1-2. Wanea roa wie veleicht?

 WIE aula haben mol jeroat. Wan wie waut beläwen, waut ons sea schaftich moakt, dan roa wie fa Freid. Veleicht road wie, aus doa waut Besondret ooda Wichtjet passieed, biejlikj aus een Bäbe jebuaren wort ooda aus wie ons aun waut Scheenet besennen deeden ooda aus wie wada eenen gooden Frint sagen, waut wie aul fa Joaren nich jeseenen hauden.

² Oba mieeschtens roa wie, wan wie truarich sent un lieden motten. Veleicht roa wie, wan ons wäa sea enteischt haft. Wie roaren veleicht uk, wan wie wäajen eene aunhoolende Krankheit lieden motten ooda wan een leewa Mensch jestorwen es. En soone Tieden feel wie ons veleicht soo aus de Profeet Jeremia, aus de Babelonia Jerusalem venicht hauden. Jeremia säd: “Miene Tronen ranen en eenen Stroom, … miene Tronen ranen un kjennen nich opphieren, doa es kjeen nojäwen” (Klg. 3:48-49).

3. Woo feelt Jehowa sikj, wan hee siene Deena sitt lieden? (2. Mose 3:7).

³ Jehowa weet krakjt, woo foaken wie roaren motten wäajen schwoare Tieden. De Bibel sajcht, daut hee krakjt weet, woo foaken jieda eena von siene Deena lieden mott, un hee horcht no ons, wan wie am om Help prachren (Psa. 34:16). Oba Jehowa deit noch mea, aus bloos no ons kjikjen un ons toohorchen. Krakjt soo aus een leeftolja Voda es am daut schwoa, wan hee sitt, daut siene Kjinja roaren, un hee well dee jieren halpen (läs 2. Mose 3:7).

4. Woone Biespels woa wie ons nu unjastonen, un wuarom?

 ⁴ En sien Wuat lat Jehowa ons weeten, woo hee siene Deena ieeschtemma jeholpen haft, wan dee roaren musten. Daut kjenn wie biejlikj aun Hana, David un dän Kjennich Hiskia seenen. Wuarom musten dee roaren? Woo deed Jehowa dee auntwuaten, aus dee am om Help prachaden? Woo kaun dee äa Biespel ons Moot jäwen, wan wie truarich sent, enteischt woaren ooda ons onen Hopninj feelen?

WAN WIE TRUAREN MOTTEN

5. En waut vonne Loag wia Hana, un woo feeld see sikj?

⁵ Hana haud veschiedne Trubbels, waut ar toom Roaren brochten. Biejlikj haud Hana äa Maun noch eene aundre Fru. Dise Fru heet Peninna, un dee haust Hana. Bowenenn kunn Hana nich Kjinja haben, oba Peninna haud miere Kjinja (1. Sam. 1:1-2). Peninna vespott Hana emma wada, wäajen see nich kunn Kjinja haben. Woo wurscht du die en soone Loag jefeelt haben? Hana “wia sea jeschloagen”, un daut brocht ar bat doa, daut see “nich äten kunn un eefach hielen must” (1. Sam. 1:6-7, 10).

6. Waut deed Hana, om Troost to kjrieen?

⁶ Woo wort Hana jetreest? Eenatlei, waut ar holp, wia, daut see no daut Aunbädungszelt jinkj. Doa, veleicht dicht bie dän Engank no dän Hoff von daut Aunbädungszelt, bäd see dän “HARN aun unja betre Tronen.” See prachad Jehowa: “Wan du werkjlich mien Älent aunseenen wurscht un fa mie, diene Deenarin, enstonen wurscht” (1. Sam. 1:10-11). Hana schedd sikj gaunz ut to Jehowa. Am mott daut sennen schwoa jewast, aus hee sach, daut siene leewe Dochta roaren must!

7. Woo holp Hana daut, sikj bie Jehowa uttoschedden?

⁷ Nodäm daut Hana sikj em Jebäd utjeschett haud, vesechad de Huaga Priesta Eli ar, daut Jehowa äa Jebäd beauntwuaten wudd. Woo feeld Hana sikj dan? De Bibel sajcht: “See jinkj trigj un eet, un wia nich mea soo truarich” (1. Sam. 1:17-18). Wan Hana äare schwoare Loag sikj uk noch nich jeendat haud, wia ar daut oba leichta. Wuarom? Wäajen see Jehowa äa Schwoaret un äare Sorjen äwajäft haud. Hee sach, woo schwoa ar daut wia, hieed ar roaren un säajend ar lota, doaderch daut hee ar leet Kjinja haben (1. Sam. 1:19-20; 2:21).

8-9. Wuarom sell wie no Hebräa 10:24-25 no aules doonen, waut wie kjennen, om bie de Toopkomes to sennen? (See uk daut Bilt.)

⁸ De Lia fa ons. Hast du nu jroz met eene schwoare Loag to kjamfen, waut die toom Roaren brinjt? Veleicht motst du truaren, wäajen doa eena von diene Famielje ooda een gooda Frint jestorwen es. En soone  Tieden well eena bloos auleen sennen; un dauts uk jeweenlich. Oba krakjt soo aus Hana Troost un Moot kjrieech, wäajen see nom Aunbädungszelt jinkj, krakjt soo kaust du uk Troost kjrieen, wan du no de Toopkomes wankst – mau rajcht wan die daut dan jroz uk nich scheen jeit (läs Hebräa 10:24-25). Bie de Toopkomes woaren Bibelvarzhen jeläst, waut ons Moot jäwen. Doaderch kaun Jehowa ons halpen, daut wie nich wieda äwa Sachen nodenkjen, waut ons truarich moaken. Dit kaun ons halpen, daut et nich too oajch woat, besonda wan onse Loag nich fuaz bäta woat.

⁹ Bie de Toopkomes spräakjen onse Gloowesbreeda ons Moot too un wiesen ons, woo sea dee ons leewen, un doaderch feel wie ons bäta (1. Tes. 5:11, 14). See wie mol de Erfoarunk von eenen Sondapionia, dän siene Fru storf. Hee sajcht: “Eenjemol mott ekj auleen sennen un bloos roaren. Oba onse Toopkomes haben mie werkjlich väl Moot jejäft. De Breeda un Sestren äare scheene Wieed treesten mie sea. Endoont woo schwoa mie daut es ooda waut vonne groote Sorjen ekj hab, ea ekj no een Toopkomen foa, feel ekj mie oba bäta, wan ekj ieescht doa sie.” Wan wie bie onse Toopkomes sent, kaun Jehowa ons derch onse Gloowesbreeda halpen.

10. Woo kjenn wie Hana nodoonen, wan wie truaren motten?

¹⁰ Hana kjrieech uk Moot, doaderch daut see sikj em Jebäd bie Jehowa utschedd. Du kaust uk “aul … [diene] Sorjen” opp Jehowa schmieten un die secha sennen, daut hee no die horchen woat (1. Pet. 5:7). Eene Sesta, dee äa Maun von Stäla omjebrocht wort, vetald: “Mie späad sikj soo, daut mien Hoat to fiene Bieta vebroaken wia, waut nich jinkj to heelen. Oba ekj kjrieech doaderch Troost, daut ekj to mienen leeftoljen, himlischen Voda bäd. Eenjemol haud ekj nich de rajchte Wieed, oba hee kunn mie doawäajen vestonen. Wan ekj gaunz dol wia, bäd ekj doarom, daut hee mie halpen sull, ruich to woaren. Un ekj kunn fuaz späaren, daut ekj ruja wort, un doaderch kunn ekj wiedamoaken.” Jehowa kaun die krakjt vestonen, wan du roascht un am aul diene Sorjen vetalst, un am es daut uk schwoa. Mau rajcht wan dien Trubbel uk nich wajchjeit, kaun Jehowa die oba treesten un halpen, ruja to woaren (Psa. 94:19, NW; Filip. 4:6-7). Un hee woat die doafäa beloonen, daut du tru utheltst (Heb. 11:6).

WAN ONS WÄA ENTEISCHT

11. Woo feeld David sikj, aus aundre am schlajcht behaundelden?

¹¹ David jinkj en sien Läwen derch väl schwoare Loagen, waut am batem Roaren brochten. Väl Menschen kunnen am nich lieden. Mau rajcht soone, opp dee hee vetrud, deeden am enteischen (1. Sam. 19:10-11; 2. Sam. 15:10-14, 30). Opp eene Sauz schreef hee: “Ekj sie von mien stänen meed un utjespält. Ekj hiel aule Nacht soo väl, daut miene Baden naut woaren; mien Kjessen es met Tronen” derchjesuppt. Wuarom feeld David sikj soo? Hee säd: “Wiels ekj soo väl Fiend hab” (Psa. 6:7-8). David deed daut soo wee, daut aundre am schlajcht behaundelden, daut hee nich opphieren kunn met roaren.

12. Äwa waut wia David sikj no Psalm 56:9 no secha?

¹² Wan David uk väl Schwoaret beläwd, wia hee sikj oba secha, daut Jehowa am leewd. Hee schreef: “De HAR haft … [mie] hieet hielen” (Psa. 6:9). Opp eene aundre Sauz schreef hee de scheene Wieed, waut wie en Psalm 56:9 finjen (läs). Dise  Wieed wiesen ons kloa, daut Jehowa om ons todoonen es. David säd, daut et soo wia, aus wan Jehowa siene Tronen en een Kruckje saumeld ooda en een Buak oppschreef. David wia sikj secha, daut Jehowa sien Lieden sach un daut em Denkj hilt. David wia sikj uk secha, daut sien leeftolja, himlischa Voda daut nich bloos sach, waut hee derchjinkj, oba uk wist, woo am daut toosad.

13. Waut kaun die Troost jäwen, wan aundre die enteischen? (See uk daut Bilt.)

¹³ De Lia fa ons. Hast du een jebroaknet Hoat, wäajen die wäa aunjeschmäat ooda enteischt haft, dän du vetrudsd? Veleicht jeit die daut schlajcht, wäajen dien Jung ooda diene Mejal die aufjesajcht haft ooda dien Ehepoatna die veloten haft. Ooda doa haft wäa oppjehieet, Jehowa to deenen, dän du väl räakjenst. Een Brooda, dän siene Fru de Ehe bruak un am veleet, sajcht: “Ekj kunn daut nich jleewen. Ekj feeld mie to nuscht to brucken, truarich un doll.” Wan die wäa aunjeschmäat ooda enteischt haft, dan kaun die daut Troost jäwen, doaraun to denkjen, daut Jehowa die kjeenmol veloten woat. De Brooda sajcht: “Ekj sie enjeworden, daut de Menschen nich emma woaren tru sennen, oba opp Jehowa kjenn wie ons emma veloten. Krakjt endoont waut doa passieet, Jehowa woat ons emma halpen. Hee woat siene true Deena nich em Stäakj loten” (Psa. 37:28). Denkj uk doaraun, daut Jehowa die väl dolla leeft aus irjenteen Mensch. Wan daut uk sea weedeit, wan ons wäa enteischt, kaust du die oba secha sennen, daut et nuscht doaraun deit, woo sea Jehowa om die bekjemmat es (Reem. 8:38-39). Hool dit em Denkj: Krakjt endoont woo een Mensch die behaundelt, dien himlischa Voda leeft die.

14. Waut vesprakjt Psalm 34:19 ons?

¹⁴ Wan die wäa enteischt haft, dan kjennen die de Wieed en Psalm 34:19 Troost jäwen (läs). Een Buak toom nosieekjen sajcht, daut soone, “dee een bedrekjten Jeist haben”, kjennen soone sennen, waut nuscht Goodet to hopen haben. Woo halpt Jehowa soone, waut sikj soo feelen, wäajen dee enteischt worden? Daut sajcht: “De HAR es aul dee no aun”. Hee es soo aus een leeftolja Voda, dee sien Kjint oppe Oarms helt un treest, wan daut roat. Krakjt soo feelt Jehowa met ons met un halpt ons fuaz, wan wie lieden motten, wäajen ons wäa enteischt ooda veloten haft. Hee well ons jieren treesten un berujen, wan ons Hoat jebroaken es ooda wan wie jleewen, daut et nuscht met ons es. Hee jeft ons uk väl goode Sachen, wua wie ons too  freien kjennen un waut ons halpen, daut Schwoare uttohoolen, waut wie jroz derchgonen (Jes. 65:17).

WAN WIE ONS ONEN HOPNINJ FEELEN

15. En waut vonne Loag wia Hiskia, daut hee sea roaren must?

¹⁵ Aus de Kjennich Hiskia von Juda 39 Joa wia, wort hee en, daut hee eene schlemme Krankheit haud. Jehowa schekjt dän Profeet Jesaja no am met de Norecht, daut hee aun dise Krankheit stoawen wudd (2. Kjen. 20:1). Daut späad sikj soo, daut et kjeene Hopninj fa Hiskia jeef. Aus Hiskia dit hieed, wia hee soo truarich, daut hee sea road un hee bäd von gaunzen Hoaten to Jehowa (2. Kjen. 20:2-3).

16. Woo beauntwuad Jehowa Hiskia sien Jebäd?

¹⁶ Aus Jehowa hieed, woo sea Hiskia bäd un road, kjrieech hee Metjefeel un säd to am: “Ekj hab dien Jebäd jehieet un diene Tronen jeseenen. Horch, ekj woa die jesunt moaken.” Derch Jesaja leet Jehowa am weeten, daut hee am ut Metleet sien Läwen aunlenjen wudd un Jerusalem von de Assiera beschitzen wudd (2. Kjen. 20:4-6).

17. Woo stoakjt Jehowa ons, wan wie eene schlemme Krankheit haben? (Psalm 41:4). (See uk daut Bilt.)

¹⁷ De Lia fa ons. Hast du eene Krankheit, waut soo lat, daut et doafäa nich Hopninj jeft? Dan bäd to Jehowa, wan du uk roaren motst. De Bibel vesprakjt, daut “de Voda, waut voll Metjefeel es, un de Gott, waut emma treesten deit”, ons en jieda Proow treesten woat (2. Kor. 1:3-4). Wie kjennen nich velangen, daut Jehowa ons onse Trubbels vondoag dän Dach wajchnemt, oba wie kjennen doamet räakjnen, daut hee ons stoakjen woat (läs Psalm 41:4). Derch sienen heiljen Jeist jeft Jehowa ons Krauft, Weisheit un ennalichen Fräd, daut wie doamet foadich woaren kjennen (Spr. 18:14, NW; Filip. 4:13). Hee treest ons uk doaderch, daut wie de Hopninj haben fa lota, wua kjeena mea woat krank sennen (Jes. 33:24).

18. Waut von Bibelvarsch hast du, waut die treest, wan du en eene schwoare Loag best? (See daut Hock “ Bibelvarzhen, waut ons treesten, wan wie roaren motten”.)

¹⁸ Krakjt soo aus Hiskia derch Jehowa siene Wieed jetreest wort, krakjt soo woa wie derch Gott sien Wuat jetreest. Jehowa haft loten soone Wieed oppschriewen, waut ons berujen un treesten, wan wie en schwoare Loagen sent (Reem. 15:4). Aus eene Sesta en Wast Afrika enwort, daut see Kjräft haud, road see foaken. See sajcht: “Een Bibelvarsch, waut mie besonda treest, wia Jesaja 26:3. Wan wie foaken uk nuscht doonen kjennen, daut sikj de Loag endat, vesechad dis  Varsch mie oba, daut Jehowa ons ennalichen Fräd jäwen kaun un halpen kaun, de Loag uttohoolen.” Jeft daut eenen Bibelvarsch, waut die besonda väl Troost jeft, wan du en eene sea schwoare Loag best, waut veleicht hopninjsloos lat?

19. To waut kjenn wie ons aul freien?

¹⁹ Wie läwen gaunz aum Enj von de latste Doag un daut woat bloos noch mea Lieden jäwen, waut ons batem Roaren brinjen. Oba soo aus wie aun de Biespels von Hana, David un dän Kjennich Hiskia jeseenen haben, sitt Jehowa daut, wan wie roaren, un am moakt daut schwoa. Hee woat onse Tronen nich vejäten. Wan wie en schwoare Loagen sent, dan kjenn wie ons gaunzet Hoat utschedden to Jehowa. Wie wellen ons nich von onse leewe Breeda un Sestren enne Vesaumlunk oppoat hoolen. Wie wellen wieda en Gott sien Wuat no Troost sieekjen. Wie kjennen ons secha sennen, daut hee ons beloonen woat, wan wie wieda tru uthoolen. Doa es daut wundascheene Vespräakjen met en, daut hee aule Tronen wajchmoaken woat, waut daut Lieden nu veuasoakt (Opb. 21:4). Dan woa wie bloos noch fa Freid roaren.