1. Wäa holp met, de Vesaumlunk en Filippi opptostalen?

AUS de Apostel Paulus met Silas, Lukas un Timotäus toop no de Staut Filippi kjeem, fungen see doa väle, waut mea äwa de goode Norecht weeten wullen. Dise vea flietje Breeda holpen met, doa eene Vesaumlunk opptostalen, un de niee Jinja vesaumelden sikj woomäajlich en eene Sesta äa Hus, waut Liedia heet un sea oppnäment wia (Apj. 16:40).

2. Waut fa Schwierichkjeiten kjeemen fuaz opp?

² De niee Vesaumlunk must fuaz met Schwierichkjeiten foadich woaren. De Soton brocht eenje en Filippi bat doa, daut dee sea jäajen daut Prädichtwoakj von Paulus un siene Poatna schauften. Paulus un Silas worden faustjenomen, vekjield un enjestopt. Aus dee wada frie wieren, jinjen see no de niee Jinja un spruaken dee Moot too. Dan veleeten Paulus, Silas un Timotäus de Staut, oba Lukas bleef woomäajlich doa. Woo jinkj daut dan met de niee Vesaumlunk wieda? Jehova holp dee derch sienen Jeist, daut dee fein wiedakjeem (Filip. 2:12). Paulus kunn sikj werkjlich äwa dee freien!

3. No waut fruach Paulus Gott, soo aus Filippa 1:9-11 sajcht?

³ Ojjefäa tieen Joa lota schreef Paulus eenen Breef no de Vesaumlunk en Filippi. Dis Breef wiest, woo väl hee de Breeda doa räakjend. Hee schreef: “Gott weet, woo sea ekj mie . . . von gaunzem Hoat no junt aula bangen doo” (Filip. 1:8). Hee säd de Breeda daut, daut hee fa an bäd. Hee fruach Jehova doano, daut dee äare Leew toonämen kunn  un daut dee lieeden, waut daut aulabaste wia, un daut see rein un schultfrie wieren un daut see wieda väl rajchtet un goodet deeden. Secha kjenn wie uk noch väl von Paulus siene leeftolje Wieed lieren. Well wie daut mol läsen, waut hee de Filippa schreef (läs Filippa 1:9-11). Dan woa wie daut eenselwies derchgonen un seenen, woo wie daut nokomen kjennen.

4. (a) Woo wees Jehova ons no 1. Johanes 4:9-10 no siene Leew? (b) Woo sea sell wie Gott leewen?

⁴ Jehova wees ons siene groote Leew doaderch, daut hee sienen Sän no de Ieed schekjt, om fa onse Sinden to stoawen (läs 1. Johanes 4:9-10). Siene groote Leew drift ons doatoo, am to leewen (Reem. 5:8). Woo sea sell wie Gott leewen? Daut muak Jesus dietlich, aus hee to eenen Farisäa säd: “Du saust dän Harn, dienen Gott, met dien gaunzet Hoat goot sennen, un met diene gaunze Seel, un met aul diene Jedanken” (Mat. 22:36-37). Wie wellen Gott nich bloos een bät leewen, oba jieda Dach emma dolla. Paulus säd to de Filippa, “daut . . . [äare] Leew toonämen” sull. Waut kjenn wie doonen, daut onse Leew fa Gott jrata woat?

5. Waut mott wie doonen, daut onse Leew jrata woat?

⁵ Daut wie Gott leewen kjennen, mott wie dän kjanen lieren. De Schreft sajcht: “Wäa nich Leew haft, kjant Gott nich, wiels Gott es ons goot” (1. Joh. 4:8). De Apostel Paulus jeft auntovestonen, daut onse Leew fa Gott toonämen woat, wan wie mea weeten un vestonen kjennen (Filip. 1:9). Aus wie aunfungen, de Bibel to studieren, kjrieej wie eene Leew fa Gott, wan wie uk noch nich sea väl von am wisten. Oba je bäta wie am kjanen lieeden, je dolla leewd wie am. Doawäajen es daut soo needich, daut wie pinkjlich Gott sien Wuat studieren un doaräwa nodenkjen! (Filip. 2:16).

6. Waut lieet 1. Johanes 4:11, 20-21 ons doaräwa, woo wie en de Leew toonämen kjennen?

⁶ Gott siene groote Leew fa ons drift ons doatoo, daut wie uk onse Breeda leewen (läs 1. Johanes 4:11, 20-21). Veleicht jleew wie, daut daut goanich soo schwoa es, dee to leewen. Wie deenen je aula Jehova un strenjen ons aun, am notodoonen. Un wie wellen en Jesus siene Footspoaren gonen, waut soone groote Leew haud, daut hee mau rajcht sien Läwen fa ons jeef. Un doch kaun daut eenjemol schwoa sennen, daut Jeboot notokomen, daut wie ons unjarenaunda leewen sellen. Well wie mol seenen, woo daut ieeschtemma en de Vesaumlunk en Filippi wia.

7. Waut lia wie von dän Rot, waut Paulus Efodia un Sintieche jeef?

⁷ Efodia un Sintieche wieren twee flietje Sestren, waut dän Apostel Paulus “em Deenst . . . tru biejestonen” hauden. Oba woomäajlich wieren dee beid sikj wäajen irjentwaut oneenich jeworden. Un aus Paulus dan no de Vesaumlunk schreef, wua Efodia un Sintieche wieren, jeef dee an dän Rot, “sikj eenich to sennen em Harn” (Filip. 4:2-3). Un Paulus säd mau rajcht to de gaunze Vesaumlunk doa: “Doot aules oone brummsch oda wadaspanstich to senne” (Filip. 2:14, Reimerbibel). Secha holp Paulus sien strenja Rot Efodia un Sintieche un uk de gaunze Vesaumlunk doa, mea Leew unjarenaunda to haben.

8. (a) Wuarom es daut eenjemol schwoa, onse Breeda to leewen? (b) Waut kaun ons halpen, dee to leewen?

 ⁸ Soo aus Efodia un Sintieche es ons daut veleicht uk eenjemol sea schwoa, aundre to leewen, wiels wie no dee äare Schwakheiten kjikjen. Wie aula moaken jieda Dach Fäla. Un wan wie bloos no aundre äare Schwakheiten kjikjen, dan woat onse Leew fa dee kolt woaren. Wan doa biejlikj een Brooda nich methalpt, daut Vesaumlungshus reintomoaken, dan kjenn wie ons leicht äwa dän oajren. Wan wie dan aun aul de Fäla denkjen, waut dee ea jemoakt haft, dan woa wie ons bloos noch dolla oajren un onse Leew fa dän woat emma weinja woaren. Wan wie mol en soone Loag sent, dan wudd wie sellen doaraun denkjen, daut Jehova onse Schwakheiten sitt un uk dän Brooda siene. Oba Jehova leeft ons aula, wan wie uk onvolkomen sent. Doawäajen sell wie am nodoonen un no de Breeda äare goode Sieden kjikjen. Wan wie ons aunstrenjen, onse Breeda to leewen, dan woa wie noch dolla met dee veeent sennen (Filip. 2:1-2).

9. Waut es bie “daut aulabaste” met en, wua Paulus en sienen Breef aun de Filippa von rät?

⁹ Jehova leet de Christen en Filippi un uk ons sajen, daut wie sullen “fauststalen lieren, waut daut aulabaste [wia]” (Filip. 1:10). Bie “daut aulabaste” es met en, daut Jehova sien Nomen jeheilicht woat un sien Väanämen sikj erfelt un daut doa Fräd un Eenichkjeit en de Vesaumlunk es (Mat. 6:9-10; Joh. 13:35). Wan dise wichtje Sachen en ons Läwen daut ieeschte sent, dan bewies wie, daut wie Jehova leewen.

10. Waut mott wie doonen, daut Jehova ons fa rein talt?

¹⁰ Paulus säd uk, daut wie “rein”, ooda onen Fäla, sennen sullen. Daut meent nich, daut wie volkomen sennen motten. Wie kjennen nich gaunz un goa rein sennen, soo aus Jehova es. Oba hee woat ons fa rein talen, wan wie ons sea aunstrenjen, daut onse Leew toonemt, un wan wie daut em Uag hoolen, waut daut aulabaste es. Wie kjennen onse Leew biejlikj doaderch wiesen, daut wie ons bastet doonen, om schultfrie to sennen, ooda aundre nich tofaul to brinjen.

11. Wuarom sell wie aundre nich tofaul brinjen?

¹¹ Daut es sea iernst, daut wie aundre nich sellen tofaul brinjen. Derch waut wudd wie daut kjennen? Biejlikj derch onsen Tietvedrief, onse Kjleedie ooda derch de Oabeit, waut wie doonen. Woomäajlich doo wie doa nuscht, waut Jehova fa orrajcht talt. Oba wan daut, waut wie doonen, aundre äa Jewessen baudat un dee wäajen daut tofaul komen, dan es daut sea schlemm. Jesus säd, daut wudd bäta sennen, wan se ons eenen grooten Steen aum Hauls bungen un em Mäa nenschmeeten, aus wan wie eent von siene Schop wudden tofaul brinjen! (Mat. 18:6).

12. Waut kjenn wie von de Lied lieren, waut Pionia wieren?

¹² Woo kjeemen eene Lied, waut Pionia wieren, daut no, waut Jesus säd? En dee äare Vesaumlunk wia een Ehepoa, waut noch nich lang jedeept wieren. Dee wieren beid en sea trigjhoolende Famieljes oppjewossen un dochten, daut sikj daut fa Christen nich jehieed, nom Ziene to gonen – nich mol, wan daut een feina Film wia. Doawäajen stieeden dee sikj sea  doaraun, daut de Pionieren eenen Film jekjikjt hauden. No daut worden de Pionieren sikj eenich, nich mea nom Ziene to gonen, bat de niee Breeda äa Jewessen dolla oppjeschoapt hauden un bäta vestunden, waut goot ooda schlajcht wia (Heb. 5:14). Dise Pionieren räden nich bloos von Leew, oba beweesen daut met äare Woakjen (Reem. 14:19-21; 1. Joh. 3:18).

13. Woo kunn wie wäm to waut schlajchtet veuasoaken?

¹³ Wie wudden aundre uk tofaul brinjen, wan wie dee to waut schlajchtet veuasoaken wudden. Well wie mol een Biespel seenen. Saj wie mol, eena, waut von Alkohol aufhenjich es, studieet de Bibel un hieet schlieslich opp met supen, wan am daut uk sea schwoa felt. Am es daut kloa, daut hee nu gaunz von Alkohol wajchbliewen mott. Hee endat sien Läwen un lat sikj deepen. Lota kroacht een Brooda am han un well am een Kuffel met waut stoakjet jäwen. De Brooda sajcht to am: “Du best je nu eent von Jehova siene Zeijen un hast Jehova sienen Jeist. Un de Selfstbeharschunk jehieet je to dän Jeist siene Frucht. Wan du die beharschen kaust, dan deit daut doch nuscht, wan du een bät stoakjet drinkjst.” Woo schod wudd daut nich sennen, wan de niea Brooda no disen schlajchten Rot horchen wudd!

14. Woo halpen de Toopkomes ons, daut notokomen, wua Filippa 1:10 von rät?

¹⁴ Woo halpen onse Toopkomes ons, daut wie daut doonen kjennen, wua  Filippa 1:10 von rät? Ieeschtens lia wie doa, waut Jehova fa daut aulabaste talt. Tweedens woat ons jewäsen, woo wie daut nokomen kjennen, waut wie lieren, un daut halpt ons, daut wie kjennen rein bliewen. Un dreddens woat ons doa jeholpen, “en goode Woakjen, Leew to bewiesen” (Heb. 10:24-25). Wan onse Breeda ons Moot toospräakjen, dan woat onse Leew fa dee un uk fa Gott jrata woaren. Un wan wie Gott un onse Breeda von Hoaten leewen, dan woa wie ons bastet doonen, om dee nich tofaul to brinjen.

15. Waut jehieet to daut rajchte un goode, waut wie doonen sellen?

¹⁵ Paulus bäd iernstlich, daut de Filippa wudden “rajchtet un goodet doonen” (Filip. 1:11). Secha jehieed to dit rajchte un goode de Leew fa Jehova un fa sien Volkj un uk daut see met aundre äwa äaren Gloowen aun Jesus un äare wundascheene Hopninj räden. En Filippa 2:15 säd Paulus: “Schient aus Lichta . . . en dise Welt.” Daut es sea paussent, wiels Jesus säd, daut siene Nofolja “daut Licht fa dise Welt” sennen wudden (Mat. 5:14-16). Hee jeef an uk daut Jeboot: “Moakt . . . Lieelinja”, un säd, see wudden siene “Zeijen sennen . . . äwa de gaunze Welt” (Mat. 28:18-20; Apj. 1:8). Wie doonen “rajchtet un goodet”, wan wie flietich bie dit wichtje Woakj methalpen.

16. Woo wiest Filippa 1:12-14, daut wie mau rajcht en eene schwoare Loag aus Lichta schienen kjennen? (See daut Bilt oppe väaschte Sied.)

¹⁶ Wie kjennen aus Lichta schienen, endoont woo onse Omstend sent. Eenjemol kjrie wie derch eene schwoare Loag besondre Jeläajenheiten toom prädjen. De Apostel Paulus biejlikj schreef sienen  Breef aun de Filippa, aus hee en een Hus en Room faust wia. Oba siene Kjäden hilden am nich doavon auf, de Woaka to prädjen un uk dee, waut am besochten. Daut Paulus en dise schwoare Loag soo flietich prädijd, holp de Breeda “Gott sien Wuat noch driesta un forchtloosa to prädjen” (läs Filippa 1:12-14; 4:22).

17. Woo kunnen eenje Breeda un Sestren en schwoare Omstend wiedaprädjen?

¹⁷ Een deel Breeda un Sestren sent krakjt soo äwanäment aus Paulus. Wiels dee en soone Lenda wonen, wua see nich frie von Hus to Hus prädjen kjennen, sieekjen dee sikj aundre Jeläajenheiten toom prädjen (Mat. 10:16-20). En eent von dise Lenda jeef een Kjreisoppsechta dän Rot, daut jieda Vekjindja sien Frintschoft, de Nobasch, de Schoolpoatna, de Oabeitspoatna un Bekaunde prädjen sull. Nich mol twee Joa lota jeef et dan en disen Kjreis väl mea Vesaumlungen aus ea. Veleicht won wie en een Launt, wua wie gaunz frie prädjen kjennen. Oba wie kjennen doawäajen väl lieren von dise Breeda. Wan wie jieda Jeläajenheit utnutzen, om aundre to prädjen, dan woat Jehova ons halpen, daut wie uk en schwoare Omstend wiedaprädjen kjennen (Filip. 2:13).

18. To waut sell wie ons eenich sennen?

¹⁸ Noch kjeenmol ea wia daut soo drinjent aus nu, daut to doonen, waut Gott Paulus oppschriewen leet en sienen Breef aun de Filippa. Well wie daut em Uag hoolen, waut daut aulabaste es, un rein sennen, aundre nich tofaul brinjen un rajchtet un goodet doonen. Dan woat onse Leew toonämen un wie woaren onsen leeftoljen Voda Jehova ieren.