FROAG 6
Waut, wan aundre mie metrieten wellen?
WAUT WURSCHT DU DOONEN?
Fraunz sitt twee von siene Schoolpoatna opptoo no sikj komen, un fuaz fangt am daut Hoat aun to bumsen. Dise Wäakj haben se am aul twee Mol aunjehukt to schmieekjen. Nu proowen see aul wada.
De ieeschta Jung sajcht:
“Best aul wada auleen? Hei, kjanst disen nieen Frint aul?”
Un äwadäm plinkjat dee metem Uag un kjricht sikj waut ut de Fupp un helt Fraunz daut han.
Fraunz sitt de Zegoa, waut de Jung tweschen de Finjasch helt. Nu bumst am daut Hoat noch dolla.
“Nä”, sajcht Fraunz. “Ekj hab junt aul jesajcht, daut ekj nich . . .”
De tweeda Jung rät doa mank un sajcht: “Hab nich soo Angst!”
Fraunz ropt aul sienen Moot toop un sajcht: “Ekj hab nich Angst!”
De tweeda Jung lajcht sienen Oarm opp Fraunz sienen Schulla un sajcht natjes: “Nemm dee bloos.”
De ieeschta Jung helt Fraunz de Zegoa noch dolla verem Jesecht un fuschelt: “Wie woaren daut nich wiedasajen. Daut woat kjeena en.”
Wan du Fraunz wieescht, waut wurscht du doonen?
DENKJ IEESCHT MOL NO!
Haben Fraunz siene Schoolpoatna doaräwa nojedocht, waut see deeden? Haben dee daut ut sikj selfst jedonen? Veleicht nich. Jeweenlich loten dee sikj von aundre metrieten un doonen bloos, waut dee doonen, daut see bie dee goot aunjeseenen sent.
Wan die daut nu soo jinkj, waut wurscht du dan doonen kjennen, daut aundre die nich metreeten?
-
SIE VÄABEDOCHT
De Schreft sajcht: “De kluake seenen daut Ojjlekj komen un brinjen sikj utem Stich, oba de jlikjeltje gonen doa nenn un motten doafäa lieden” (Spricha 22:3).
Foaken sitt eena dän Trubbel aul von wiet auf. Saj wie mol, du sitst aul von een Enj auf, daut diene Schoolpoatna schmieekjen. Wan du eenen Trubbel em verut komen sitst, dan kaust du die doaropp reedmoaken.
-
DENKJ NO
De Schreft sajcht: “Hoolt jun Jewessen rein” (1. Petrus 3:16).
Denkj doaräwa no: “Woo wudd mie daut enne Lenjd gonen, wan ekj metmuak?” Veleicht wurscht du diene Poatna een Stootje toom Jefaulen läwen, oba woo wudd die daut lota dan gonen? Wurscht du waut doonen, waut du fa orrajcht talst, bloos daut diene Schoolpoatna die jleichen? (2. Mose 23:2).
-
SIE DIE EENICH
De Schreft sajcht: “De Weise ferchten sikj beeset to doonen” (Spricha 14:16).
Irjentwanea motst du die eenich woaren, waut du doonen west, un dan doamet läwen. De Schreft rät von Menschen, waut sikj daut rajchte wälden, soo aus Josef, Hiob un Jesus. Oba dee rät uk von Kain, Esau un Judas: Dee wälden sikj daut schlajchte. Waut woascht du doonen?
De Schreft sajcht: “Doo goodet” (Psalm 37:3). Wan du die ieescht em kloaren best, woo daut utkjemt, un du die eenich best, dan es daut foaken goanich soo schwoa, kloa to sajen, waut du west – un daut feelt sikj dan goot.
Daut fält nich, diene Schoolpoatna waut väatoprädjen. De mieeschte Tiet rieekjt daut too, bloos kloa un dietlich NÄ to sajen. Ooda du wurscht uk sajen kjennen:
-
“Ekj nich!”
-
“Soo waut doo ekj nich!”
-
“Jie weeten goot, daut ekj nich woa!”
Waut doa talt, es, daut du fuaz waut sajchst un onen Angst. Du woascht die wundren, woo haustich diene Poatna dan stell sent!
MET SPOTT OMGONEN
Wan du die von diene Poatna spälen latst, dan best du soo aus eene Maschien, waut dee kontrollen
Waut, wan aundre sikj äwa die domm haben? Waut, wan dee sajen: “Waut’s doamet orrajcht, kjnipt die daut?” Soont hieet eena leicht mol mank eenem siene Poatna. Waut kaust du doonen? Du kaust tweeatlei doonen:
-
Du kaust bloos metmoaken. Kaust sajen: “Daut’s soo, ekj hab Angst!” Un dan sajen, wuarom.
-
Du kaust uk waut trigjsajen. Du kust sajen, wuarom du daut nich deist, un dan sajen: “Ekj docht nich, daut soone kluake Menschen schmieekjten.”
Wan de aundre bloos wieda spotten, dan velot doa! Hool em Denkj: Je lenja du doa blifst, je oaja woat daut. Oba wan du doa velatst, dan wiest du, daut du die nich wäajen aundre endren woascht.
Rajcht jesajcht kaust du die nich von aul dit utem Stich brinjen. Oba du kaust die eenich sennen, waut du doonen west, opp dien Stekj stonen bliewen un selfst de Kontroll haben. Soo kaust du dien Läwen selfst kontrollieren (Josua 24:15).
Veleicht jleichst du uk dit
WAUNTTOFEL-VIDEOS
Lot die nich von aundre metrieten!
Hia kaust du veatlei seenen, waut die de Krauft jäwen kaun, fa die selfst to entscheiden.
