Psalm 145:1-21
En lohb-leet fumm Dawfit.
145 Ich vill dich uf hayva, mei Gott un Kaynich,un dei nohma lohva fa’immah un immah.
2 Alli dawk vill ich dich lohva,un dei nohma preisa fa’immah un immah.
3 Da HAH is grohs, un is es veaht fa gepreist sei;sei grohsi eah is unbegreiflich.
4 Vass du gedu hosht vatt gepreist funn ay nohch-kummashaft zu di neksht;si fazayla veyyich dei mechtichi verka.
5 Ich zayl shvetza veyyich dei hallichkeit un kaynich-eah,un ich vill ivvah dei vundahboahri verka denka.
6 Leit zayla shvetza veyyich dei mechtichi verka,un ich zayl shvetza veyyich dei hallichkeit.
7 Si zayla sawwa vi goot-maynich es du bisht,un zayla singa veyyich dei gerechtichkeit.
8 Da HAH is bamhatzich un gnaydich,eah vatt nett kshvind bays, un hott grohsi leevi.
9 Da HAH is goot zu alli-ebbah,eah is bamhatzich zu alles es eah gmacht hott.
10 Alles es du gmacht hosht gebt dank zu diah, oh HAH,un dei saylichi zayla dich lohva.
11 Si zayla shvetza veyyich di hallichkeit funn dei Kaynich-Reich,un veyyich dei macht,
12 so es leit vissa kenna veyyich dei mechtichi kshefta,un da hallich glitzah funn dei Kaynich-Reich.
13 Dei Kaynich-Reich is en ayvich reich,un dei Kaynich-Macht bleibt deich alli nohch-kummashaft.Da HAH is shtandhaftich in alles es eah fashprocha hott,un gnaydich zu alles es eah gmacht hott.
14 Da HAH haybt awl selli uf es anna falla,un macht selli grawt es nunnah gebohwa sinn.
15 Di awwa funn alli-ebbah gukka zu diah,un du gebsht eena ess-sach an di recht zeit.
16 Du machsht dei hand uf,un machsht zufridda di falanga funn alles levendiches.
17 Da HAH is gerecht in awl sei vayya,un bamhatzich zu alles es eah gmacht hott.
18 Da HAH is nayksht bei awl selli es een ohroofa,bei awl selli es een eahnshtlich ohroofa.
19 Eah folfild di falanga funn selli es een firchta,eah heaht si roofa un helft eena.
20 Da HAH vatsht ivvah awl selli es een leeb henn,avvah di gottlohsa bringd eah um.
21 Mei maul zayld da lohb fumm HAH fazayla;loss alli-ebbes sei heilichah nohma preisa fa’immah un immah.
