1-2. Waut woa wie en disen Artikjel seenen?

EENJEMOL denkj wie veleicht doaräwa no, woo kort ons Läwen mau es un woo “väl Trubbel” wie haben (Hiob 14:1). Doawäajen sent wie eenjemol mootloos. Krakjt soo jinkj daut väl von Jehova siene Deena en de Bibeltiet. Eenje wullen soogoa stoawen (1. Kjen. 19:2-4; Hiob 3:1-3, 11; 7:15-16). Oba dee veleeten sikj opp Jehova un dee treest dee emma wada un jeef an Krauft. Dee äare Jeschichten kjennen ons väl lieren un Troost jäwen (Reem. 15:4).

² En disen Artikjel woa wie seenen, woo eenje von Jehova siene Deena met groote Schwierichkjeiten foadich worden, biejlikj Jakob sien Sän Josef, de Wätfru Noomi un äare Schwieedochta Rut, de Levit, waut Psalm 73 schreef, un de Apostel Petrus. Woo jeef Jehova dee Moot? Un waut kjenn wie von dee lieren? De Auntwuaten opp dise Froagen woaren ons wiesen, daut Jehova aul dee no aun es, “dee een jebroaknet Hoat haben”, un dee halpt, “dee een bedrekjten Jeist haben” (Psa. 34:19).

3-4. Waut passieed met Josef, aus hee noch junk wia?

³ Aus Josef rom 17 Joa wia, haud hee twee Dreem von Gott. Dise Dreem weesen am, daut hee noch mol wudd en siene Famielje sea aunjeseenen sennen (1. Mo. 37:5-10). Oba meist fuaz no daut dreid Josef sien Läwen gaunz dral. Siene Breeda veachten am un vekoften am un hee must aus Sklow fa dän ägiptischen Beaumten Potifar schaufen (1. Mo. 37:21-28). Ieeschtemma wia Josef tus bie sienen Voda, waut am sea leewd. Un nu met eemol wia hee bloos  een Sklow en Ägipten un must fa eenen Beaumten schaufen, waut Jehova nich deend (1. Mo. 39:1).

⁴ Oba siene Trubbels worden noch jrata. Josef haud nuscht schlajchtet jedonen, oba Potifar siene Fru säd, daut Josef ar haud wult bemotten, met ar Schaund to driewen. Potifar unjastunt sikj de Sach nich un leet Josef fuaz em Jefenkjnis enstoppen un doa wort dän met Kjäden faustjemoakt (1. Mo. 39:14-20; Psa. 105:17-18). Stal die väa, woo dän jungen Josef daut mott jegonen haben, daut se dän soo orrajcht beschuljen deeden. Un woomäajlich brocht daut uk eenen schlajchten Nomen opp Jehova. Secha muak Josef daut mootloos.

5. Waut deed Josef, daut hee nich too mootloos wort?

⁵ Josef kunn nuscht doaraun endren, daut hee een Sklow wia un daut hee em Jefenkjnis wia. Waut holp am, nich opptojäwen? Hee docht nich en eentwajch doaräwa no, waut hee aules nich mea doonen kunn. Enne Städ daut deed hee flietich daut, waut se am oppjejäft hauden. Oba daut wichtichste wia, daut Josef emma doano sträwd, Jehova to jefaulen. Un Jehova säajend aules, waut Josef deed (1. Mo. 39:21-23).

6. Woo jeewen Josef siene Dreem am veleicht Moot?

⁶ Veleicht jeef Josef daut uk Moot, wan hee äwa de Dreem von Gott nodocht, waut hee ea mol jehaut haud. Dee weesen, daut hee siene Famielje wadaseenen wudd un daut siene Loag sikj endren wudd. Un krakjt soo kjeem daut rom. Aus Josef rom 37 Joa wia, erfelden siene Dreem sikj opp eene besondre Oat! (1. Mo. 37:7, 9-10; 42:6, 9).

7. Woo kaun 1. Petrus 5:10 ons halpen, wan wie schwoaret beläwen?

⁷ De Lia fa ons. Aun Josef siene Jeschicht kjenn wie seenen, daut de Menschen vonne  Welt ons schlajcht behaundlen woaren. Soogoa een Gloowesbrooda kaun ons veleicht mol velazen. Oba wan wie ons opp Jehova veloten, dan es hee fa ons soo aus een Steentorm ooda eene Tooflucht, wua wie secha sent. Dan woa wie nich mootloos woaren ooda opphieren Jehova to deenen (Psa. 62:7-8; läs 1. Petrus 5:10). Denkj doaraun, daut Josef veleicht noch mau 17 Joa wia, aus hee de Dreem von Jehova haud. Daut wiest ons, daut Jehova de junge Menschen mank siene Deena väl räakjent. Vondoag dän Dach haben väl junge Menschen krakjt soonen stoakjen Gloowen aun Jehova aus Josef. Un wiels dee Gott nich wullen ontru woaren, sent eenje von dee mau rajcht enjestopt worden (Psa. 110:3).

8. Waut beläwden Noomi un Rut?

⁸ Wäajen eene groote Hungaschnoot trocken Noomi un äare Famielje von Juda no Moab un läwden doa aus Utlenda. Doa storf Noomi äa Maun Elimelech un nu wia see met äare beid Junges auleen. Un met de Tiet befrieden dee sikj met Rut un Orpa, waut von Moab wieren. Ojjefäa tieen Joa lota storwen uk Noomi äare beid Säns, onen daut see Kjinja hauden (Rut 1:1-5). Kaust du die väastalen, woo truarich dise Frues wieren? Rut un Orpa wudden sikj kjennen fresch befrieen. Oba wäa wudd sikj dan om Noomi kjemren, waut aul ella wia? Noomi wia soo sea bedrekjt, daut see säd: “Nant mie nich Noomi, . . . nant mie leewa Mara. Dee, dee aule Macht haft, haft mien Läwen betta jemoakt.” Wäajen aul daut schwoare wort Noomi sikj eenich, trigj no Betlehem to gonen, un Rut jinkj met ar met (Rut 1:7, 18-20).

9. Derch waut spruak Rut Noomi Moot too, soo aus Rut 1:16-17, 22 wiest?

⁹ Waut holp Noomi en äare schwoare Loag? Daut wia truhoatje Leew. Rut wees Noomi truhoatje Leew un wull bie ar bliewen (läs Rut 1:16-17, 22). Un aus see dan en Betlehem wieren, deed Rut sea schwoa schaufen, om fa sikj un fa Noomi Joascht tooptoläsen. Un wiels Rut soo flietich wia, räden de Menschen goot von ar (Rut 3:11; 4:15).

10. Woo wees Jehova, daut am daut äwa de Oame jaumad, soo aus Noomi un Rut?

¹⁰ Jehova jaumad daut äwa de Oame, soo aus Noomi un Rut. Doawäajen jeef hee de Israeliten een besondret Jesaz. Hee säd, dee sullen emma aune Kaunt waut äwaloten, wan see arnten deeden, daut de Oame sikj daut doa holen kunnen (3. Mo. 19:9-10). Opp dee Wajch hauden Noomi un Rut waut to äten un durwen nich prachren.

11-12. Waut deed Boas fa Noomi un Rut?

¹¹ Daut Flekj, wua Rut Jeträajd toopläsd, jehieed dän rikjen Maun Boas. Hee sach, woo tru Rut sikj om Noomi kjemmad un woo väl Leew see dee wees. Doawäajen befried hee sikj met Rut un koft daut Launt trigj, waut ieeschtemma Noomi äare Famielje äat wia (Rut 4:9-13). Rut un Boas hauden dan een Junkje, waut Obed heet un lota de Groospape von dän Kjennich David wia (Rut 4:17).

¹² Stal die väa, woo sea Noomi sikj freid, aus see dän kjlienen Obed hoolen kunn, un woo dankboa see Jehova wia! Oba Noomi un Rut woaren noch waut väl bätret beläwen, wan see vom Doot oppstonen un enwoaren, daut von Obed soogoa de vesproakna Messias Jesus Christus aufstaumd.

13. Waut kjenn wie von Noomi un Rut äare Jeschicht lieren?

¹³ De Lia fa ons. Wan wie derch schwoare  Tieden gonen, dan feel wie ons veleicht uk mootloos ooda bedrekjt un weeten nich ut noch en. Dan sell wie ons gaunz opp onsen Voda em Himmel veloten un ons aun onse Gloowesbreeda hoolen. Jehova woat ons daut schwoare veleicht nich wajchnämen. Hee wuak je uk nich Noomi äaren Maun un äare Säns vom Doot opp. Oba hee woat ons halpen, doamet foadich to woaren, biejlikj doaderch daut onse Breeda un Sestren ons truhoatje Leew wiesen (Spr. 17:17).

14. Wuarom wort een Levit soo mootloos?

¹⁴ De Psalm 73 wort von eenen Levit jeschräwen, waut de groote Iea haud, doa to deenen, wua Jehova aunjebät wort. Un doch wia hee mol mootloos. Wuarom? Wiels hee de schlajchte un stolte Menschen aufjenstich wort. Hee wull nich soon schlajchtet Läwen fieren, oba uk soo fein wiedakomen aus dee (Psa. 73:2-9, 11-14). Dee wieren rikj, hauden een scheenet Läwen un kjeene Sorjen. Daut muak dän soo mootloos, daut hee säd: “Daut haft mie nuscht jenuzt, daut ekj mien Hoat un miene Henj hab rein jehoolen.” De Levit wudd leicht haben kunt vom Gloowen aufkomen.

15. Woo kunn de Levit no Psalm 73:16-19, 21-25 no wada Moot kjrieen?

¹⁵ Läs Psalm 73:16-19, 21-25. De Levit jinkj “en Gott sien Heilichtum nenn”. Doa wia hee met siene Gloowesbreeda toop un kunn ruich äwa siene Loag nodenkjen un bäden. Hee wort dan en, daut et nich rajcht wia, woo hee docht, un daut hee leicht wudd kjennen von Jehova aufkomen. Hee kunn uk vestonen, daut de Schlajchte “opp glauten Boddem” stunden un daut et met dee schlajcht utkomen wudd. De Levit must lieren, soo to denkjen aus Jehova, daut hee nich mea aufjenstich un mootloos wia. Dan haud hee wada ennalich Fräd un wia schaftich. Hee säd to Jehova: “Doa es nuscht opp de Ieed, daut ekj haben mucht, buta die.”

16. Waut kjenn wie von dän Levit lieren?

 ¹⁶ De Lia fa ons. Wie wellen de schlajchte Menschen kjeenmol aufjenstich woaren, wan daut uk soo lat, daut dee fein wiedakomen. Dee sent bloos fa eene Tiet schaftich un woaren nich daut eewje Läwen kjrieen (Liera 8:12-13). Wan wie dee aufjenstich sent, dan kjenn wie mootloos woaren un von Jehova aufkomen. Wan die daut uk mol soo jeit aus dän Levit, dan doo daut uk soo aus dee. Horch no Gott sienen leeftoljen Rot un sie met soone toop, waut sienen Wellen doonen. Wan daut fa die nuscht bätret jeft aus Jehova deenen, dan woascht du opp iernst schaftich sennen. Un du woascht nich von dän Wajch aufkomen, waut no “daut woare Läwen” jeit (1. Tim. 6:19).

17. Waut muak Petrus mootloos?

¹⁷ De Apostel Petrus wia reed, haustich waut to doonen. Oba eenjemol docht hee nich no, ea hee waut säd ooda deed, un lota beschod hee daut. Aus Jesus biejlikj to de Apostel säd, daut hee wudd lieden un stoawen motten, räd Petrus doajäajen un säd: “Soowaut saul die nie passieren!” (Mat. 16:21-23). Jesus wees Petrus fuaz trajcht. Un aus se Jesus faustnämen wullen, bedocht Petrus daut wada nich, waut hee deed, un hakt dän Huagen Priesta sienen Kjnajcht daut Ua auf (Joh. 18:10-11). Un Jesus must Petrus wada trajchtwiesen. Petrus pucht uk mol doamet, daut hee Jesus kjeenmol wudd veloten, wan de aundre Apostel uk wudden (Mat. 26:33). Oba daut dieed goanich lang, bat Petrus Angst kjrieech un dreemol säd, daut hee Jesus nich kjand. Petrus wort sea mootloos un “hee [jinkj] rut un hield bettalich” (Mat. 26:69-75). Veleicht haft Petrus jewundat, aus Jesus am jeemols vejäwen wudd.

18. Woo jeef Jesus Petrus wada Moot?

¹⁸ Oba Petrus wort wäajen sienen Fäla  nich soo mootloos, daut hee opphieed Jehova to deenen. Hee kjrieech fresch Moot un wia wada met de aundre Apostel toop (Joh. 21:1-3; Apj. 1:15-16). Waut holp am doabie? Eent wia, daut Jesus aul verhäa jebät haud, daut Petrus nich sienen Gloowen velieren sull. Un hee säd uk, daut Petrus trigjkomen sull un siene Breeda stoakjen. Jehova horcht no dit Jebäd. Lota leet Jesus sikj dan von Petrus seenen un spruak am secha Moot too (Luk. 22:32; 24:33-34; 1. Kor. 15:5). Un nodäm aus de Apostel eene gaunze Nacht oppem Wota jewast wieren un kjeene Fesch jekjräajen hauden, leet Jesus sikj uk von dee seenen. Doa jeef hee Petrus de Jeläajenheit, am to sajen, woo sea hee am leewd. Jesus haud sienen leewen Frint togood jehoolen un jeef am noch mea Oabeit (Joh. 21:15-17).

19. Woo denkjt Jehova äwa ons, wan wie eenen Fäla moaken, soo aus Psalm 103:13-14 sajcht?

¹⁹ De Lia fa ons. Soo aus Jesus met Petrus omjinkj wiest, woo metfeelent hee wia. Un Jesus es krakjt soo aus sien Voda. Doawäajen sell wie kjeenmol denkjen, daut Jehova ons nich togood hoolen woat, wan wie eenen Fäla moaken. Daut es, waut de Soton ons enbillen well. Wie sellen ons leewa bemieejen, doaraun to denkjen, daut Jehova ons sea leeft un ons vestonen kaun un ons vejäwen well. Un wie sellen am nodoonen, wan aundre ons velazen (läs Psalm 103:13-14).

20. Waut woa wie en dän näakjsten Artikjel seenen?

²⁰ Waut hab wie von Josef un Noomi un Rut un dän Levit un von Petrus jelieet? Jehova “es aul dee no aun, dee een jebroaknet Hoat haben” (Psa. 34:19). Hee lat daut too, daut wie eenjemol schwoaret derchgonen un mootloos woaren. Oba wan wie met Jehova siene Help tru bliewen, dan woat ons Gloowen stoakja (1. Pet. 1:6-7). En dän näakjsten Artikjel woa wie noch mea seenen, woo Jehova siene true Deena unjastetten deit, wan dee biejlikj mootloos sent wäajen äare Fäla ooda aundre Schwierichkjeiten.