Jeschräwen von Matäus 18:1-35
18 No daut kjeemen de Jinja no Jesus un fruagen: “Wäa es dan de Hechsta en daut Kjennichrikj vom Himmel?”
2 Dan roopt Jesus sikj een natet Kjint un stald daut doa medden mank dee
3 un säd: “Ekj saj junt daut soo, aus et es: Wan jie junt nich woaren endren* un soo woaren aus nate Kjinja, dan woa jie opp kjeene Wajch en daut Kjennichrikj vom Himmel nennkomen.
4 Doawäajen, wäa sikj deemootjen woat soo aus dit nate Kjint, dee woat en daut Kjennichrikj vom Himmel de Hechsta sennen.
5 Un wäa soo een natet Kjint en mienen Nomen oppnemt, dee nemt mie uk opp.
6 Oba wäa eent von dise Kjliene, waut aun mie Gloowen haft, tofaulbrinjt, fa dän wudd daut bäta sennen, wan dän een Molsteen aum Hauls jebungen wort, waut met eenen Burra* jedreit woat, un dan medden em Mäa jeschmäten wort.
7 Weehee de Menschen von de Welt, waut aundre tofaulbrinjen. Secha jeit daut nich väatobieejen, daut doa soone sennen woaren, waut aundre tofaulbrinjen, oba weehee dänjanjen, wäa daut deit.
8 Soo, wan diene Haunt ooda dien Foot die dan tofaulbrinjt, dan moak dee auf un schmiet dee wajch von die. Dauts bäta, daut du met eene Haunt un eenen Foot daut Läwen kjrichst, aus daut du beid Henj un beid Feet hast un dan en daut eewje Fia jeschmäten woascht.
9 Krakjt soo uk, wan dien Uag die tofaulbrinjt, dan riet daut ut un schmiet daut wajch von die. Dauts bäta, daut du met een Uag daut Läwen kjrichst, aus daut du beid Uagen hast un dan en de brennende Gehe̱nna* jeschmäten woascht.
10 Seet doano, daut jie kjeenem von dise Kjliene woaren veachten, wiels ekj saj junt, daut dee äare Enjel em Himmel emma mienen Voda em Himmel sien Jesecht seenen.
11 ––*
12 Waut jleew jie? Wan een Maun 100 Schop haud un eent von daut vebiestad sikj, wudd dee Maun dan nich de 99 Schop oppem Boajch loten un sikj oppem Wajch jäwen un daut eene sieekjen, waut sikj vebiestat haud?
13 Ekj saj junt daut soo, aus et es: Wan dee daut finjt, dan freit dee sikj dolla äwa daut eene Schop aus äwa de 99, waut sikj nich vebiestat haben.
14 Krakjt soo uk well mien* Voda em Himmel nich mol haben, daut doa eent von dise Kjliene wajchkjemt.
15 Doawäajen, wan dien Brooda eene Sind jäajen die jedonen haft, dan go auleen no dän un wies dän, waut dee orrajcht jedonen haft*. Wan dee no die horcht, dan hast du dienen Brooda trigjjekjräajen.
16 Oba wan dee nich no die horcht, dan nemm noch eent ooda twee met die met, soo daut aules kaun met twee ooda dree Zeijen kloa woaren.
17 Wan dee nich no äant horcht, dan räd met de Vesaumlunk*. Wan dee uk nich mol no de Vesaumlunk horcht, dan tal dän soo aus eenen Mensch von de Welt* ooda soo aus eenen Takskollakjta.
18 Ekj saj junt daut soo, aus et es: Wautemma jie oppe Ieed binjen woaren, woat em Himmel aul jebungen sennen. Un wautemma jie oppe Ieed loosmoaken woaren, woat em Himmel aul loosjemoakt sennen.
19 Ekj saj junt daut soo, aus et es: Wan twee von junt hia oppe Ieed sikj toop eenich sent, no waut wichtjet to froagen, dan woat mien himlischa Voda daut soo romkomen loten.
20 Wäajens, wua twee ooda dree toop sent en mienen Nomen, doa sie ekj medden mank.”
21 Dan kjeem Petrus no am un säd: “Har, wan mien Brooda jäajen mie sindicht, woo väl mol saul ekj dän daut vejäwen? Bat 7 mol?”
22 Jesus säd to dän: “Ekj saj die, nich bloos 7 mol, oba soogoa 77 mol.
23 Dauts, wuarom daut Kjennichrikj vom Himmel met eenen Kjennich to vejlikjen es, waut met siene Sklowen well veräakjnen.
24 Aus hee aunfunk, met dee to veräakjnen, brochten se am eenen Maun, waut am 10,000 Tale̱nten* schuldich wia.
25 Oba wiels hee daut nich trigjtolen kunn, velangd de Kjennich, daut se am un siene Fru un siene Kjinja un aules, waut hee haud, vekjeepen sullen toom de Schult betolen.
26 Dan foll dis Sklow opp kjneees* un prachad am un säd: ‘Hab Jedult met mie; ekj woa die daut aula trigjtolen.’
27 Wäajen dän Kjennich daut äwa dän Sklow jaumad, strikjt hee am de Schult un leet am gonen.
28 Oba aus de Sklow von doa veleet, troff hee eent von siene Met-Sklowen, dee am 100 Dena̱rius* schuldich wia. Hee pakt dän en un funk dän aun to warjen un säd: ‘Betol mie aules, waut du mie schuldich best.’
29 Dan foll sien Met-Sklow oppe Kjneeen un prachad am un säd: ‘Hab Jedult met mie; ekj woa die daut betolen.’
30 Oba hee horcht nich no dän. Hee leet am em Jefenkjnis stoppen, bat dee am daut betolen kunn, waut dee am schuldich wia.
31 Aus dän siene Met-Sklowen daut sagen, waut doa passieed, wieren dee sea vestalt. Dan jinjen see no äaren Kjennich un säden dän krakjt, waut doa aunjegonen wia.
32 Dan roopt de Kjennich sikj dän un säd: ‘Du beesa Sklow! Ekj hab die aule Schult jestrikjt, aus du mie prachren deetst.
33 Wurscht du dienen Met-Sklow nich uk haben sult Metleet wiesen, soo aus ekj die Metleet wees?’
34 Dan fua dän Kjennich de Wutt nenn un hee äwajeef dän Sklow de Jefenkjniswoaka, bat dee am aules betolt haud, waut hee am schuldich wia.
35 Krakjt soo woat mien himlischa Voda met jiedrem eenen von junt omgonen, wan jie junen Brooda nich von Hoaten vejäwen.”
Footnooten
^ Ooda: omkjieren.
^ Ooda: “Äsel”.
^ See Wuaterkjläarunk bie “Gehe̱nna”.
^ Dis Varsch kjemt en eenje Biblen väa, oba en väl griechische Schreften, waut aul ella sent, es dee nich bennen.
^ Ooda woomäajlich: “jun”.
^ Wuatlich: “wies dän trajcht”.
^ Hia rät daut gaunz kloa doavon, daut dee to de Veauntwuatelje enne Vesaumlunk räden saul (vejlikj met 5. Mose 19:16-17). See Wuaterkjläarunk bie “Vesaumlunk”.
^ Aulsoo eenen Nichjud, waut nich aun Gott jleeft.
^ 10,000 Tale̱nten Selwa es soo väl aus 60,000,000 Dena̱rius. See Wuaterkjläarunk bie “Tale̱nt”.
^ Ooda: hee bekjt sikj.
^ See Wuaterkjläarunk bie “Dena̱rius”.
