Psalm 7:1-17
Da Dawfit singd zumm HAH veyyich di vadda fumm Kush da Benjaminiddah.
7 Oh HAH mei Gott, ich du mei fadrauwes in dich fa mich aus di kfoah halda;hald mich funn selli es miah nohch sinn un mach mich frei,
2 so es si mich nett fareisa vi en layb,un mich vekk shlayfa vo nimmand is fa helfa.
3 Oh HAH mei Gott, vann ich dess gedu habb,vann ungerechtichkeit in mei hend is,
4 vann ich letz gedu habb zu demm es freindlich is zu miah,adda sellah grawbt habb es mei feind is unni uahsach,
5 dann loss mei feind miah nohch kumma un mich fanga;loss een mei layva in da grund shtamba,un mei eah im shtawb leiya lossa. (Sela)
6 Shtay uf, oh HAH, in deim zann;setz dich geyyich da zann funn mei feinda.Vekk uf, mei Gott, un shtell sell recht vass letz is.
7 Loss di leit sich fasamla um dich rumm,un rool ivvah si funn drovva in di hay.
8 Da HAH richt di mensha.Richt mich, oh HAH, noch mei gerechtichkeit un unshuld.
9 Mach di ungerechtichkeit funn di gottlohsa shtobba,avvah mach di gerechta shtandhaftich.Du bisht en gerechtah Gott, un broviahsht di hatza un gedanka.
10 Mei shield ivvah mich is Gott,deah vo di gerechta im hatz helft.
11 Gott is en gerechtah richtah,un en Gott es shtrohfa dutt alli dawk.
12 Vann en mensh nett boos dutt,dann macht eah sei shauf;eah shpand sei bow un zeeld.
13 Eah hott sich greeks-ksha grisht es doht macht;eah risht sich mitt feiyahrichi arrows.
14 Gukket, da gottlohs hott evil im sinn,eah dutt evil ausshaffa in sei gedanka un bringd falshheit foah.
15 Eah macht en loch un grawbt’s aus fa anri,un fald selvaht in’s loch es eah gmacht hott.
16 Sei dumhayda kumma zrikk uf sei ayknah kobb,sei unfashtand kumd runnah uf een selvaht.
17 Ich gebb dank zumm HAH fa sei gerechtichkeit,un lohb da Alli-Haychsht HAH bei singa.
