7. POAT
Waut es Gott sien Kjennichrikj?
1. Waut es Gott sien Rikj?
Wuarom es Jesus soo een gooda Kjennich? (MARKUS 1:40-42)
Gott sien Rikj es eene Rejierunk em Himmel. Daut woat enne Städ aule aundre Rejierungen harschen un doano seenen, daut Gott sien Wellen em Himmel un oppe Ieed jedonen woat. Boolt woat dit Rikj aules doonen, waut eena sikj von eene goode Rejierunk wenscht. Daut woat aule Menschen veeenjen. Es daut nich eene goode Norecht? Läs Daniel 2:44; Matäus 6:9-10; 24:14.
Jieda Kjennichrikj haft eenen Kjennich. Jehova haft sienen Sän Jesus Christus en sien Rikj toom Kjennich bestemt. Läs Openboarunk 11:15.
Kjikj daut Video Waut es Gott sien Kjennichrikj?
2. Wuarom es Jesus de basta Kjennich?
Gott sien Sän es de basta Kjennich. Dee es metfeelent un sitt emma nom rajchten (Matäus 11:28-30). Dee haft uk de Macht, de Menschen to halpen. Jesus woat vom Himmel äwa de gaunze Ieed rejieren. Nodäm Gott Jesus vom Doot oppwuak, fua dee trigj nom Himmel un wacht bie Gott siene rajchte Sied, bat hee am de Kjennichsmacht jeef (Hebräa 10:12-13). Läs Daniel 7:13-14.
3. Wäa woat met Jesus toop rejieren?
“Gott siene heilje” woaren met Jesus toop em Himmel rejieren (Daniel 7:27). De ieeschte, waut to dise Grupp jehieeden, wieren Jesus siene true Apostel. Un bat vondoag wält Jehova true Mana un Frues ut, waut dan uk to siene Heilje jehieren. Wan dee stoawen, stonen dee met eenen jeisteljen Kjarpa opp, soo aus Jesus. Läs Johanes 14:1-3; 1. Korinta 15:42-44.
Woo väle woaren nom Himmel komen? Jesus säd, daut wia eene “kjliene Häad” (Lukas 12:32). Met aules toop sent daut 144 000, waut met Jesus äwa de Ieed rejieren woaren. Läs Openboarunk 14:1.
4. Waut passieed, aus Jesus aunfunk to rejieren?
Gott sien Rikj funk 1914 aun to rejieren. * Waut deed Jesus daut ieeschte, aus hee Kjennich wort? Hee schmeet dän Soton un de beese Jeista utem Himmel rut. De Soton wort wuttent doll un funk aun, väl Trubbel oppe Ieed to moaken (Openboarunk 12:7-10, 12). Von dan aun wort daut oppe Ieed emma schlemma. Kjrich, Hungaschnoot, Krankheiten un Ieedbäben sent een Tieekjen, daut Gott sien Rikj boolt volstendich äwa de Ieed harschen woat. Läs Lukas 21:7, 10-11, 31.
5. Fa waut kjemt Gott sien Kjennichrikj opp?
Gott sien Rikj sorcht nu aul doafäa, daut äwaraul de goode Norecht jeprädicht un soo eene groote Häad Menschen von aule Velkja toopjebrocht woat. Millionende deemootje Menschen jehorchen Jesus aus äaren Harscha. Dee woaren beschizt woaren, wan Gott sien Rikj dise beese Welt venichten woat. Daut ons daut togood kjemt, waut Gott sien Rikj deit, mott wie lieren, Jesus aus Kjennich to jehorchen. Läs Openboarunk 7:9, 14, 16-17.
En eene Tiet von 1 000 Joa woat Gott sien Rikj aul daut towäaj schaufen, waut Gott sikj mol fa de Menschheit väajenomen haud. De gaunze Ieed woat een Paradies woaren. Dan woat Jesus sienen Voda daut Kjennichrikj trigjäwen (1. Korinta 15:24-26). Wäm wurscht du jleichen, von Gott sien Rikj to vetalen? Läs Psalm 37:10-11, 29.
^ Varsch 6 En daut Buak Waut lieet de Schreft werkjlich? opp de Sieden 215-218 jeit notoläsen, woo biblische Profezeiungen opp daut Joa 1914 hanwiesen.
