Julia äare Elren un Frind sajen ar emma wada, woo denn ar lat, oba jiedatsmol, wan see sikj em Spieejel sitt, denkjt see: “Ekj sie väl too fat! Ekj mott onbedinjt aufnämen!”

Nu denkjt Julia no, waut see doonen kunn, om noch leichta to woaren: “Bloos een poa Kilo.” See jrebbelt, aus see veleicht sull een poa Doag hungren . . .

Waut wurscht du doonen, wan die daut soo jinkj aus Julia?

Daut baudat nich, wan du die doaräwa Jedanken moakst, woo die lat. Hast du jewist, daut de Schreft von miere Menschen sajcht, daut dee schmock leet, soo aus von Sara, Rahel, Abigajil, Josef un David? Von de Mejal Abischag sajcht daut mau rajcht, daut dee “butajeweenlich schmock” leet (1. Kjennichs 1:4, NW).

Oba eenje sent äwamotich sea doarom bekjemmat, daut äant saul schmock loten. Doaderch kjennen groote Trubbels oppkomen. Läs mol dit hia:

• Aus se waut Mejalen befruagen, säden 58 Prozent, daut see too schwoa wieren. Oba rajcht jesajcht wieren bloos 17 Prozent too schwoa.

• Opp eene aundre Sauz säden 45 Prozent von soone Frues, waut aul too denn wieren, daut see too fat wieren!

• Eenje junge Menschen jankad soo sea auftonämen, daut dee Anorexia jekjräajen haben; daut es eene läwesjefäadelje Krankheit, wua dee schia doothungren.

 Wan du beduascht, aus du Anorexia ooda sest eenen Trubbel hast met äten, dan froag no Help. Du wurscht kjennen met eent von diene Elren ooda met sestwäm räden, waut du vetrust. De Schreft sajcht: “Een Frint woat emma Leew bewiesen, un een Brooda es jebuaren toom em Trubbel biestonen” (Spricha 17:17).

Daut, waut eenem werkjlich schmock moakt, es, waut fa een Mensch eena ennalich es. Denkj mol aun David sienen Sän Absalom. Von dän sajcht de Schreft:

“Doa wia kjeena en Israel dee soone Aunerkjanunk kjrieech aus Absalom fa woo schmock am daut leet. [Doa] . . . wia aules aun am sea toom bewundren schmock” (2. Samuel 14:25).

Oba dis Jung wia grulich stolt un onopprechtich un wull jieren aunjeseenen sennen! Doawäajen rät de Schreft nich sea goot von Absalom; dee sajcht, woo ontru dee wia un daut et een vehausta Merda wia.

Kjeen Wunda, daut de Schreft ons dän Rot jeft:

“Trakjt junt de niee Perseenlichkjeit aun” (Kolossa 3:10, NW).

“Lot jun Schmuck nich bloos fonn buta senne . . . Leewa lot daut fonn benne senne, em Hoat” (1. Petrus 3:3-4, Reimerbibel).

Daut es nich orrajcht, wan eenem saul schmock loten, oba väl wichtja es daut, waut fa een Mensch eena es. Fa aundre es daut aulmols väl mea wieet, wan eena een gooda Mensch es, aus wan eena groote Musklen ooda een schmocket Jeschekj haft. Eene Mejal, waut Phylicia heet, sajcht: “Wan die schmock lat, kjikjen de Menschen veleicht no die, oba waut dee daut baste von die em Denkj hoolen, es daut goode, waut du deist, un woo du ennalich best.”

Best du foaken ontofräd doamet, woo die lat?

Haft die daut mol jejankat, die opperieren to loten ooda grulich sea neiw to sennen, waut du atst un woo väl, bloos daut die schmocka lat?

Waut wurscht du jleichen, aun die to endren? (Tieekjen daut aun.)

• WOO GROOT DU BEST

• DIENE WICHT

• DIENE HOA

• DIEN JESCHEKJ

• DIEN JESECHT

• DIENE HUT

Wan du bie de ieeschte beid Froagen daut “Jo” jetieekjent hast un bie de dredde Froag dree ooda mea Sachen aunjetieekjent hast, dan es daut goot mäajlich, daut die fa aundre to beseenen lang nich soo domm lat, aus du denkjst. Eena moakt sikj leicht too väl Jedanken doaräwa, woo eenem lat (1. Samuel 16:7).