Hast du dit Joa de Woaktorms oppmoakjsom jeläst? See mol, aus du de Froagen hia beauntwuaten kaust:

Wuarom jeft ons daut Moot, daut Jakobus 5:11 sajcht, daut Jehova “metliedent” es un sikj “erboarmt”?

Wie weeten, daut Jehova ons onse Fäla wellich togood helt, wiels hee sikj erboarmt. Jakobus 5:11 wiest, daut hee uk metliedent es un ons halpen well. Wie sellen am nodoonen (w21.01, S. 21).

Wuarom stald Jehova eenje aus Haupt aun?

Wiels hee siene groote Famielje leeft un well, daut aule frädlich un ordentlich toopschaufen kjennen. Jieda eena en de Famielje, waut sikj no daut recht, waut Jehova enjerecht haft, weet, wäa waut wichtjet entscheiden saul un wäa doano seenen saul, daut daut uk jedonen woat (w21.02, S. 3).

Wuarom sellen Christen oppaussen, wan see met aundre äwa Internet ooda Fon schriewen ooda räden?

Wan eena äwa Internet ooda Fon met aundre schrift ooda rät, dan mott eena oppaussen fa schlajchte Jesalschoft. Daut es schwanda, wan eena en groote Gruppen bennen es (1. Tim. 5:13). Eena wudd doa uk leicht kjennen Jeschichten wiedadroagen, wua eena nich weet, aus dee werkjlich soo sent, ooda de Gloowesbreeda utnutzen toom Jelt moaken (w21.03, S. 31).

Wuarom leet Gott daut too, daut Jesus lieden un stoawen must?

Ieeschtens wia daut needich, daut Jesus aum Pol jehongen wort, daut de Juden kunnen von eenen Fluch friejemoakt woaren (Gal. 3:10; 3:13, NW). Tweedens muak Jehova Jesus reed, daut dee lota wudd kjennen ons Huaga Priesta woaren. Un dreddens bewees Jesus, daut Menschen Gott tru bliewen kunnen, wan dee sea aufjeprooft worden, wiels hee batem Doot tru bleef (Hiob 1:9-11) (w21.04, S. 16-17).

Waut kjenn wie doonen, wan em Deenst mau weinich tus sent?

Wie kjennen proowen, to soone Tieden to prädjen, wua dee woomäajlich tus sent. Wie kjennen uk opp eene aundre Städ prädjen. Un wie kjennen daut opp eene aundre Wajch proowen un biejlikj Breew schriewen (w21.05, S. 15-16).

Waut meend de Apostel Paulus, aus hee säd: “Ekj sie derch daut Jesaz fa daut Jesaz jestorwen”? (Gal. 2:19).

Daut Jesaz Moses muak kloa, daut de Menschen onvolkomen wieren, un wees de Israeliten no dän Christus han (Gal. 3:19, 24). Dit brocht Paulus bat doa, Christus auntonämen. Wiels Paulus daut deed, wia hee soo to sajen “derch daut Jesaz . . . jestorwen” un must sikj nich mea aun daut hoolen (w21.06, S. 31).

Wuarom es Jehova een goodet Väabilt fa staunthauft bliewen?

Jehova haft daut jeduldich utjehoolen, daut se am eenen schlajchten Nomen muaken, sikj jäajen siene Harschoft stalden, daut eenje von siene Kjinja sikj jäajen am stalden, daut de Fient en eentwajch Läajes vetald, daut siene Deena lieden musten, daut hee nich kunn met siene Frind toop sennen, waut jestorwen sent, daut schlajchte Menschen aundre toosaden un daut de Menschen de Natua tweimuaken (w21.07, S. 9-12).

Wuarom es Josef een goodet Biespel fa Jedult?

Hee wort von siene Breeda ojjerajcht behaundelt. Lota wort hee ojjerajcht beschulcht un en Ägipten fa Joaren em Jefenkjnis jestopt (w21.08, S. 12).

Von waut von schedren rät daut en Hagai 2:6-9, 20-22?

Een deel Menschen sent no de Woarheit jetrocken worden, wan de Velkja uk nich horchen wellen, wan de goode Norecht von daut Kjennichrikj jeprädicht woat. Boolt woaren de Velkja toom latste Mol jescheddat woaren, wan dee venicht woaren (w21.09, S. 15-19).

Wuarom sell wie en onsen Deenst nich oppjäwen?

Jehova sitt, woo wie ons aunstrenjen, un am jefelt daut. Wan wie nich meed ooda mootloos woaren, kjrie wie daut eewje Läwen (w21.10, S. 25-26).

Woo halpt 3. Mose, Kapitel 19 ons, dän Rot notokomen, en aul onse Wäaj “heilich [to] sennen”? (1. Pet. 1:15).

Dis Varsch es woomäajlich von 3. Mose 19:2 jenomen. En Kapitel 19 finj wie väl Biespels, woo wie 1. Petrus 1:15 en ons Läwen nokomen kjennen (w21.12, S. 3-4).