DE MENSCHEN hia oppem Bilt sent Jesus siene Nofolja. See hauden Jesus jehorcht un wieren en Jerusalem jebläwen. Aus see aula toop wachten deeden, ruzhd daut met eemol jescheit en daut gaunze Hus. Daut hieed sikj soo aus een stoakja Wint. Un plazlich hauden aule Jinja Tungen soo aus von Fia oppem Kopp. Kaust du de Fiaflaumen opp jiedren eenen sienen Kopp seenen? Waut haud daut aules to bedieden?

Daut wia een Wunda! Jesus wia wada trigj em Himmel bie sienen Voda un deed Gott sienen heiljen Jeist opp siene Nofolja utjeeten. Weetst du, waut see derch dän heiljen Jeist doonen kunnen? See kunnen met eemol veschiedne Sproaken räden.

Väle Menschen en Jerusalem hauden daut stoakje Jeruzh jehieet un kjeemen noseenen, waut doa wia. Eenje wieren von aundre Lenda. Dee wieren no Jerusalem jekomen to daut israelitische Pinjstfast. Dise Jast kunnen sikj nich sea jenuach wundren! See hieeden de Jinja opp äare ieejne Sproaken von aul de goode Dinja räden, waut Gott jedonen haud.

De Jast säden: ‘Dee sent doch aula von Galiläa. Woo kjennen dee dan onse Sproaken räden?’

Dan stunt Petrus opp un erkjläad an daut. Met lude Stemm vetald hee, woo Jesus wia omjebrocht worden un daut Jehova am wada oppjewakjt haud. ‘Nu es Jesus em Himmel aun de rajchte Sied bie Gott’, säd Petrus. ‘Un hee haft dän heiljen Jeist utjegoten, soo aus hee daut vesproaken haud. Doawäajen kjenn jie dise Wunda seenen un hieren.’

Aus Petrus dit aules vetald, wieren väle Menschen truarich äwa daut, waut met Jesus passieet wia. ‘Waut sell wie doonen?’, fruagen see. Petrus säd: ‘Jie motten jun Läwen endren un junt loten deepen.’ Noch dänselwjen Dach leeten sikj ojjefäa 3 000 Menschen deepen un worden Jesus siene Nofolja.