De Toopkomes fa dän Prädichtdeenst halpen ons, ons unjarenaunda auntospornen en goode Woakjen Leew to bewiesen, krakjt soo aus de aundre Toopkomes, waut Jehova ons jejäft haft (Heb 10:24-25). Dee sellen aules toop von fief bat säwen Minuten dieren, un doa es met en, de Gruppen entodeelen, to sajen, wua see prädjen sellen, un daut Jebäd. (Wan dit Toopkomen hinja een aundret Toopkomen es, dan saul daut nich mol soo lang dieren.) De Leida saul sikj waut reedmoaken, waut deejanje halpt, waut dän Dach em Deenst gonen. Biejlikj aum Sinowent, wan väle de gaunze Wäakj äwa aul nich sent em Deenst jewast, kunn eena soont derchnämen, waut eena em Deenst sajen kunn. Waut sent noch een poa aundre Sachen, wua eena wudd kjennen äwa räden?

• Eene Iedee toom prädjen von daut Schoolheft fa ons christeljet Läwen un Deenst

• Woo eena eene Vetal aunfangen kaun met daut, waut korz jeworden es, ooda met daut, waut enne Norechten steit

• Waut eena doonen kaun, wan deejanja de Vetal well to Enj brinjen

• Waut eena doonen kaun, wan doa wäa nich aun Gott jleeft, aun de Ewoluzion jleeft, eene aundre Sproak rät ooda eenen aundren Gloowen haft, aus de Menschen jeweenlich en ons Jebiet haben

• Woo eena jewesset von de Websied jw.org brucken kaun, von de JW Library^®-App ooda von de Bibel

• Woo eena eene Sach von ons Jereetschoft fa dän Deenst brucken kaun

• Woo eena opp veschiedne Wäaj prädjen kaun, biejlikj äwa Fon, Breew schriewen, effentlich Zeichnis jäwen, Wadabesuchs moaken ooda Bibelstudiums derchfieren

• Woo eena aun de Sechaheit denkjen kaun, sikj de Menschen aunpaussen, sikj goot oppstalen, goot jesonnen sennen ooda soowaut mea

• Een Poat von daut Heft Eew die em läsen un lieren ooda een Video doavon

• Woo eena dän Deenstpoatna Moot toospräakjen un halpen kaun

• Een Bibelvarsch, waut fa dän Deenst paussent es, ooda eene scheene Erfoarunk