De ieeschta Breef aun de Tessalonicha 4:1-18
4 Tolatst, Breeda, hab wie junt jelieet, woo jie läwen* sellen toom Gott jefaulen, un dauts, waut jie uk doonen. Oba wie froagen junt un fodren junt en dän Harn Jesus sienen Nomen opp, en dee Sach wieda un noch dolla tootonämen.
2 Wiels jie kjanen de Aunwiesungen*, waut wie junt derch dän Harn Jesus jeewen.
3 Wiels waut Gott haben well, es, daut jie sellen heilich sennen un junt von sintelje Sorten Sex* wajchhoolen.
4 Jieda eena saul weeten, woo hee sienen ieejnen Kjarpa* kontrollen kaun, daut dee heilich un ierenhauft blift,
5 un saul nich een bejieejet, onkontroldet Sex-Velangen haben, soo aus de aundre Sorten Menschen* haben, waut Gott nich kjanen.
6 Kjeena saul soont doonen, waut sikj nich jehieet un sienen Brooda en disen Stekj utnutzen. Wiels Jehowa* deit aul soont aus dit bestrofen, krakjt soo aus wie junt daut aul verhäa jesajcht haben un junt uk strenj jewoarnt haben.
7 Wiels Gott haft ons nich jewält toom orrein sennen, oba toom heilich sennen.
8 Soo, wäa dit aufwiesen deit, dee wiest nich Menschen auf, oba Gott, dee junt sienen heiljen Jeist jeft.
9 Oba äwa de Broodaleew es et nich needich, daut wie junt noch schriewen, wiels jie haben selfst von Gott jelieet, daut jie junt unjarenaunda leewen sellen.
10 Un jie doonen je daut aul bie aul de Breeda äwaraul en Mazedo̱nien. Oba wie fodren junt opp, Breeda, daut wieda un noch dolla to doonen.
11 Nämt junt daut väa, een rujet Läwen to fieren un junt om june ieejne Sachen to kjemren un met june Henj to schaufen, soo aus wie junt daut jelieet haben,
12 daut de Menschen buten seenen kjennen, daut jie junt natieedlich benämen un daut junt daut aun nuscht fält.
13 Un bowenenn, Breeda, well wie, daut jie doa omweeten, woo daut met dee steit, waut jestorwen sent*, soo daut jie nich soo truaren aus de Äwaje, waut kjeene Hopninj haben.
14 Wan wie Gloowen haben, daut Jesus jestorwen un vom Doot oppjestonen es, dan hab wie uk Gloowen, daut Gott dee, waut aus Jesus siene Nofolja jestorwen sent*, woat no am brinjen.
15 Dits, waut wie junt no Jehowa* sien Wuat no sajen: Wie, dee wie läwen un noch aum Läwen sent, en de Tiet, wan de Har woat doa sennen*, woaren secha nich ea nom Himmel foaren aus dee, waut aul jestorwen sent*.
16 De Har selfst woat vom Himmel raufkomen un lud sajen, waut jedonen saul, soo aus met eene Stemm von eenen väaschten Enjel* un met Gott siene Trompeet. Un dee, waut doot sent un met Christus veeent sent, woaren daut ieeschte oppstonen.
17 No daut woa wie, dee wie läwen un äwaläwen, met dee toop enne Wolkjen wajchjenomen woaren toom dän Harn enne Loft bejäajnen. Un dan woa wie emma bie dän Harn sennen.
18 Soo, treest junt wieda unjarenaunda met dise Wieed.
Footnooten
^ Wuatlich: “gonen”.
^ Ooda: waut wie junt aunjedeent haben.
^ Opp Griechisch: “porne̱ia”. See Wuaterkjläarunk bie “Sintelje Sorten Sex”.
^ Wuatlich: “Dinkj”.
^ Ooda: “de Velkja”; “aundre Raussen”.
^ See Wuaterkjläarunk bie “Jehowa”.
^ Ooda: “em Doot enjeschlopen sent”.
^ Ooda: “em Doot enjeschlopen sent”.
^ See Wuaterkjläarunk bie “Jehowa”.
^ See Wuaterkjläarunk bie “De Tiet, daut du doa best”.
^ Ooda: “em Doot enjeschlopen sent”.
^ Ooda: “Erzenjel”.
