DAUT Läwen es vondoag dän Dach nich soo, aus Gott daut mol wull. Oppe gaunze Ieed sullen Menschen läwen, waut daut scheen jinkj, äaren Schepfa unjadon wieren un soo leeftolich wieren aus hee. Gott wull, daut de Menschen aula schaftich wieren un Famieljes hauden, niee Sachen lieeden un de gaunze Ieed to een Paradies muaken.

• “[Hee moakt] en aule Welt met aulem Kjrich een Enj” (Psalm 46:10).

• “Diene Rach es jekomen, un de Tiet . . . [dee] omtobrinjen, dee de Ieed vedorwen haben” (Openboarunk 11:18).

• “Kjeena von june Menschen woat sajen: ‘Ekj sie nich jesunt’” (Jesaja 33:24).

• “Waut miene jewälde buen, woaren see lang goot brucken kjennen” (Jesaja 65:22).

Woo woaren dise Profezeiungen sikj erfellen? Gott haft sienen Sän Jesus toom Kjennich jemoakt, daut dee vom Himmel äwa de Ieed rejieren woat. De Schreft nant dise Rejierunk Gott sien Kjennichrikj (Daniel 2:44). Dee sajcht von Jesus: “Gott de Har woat am sien . . . Troon jäwen. Un hee woat . . . Kjennich sennen” (Lukas 1:32-33).

Aus Jesus oppe Ieed wia, deed hee väl Wunda toom wiesen, daut de Menschen äa Läwen väl bäta sennen woat, wan hee rejieet.

• Daut Jesus de Menschen jesunt muak, es een Bewies, daut hee de Krankheiten tonuscht moaken woat (Matäus 9:35).

• Daut hee daut Mäa beruijd, wiest, daut hee de Kontroll äwa de Natua haft toom de Menschen beschitzen (Markus 4:36-39).

• Hee jeef Dusende to äten un wees doaderch, daut hee de Menschen met aules vesorjen woat, waut dee em Läwen brucken (Markus 6:41-44).

• Jesus muak opp eene Kjast Wota to Wien, waut wiest, daut hee de Menschen halpen woat, Freid aum Läwen to haben (Johanes 2:7-11).

Woo kjricht eena daut Läwen, waut Gott dee jäwen well, waut am leewen? Doatoo mott eena waut doonen. De Schreft sajcht, wie sellen opp dän Wajch gonen, “dee toom Läwen fieet, un daut sent mau weinich, dee . . . [dän] finjen” (Matäus 7:14).

Woont es de Wajch, dee toom Läwen fieet? Gott sajcht: “Ekj sie de HAR, dien Gott, un ekj lia die daut, waut goot fa die es, un wies die dän Wajch, dän du gonen saust” (Jesaja 48:17). Opp disen Wajch to gonen, es daut baste Läwen.

 Jesus säd: “Ekj sie de Wajch, de Woarheit un daut Läwen” (Johanes 14:6). Wan wie daut doonen, waut Jesus lieed un am nodoonen, dan woa wie Gott noda komen un ons woat daut em Läwen togood komen.

Woo kaun eena dän Wajch finjen, dee toom Läwen fieet? Daut jeft väl Gloowes, oba Jesus säd: “Dee woaren nich aula en daut Himmelrikj komen, dee to mie: Har, Har! sajen. Doa komen bloos dee nenn, dee doa doonen, waut mien Voda em Himmel haben well” (Matäus 7:21). Un hee säd uk: “Jie sullen dee aun äare Frucht kjanen” (Matäus 7:16). De Schreft kaun eenem halpen to seenen, woont de woara Gloowen es (Johanes 17:17).

Woo kaun eena dän Wajch gonen, dee toom Läwen fieet? Wie motten dän kjanen lieren, waut daut Läwen jeft. Biejlikj wäa daut es, woo dee heet, woo dee daut haft, waut dee deit un waut dee von ons haben well. *

Gott well fa de Menschen mea, aus bloos schaufen, äten, Tietvedrief haben un Kjinja opptrakjen. Wie kjennen onsen Schepfa kjanen lieren un siene Frind woaren. Wie kjennen am onse Leew wiesen, wan wie sienen Wellen doonen. Jesus säd: “Daut eewje Läwen es dit: daut see die, dän eensich woaren Gott . . . kjanen lieren” (Johanes 17:3).

Wan wie Gott jefaulen wellen, dan mott wie en ons Läwen veleicht eenjet endren. Daut kaun ons schwierich schienen. Oba ons Läwen woat bäta woaren, wan wie aunfangen opp dän Wajch to gonen, waut toom Läwen fieet. Om de Auntwuaten opp eenje wichtje Froagen äwa Gott to finjen, beeden Jehova siene Zeijen die aun, emsonst de Bibel to studieren, uk wua un wanea daut fa die paussent es. Opp onse Websied www.jw.org kaust du ons schriewen.