1. (a) Met waut fa Trubbels mott wie foadich woaren? (b) Wuarom kaun Jehova schaftich sennen met siene true Deena? (See de Bilda aum Aunfank.)

SOO aus jie weeten, jeft daut väl Trubbels en dise Welt. Väle von junt leewe Breeda un Sestren motten met schwoare Krankheiten foadich woaren. Aundre kjemren sikj om äa elret Frintschoft, wan see selfst uk aul nich mea soo junk sent. Noch aundre motten aul sea schaufen, bloos om fa de Famielje to sorjen un nich toom sikj diere Sachen kjeepen. Un wie weeten, daut een deel von junt nich bloos eent von soone Trubbels haben, oba väl veschiedne. Daut kost sea väl Tiet un Krauft un kaun uk sea dia komen. Oba jie veloten junt doawäajen gaunz opp daut, waut Gott vesproaken haft. Jie sent junt secha, daut doa eene bätre Tiet kjemt. Jehova mott sea schaftich sennen, daut jie soonen stoakjen Gloowen haben!

2. (a) Woo kaun Jesaja 40:29 ons Moot jäwen? (b) Waut fa eenen grooten Fäla sell wie nich moaken?

² Späat sikj die daut eenjemol soo, daut du gaunz aune Enj kjemst met aule Schwierichkjeiten? Soo jeit väl aundre daut uk. De Schreft sajcht, daut Gott siene Deena ieeschtemma foaken dochten, see kunnen nich mea wieda (1. Kjen. 19:4; Hiob 7:7). Oba enne Städ daut dee oppjeewen, fruagen dee Jehova no Help.  Dee worden von Gott nich aunjeschmäat, wiels dee, “dee meed sent, jeft hee mea Krauft” (Jes. 40:29). Daut es schod, daut eenje von Gott siene Deena von de vondoagsche Tiet jleewen, see wudden bäta kjennen met äare Trubbels foadich woaren, wan see de Woarheit een Stootje ligjen leeten. Dee denkjen, Jehova to deenen es eene Laust un nich een Säajen. Dee läsen nich mea Gott sien Wuat, gonen nich no de Toopkomes un doonen uk nich mea prädjen. Soo jroz well de Soton daut haben.

3. (a) Woo kjenn wie väabieejen, daut de Soton ons nich kaun schwak moaken? (b) Waut woa wie en disen Artikjel seenen?

³ De beesa Fient weet, daut ons Gloowen stoakja woat, wan wie sea drock sent em jeisteljen. Oba hee well nich, daut wie stoakj sent. Wan du meed un mootloos best, dan trakj die nich von Jehova trigj. Komm Jehova emma noda, wiels hee woat die “opprechten . . . un stoakjen” (1. Pet. 5:10; Jak. 4:8). En disen Artikjel woa wie tweeatlei unjasieekjen, waut ons em Deenst fa Gott bräken kaun. Wie woaren uk seenen, woo biblische Gruntsauzen ons halpen kjennen, met de Trubbels foadich to woaren. Oba ieescht mol well wie seenen, wuarom wie secha sennen kjennen, daut Jehova ons stoakjen kaun, soo aus Jesaja 40:26-31 sajcht.

4. Waut lieet ons Jesaja 40:26?

⁴ Läs Jesaja 40:26. Kjeena haft bat nu kunt aul de Stierns talen, waut et jeft. Forscha denkjen, daut aul bloos en onse Galaxie, waut Voagelbon heet, bat 400 000 Millionen Stierns sent. Un aul dise Stierns haft Jehova eenen Nomen jejäft. Waut lieet ons daut? Wan Jehova aun de Stierns intressieet es, waut nich mol läwen, woo mott dee dan äwa ons denkjen? Wiels wie sent je siene Aunbäda, waut am ut Leew deenen un nich, wäajen hee ons daut soo enjejäft haft (Psa. 19:2, 4, 15). Ons leeftolja Voda kjant ons rein gaunz. De Schreft sajcht: “Soogoa june Hoa opp däm Kopp sent [von am] jetalt” (Mat. 10:30). Un de Psalmenschriewa sajcht: “De HAR es met de jerajchte äare Doag bekaunt” (Psa. 37:18). Jehova sitt werkjlich, waut fa Schwierichkjeiten du hast, un hee kaun die de Krauft jäwen, met aul dee foadich to woaren.

5. Wuarom kjenn wie ons secha sennen, daut Jehova ons Krauft jäwen kaun?

⁵ Läs Jesaja 40:28. Jehova es dee, von däm aule Krauft kjemt. Stal die väa, woo väl Krauft hee de Sonn jeft, daut dee schienen kaun. David Bodanis, waut Bieekja von de Wissenschoft schrift, sajcht: “De Krauft, waut jieda Sekund ut de Sonn rutjeit, es soo väl aus wan [dusende Millionen Atomm-]Bommen oppdäwren wudden.” Een aundra Forscha haft utjeräakjent, daut “de Krauft . . ., waut jieda Sekund ut de Sonn rutjeit, toorieekjen wudd, daut de Menschheit fa 200 000 Joa jenuach Brennstoff un ellektrischet Fia haud”. Kaun deejanja, waut de Sonn soo väl Krauft jeft, nich uk ons de needje Krauft jäwen, om met jieda Trubbel foadich to woaren?

6. Waut bediet daut, daut Jesus sien Joch nich drekjt, un waut sull daut aun ons doonen, wan wie daut weeten?

⁶ Läs Jesaja 40:29. Jehova to deenen jeft ons väl Freid. Jesus säd to siene Jinja: “Lajcht junt mien Joch opp”. Un hee säd uk: “Jie woaren Ru finjen fa june Seelen [ooda oppjefrescht woaren]. Wiels mien Joch drekjt nich, un miene Laust es leicht” (Mat. 11:28-30). Daut es werkjlich soo! Eenjemol sent wie veleicht meed, wan wie no de Toopkomes foaren ooda em Deenst gonen. Oba woo feel wie ons, wan wie trigjkomen? Feel wie ons nich oppjefrescht un haben  mea Krauft toom met onse Schwierichkjeiten foadich woaren? Jesus sien Joch drekjt werkjlich nich!

7. Vetal een Biespel, waut wiest, daut daut soo es, waut Matäus 11:28-30 sajcht.

⁷ Eene Sesta, waut wie Kayla nanen, haft eene Krankheit, wua see sikj sea meed feelt, un es narfenkrank un haft groote Kopprietinj. Doawäajen es daut fa ar eenjemol schwoa, no de Toopkomes to wanken. Eemol aus see bie een Toopkomen jewast wia, schreef see: “De Räd haundeld sikj von Mootloosichkjeit. De Brooda hilt de Räd met soo väl Leew un Metjefeel, daut mie de Tronen kjeemen. Daut holp mie wada denkjen, daut mie de Toopkomes werkjlich fälden.” See wia sea schaftich, daut see sikj aunjestrenjt haud, doa to sennen.

8-9. Waut meend de Apostel Paulus doamet, aus hee schreef: “Wan ekj schwak sie, dan sie ekj stoakj”?

⁸ Läs Jesaja 40:30. Endoont waut wie aules kjennen, wie kjennen nich aules met onse ieejne Krauft. Daut mott wie aula enseenen. De Apostel Paulus wist sikj met väl, un doch wia hee nich emstaunt, aules to doonen, waut hee wull. Hee säd to Gott, waut am toosad, oba Gott säd to am: “Miene Krauft es en schwake Menschen stoakj.” Paulus kunn daut vestonen. Doawäajen säd hee: “Wan ekj schwak sie, dan sie ekj stoakj” (2. Kor. 12:7-10). Waut meend Paulus doamet?

⁹ Paulus wort en, daut siene ieejne Krauft nich jenuach wia. Oba Gott sien heilja Jeist kunn Paulus de Krauft jäwen, dee am fäld. Soo kunn dee mau rajcht Sachen doonen, waut hee met siene ieejne Krauft kjeenmol haud kunt. Krakjt soo es daut uk met ons. Wan Jehova ons Krauft jeft, dan sent wie stoakj!

10. Woo holp Jehova David, met siene Trubbels foadich to woaren?

¹⁰ De Psalmenschriewa David beläwd foaken, woo Gott sien heilja Jeist am Krauft jeef. Hee sunk: “Met die opp miene Sied kaun ekj mie äwa een Kjrichsvolkj äwahäa moaken, un met mienen Gott kaun ekj äwa de Waunt sprinjen” (Psa. 18:30). Daut jeft Wenj, ooda Trubbels, wua wie selfst nich äwasprinjen kjennen; wie brucken Jehova siene Help.

11. Laj daut ut, woo de heilja Jeist ons halpt, wan wie Trubbels haben.

¹¹ Läs Jesaja 40:31. Daut de Odlasch lang enne Loft romflieejen kjennen, es nich bloos ut äare ieejne Krauft. Dee loten sikj von de woame Loft, waut no bowen sticht, no Hecht schuwen un soo kjennen dee äare ieejne Krauft spoaren. Wan du en eene schwieeje Loag best, dan denkj aun de Odlasch. Pracha Jehova, daut hee die soo to sajen no Hecht schift derch dän Helpa, dän heiljen Jeist (Joh. 14:26, NW). Wie kjennen Jehova to aulentiet no sienen heiljen Jeist froagen, wan ons daut fält. Un veleicht bruck wie besonda Jehova siene Help, wan wie ons met wäm von de Vesaumlunk oneenich sent. Oba wuarom jeft daut eenjemol Oneenichkjeit?

12-13. (a) Wuarom jeft daut eenjemol Oneenichkjeit tweschen Christen? (b) Waut lieet ons de Jeschicht von Josef äwa Jehova?

¹² Oneenichkjeiten komen doaderch, wäajen wie aula onvolkomen sent. Doawäajen oaja wie ons eenjemol äwa daut, waut onse Gloowesbreeda sajen ooda doonen. Ooda dee oajren sikj äwa ons. Soont kaun sea schwoa sennen. Oba soo aus bie aundre Priefungen kjenn wie uk en dise Loag bewiesen, daut wie Jehova tru sent. Woo kjenn wie daut? Doaderch, daut wie lieren, en Eenichkjeit met onse Gloowesbreeda tooptoschaufen, wiels Jehova leeft dee, wan dee uk onvolkomen sent.

¹³ Jehova lat daut too, daut siene Deena aufjeprooft woaren. Daut wiest de  Jeschicht von Josef. Aus hee noch junk wia, wort hee von siene aufjenstje Haulfbreeda aus Sklow vekoft un no Ägipten jebrocht (1. Mo. 37:28). Jehova sach, waut met am wort, un secha muak am daut truarich, waut se met sienen Frint Josef deeden. Oba hee deed doa nuscht jäajen. Lota wort Josef beschulcht, daut hee met Potifar siene Fru haud wult Schaund driewen, un wort dan enjestopt. Un Jehova leet daut uk too. Oba leet Gott Josef em Stäakj? Nä. Jehova “jeef am Erfolch en aules waut hee deed” (1. Mo. 39:21-23).

14. En waut fa Stekjen es ons daut toom gooden, wan wie ons nich enoajren loten?

¹⁴ Räd wie noch von een aundret Biespel. Nich leicht wäm haben se soo schlajcht behaundelt aus David. Oba dis Frint von Gott leet sikj doawäajen nich vebetren. Hee schreef: “Siet nich bossich un woat nich doll; oajat junt nich, wiels daut moakt dän Schoden bloos jrata” (Psa. 37:8). De jratste Uasoak, wuarom wie ons nich sellen oajren, es, wiels wie Jehova nodoonen wellen. “Hee haundelt met ons nich doano aus onse Sinden vedeent haben” (Psa. 103:10). Un daut es ons uk sest noch toom gooden, wan wie ons nich enoajren loten. Wan eena emma wuttich es, dan kaun eena biejlikj huagen Blootdruck kjrieen ooda Trubbel met odmen. Daut kaun uk de Läwa, de Pluz, de Moag ooda de Doarm schoden. Wan wie wuttich sent, dan kjenn wie uk nich emma kloa denkjen. Un wan eena siene Wutt rutlat, dan kaun eena sikj eenjemol noch lang truarich feelen doaräwa. Oba de Schreft sajcht: “Een frädeljet Hoat jeft dän Kjarpa Läwen” (Spr. 14:30). Waut kjenn wie doonen, wan aundre ons beleidicht haben? Woo kjenn wie ons wada eenich sennen met onse Breeda? Wan wie ons no dän gooden Rot von de Schreft rechten.

15-16. Waut sell wie doonen, wan ons wäa beleidicht haft?

¹⁵ Läs Efeesa 4:26. Daut es nuscht waut butajeweeneljet, wan Menschen von de Welt ons schlajcht behaundlen. Oba wan een Gloowesbrooda ooda wäa von onse Famielje waut sajcht ooda deit, waut ons sea velazt, dan feel wie ons veleicht gaunz doljeschloagen. Waut, wan wie doa nich von vejäten kjennen? Bliew wie dan joarenlank doll? Ooda recht wie ons no dän gooden Rot von de Schreft un proowen daut schwind äwareen to moaken? Je lenja wie doamet wachten, je schwanda woat daut sennen, met onsen Brooda Fräd to moaken.

¹⁶ Saj wie mol, een Brooda haft die beleidicht un du kaust doa nich von vejäten. Woo kaust du wada Fräd moaken met dän?  Daut ieeschte wudd sennen, iernstlich bäden. Froag Jehova doano, daut du fein met dän Brooda räden kaust. Denkj doaraun, daut dee uk eent von Jehova siene Frind es un daut hee dän leeft (Psa. 25:14). Jehova jeit leeftolich met siene Frind om, un hee well uk, daut wie daut doonen (Spr. 15:23; Mat. 7:12; Kol. 4:6). Äwalaj die goot, waut du to dän sajen west. Denkj nich, daut dien Brooda die met Fliet wee jedonen haft; secha wull dee daut nich soo. Un vejät nich, daut du veleicht uk kust een bät Schult doaraun haben, daut de Sach oppkjeem. Du wurscht to dän Brooda kjennen sajen: “Veleicht sie ekj too neiw, oba aus du daut jistren to mie sätst, dan feeld ekj mie soo . . .” Wan daut toom ieeschte Mol nich schauft, dan see, aus du opp eene aundre Jeläajenheit kaust Fräd moaken. Äwadäm doo fa dän Brooda bäden un froag Jehova, daut dee dän säajnen mucht un daut du no dän siene goode Sieden kjikjen kaust. Krakjt endoont woo de Sach nu utkjemt, du kaust die secha sennen, daut Jehova sikj äwa die freit, wiels du dien Poat jedonen hast toom met dienen Brooda Fräd moaken, dee je Gott sien Frint es.

17. (a) Wuaderch halpt Jehova ons, daut wada en Ordninj to brinjen, wan wie eene Sind begonen haben? (b) Wuarom sull wie de Help aunnämen?

¹⁷ Eenje feelen sikj daut nich wieet, Jehova to deenen, wäajen dee eene schwoare Sind begonen haben. Sikj schuldich feelen kaun eenem sea toosaten. De Kjennich David haud daut beläft un hee säd: “Aus ekj miene Sind stelhoolen wull, ständ ekj dän dachäwa doarunja, daut ekj schia omkjeem.” Daut goode wia, daut David jeistlich wia un met dise Sach rajcht omjinkj. Hee schreef: “Dan bekjand ekj die miene Sind . . . un dan vejeefst du mie miene Sindenschult” (Psa. 32:3-5). Wan du schwoa jesindicht hast, dan well Jehova die halpen, daut wada en Ordninj to brinjen. Oba du motst de Help aunnämen, waut hee derch de Vesaumlunk jeft (Spr. 24:16; Jak. 5:13-15). Siem nich! Dien eewjet Läwen henjt doavon auf! Oba waut, wan du eene Sind aul lang äwareen jemoakt hast un die oba noch emma met een schlajchtet Jewessen romdrajchst?

18. Woo kaun Paulus sien Biespel deejanje halpen, waut sikj daut nich wieet feelen, Jehova to deenen?

¹⁸ Secha feeld de Apostel Paulus sikj eenjemol schlajcht äwa de Fäla, waut hee ieeschtemma jedonen haud. Hee säd je: “Ekj sie de jerinjsta von de Apostel un sie daut nich wieet, een Apostel jenant to woaren, wiels ekj Gott siene Jemeent vefolcht hab.” Oba Paulus säd uk: “Derch Gott siene Jnod sie ekj, waut ekj sie” (1. Kor. 15:9-10). Jehova neem Paulus soo aun, aus hee wia, un hee wull uk, daut Paulus daut wist. Wan die diene Sinden opp iernst leet sent un du Jehova dee bekjanst un uk de Eltestasch, wan daut needich es, dan kaust du die secha sennen, daut Jehova die togoodhoolen woat. Velot die doaropp un nemm de Vejäwunk aun! (Jes. 55:6-7).

19. Waut es de Varsch fa daut Joa 2018, un wuarom es daut paussent?

¹⁹ Je noda wie no daut Enj von dise Welt komen, je mea Trubbels kjennen doa oppkomen. Oba wie kjennen ons secha sennen, daut Jehova ons aules jäwen woat, waut wie brucken toom am wieda tru deenen, wiels hee “moakt de schwake stoakj, un dee, dee meed sent, jeft hee mea Krauft” (Jes. 40:29; Psa. 55:23; 68:20). Aun dit kjenn wie aune 2018 jiedatsmol denkjen, wan wie bie een Toopkomen em Vesaumlungshus sent un dän Varsch fa daut Joa seenen. Dee sajcht: Dee, waut sikj opp Jehova veloten, kjrieen fresche Krauft (Jes. 40:31).