KJIKJ mol dis nata Jung, waut hia met de elre Mana vetalt. Daut sent Lierasch en Gott sienen Tempel en Jerusalem. Un de Jung es Jesus. Hee haft aul een natet Schoof jewossen. Hee es nu aul twalf Joa.

De Lierasch motten sikj sea wundren, woo väl Jesus von Gott un von de Bibel weet. Oba wuarom sent Josef un Maria nich hia? Wua sent dee? Well wie mol seenen.

Jieda Joa jinkj Josef met siene Famielje no Jerusalem to een besondret Fast. Daut wort daut ‘Passafast’ jenant. Daut wia eene lange Reis von Nazaret bat Jerusalem. To dee Tiet jeef daut noch kjeene Koafoatieja uk kjeenen Zuach. De mieeschte Menschen jinjen tofoot, un soo brukten see ojjefäa dree Doag fa de Reis no Jerusalem.

Josef un Maria hauden nu aul eene groote Famielje. See musten sikj om de kjlandre Breeda un Sestren von Jesus kjemren. Aus daut Fast ieescht derch wia, jeewen Josef un Maria sikj met äare Kjinja oppem Wajch trigj no Nazaret. See dochten, Jesus kjeem met aundre met. Oba aus see utgangs Dach aunhilden toom Nacht bliewen, kunnen see Jesus noanich finjen. Un soo jinjen see trigj no Jerusalem no am sieekjen.

Schlieslich fungen see Jesus hia em Tempel. Hee horcht de Lierasch too un deed an väl froagen. Aulemaun wundad sikj, woo kluak Jesus wia. Oba Maria säd to am: ‘Jung, wuarom hast du ons dit aunjedonen? Dien Voda un ekj, wie haben ons groote Sorjen jemoakt, wiels wie die nich finjen kunnen.’

Jesus auntwuad: ‘Wuarom must jie no mie sieekjen? Wist jie daut nich, daut ekj en mienen Voda sien Hus sennen must?’

Jesus wia jieren doa, wua hee mea von Gott lieren kunn. Deist du uk emma jieren mea von Gott lieren? Tus en Nazaret jinkj Jesus jieda Wäakj no de Vesaumlunk toom Gott aunbäden. Wiels hee emma sea toohorchen deed, lieed hee väl ut de Bibel. Sell wie daut nich uk soo doonen?