DAUT latste Buak enne Bibel, de Openboarunk, jeft aule Menschen Hopninj. Doa bennen schrift Johanes von Visionen, wua hee sach, woo sikj daut schlieslich erfellen woat, waut Gott sikj väajenomen haft.

En de ieeschte Vision deit Jesus vom Himmel ut eenje Vesaumlungen lowen un Rot jäwen. Dan sitt Johanes Gott sienen Troon em Himmel un woo de Jeista Gott preisen.

Waut Gott sikj väajenomen haft, kjemt emma noda. Johanes sitt Jesus en eene Vision aus een Laum un dän woat eene Schreftroll jejäft met säwen Säajels. Aus de ieeschte vea Säajels opjemoakt woaren, komen vea Rittasch verendach. De ieeschta, opp een wittet Pieet, es Jesus aus Kjennich. De dree aundre Pieed haben aula eene veschiedne Kalia. Dee bedieden Kjrich, Hungaschnoot un Krankheiten, waut daut en de latste Tiet jeft. Aus daut säwende Säajel opjeit, blosen doa säwen Trompeeten. Dee bedieden, daut Gott sien Uadeel bekauntjemoakt woat. Doamet komen säwen Ploagen, waut Gott sienen Oaja wiesen.

Johanes sitt dan een kjlienet Junkje, waut jroz jebuaren es. Daut steit fa Gott sien Kjennichrikj, waut em Himmel es oppjestalt worden. Doahinja kjemt daut em Himmel to eenen Kjrich un Soton woat met siene beese Enjel toop raufjeschmäten no de Ieed. “Wee dee, dee opp de Ieed . . . wonen”, sajcht eene lude Stemm. De beesa Fient es sea wuttich, wiels dee weet, am blift mau weinich Tiet (Openboarunk 12:12).

Johanes sitt Jesus em Himmel aus een Laum. Met am toop sent 144 000, dee von de Menschen oppe Ieed sent utjewält worden. Dee woaren aus Kjennichs “met am toop rejieren”. Soo wiest de Openboarunk, daut dise 144 000 uk to dän vesproaknen Nokomen jehieren (Openboarunk 14:1; 20:6).

De majchtje Harscha oppe Ieed doonen sikj aula toop “to dän aulmajchtjen Gott sien grooten Dach toom Kjrich”. Dis Kjrich woat en de Bibel Harmagedon jenant. De Harscha kjamfen jäajen Jesus, dee opp daut witte Pieed de Väaschta von een himlischet Häa es. Aule Harscha von dise Welt woaren venicht. Soton woat jebungen un Jesus un de 144 000 rejieren fa dusent Joa äwa de Ieed. Doahinja woat Soton venicht (Openboarunk 16:14; 20:4).

Waut woaren de dusent Joa, wua Christus met de 144 000 toop rejieet, fa jehuarsome Menschen brinjen? Johanes schrift: “Un Gott woat an aule Tronen von de Uagen weschen. Doa woat kjeen Doot ooda Trua ooda Hielen ooda Weedoag mea sennen, wiels waut verhäa wia, es veschwungen” (Openboarunk 21:4). De Ieed woat een Paradies!

Doamet es gaunz kloa, om waut daut enne Bibel jeit: daut derch dän Messias sien Kjennichrikj Jehova sien Nomen jeheilicht woat un fa emma bewäsen woat, daut hee daut Rajcht haft to harschen!

Stett sikj opp daut Bibelbuak Openboarunk.