Psalm 25:1-22
En Psalm fumm Dawfit.
25 Zu diah, oh HAH, hayvich mei sayl uf.
2 Oh mei Gott, ich du mei fadrauwa in dich,loss mich nett zumm shohm gebrocht sei,un loss mei feinda sich nett froiya ivvah mich.
3 Selli es iahra hofning in dich doon,zayla nee nett zumm shohm gebrocht sei.Avvah selli es geyyich dich shaffa unni uahsach,zayla sich shemma.
4 Veis miah dei vayya, oh HAH,un lann mich fa dei pawda nohch gay.
5 Fiah mich in dei voahheit un lann mich,fa du bisht da Gott funn mei saylichkeit;mei hofning is in diah da gans dawk.
6 Denk an dei bamhatzichkeit un dei shtandhaftichi-leevi, oh HAH,fa du hosht si shund katt lang zrikk.
7 Denk nett an di sinda funn mei yungi dawwa,un aw nett vi ich geyyich dich kshaft habb.Denk an mich deich dei bamhatzichkeit, oh HAH,veil du goot bisht.
8 Da HAH is goot un gerecht,fasell veist eah di sindah sei vayk.
9 Eah fiaht di daymeedicha in vass recht is,un land eena sei vayk.
10 Awl di vayya fumm HAH sinn oahrich goot un shtandhaftich,zu selli es sei bund un gebodda halda.
11 Fa da sayk funn dei nohma, oh HAH,fagebb mei sinda, fa si sinn feel.
12 Veah is da mann es di furcht Gottes hott?Eah veist sellem mann da vayk es eah gay soll.
13 Da HAH saykend een mitt en goot layva,sei nohch-kummashaft zayld’s land eahva.
14 Da HAH is da freind funn selli es een firchta;eah veist sei bund zu eena.
15 Mei awwa sinn immah uf’m HAH,un eah zeekt mei fees aus di fall.
16 Dray dich zu miah, un sei gnaydich zu miah,fa ich binn laynich un fafolkt.
17 Da angsht in mei hatz is grohs,fiah mich aus dee dreebsawl.
18 Gukk an mei angsht un druvvel,un fagebb awl mei sinda.
19 Gukk an mei feinda es feel sinn;si hassa mich mitt en grohsah hass.
20 Hald mich aus di kfoah un mach mich frei,loss mich nett fashohmd vadda,fa ich du mei fadrauwa in dich.
21 Loss unshuld un ufrichtichkeit mich heeda,veil mei hofning in diah is.
22 Mach Israel frei, oh Gott,funn awl sei druvvel.
