Psalm 85:1-13
Zumm foah-singah. En Psalm funn di kinnah funn Korah.
85 Du voahsht gnaydich zu deim land, oh HAH,un hosht dei kfangani fumm Jakob zrikk gebrocht.
2 Du hosht di shulda funn dei leit fagevva,un hosht awl iahra sinda zu gedekt. (Sela)
3 Du hosht ufkeaht bays sei mitt eena,un bisht vekk gedrayt funn dei gleedichah zann.
4 Bring uns zrikk, oh Gott, unsah Heiland,un du dei zann vekk geyyich uns.
5 Zaylsht du bays sei ivvah uns fa’immah?Zayld dei zann nee nett ufheahra?
6 Zaylsht du uns nett viddah greftich macha,so es dei leit sich froiya kenna ivvah dich?
7 Veis uns dei shtandhaftichi-leevi, oh HAH,un gebb uns dei saylichkeit.
8 Ich zayl heicha vass Gott da HAH sawwa zayld;eah fashprecht fridda zu sei leit, sei saylichi,avvah si sella nett viddah zrikk gay zu iahra dumhayda.
9 Sei saylichkeit is geviss nayksht zu selli es een firchta,so es sei hallichkeit in unsah land bleibt.
10 Leevi un voahheit kumma zammah;gerechtichkeit un fridda kissa nannah.
11 Voahheit kumd ruff aus di eaht;gerechtichkeit gukt runnah fumm himmel.
12 Da HAH gebt geviss sell vass goot is,un unsah land gebt iahra frucht.
13 Gerechtichkeit gayt fannich eem heah,un risht da vayk fa sei shritt.
