Di Bivvel yoost en illustration fa uns helfa da diffans sayna zvishich selli in da recht glawva un selli in falshi glawva. Es sawkt: “An iahra frucht sellet diah si kenna. Kann ebbah drauva greeya funn danna, adda feiya [figs] funn dishtla?” (Matthäus 7:16) Yusht vi ma da diffans sayna kann zvishich vass en drauva-shtokk gebt un vass en danna-shtokk gebt, so kann ma da diffans sayna zvishich da recht glawva un falshi glawva bei iahra frucht, sell is bei vass si doon.

1.   Selli in da recht glawva teetsha di voahret es gebayst is uf di Bivvel, nett uf vass mensha denka. (Johannes 4:24; 17:17) Dess maynd aw di voahret veyyich di sayl un di hofning fa ayvich layva inna paradise uf di eaht. (Psalm 37:29; Jesoiya 35:5, 6; Ezekiel 18:4) Da recht glawva dutt aw nett zrikk hayva funn sawwa vass falshi teetshings sinn.​—Matthäus 15:9; 23:27, 28.

2.   Selli in da recht glawva doon leit helfa Gott kenna, un aw si lanna veyyich sei nohma, Jehova. (Psalm 83:18, King James Version; Jesoiya 42:8; Johannes 17:3, 6) Es dutt nett teetsha es Gott so mechtich is es miah nett nayksht kumma kenna zu een, avvah es teetsht es Gott havva vill es miah sei friend sinn.​—Jakobus 4:8.

3.   Selli in da recht glawva teetsha es yusht deich da Jesus kenna leit ksayft sei bei Gott. (Apostelgeschichte 4:10, 12) Si doon vass da Jesus sawkt un boviahra sei example fallohwa.​—Johannes 13:15; 15:14.

4.   Selli in da recht glawva gukka yusht zu Gott Sei Reich fa di aynsisht hofning fa mensha. Si doon anri sawwa veyyich sell Reich.​—Matthäus 10:7; 24:14.

5.   Selli in da recht glawva helfa leit fa recht leevi veisa zu anri unni denka es si ebbes zrikk greeya zayla. (Johannes 13:35) Si teetsha fa respekt havva fa alli sadda leit un doon geahn selli einemma es sinn funn diffandi cultures, languages, un backgrounds. (Apostelgeschichte 10:34, 35) Koss funn iahra leevi fa anri, doon si nett part nemma in ennichi wars.​—Micha 4:3; 1 Johannes 3:11, 12.

6.   Nimmand in da recht glawva vatt betzawld fa foah gay in di congregation. Si doon aw nett ennich ebbah en nohma gevva so vi “Rabbi” adda “Meishtah.”​—Matthäus 23:8-12; 1 Petrus 5:2, 3.

7.   Selli in da recht glawva doon goah kenn part nemma in politics. (Johannes 17:16; 18:36) Avvah, si veisa doch respekt un doon vass di governments sawwa in di area vo si voona. Si doon’s koss funn vass di Bivvel sawkt: “Gevvet em Kaisah vass zu em Kaisah heaht [sell maynd di governments heit], un gevvet zu Gott vass zu Gott heaht.”​—Markus 12:17; Römer 13:1, 2.

8.   Da recht glawva is en vayk funn layva, nett yusht sacha du es kenn mayning henn, adda yusht du koss anri doon. Si doon alli part funn iahra layva baysa yusht uf vass di Bivvel sawkt es recht un letz is. (Epheser 5:3-5; 1 Johannes 3:18) Avvah dess falayt si nett, koss es bringd si joy fa “da haebbi Gott” deena.—1 Timotheus 1:11 New World Translation.

9.   Es zayla vennich leit sei es in da recht glawva sinn. (Matthäus 7:13, 14) Selli in da recht glawva sinn oft nunnah gegukt druff, fann gmacht difunn, un veesht gyoost koss si doon Gott sei villa.​—Matthäus 5:10-12.

En glawva is nett recht adda letz yusht bei vi ma shpiaht diveyya

 ’Sis nett goot fa en glawva tshoosa yusht bei vi’s em shpiahra macht. Di Bivvel hott ksawt es zayld en zeit sei vann leit “alli sadda shool-meshtah [adda teachers funn di Bivvel] um sich rumm [geddahra zayla] es eena sawwa vass iahra oahra heahra vella.” (2 Timotheus 4:3) In blatz funn sell, di Bivvel sawkt fa en glawva havva “es rein un sauvah is fannich Gott unsah Faddah” even vann nett feel leit agreeya mitt sellah glawva.​—Jakobus 1:27; Johannes 15:18, 19.