1. (a) Waut wellen Gott siene Deena aula doonen? (b) Wuarom wellen dee daut doonen? (See daut Bilt oppe väaschte Sied.)

JESUS CHRISTUS säd to siene Nofolja: “Got . . . no de Velkja von de Welt un moakt an to Lieelinja” (Mat. 28:19). Aule von Gott siene true Deena wellen lieren disen “Deenst volstendich [derchtofieren]”, wua see fäa aunjestalt sent (2. Tim. 4:5, NW). Kjeene aundre Oabeit es soo wichtich un drinjent un loont sikj soo sea aus ons Deenst fa Jehova. Oba eenjemol es daut nich leicht, daut wie soo väl Tiet doafäa haben, aus wie wudden jleichen.

2. Wuarom kaun daut schwoa sennen onsen Deenst derchtofieren?

² Wie haben aula väl wichtjet to doonen, waut ons Tiet un Krauft kost. Veleicht mott wie jieda Dach väl Stund schaufen, daut wie un onse Famielje to läwen haben. Ooda wie motten sestwaut fa onse Famielje doonen ooda sent krank ooda narfenkrank ooda kjennen wäajen ons Ella nich soo väl doonen. Woo kjenn wie doawäajen noch onsen Deenst volstendich derchfieren?

3. Waut kjenn wie von Jesus siene Wieed en Matäus 13:23 lieren?

³ Wan wie wäajen onse Omstend uk nich soo väl Tiet fa dän Deenst haben, aus wie wudden wellen, sell wie doawäajen nich mootloos woaren. Jesus wist, daut wie nich aula wudden jlikjen väl Frucht brinjen kjennen, aulsoo nich jlikjen väl Tiet un Krauft haben toom prädjen (läs Matäus 13:23). Jehova räakjent daut sea väl, wan wie ons bastet doonen toom am deenen (Heb. 6:10-12). Oba veleicht späat sikj ons daut soo, daut wie noch mea wudden doonen kjennen. En disen Artikjel woa wie seenen, waut wie doonen kjennen, daut de Deenst fa Jehova daut wichtichste fa ons es, un woo wie ons Läwen eefach hoolen kjennen un woo wie ons em prädjen un lieren vebätren kjennen. Oba daut ieeschte woa wie seenen,  waut daut bediet, onsen Deenst volstendich derchtofieren.

4. Waut meent daut, onsen Deenst volstendich derchtofieren?

⁴ Onsen Deenst volstendich derchtofieren bediet, daut wie soo väl aus mäajlich prädjen un lieren. Oba daut jeit nich bloos doarom, woo väl Tiet wie ons fa dän Deenst nämen kjennen. Jehova kjikjt doano, ut waut fa eenen Senn wie am deenen. Wie doonen onsen Deenst fa Jehova * met onse gaunze Seel, wäajen wie am un onsen Näakjsten leewen (Mar. 12:30-31; Kol. 3:23). Gott met onse gaunze Seel deenen meent, daut wie ons aunstrenjen un onse Krauft soo goot aus mäajlich en sienen Deenst brucken. Wan wie dankboa sent, daut wie kjennen en daut Prädichtwoakj metmoaken, dan woa wie wellen met soo väl Menschen aus mäajlich äwa de goode Norecht räden.

5-6. Kaun daut Prädichtwoakj bie ons daut wichtichste sennen, wan wie uk nich soo väl Tiet haben? Jeff een Biespel.

⁵ See wie mol een Biespel. Een junga Maun jleicht sea Jittoa spälen. Hee spält met dee soo foaken, aus hee kaun. Dan kjricht hee eene Oabeit en een Restaraunt, wua hee emma utgangs Wäakj Jittoa spälen kaun. Oba hee vedeent doa nich jenuach toom sien Läwen moaken. Doawäajen schauft hee noch von Mondach bat Friedach en een Stua biem Toomdesch. Hee mott de mieeschte Tiet em Stua schaufen, oba Musikj spälen es daut, waut hee daut dolste jleicht. Doawäajen prooft hee, daut emma bäta to lieren, un wenscht sikj, daut hee eenen Dach bloos noch Jittoa spälen kaun. Un entweschen nuzt hee jieda Jeläajenheit ut toom Musikj spälen, wan daut uk mau bloos een Stootje es.

⁶ Biejlikj soo kaust du veleicht uk nich soo väl Tiet prädjen, aus du wurscht wellen. Oba daut es, waut du daut dolste wurscht jleichen. Doawäajen west du daut emma bäta lieren, de Menschen met de goode Norecht to Hoaten to räden. Oba wäajen du  soo drock met aundre Sachen best, wundascht du veleicht, waut du doonen kaust, daut daut Prädichtwoakj daut wichtichste en dien Läwen woat.

7-8. Woo kjenn wie krakjt soo äwa dän Deenst jesonnen sennen aus Jesus?

⁷ Bie Jesus wia daut sea fein to seenen, woo de Deenst daut wichtichste em Läwen sennen kaun. Fa am wia daut emma daut ieeschte, äwa Gott sien Kjennichrikj to räden (Joh. 4:34-35). Hee jinkj hundade Kilomeeta, om soo väl Menschen aus mäajlich to prädjen. Hee neem jieda Jeläajenheit woa, no dee äare Hiesa to gonen ooda sestwua met dee to räden. Jesus sien gaunzet Läwen dreid sikj om sienen Deenst.

⁸ Wie doonen Christus no, wan wie no Jeläajenheiten sieekjen, om met aundre äwa de goode Norecht to räden, wuaemma un wanemma daut schauft. Un daut wie kjennen prädjen, sent wie uk wellens, soont tochtoloten, waut ons scheen jeit (Mar. 6:31-34; 1. Pet. 2:21). Eenje en de Vesaumlunk kjennen Sondapionia, Pionia ooda Pioniahelpa sennen. Aundre haben eene aundre Sproak jelieet ooda sent doa hanjetrocken, wua mea Help toom prädjen fält. Oba väl von daut Prädichtwoakj woat von jeweenelje Vekjindja jedonen, waut äa bastet doonen. Endoont woo daut bie ons es – Jehova velangt nich mea von ons, aus wie doonen kjennen. Hee well, daut wie aula Freid bie onsen Deenst haben, wan wie “daut wundavolle Evangelium” bekauntmoaken, waut de jlekjelja Gott ons aunvetrut haft (1. Tim. 1:11; 5. Mo. 30:11).

9. (a) Woo wees Paulus, daut daut Prädichtwoakj daut ieeschte en sien Läwen wia, wan hee uk schaufen must? (b) Woo wiest Aposteljeschicht 28:16, 30-31 ons, woo Paulus äwa sienen Deenst docht?

⁹ De Apostel Paulus wia een goodet Biespel, wiels de Deenst fa am daut wichtichste en sien Läwen wia. Aus hee opp siene tweede Prädichtreis en Korint wia, haud hee nich väl Jelt un must een Stootje aus Zeltmoaka schaufen. Oba fa Paulus wia siene Oabeit nich daut ieeschte. Hee muak Zelten, om sien Läwen to moaken, soo daut hee de Korinta de goode Norecht “emsonst [prädjen]” kunn (2. Kor. 11:7). Sien Deenst bleef daut wichtichste fa am un hee prädijd jieda Sabat, wan hee uk bieaun schaufen must. Aus hee een bät Help kjrieech, kunn hee mea Tiet fa dän Deenst brucken. Doawäajen “funk Paulus aun sikj gaunz un goa hantojäwen de Juden daut to bewiesen, daut Jesus de Christus wia” (Apj. 18:3-5; 2. Kor. 11:9). Lota, aus hee en Room wia un doa twee Joa en een Hus faust wia, prädijd hee dee, waut am besochten, un hee schreef uk Breew (läs Aposteljeschicht 28:16, 30-31). Paulus wull sikj derch nuscht von sienen Deenst aufhoolen loten. Hee schreef: “Wiels wie disen Deenst . . . jekjräajen haben, woa wie nich mootloos” (2. Kor. 4:1). Soo aus fa Paulus kaun daut Kjennichrikjswoakj fa ons uk daut ieeschte em Läwen sennen, wan wie uk schaufen motten.

10-11. Woo kjenn wie onsen Deenst volstendich derchfieren, wan wie Trubbels met de Jesuntheit haben?

¹⁰ Wan wie wäajen ons Ella ooda wäajen de Jesuntheit nich väl von Hus to Hus prädjen kjennen, dan kjenn wie doawäajen opp aundre Wäaj Zeichnis jäwen. De ieeschte Christen prädijden aulawäajen, wua Menschen wieren. Dee neemen jieda Jeläajenheit woa, endoont wua see wäm troffen, un prädijden von Hus to Hus, effentlich un opp Jeläajenheit (Apj. 17:17; 20:20). Wan wie nich väl gonen kjennen, dan kjenn wie veleicht wua setten, wua väl Menschen vebiegonen, un dee prädjen. Ooda wie  kjennen opp Jeläajenheit prädjen, Breew schriewen ooda äwa Fon Zeichnis jäwen. Een deel Vekjindja, waut nich väl von Hus to Hus gonen kjennen, jeit daut sea scheen, soo aus dit to prädjen.

¹¹ Du kaust dienen Deenst volstendich derchfieren, wan du uk Trubbels met de Jesuntheit hast. Daut es aun Paulus sien Biespel to seenen. Hee säd: “Dise jeistliche Krauft [kjemt] von Gott . . . un nich von ons” (2. Kor. 4:7). Paulus brukt dise Krauft, aus hee bie eent von siene Prädichtreisen krank wort. Hee säd to de Galata: “Ekj [prädijd] doawäajen daut ieeschte bie junt daut Evangelium . . ., wiels ekj krank wia” (Gal. 4:13). Wan wie nich jesunt sent, dan hab wie doaderch veleicht uk de Jeläajenheit, aundre de goode Norecht to prädjen, biejlikj Doktasch, Nursen un aundre, waut sikj om ons kjemren. Väle von dee sent jeweenlich oppe Oabeit, wan de Vekjindja bie äa Hus prädjen.

12. Waut kjenn wie doonen, daut ons Uag emma “kloa kjikjt”?

¹² Jesus säd: “Daut Licht fa dän Kjarpa es daut Uag. Wan daut Uag kloa kjikjt, woat de gaunza Kjarpa voll Licht sennen” (Mat. 6:22). Waut meend hee doamet? Hee meend, daut wie ons Läwen sullen eefach hoolen; wie sullen soo to sajen kloa no eene eensje Sach kjikjen un ons nich doavon auflenkjen loten. Jesus jeef ons een feinet Biespel, wiels am daut emma daut wichtichste wia, Jehova to deenen, un hee lieed uk siene Nofolja, daut see dän Deenst fa Jehova un daut Kjennichrikj emma em Uag hoolen sullen. Wie kjennen am nodoonen,  wan wie “daut ieeschte no Gott sien Rikj un no [Gott] siene Jerajchtichkjeit” sieekjen un wan ons Läwen sikj om dän christeljen Deenst dreit (Mat. 6:33).

13. Waut kaun ons halpen, onsen Deenst em Uag to hoolen?

¹³ Wie kjennen onsen Deenst biejlikj doaderch em Uag hoolen, daut wie ons Läwen eefacha moaken. * Dan woa wie mea Tiet haben toom aundre halpen, Jehova kjanen un leewen to lieren. Wudd wie ons daut veleicht kjennen met de Oabeit aundasch enrechten, daut wie enne Wäakj mea Tiet fa dän Deenst hauden? Ooda wudd wie kjennen weinja soonen Tietvedrief haben, waut väl Tiet brukt?

14. Waut vonne Endrungen muak een Ehepoa, daut see mea em Deenst doonen kunnen?

¹⁴ Dit es, waut een Eltesta, waut Elias heet, un siene Fru deeden. Hee sajcht: “Wie kunnen don nich Pionia woaren, oba wie kunnen kjlandre Endrungen moaken, om mea Tiet fa dän Deenst to haben. Biejlikj vebrukt wie weinja Jelt. Wie worden uk en, daut wie too väl Tiet brukten fa Tietvedrief, un hieeden doa dolla met opp. Un wie fruagen uk, aus wie wudden aundre Tieden schaufen kjennen. Doaderch kunn wie zeowes em Deenst gonen un mea Bibelstudiums fieren un mau rajcht tweemol de Moonat enne Wäakj prädjen. Daut jeef ons väl Freid!”

15-16. Woo kjenn wie ons no 1. Timotäus 4:13, 15 no em Deenst vebätren? (See uk dän Kausten “ Waut wie ons väanämen kjennen toom onsen Deenst volstendich derchfieren”.)

¹⁵ Waut halpt ons noch, onsen Deenst volstendich derchtofieren? Wan wie ons em prädjen un lieren vebätren. Fa jewesse  Oabeiten es daut needich, daut deejanje, waut de Oabeit doonen, sikj emma wieda doarenn eewen un utlieren. Soo es daut uk bie de Kjennichrikjsvekjindja. Wie motten wieda lieren, woo wie ons em Deenst vebätren kjennen (Spr. 1:5; läs 1. Timotäus 4:13, 15).

¹⁶ Woo kjenn wie ons wieda vebätren en onsen Deenst? Daut kjenn wie, wan wie no dän Rot horchen, waut wie jieda Wäakj en de School fa Läwen un Deenst kjrieen. Bie dit Toopkomen kjrie wie goode Help toom onsen Deenst emma bäta doonen. Wan biejlikj de Leida von daut Toopkomen deejanje Rot jeft, waut eene Oppgow hauden, dan kjenn wie oppaussen, waut wie doarut lieren kjennen. Un wan wie daut näakjste Mol met wäm von de goode Norecht räden, dan kjenn wie daut doonen, waut wie jelieet haben. Wie kjennen uk dän Oppsechta von onse Deenstgrupp no Help froagen ooda met dän toop prädjen ooda met eenen aundren erfoarnen Vekjindja ooda Pionia ooda met dän Kjreisoppsechta toop. Un je bäta wie lieren, aul de Sachen von ons Jereetschoft fa dän Deenst to brucken, je scheena woat ons daut prädjen un lieren gonen.

17. Waut woascht du beläwen, wan du dienen Deenst volstendich derchfieescht?

¹⁷ Daut es eene groote Iea, daut Jehova ons lat “siene Metoabeida” sennen! (1. Kor. 3:9). Wan wie “fauststalen lieren, waut daut aulabaste es,” un emma onsen christeljen Deenst em Uag hoolen, dan woa wie “dän HARN met Freiden [deenen]” (Filip. 1:10; Psa. 100:2). Aus Gott siene Deena kjenn wie ons secha sennen, daut hee ons de Krauft jäwen woat, waut ons fält, om onsen Deenst derchtofieren, endoont waut vonne Schwierichkjeiten wie haben (2. Kor. 4:1, 7; 6:4). Wan wie Jehova met onse gaunze Seel deenen, dan woa wie Freid doabie haben, endoont aus wie weinich ooda väl doonen kjennen (Gal. 6:4). Wan du dienen Deenst volstendich derchfieescht, dan wiest du diene Leew fa Jehova un dienen Näakjsten. Un “wan du daut doonen woascht, woascht du die selfst seelich moaken, un uk dee, dee die hieren” (1. Tim. 4:16).