LESSON 4
Veah is da Jesus Christus?
1. Vi hott da Jesus sei layva kshteaht?
Favass henn alli sadda leit enjoyt shvetza mitt da Jesus?—MATTHÄUS 11:29; MARKUS 10:13-16.
Nett vi ennichah anrah mensh, da Jesus voah en mechtichah engel un hott in da himmel gvoond eb eah geboahra voah uf di eaht. (Johannes 8:23) Eah voah’s eahsht ding es Gott gmacht hott, un eah hott kolfa awl di anri sacha macha. Eah is da aynsisht es Jehova gmacht hott bei sich selvaht un sell is favass eah da “aynsisht geboahra” Sohn hayst. (Johannes 1:14, 18) Da Jesus hott kshvetzt fa Gott, sell is favass eah aw’s “Vatt” kaysa is.—Lays Shpricha 8:22, 23, 30; Kolosser 1:15, 16.
2. Favass is da Jesus zu di eaht kumma?
Gott hott sei Sohn sei layva fumm himmel zu di eaht kshikt, fa geboahra vadda zu’n yuddish maydel es Maria kaysa hott. See hott nee nett kshlohfa katt mitt en mann. So da Jesus sei faddah voah nett funn mensha. (Lukas 1:30-35) Da Jesus is zu di eaht kumma (1) fa uns di voahret lanna veyyich Gott, (2) fa uns veisa vi miah Gott sei villa du kenna even vann miah en haddi zeida havva sinn, un (3) fa sei pirfikt layva gevva fa “leit frei macha.”—Lays Matthäus 20:28.
3. Favass braucha miah frei gmacht sei?
In dee case, frei gmacht sei maynd, betzawla vass’s kosht fa frei gmacht sei funn da shtrohf funn doht. (2 Mosi 21:29, 30) Fa ald vadda un shtauva voah nett vass Gott hott vella fa mensha. Vi vissa miah sell? Gott hott ksawt zu da eahsht mann, Adam, es vann eah dutt vass di Bivvel sawkt es en “sind” is, dann zayld eah shtauva. So vann da Adam nett ksindicht hett, dann veah eah selayva nett kshtauva. (1 Mosi 2:16, 17; 5:5) Di Bivvel sawkt da doht is “in di veld kumma” deich da Adam. No is di sind un da doht uf awl mensha kumma noch een. Miah braucha frei gmacht sei funn da doht es miah grikt henn funn da Adam.—Lays Römer 5:12; 6:23.
Veah kend betzawla vass’s nemd fa uns frei macha funn da doht? Vann miah shtauva, betzawla miah yusht fa unsah aykni sinda. Kenn sindlichah mensh kann betzawla fa ennich ebbah shunsht sei sinda.—Lays Psalm 49:7-9.
4. Favass is da Jesus kshtauva?
Da Jesus voah pirfikt. So eah hott nett shtauva missa fa sei sinda—eah hott selayva nix letz gedu. Avvah, da Jesus is kshtauva fa anri iahra sinda. Gott hott gvissa vi grohsi leevi es eah hott fa mensha bei sei Sohn shikka fa shtauva fa uns. Da Jesus hott aw leevi gvissa fa uns bei sei Faddah heicha un sei layva gevva fa unsah sinda.—Lays Johannes 3:16; Römer 5:18, 19.
Vatsh da video Favass Is da Jesus Kshtauva?
5. Vass is da Jesus am du nau?
Vo da Jesus uf di eaht voah, hott eah granki kayld, dohdi zrikk zu layva gebrocht, un hott leit kolfa es am soffahra voahra. In sellah vayk hott eah gvissa vass eah du zayld noch dee zeit fa awl mensha es heicha. (Matthäus 15:30, 31; Johannes 5:28) Noch es da Jesus kshtauva is, hott Gott een viddah zrikk zu layva gebrocht es en mechtichah engel im himmel. (Epheser 1:20) Da Jesus hott no gvoaht uf di rechts seit funn Gott biss Jehova een di macht gevva hott fa roola es en Kaynich ivvah di gans eaht. (Hebräer 10:12, 13) Da Jesus is nau en Kaynich am roola in da himmel, un awl selli vo een nohch kumma, sinn am dee goodi sacha breddicha, gans ivvah di veld.—Lays Daniel 7:13, 14; Matthäus 24:14.
Glei, zayld da Jesus sei Kaynich macht yoosa fa awl’s soffahres un aw selli vo em soffahra macha, zu’n end bringa. Awl selli vo veisa es si an da Jesus glawva un een heicha, zayla layva enjoya inna paradise eaht.—Lays Psalm 37:9-11.
