De Breef aun de Reema 3:1-31
3 Waut haft daut dan fa Goodet, een Jud to sennen? Ooda, waut haft de Beschniedunk fa Goodet?
2 Daut haft een deel Goodet. Eenatlei es aulmols, daut Gott de Juden haft de heilje Norecht äwajäft.
3 Oba woo es et dan nu? Wan eenje nich Gloowen hauden, meend daut dan, daut Gott ontru wia?
4 Oba secha nich! Mau rajcht wan jieda Mensch wudd een Läajna sennen, wudd Gott oba emma rajcht sennen, krakjt soo aus de Schreften sajen: “Daut woat sikj utwiesen, daut du rajcht best met daut, waut du sajchst. Du woascht rajcht sennen, wan die wäa rechten woat.”
5 Oba wan onse Ojjerajchtichkjeit Gott siene Jerajchtichkjeit opdakjt, waut sell wie dan sajen? Es Gott dan orrajcht, wan hee siene Wutt wiest? (Ekj räd soo, aus eenje daut tohoolen haben.)
6 Nä, Gott es nich orrajcht! Wan jo, woo wudd hee dan kjennen de Welt rechten?
7 Oba wan daut derch mien Lieejen noch kloara woat, daut Gott tru es, un wan hee dan noch dolla veharlicht woat, dan froagen eenje veleicht: “Wuarom woa ekj dan aus een Sinda jerecht?”
8 Kunn wie nich sajen: “Well wie Schlajchtet doonen, soo daut doa Goodet bie rutkjemt”? Eenje Menschen schmieten ons daut väa, daut wie soont sajen. Oba soone Menschen, waut soont sajen, woaren soon Jerecht kjrieen, aus see sikj daut vedeent haben.
9 Woo es et dan? Hab wie Juden daut dan bäta? Äwaheipt nich! Wiels, soo aus wie ea aul jesajcht haben, sent de Juden uk de Griechen beid unja de Sind,
10 krakjt soo aus jeschräwen steit: “Doa es kjeen jerajchta Mensch, nich mol eena;
11 doa es kjeena, waut daut ensitt, waut jedonen mott; doa es kjeena, waut no Gott sieekjt.
12 Aule haben sikj wajchjedreit; aule sent ondaugboa jeworden; doa es kjeena, waut leeftolich es, nich een eensja.”
13 “Dee äa Hauls es een opnet Grauf; äare Tung brucken see toom aundre veleiden.” “Hinja äare Leppen es Schlangenjeft.”
14 “Äa Mul es voll Flieekjen un Wutt*.”
15 “Dee äare Feet sent bosich, wan daut om dootmoaken* jeit.”
16 “Dee rechten grooten Schoden aun un veuasoaken Lieden,
17 un dän Wajch von Fräd haben dee nich kjanen jelieet.”
18 “Dee haben kjeenen Respakjt fa Gott.”*
19 Wie weeten, daut aules en daut Jesaz fa dee es, waut unja daut Jesaz sent. Daut Jesaz es doatoo, daut jieda Mul stell jemoakt woat, un toom wiesen, daut de gaunze Welt schuldich es ver Gott un de Strof vedeent.
20 Doawäajen kaun kjeena ver Gott fa jerajcht jetalt woaren, doaderch daut hee daut nokjemt, waut daut Jesaz velangt. Daut Jesaz halpt ons, daut kloara to vestonen, waut de Sind es.
21 Oba Gott haft siene Jerajchtichkjeit nu opp eene Wajch openboat, wua daut Jesaz nich met en es, soo aus daut Jesaz un de Profeeten daut verutsäden.
22 Jo, Gott siene Jerajchtichkjeit es openboat worden derch dän Gloowen aun Jesus Christus. Un dits fa aul dee, waut Gloowen haben, wiels doa es kjeen Unjascheet.
23 Wiels aule haben jesindicht un sent daut nich emstaund, Gott siene Harlichkjeit to wiesen.
24 Oba Gott talt dee fa jerajcht wäajen dän Pries, waut Christus Jesus betolt haft toom dee raden. Dits een Jeschenkj von Gott wäajen sien grootet Metleet*.
25 Gott schekjt Jesus aus een Opfa toom de Menschen wada met sikj toopbrinjen derch dän Gloowen aun Jesus sien Bloot. Gott deed dit toom siene ieejne Jerajchtichkjeit wiesen, wiels hee wia jeduldich un vejeef de Sinden von de Vegonenheit.
26 Daut deed hee toom ons nu uk siene Jerajchtichkjeit wiesen, doaderch daut hee soonen Mensch fa jerajcht talt, waut Gloowen aun Jesus haft.
27 Soo, hab wie dan noch irjenteene Uasoak to puchen? Äwaheipt nich. Sull wie doamet puchen, daut wie daut Jesaz hoolen? Nä, bloos wäajen wie daut Jesaz von dän Gloowen nokomen.
28 Wiels wie weeten, daut een Mensch fa jerajcht jetalt woat derch dän Gloowen un nich doaderch, daut dee prooft to doonen, waut daut Jesaz velangt.
29 Ooda es hee bloos de Juden äa Gott? Es hee nich uk de aundre Sorten Menschen* äa Gott? Jo, hee es uk de aundre Sorten Menschen äara.
30 Wäajen Gott bloos eena es, woat hee de Beschnädne uk de Onbeschnädne fa jerajcht talen wäajen dee äaren Gloowen.
31 Moak wie daut Jesaz derch onsen Gloowen dan tonuscht? Äwaheipt nich! Em Jäajendeel: Wie unjastetten daut Jesaz.
Footnooten
^ Ooda: “Bettajet”.
^ Wuatlich: “Bloot vejeeten”.
^ Wuatlich: “Gottesforcht es nich ver dee äare Uagen”.
^ Ooda: “siene onvedeende Leeftolichkjeit”.
^ Ooda: “de Velkja”; “aundre Raussen”.
