Di Bivvel sawkt vi sacha sei zayla un vass fa attitude es leit havva zayla fa sayna vann di “letshta dawwa” do sinn. Un’s helft fa sayna vann’s “end funn di veld” nayksht is.​—2 Timotheus 3:1; Matthäus 24:3; Daniel 8:19.

 Di Bivvel sawkt es zayla feel sacha haebna an di saym zeit, un dess is en “zaycha” adda en vayk fa sayna vann di letshta dawwa do sinn. (Lukas 21:7) Do sinn samm examples:

 Wars gans ivvah. Da Jesus hott ksawt: “Ay land zayld greek macha mitt em anra un ay kaynich-reich mitt em anra kaynich-reich.” (Matthäus 24:7) Offenbarung 6:4 sawkt en reidah uf en gaul, es shtayt fa war, zayld da ‘fridda funn di eaht vekk nemma.’

 Nett genunk ess-sach. Da Jesus hott ksawt es “zayld hungahs-noht gevva.” (Matthäus 24:7) Offenbarung sawkt aw veyyich noch en reidah uf en gaul es shtayt fa nett genunk ess-sach in feel diffandi bletz.​—Offenbarung 6:5, 6.

 Grohsi earthquakes in may bletz. Da Jesus hott ksawt es zayla earthquakes sei in feel diffandi bletz. (Matthäus 24:7; Lukas 21:11) Dee grohsi earthquakes gans ivvah di eaht zayla may leit vay du adda doht macha es selayva difoah.

 Grankeda. Da Jesus hott ksawt es zayla shlimmi “grankeda” sei.​—Lukas 21:11.

 Crime. Even vann leit shlechti sacha am du voahra fa shund en langi zeit, da Jesus hott ksawt in di letshta dawwa zayld ‘ungerechtichkeit ivvah-hand nemma’.​—Matthäus 24:12.

 Di eaht fadauva. Offenbarung 11:18 sawkt es mensha zayla “di eaht fadauva.” Si zayla dess du in feel diffandi vayya, nett yusht bei veeshti sacha du avvah aw bei di eaht shawda du.

 Leit iahra attitudes zayla shlimmah vadda. 2 Timotheus 3:1-4 sawkt vi leit sei zayla, “undankboah un ungeishtlich, . . . halda iahra vatt nett, shtroiya kshvetzah, hayva sich selvaht nett drunna, henn kenn fashtand, hassa ennich ebbes goodes. Si kenna nett gedraut sei, sinn foah-vitzich, ufgeblohsa.” Dee attitudes zayla so shlimm vadda es ma sawwa kenna es sinn “haddi zeida” fa deela mitt.

 Families nett along kumma mitt nannah. 2 Timotheus 3:2, 3 sawkt es zayla feel leit sei “unni leevi” fa iahra family, un kinnah “heicha iahra eldra nett.”

 Vennichah leevi fa Gott . Da Jesus hott ksawt ‘feel leit iahra leevi zayld abkeela.’ (Matthäus 24:12) Vass da Jesus gmaynd hott is, ’s mensht leit iahra leevi fa Gott zayld abkeela. In 2 Timotheus 3:4 sawkt’s aw es in di letshta dawwa zayla leit vi sell “blesiah [adda pleasures] may gleicha es Gott.”

 Gmayna sawwa ay ding avvah doon no ebbes shunsht. 2 Timotheus 3:5 sawkt es leit zayla ohlossa es si deena Gott avvah vella nett du vi eah sawkt.

 Prophecies funn di Bivvel bessah fashtay. ’S buch funn Daniel sawkt ‘an di zeit funn’s end’ zayla feel may leit lanna veyyich di voahheit in di Bivvel, un sell maynd aw di prophecies veyyich di letshta dawwa bessah fashtay.​—Daniel 12:4.

 Breddicha gans ivvah di veld. Da Jesus hott ksawt “dess Effangaylium [adda di goodi sacha] fumm Reich vatt gebreddicht zu di gans veld.”​—Matthäus 24:14.

 Feel leit gevva yusht nix may drumm un macha fann ivvah anri. Da Jesus hott ksawt es feel leit zayla di sacha ignora es veisa es ma in di letshta dawwa sinn. (Matthäus 24:37-39) Un, 2 Petrus 3:3, 4 sawkt aw es leit zayla fann macha ivvah selli sacha un sawwa si mayna nix.

 Awl di prophecies vadda folfild. Da Jesus hott ksawt in di letshta dawwa zayla awl di prophecies folfild vadda an di saym zeit, nett yusht en poah adda’s mensht funna, avvah awl funn si.—Matthäus 24:33.

 Yau. Sacha in di veld un vass miah laysa in di Bivvel veist es di letshta dawwa kshteaht henn in 1914, ’s yoah es World War I kshteaht hott. Fa ausfinna vi di sacha in di veld veisa es miah in di letshta dawwa sinn, vatsh deah video:

 In 1914 hott Gott Sei Reich kshteaht roola in da himmel. Ayns funn di eahshti sacha es sell Reich gedu hott is da Satan un di demons aus da himmel shmeisa runnah zu di eaht. Si kenna nau nix may du zu ennich ebbah in da himmel. (Offenbarung:12:7-​12) Ma kann da Satan sei influence sayna in leit iahra attitudes un in di sacha es si doon. Sell is vass di letshta dawwa hatt macht fa deela mitt.​—2 Timotheus 3:1.

 Feel leit sinn reeli gwohrit veyyich dee haddi zeida. Si sinn gwohrit es leit nimmi vissa vi fa along kumma mitt-nannah. Samm even feicha es leit nannah doht macha zayla biss nimmand ivvahrich is.

 Anri leit es aw gwohrit sinn veyyich vi sacha am gay sinn in di veld, henn doch en goodi hofning fa da future. Si sinn shuah es Gott Sei Reich zayld glei ebbes du fa awl di problems in di veld vekk nemma. (Daniel 2:44; Offenbarung 21:3, 4) Si patiently voahra fa Gott sei promises fa folfild vadda, un si greeya kamfirt in da Jesus sei vadda: “Alli-ebbah es aushald biss an’s end vatt saylich.”​—Matthäus 24:13; Micha 7:7.