10. POAT
Aun waut es de woara Gloowen to kjanen?
1. Jeft daut mau eenen woaren Gloowen?
“Seet junt väa fa de faulsche Profeeten” (MATÄUS 7:15)
Jesus lieed siene Nofolja bloos eenen Gloowen. Hee vejlikjt dän woaren Gloowen met eenen Wajch, waut toom eewjen Läwen fieet, un säd, daut sent mau weinich, waut dän finjen (Matäus 7:14). Gott talt bloos dee Relijion fa rajcht, waut met de Woarheit ut de Schreft stemt. Dee, waut Gott rajcht aunbäden, jehieren aula to dänselwjen Gloowen. Läs Johanes 4:23-24; 14:6; Efeesa 4:4-5.
Kjikj daut Video Es Gott daut endoont, waut von Gloowen wie haben?
2. Waut säd Jesus äwa faulsche Christen?
“Dee sajen, see kjanen Gott, oba met äare Woakjen velieejen see daut” (TITUS 1:16)
Jesus säd, doa wudden faulsche Profeeten sennen un dän Christengloowen veorreinjen. Dee wudden sikj uk Christen nanen, un daut wudd soo loten, aus wudden dee Gott rajcht aunbäden. Woo weet eena dan, woont de woare Christen sent? Dee sent aun daut to kjanen, waut dee doonen un woo dee sikj vehoolen. Läs Matäus 7:13-23.
3. Aun waut sent woare Christen to kjanen?
Well wie doatoo mol fief Sachen betrachten:
-
Woare Christen seenen de Schreft aus Gott sien Wuat aun. Dee bemieejen sikj opp iernst, no de Schreft to läwen un stetten sikj nich opp Menschenjebooten (Matäus 15:7-9). Gott siene woare Deena komen uk selfst daut no, waut see aundre lieren. Läs Johanes 17:17; 2. Timotäus 3:16-17.
-
Jesus siene woare Nofolja ieren Gott sienen Nomen, Jehova. Jesus ieed Gott sienen Nomen doaderch, daut hee dän bekauntmuak. Hee holp de Menschen, Gott kjanen to lieren, un lieed an bäden, daut Gott sien Nomen sull heilich jehoolen woaren (Matäus 6:9). Wäa moakt en diene Jäajent Gott sienen Nomen bekaunt? Läs Johanes 17:26; Reema 10:13-14.
-
Woare Christen prädjen Gott sien Rikj. Bloos Gott sien Rikj kaun de Menschen werkjlich halpen. Gott wull, daut Jesus de goode Norecht vom Kjennichrikj prädijd, un hee deed daut bat aun sienen Doot (Lukas 4:43; 8:1; 23:42-43). Jesus säd, daut siene Nofolja dit Rikj uk prädjen wudden. Waut denkjst du? Woont sent deejanje, waut vondoag no de Menschen gonen un an von Gott sien Rikj vetalen? Läs Matäus 24:14.
-
Jesus siene Nofolja sent nich een Poat von dise beese Welt. See mischen sikj nich en dee äare Striedarieen en, uk nich en de Politikj (Johanes 17:16; 18:36). Un see loten sikj uk nich von de Welt äa schlajchtet denkjen un haundlen metrieten. Läs Jakobus 4:4.
-
Bie Gott siene Deena es de woare Leew to seenen. Dee lieren ut de Schreft, Menschen von aule Velkja to achten. Dee unjastetten uk kjeenen Kjrich, soo aus de faulsche Gloowes daut foaken sea jedonen haben (Micha 4:1-3). Woare Christen brucken äare Tiet, Krauft un Jelt, om aundre to halpen un Moot to moaken. Läs Johanes 13:34-35; 1. Johanes 4:20.
4. Kaust du seenen, woont de woara Gloowen es?
Woont sent dee, waut aul äare Lieren oppe Schreft stetten un Gott sienen Nomen ieren? Wäa moakt bekaunt, daut bloos Gott sien Rikj de Menschen halpen kaun? Woone Grupp Menschen haft de woare Leew un unjastett kjeenen Kjrich? Waut denkjst du? Läs 1. Johanes 3:10-12.
