1. Waut säd Jesus to siene Jinja, wanea daut Enj komen wudd, un waut vonne Woarnunk jeef hee dee?

 EEN poa Doag ea Jesus storf, fruagen vea von siene Jinja am, “waut daut Tieekjen sennen woat, . . daut dise Welt to Enj kjemt” (Mat. 24:3, NW). Dise Jinja haben secha jewundat, woo see daut weeten kunnen, wanea Jerusalem un de Tempel wudden venicht woaren. Jesus beauntwuat nich bloos dise Froag von Jerusalem un dän Tempel, oba hee räd uk doavon, “daut dise Welt to Enj kjemt”, en woone wie nu läwen. Aus hee von dee Tiet räd, säd hee: “Dän Dach ooda de Stund wanea daut passieren woat, weet kjeena, nich emol de Enjel em Himmel, uk nich de Sän. Daut weet bloos de Voda.” Dan woarnd hee siene Jinja, daut see sullen väasechtich sennen un woaken (Mar. 13:32-37).

2. Wuarom wia daut fa de ieeschte Christen soo wichtich, väasechtich un waka to bliewen?

² Dee Juden, waut Christen wieren, musten väasechtich sennen un waka bliewen, wiels äa Läwen honk doavon auf. Jesus säd to siene Nofolja, woo see daut enwoaren wudden, wanea Jerusalem un de Tempel wudden venicht woaren. Hee säd: “Wan jie Jerusalem woaren von Armeeen beloagat seenen, dan sell jie weeten, daut daut boolt woat en de Grunt jebrocht woaren.” Dan wia de Tiet, no Jesus to horchen un “en de Boaj nenn [to] flichten” (Luk. 21:20-21). Dee, waut daut nokjeemen, äwaläwden, aus de Reema Jerusalem venichten deeden.

3. Waut woa wie en disen Artikjel lieren?

 ³ Vondoag dän Dach läw wie en dee Tiet, wua daut met dise schlajchte Welt to Enj jeit. Wie motten uk derchjedocht un waka bliewen. En disen Artikjel woa wie lieren, woo wie kjennen utjejlikjt sennen, wan wie uk dietlich beoobachten kjennen, waut enne Welt passieet, woo wie no ons selfst oppaussen kjennen un woo wie de Tiet, waut ons noch blift, daut baste utnutzen kjennen.

4. Wuarom sent wie nieschierich, woo sikj de biblische Profezeiungen doaderch erfellen, waut enne Welt passieet?

⁴ Wie haben goode Uasoak, nieschierich to sennen, waut nu enne Welt passieet un woo sikj doaderch de biblische Profezeiungen erfellen. Jesus säd biejlikj krakjt, waut doa passieren wudd, om daut wie weeten kunnen, wanea daut met dise Welt to Enj kjemt (Mat. 24:3-14). Un uk de Apostel Petrus rot ons too, doano to kjikjen, woo de biblische Profezeiungen sikj erfellen, daut wie doaderch em Gloowen stoakj bliewen kjennen (2. Pet. 1:19-21). Un daut latste Buak enne Bibel fangt mau rajcht met dise Wieed aun: “Dit es de Openboarunk dee Gott Jesus Christus jeef, siene Deena to wiesen, waut em korten passieren must” (Opb. 1:1). Wie sent sea nieschierich, waut nu enne Welt passieet, wäajen wie wellen weeten, woo sikj de biblische Profezeiungen doaderch erfellen un wie wellen uk jieren met aundre toop doaräwa räden.

5. Waut sell wie doonen, un waut sell wie nich doonen? (See uk de Bilda.)

⁵ Wan wie äwa de biblische Profezeiungen räden, dan well wie nich roden, waut doahinja komen woat. Wuarom nich? Wiels wie wellen nuscht sajen, waut de Eenichkjeit enne Vesaumlunk schoden kunn. Veleicht hia wie de Väaschte vonne Welt sajen, daut see en jewesse Stekjen fa Fräd un Sechaheit sorjen kjennen. Oba enne Städ to roden, waut de Profezeiunk en 1. Tessalonicha 5:3 doamet to doonen haft, well wie leewa doano kjikjen, woo daut en onse latste Bieekja un Videos utjelajcht wort. Wan wie ons unjarenaunda vetalen un ons opp daut stetten, waut Jehova siene Organisazion sajcht, halp wie de Vesaumlunk, “eene Meenunk [to] haben” (1. Kor. 1:10; 4:6).

6. Waut lia wie von 2. Petrus 3:11-13?

⁶ Läs 2. Petrus 3:11-13. De Apostel Petrus halpt ons, utjejlikjt to bliewen, wan wie ons biblische Profezeiungen unjastonen. Hee rot ons too, “doano [to] luaren, daut Gott sien Dach komen mucht”. Wuarom? Nich wäajen wie dän “Dach ooda dee Stund” weeten wellen, wanea Jehova Harmagedon komen loten woat, oba wäajen wie onse Tiet brucken wellen, om “heilich un fromm to läwen” (Mat. 24:36; Luk. 12:40). Aundasch jesajcht, wie wellen rajcht läwen un aules, waut wie doonen, saul wiesen, daut wie Jehova leewen. Om daut wie daut kjennen, mott wie no ons selfst oppaussen.

7. Woo kjenn wie wiesen, daut wie no ons selfst oppaussen? (Lukas 21:34).

⁷ Jesus säd to siene Jinja, daut dee nich bloos sullen oppaussen, waut enne Welt passieet, oba uk no sikj selfst. Dit muak hee gaunz dietlich en Lukas, aus hee de Woarnunk jeef: “Paust no junt selfst opp” (läs Lukas 21:34, NW). Eena, waut no sikj selfst oppaust, woat krakjt en, waut am von Jehova aufbrinjen kaun un prooft, daut utem Stich to gonen. Opp dise Wajch kaun  dee en Gott siene Leew bliewen (Spr. 22:3; Jud. 20-21).

8. Waut säd de Apostel Paulus to de Christen?

⁸ De Apostel Paulus säd, daut Christen no sikj selfst oppaussen sullen. Hee säd biejlikj to de Christen en Efesus: “Siet väasechtich, daut jie derch dit Läwen gonen aus kluake Menschen un nich aus soone, dee nich weeten, waut to de Sach jehieet” (Efs. 5:15-16). De Soton prooft ons dän Tiet äwa, von Jehova auftobrinjen. Doawäajen rot de Schreft ons too, wieda uttofinjen, “waut de Har von [ons] . . . velangt”, soo daut wie ons fa dän Soton siene Faulen beschitzen kjennen (Efs. 5:17).

9. Woo weet wie, waut Jehova sien Wellen es?

⁹ De Bibel sajcht ons nich aules, waut eene Jefoa sennen kaun, von Jehova auftokomen. Foaken mott wie soone Entscheidungen moaken, wua daut enne Bibel nich krakjt een Jesaz väa jeft. Daut wie dan weise Entscheidungen moaken kjennen, mott wie derchjedocht sennen un weeten, “waut de Har von [ons] . . . velangt”. Daut kjenn wie, wan wie räajelmässich Gott sien Wuat studieren un doaräwa nodenkjen. Je bäta wie vestonen, waut Jehova von ons haben well un proowen, “Christus . . . siene Jesennunk” to haben, je bäta woa wie weeten, woo wie “aus kluake Menschen” derch daut Läwen gonen kjennen, wan daut uk nich fa aules eene Räajel jeft (1. Kor. 2:14-16). Eenje Jefoaren sent gaunz leicht to seenen, aundre sent wada ernoa vestoaken.

10. Waut sent eenje Jefoaren, fa dee wie oppaussen motten?

¹⁰ Eenje Jefoaren, fa dee wie oppaussen motten, sent biejlikj no wäm schmeichlen, too väl drinkjen, väl too väl äten un aundre met onse Wieed velazen. Oba daut sent uk soone Sachen aus Tietvedrief haben, wua Jewault met en es, schwiensche Bilda ooda Videos kjikjen ooda soo waut (Psa. 101:3). De Beesa Fient prooft emma, irjenteene Jeläajenheit to sieekjen, woo hee ons von Jehova aufbrinjen kaun (1. Pet. 5:8). Wan wie nich oppaussen, dan kaun de Soton en ons Ieejenschoften plaunten soo aus Aufgonst, onopprechtich sennen, jiezich sennen, Hauss, stolt sennen ooda Wutt (Gal. 5:19-21). Dise Jefeelen woaren aum Aunfank veleicht nich sea stoakj sennen, un du denkjst veleicht, daut et fa die kjeene Jefoa es. Oba wan du dee nich fuaz utroden deist, dan woaren dee en die wieda waussen, krakjt soo aus eene jeftje Stud, un dee woaren die een deel Trubbel moaken (Jak. 1:14-15).

11. Waut es eene Jefoa, waut nich sea leicht to seenen es, un wuarom mott wie doafäa soo sea oppaussen?

¹¹ Eene Jefoa, waut nich sea leicht to seenen es, es schlajchte Jesalschoft. Stal die mol väa, du schaufst oppe Oabeit met wäm toop, waut nich eent von Jehova siene Zeijen es. Du west haben, dien Oabeitspoatna saul goot denkjen von Jehova siene Zeijen. Doawäajen best du frintlich un halpst dän wellich. Veleicht deist du uk bieaun met dän toop Meddach äten. Daut dieet nich lang un du deist daut foaken. Eenjemol blift de Vetal nich gaunz rein, oba du proofst, daut eefach tosied to schuwen. Met de Tiet woascht du soone Vetal dolla jewant un die stieet daut nich mea sea. Dan eenen Dach frajcht dien Oabeitspoatna, aus du no de Oabeit noch west met am toop waut drinkjen, un du deist daut. Irjentwanea fangst du aun, soo to denkjen aus dien Oabeitspoatna. Wan daut aul soo wiet jekomen es, woo lang woat daut dan noch dieren, bat du uk aunfangst, soone Sachen to doonen aus dee? Wan wie uk to aulem frintlich sent un aulem respakjten, mott wie oba doaraun  denkjen, daut de Menschen, met dee wie toop sent, waut aun ons doonen (1. Kor. 15:33). Wan wie no ons selfst oppaussen, krakjt soo aus Jesus ons säd, dan woa wie nich onneedich väl met soone Menschen toop sennen, waut nich daut doonen, waut Jehova haben well (2. Kor. 6:15). Wie woaren dise Jefoa dan kloa seenen kjennen un dee vemeiden.

12. Waut sullen Jesus siene Jinja en dee Tiet doonen, wan dee no daut Enj luaden?

¹² Jesus wull, daut siene Jinja sikj drock hilden en dee Tiet, wan see no daut Enj luaden. Doawäajen jeef Jesus an Oabeit opp. Hee säd, see sullen de goode Norecht “en Jerusalem, en gaunz Judäa, en Samaria, un äwa de gaunze Welt” prädjen (Apj. 1:6-8). Daut wia een deel Oabeit, waut see doa kjrieejen! See nuzten äare Tiet daut baste ut, wäajen see aules deeden, waut see kunnen, om aundre to prädjen.

13. Wuarom mott wie onse Tiet daut baste utnutzen? (Kolossa 4:5).

¹³ Läs Kolossa 4:5. Daut wie no ons selfst oppaussen kjennen, mott wie goot doaräwa nodenkjen, woo wie onse Tiet brucken. Ons aula kaun onverhofs mol waut passieren, wiels “Tiet un Jlekj spälen emma eene Roll” (Liera 9:11). Ons Läwen kaun haustich to Enj sennen.

14-15. Woo kjenn wie onse Tiet daut baste utnutzen? (Hebräa 6:11-12) (See uk daut Bilt.)

 ¹⁴ Wie kjennen onse Tiet daut baste utnutzen, wan wie daut doonen, waut Jehova von ons haben well un emma jratre Frind met am woaren (Joh. 14:21). Wie motten dän Rot nokomen, waut doa sajcht: “Stot faust, lot junt nich omschmieten, nämt emma too en june Oabeit fa dän Harn” (1. Kor. 15:58). Wan daut Enj dan kjemt – aus daut nu daut Enj von ons Läwen ooda daut Enj von dise schlajchte Welt es – woa wie nuscht beschoden (Mat. 24:13; Reem. 14:8).

¹⁵ Jesus leit bie dise Tiet siene Nofolja uk noch aun, wan dee Gott sien Kjennichrikj äwa de gaunze Ieed prädjen. Hee haft sien Poat aul jedonen: derch Jehova siene Organisazion lieet Jesus ons, woo wie prädjen kjennen, un hee jeft ons uk daut needje Jereetschoft, daut wie de goode Norecht vekjindjen kjennen (Mat. 28:18-20). Wie kjennen ons Poat doonen, wan wie flietich prädjen un lieren un dän Tiet äwa waka bliewen, soo lang bat Jehova met dise schlajchte Welt een Enj moakt. Wan wie dän Rot ut Hebräa 6:11-12 nokomen, dan woa wie “bat aum Enj” aun onse Hopninj fausthoolen kjennen (läs).

16. Waut sent wie ons gaunz eenich to doonen?

¹⁶ Jehova weet krakjt, waut von Dach un waut vonne Stund hee met dän Soton siene Welt een Enj moaken woat. Wan dis Dach ieescht kjemt, dan woat Jehova aule Profezeiungen erfellen, waut hee en sien Wuat haft oppschriewen loten. Bat daut soo wiet es, lat daut veleicht eenjemol soo, daut daut Weltenj nich enne Tiet komen woat. Oba Jehova sien Dach “woat nich too lot komen!” (Hab. 2:3, NW). Doawäajen kjenn wie ons gaunz eenich sennen, daut wie wieda no Jehova kjikjen un wiesen, daut wie “no Gott luaren, dee [ons] . . . rat” (Micha 7:7).