Waut es de groote Triebsaul?

AUFSPÄLEN

Waut de Schreft doatoo sajcht

De groote Triebsaul woat de schwanste Tiet met de mieeschte Trubbels sennen, waut de Menschen jeemols beläft haben. No daut no, waut de Schreft verutsäd, woat daut en “de latste Doag” ooda “de Doag, dee nom Enj gonen” passieren (2. Timotäus 3:1, PB; Daniel 12:4, PB). “En dee Doag woat daut soo schrakjlich sennen, aus daut bat nu noch niemols jewast es, von don aus Gott de Welt jemoakt haft, un uk niemols wada woaren woat” (Markus 13:19, PB; Daniel 12:1; Matäus 24:21-22).

Waut en de groote Triebsaul sennen woat

De faulsche Gloowes woaren venicht woaren. De faulsche Gloowes woaren sea haustich venicht woaren (Openboarunk 17:1, 5; 18:9-10, 21). De Rejierungen woaren daut derch de Veeende Nazionen (UNO) doonen un soo Gott sienen Wellen utfieren (Openboarunk 17:3, 15-18). a
De woara Gloowen woat aunjejräpen. “Gog ... en daut Launt Magog”, wua daut Buak Hesekiel von rät, sent Velkja, waut sikj toopstonen. Dee woaren deejanje proowen to venichten, waut no dän woaren Gloowen läwen. Oba Gott woat siene Deena beschitzen (Hesekiel 38:1-2, 9-12, 18-23, PB).
De Menschen oppe Ieed woaren jerecht. Jesus woat de Menschen rechten un “woat dee uteneen deelen, soo aus een Hoad de Schop von de Bakj deelt” (Matäus 25:31-33, PB). No waut no woaren de Menschen jerecht woaren? Daut henjt gaunz doavon auf, aus dee Jesus siene “Breeda”, waut met am toop em Himmel rejieren woaren, unjastett haben ooda nich (Matäus 25:34-46, PB).
Dee woaren toopjesaumelt, waut em Kjennichrikj rejieren. Eenje von Jesus siene Nofolja sent uzhent utjewält toom met am toop em Himmel rejieren. Aul dise woaren no äa Läwen hia oppe Ieed oppjewakjt woaren toom em Himmel läwen (Matäus 24:31; 1. Korinta 15:50-53; 1. Tessalonicha 4:15-17).
Harmagedon. De Kjrich von “dän aulmajchtjen Gott sien grooten Dach” woat uk “däm HARN sien Dach” jenant (Openboarunk 16:14, 16, PB; Jesaja 13:9, PB; 2. Petrus 3:12). Dee, waut Christus woat fa schuldich talen, woaren venicht (Zefanja 1:18; 2. Tessalonicha 1:6-10). En dän Kjrich von Harmagedon woaren uk aule Rejierungen oppe Welt venicht woaren, waut en de Schreft aus een willet Tia met säwen Kjap beschräwen woat (Openboarunk 19:19-21).

Waut no de groote Triebsaul sennen woat

De Soton un de beese Jeista woaren enjestopt. Een majchtja Enjel woat dän Soton un de beese Jeista “em Aufgrunt” nenschmieten. Dis Aufgrunt es een Bilt doafäa, daut eena nuscht kaun doonen, soo aus wan eena doot es (Openboarunk 20:1-3, PB). Dän Soton siene Loag en dän Aufgrunt es soo, aus wan wäa em Jefenkjnis es. De Soton woat nich kjennen sestwua waut aunrechten (Openboarunk 20:7).
De dusent Joa fangen aun. Gott sien Kjennichrikj woat aunfangen, fa 1000 Joa to rejieren, un daut woat väl Säajnungen äwa de Menschen brinjen (Openboarunk 5:9-10; 20:4, 6). “Eene [groote] Häad, dee kjeena talen” kaun, woat “ut de groote Vefoljunk”, ooda Triebsaul komen. Dee woaren äwaläwen un seenen, woo daut dusentjoasche Rikj aunfangt, äwa de Ieed to rejieren (Openboarunk 7:9, 14, PB; Psalm 37:9-11).

a En daut Buak Openboarunk woaren de faulsche Gloowes daut groote Babel un “de groote Hua” jenant (Openboarunk 17:1, 5, PB). Daut dunkelroode Tia, waut daut groote Babel venichten woat, stalt de Organisazion väa, waut de Lenda oppe Welt veeenjen un veträden saul. Ieeschtlich wia dise Organisazion de Velkjabunt un nu sent daut de Veeende Nazionen (UNO).