42. KAPITEL
Waut sajcht de Schreft äwa befriet un onbefriet sennen?
Opp eenje Städen jleewen de Menschen, daut eena mau dan kaun schaftich sennen, wan eena sikj befriet. Oba nich aule Befriede jeit daut scheen un uk nich aule Onbefriede jeit daut schlajcht. De Schreft sajcht, daut beides een Jeschenkj es.
1. Waut vonne goode Sieden haft daut, onbefriet to sennen?
De Schreft sajcht: “Wäa sikj befrieen deit, deit rajcht; un wäa sikj nich befrieen deit, deit noch bäta” (läs 1. Korinta 7:32-33, 38). Waut meent daut, wan daut sajcht, wäa sikj nich befriet, deit “noch bäta”? Onbefriede Christen brucken sikj nich Sorjen moaken äwa daut, waut äaren Ehepoatna fält, un soo sent dee jeweenlich friea. Biejlikj kjennen dee mea em Deenst doonen, soo aus em Utlaunt de goode Norecht prädjen. Un daut baste es: Dee haben mea Tiet toom Jehova noda komen.
2. Waut vonne goode Sieden haft daut, em Jesaz befriet to sennen?
Befriet sennen haft uk siene goode Sieden. De Schreft sajcht, daut äare “twee sennen, es bäta aus auleen sennen” (Liera 4:9). Daut es besonda dan soo, wan Christen sikj en äaren Ehestaunt no biblische Gruntsauzen rechten. Soon Poa, waut sikj em Jesaz befriet, vesprakjt, daut dee sikj unjarenaunda emma woaren leewen un respakjten. Un soo feelen dee sikj foaken sechra, aus wan dee bloos wudden toopläwen. De Ehestaunt es uk de basta Aunfank toom eene Famielje haben.
3. Woo denkjt Jehova äwa dän Ehestaunt?
Aus Jehova daut ieeschte Poa toopfried, säd hee: “Een Maun [jeit] von siene Elren wajch, un veeenicht sikj met siene Fru, un see sent eent” (1. Mose 2:24). Jehova well haben, daut een Poa Lied sikj saul leewen un toopbliewen, soo lang aus dee läwen. Gott jeft bloos dan de Frieheit, sikj scheeden to loten, wan eena von de Ehepoatna haft Huararie begonen. Wan daut soo es, jeft Jehova dän truen Ehepoatna de Frieheit to entscheiden, aus dee sikj well scheeden loten (Matäus 19:9). a Jehova sajcht Christen daut auf, mea aus eenen Ehepoatna to haben (1. Timotäus 3:2).
DOLLA UNJASTONEN
Lia, woo du kaust schaftich sennen un woo du Jehova kaust schaftich moaken, krakjt endoont aus du befriet best ooda nich.
4. Nutz daut goot ut, wan du nich befriet best
Jesus sach daut soo aus een Jeschenkj, nich befriet to sennen (Matäus 19:11-12). Läst Matäus 4:23 un dan got toop dise Froag derch:
-
Woo nuzt Jesus daut ut, daut hee nich befriet wia, toom sienen Voda deenen un aundre halpen?
Onbefriede Christen kjennen äare Tiet goot utnutzen un schaftich sennen, soo aus Jesus wia. Kjikjt daut VIDEO un dan got toop de Froag derch, waut hia aunjejäft es.
-
Woo kjennen Christen daut fein utnutzen, wan dee nich befriet sent?
Hast du daut jewist?
De Schreft sajcht nich, woo oolt eena mott sennen toom sikj befrieen. Oba dee rot ons too to wachten, bat wie “oolt jenuach” sent. En de Jugentjoaren kaun daut Velangen, Sex to haben, sea stoakj sennen, un doaderch kaun eena dan veleicht nich goode Entscheidungen moaken (1. Korinta 7:36).
5. Wäl die eenen gooden Ehepoatna
Eent von de wichtichste Entscheidungen, waut du jeemols moaken woascht es, die eenen Ehepoatna wälen. Läst Matäus 19:4-6, 9 un dan got toop dise Froag derch:
-
Wuarom sull een Christ sikj nich too haustich befrieen, onen goot to äwalajen?
De Schreft kaun die halpen, eenen gooden Ehepoatna to finjen. Daut wichtichste es, daut du no wäm kjikjst, waut Jehova leeft. b Läst 1. Korinta 7:39 un 2. Korinta 6:14. Dan got toop dise Froagen derch:
-
Wuarom sell wie ons bloos met wäm befrieen, waut uk een Christ es?
-
Woo jleefst du, wudd Jehova doaräwa denkjen, wan wie ons met wäm befrieden, waut am nich leewd?
Wan twee Sorten Tieren unja een Joch jespaunt sent, dan woaren dee beid lieden. Soo es daut uk, wan een Christ sikj met wäm befriet, waut nich een Christ es. Dan woat dee een deel Trubbels haben
6. Denkj soo äwa de Ehe, aus Jehova deit
Ieeschtemma en Israel leeten eenje Mana sikj von äare Frues scheeden, wäajen dee bloos aun sikj selfst dochten. Läst Maleachi 2:13-14, 16 un dan got toop dise Froag derch:
-
Wuarom es Jehova daut jäajenaun, wan sikj wäa onen biblischen Grunt scheeden lat?
Ehebruch un Ehescheedunk brinjt väl Lieden opp dän truen Poatna un opp de Kjinja
Kjikjt daut VIDEO un dan got toop de Froag derch, waut hia aunjejäft es.
-
Wan du met wäm befriet best, waut Jehova nich leeft, waut kaust du doonen, daut du doawäajen eenen gooden Ehestaunt hast?
7. Komm daut no, waut Jehova äwa dän Ehestaunt sajcht
Een Mensch mott sikj veleicht sea aunstrenjen, om daut notokomen, waut Jehova äwa de Ehe sajcht. c Oba Jehova säajent dee, waut daut doonen. Kjikjt daut VIDEO.
Läst Hebräa 13:4 un dan got toop dise Froagen derch:
-
Jleefst du, es daut too strenj, waut Jehova von de Ehe velangt? Wuarom wurscht du daut sajen?
Jehova velangt von eenen Christ, waut sikj befriet ooda scheeden lat, daut dee daut em Jesaz deit, wäajen de Rejierungen daut en de mieeschte Lenda velangen. Läst Titus 3:1 un dan got toop dise Froag derch:
-
Wan du befriet best, best du die secha, daut dien Ehestaunt uk verem Jesaz jeltich es?
EENJE FROAGEN VELEICHT: “Wuarom sell wie ons befrieen? Kjenn wie nich bloos soo toopläwen?”
-
Waut wurscht du dan sajen?
KAPITEL TOOPJEFOT
Befriet sennen un onbefriet sennen, sent beides Jeschenkja von Jehova. Befriede un uk Onbefriede kjennen een scheenet Läwen haben, wan dee no Jehova sienen Wellen läwen.
Waut hast du jelieet?
-
Woo kaun een Mensch sien onbefriedet Läwen goot utnutzen?
-
Wuarom sajcht de Schreft, daut wie ons bloos sellen met soone befrieen, waut uk Jehova leewen?
-
Woont es no de Schreft no de eensja Grunt, sikj scheeden to loten?
MEA NOSIEEKJEN
Waut meent daut, sikj bloos met wäm to befrieen, waut “däm Harn [aunjehieet]”?
Acht en dit Video opp dreeatlei, waut die halpen kaun, goode Entscheidungen to moaken, wan du wäm kjanen lieescht un die befrieen west.
Kjikj, wuarom een Brooda daut väl mea wieet wia, waut Jehova am jeef, aus daut, waut hee oppjejäft haud.
Waut saul eena äwalajen, ea eena doaräwa nodenkjt, sikj scheeden to loten ooda uteneen to gonen?
“Daut ieren, ‘waut Gott jebungen haft’” (De Woaktorm, Dezamba 2018)
b Opp eenje Städen wälen de Elren dän Ehepoatna fa äare Kjinja. Wan daut soo es, dan sellen leeftolje Elren wäm sieekjen, waut Jehova leeft un nich bloos doano kjikjen, woo väl Jelt dee haft ooda woo goot dee aunjeseenen es.
c Wan du onbefriet met wäm toopläfst, dan kaust du selfst entscheiden, aus du die west met dänjanjen befrieen ooda dän veloten.
Veleicht jleichst du uk dit
WAUT FOAKEN JEFROACHT WOAT
Woo es een Bibelstudium met Jehova siene Zeijen?
Wan Jehova siene Zeijen emsonst met die de Bibel studieren, dan kaust du soone Bibel brucken, aus du west. Doa kaun diene gaunze Famielje met bie sennen un uk Frind, wan du dee enloden west.
