Yau! Di Bivvel kumd funn ‘Gott, deah vo selli kamfirt gebt es discouraged sinn.’ (2 Korinther 7:6) Nay, di Bivvel is nett en mental-health buch, avvah es hott shund feel leit kolfa es sich selvaht umbringa henn vella. Di Bivvel kann aw dich helfa.

•  Vi kann di Bivvel dich helfa?

•  Dutt di Bivvel uns sawwa veyyich leit es shtauva henn vella?

•  Velli shrifta kenna dich helfa vann du denksht veyyich dich selvaht umbringa?

•  Vass vann en friend sawkt, “Ich vill shtauva”?

•  Vass vann ich shund boviaht habb mich selvaht umbringa?

• ● Sawk anri vi du shpiahsht.

   Vass di Bivvel sawkt: “En freind gebt leevi di gans zeit, un en broodah is geboahra fa helfa an di zeit funn noht.”​—Shpricha 17:17.

   Vass’s maynd: Miah braucha hilf funn anri vann miah shlechti gedanka henn.

   Vann du nett anri sawksht veyyich vi du shpiahsht, dann kenda dei shlechti gedanka dich overwhelmed shpiahra macha. Avvah vann du anri sawksht vi du shpiahsht, dann mechsht du bessah shpiahra un even sacha diffand ohgukka.

   Boviah dess: Shvetz mitt ebbah heit, fleicht ebbah in dei family adda en friend es du trost. a Es mecht aw helfa vann du anna shreibsht vi du shpiahsht.

• ● Grikk hilf funn en doktah.

   Vass di Bivvel sawkt: “Dee vo ksund sinn braucha kenn doktah, yusht dee vo grank sinn.”​—Matthäus 9:12.

   Vass’s maynd: Miah sedda hilf greeya funn en doktah vann miah grank sinn.

   Vann ma em selvaht umbringa vill kend’s en sign sei funn mentally grank sei. Yusht vi ennichi grankheit, dess is nix fa em shemma diveyya. Grank sei mentally kann getreet sei.

   Boviah dess: Grikk hilf funn en doktah so kshvind es du kansht.

• ● Fagess nett es Gott ebbes drumm gebt veyyich dich.

   Vass di Bivvel sawkt: “Vadda nett fimf shpatza fakawft fa zvay cent? Un nett ayns funn eena vatt fagessa bei Gott. . . . Feichet eich nett, diah sind may veaht es feel shpatza.”​—Lukas 12:6, 7.

   Vass’s maynd: Du bisht precious zu Gott.

   Du mechsht shpiahra vi nimmand ebbes drumm gebt veyyich dich, avvah Gott vayst vass du am deich gay bisht. Eah gebt ebbes drumm veyyich dich, even vann du shpiahsht es’s nimmi diveaht is layva. Psalm 34:18 sawkt: “[Jehova] is nayksht zu selli es fabrochani hatza henn, un setz selli frei es moot faloahra henn.” Gott vill havva es du laybsht because eah gleicht dich.

   Boviah dess: Gukk fa sacha in di Bivvel es dich veist es Gott ebbes drumm gebt veyyich dich. Fa’n example, gukk an chapter 24 funn’s buch Draw Close to Jehovah. Dess buch helft em di Bivvel bessah fashtay.

• ● Bayt zu Gott.

   Vass di Bivvel sawkt: “Lawdet awl eiyah bekimmahnis uf [Gott], fa eah gebt acht uf eich.”​—1 Petrus 5:7.

   Vass’s maynd: Gott vill havva es du een sawksht vi du reeli feelsht un vass du gwohrit bisht diveyya.

   Gott kann dich peace gevva un dich helfa deich haddi zeida. (Philipper 4:6, 7, 13) In deah vayk, helft eah selli es bayda zu een fa hilf.​—Psalm 55:22.

   Boviah dess: Bayt zu Gott heit. Yoos sei nohma, Jehova, un sawk een vi du shpiahsht. (Psalm 83:18, KJV) Frohk een fa dich helfa on gay.

• ● Denk deef veyyich di hofning es di Bivvel hott fa da future.

   Vass di Bivvel sawkt: ‘Miah henn dee hofning vi en anchor fa unsah layva, es is shuah koss ’sis funn Gott.’—Hebräer 6:19.

   Vass’s maynd: Du mechsht sad un no haebbi shpiahra, yusht vi en boat es uf un ab gayt mitt di waves inna shtoahm. Avvah di hofning in di Bivvel kann dich helfa kawm shpiahra.

   Dee hofning is nett yusht en drohm, avvah ’sis gebayst uf Gott sei promise fa di sacha vekk nemma es uns pain gebt.​—Offenbarung 21:4.

   Boviah dess: Lann may veyyich di hofning funn di Bivvel bei deah article laysa: “En Rechti Hofning fa en Bessahrah Future.”

• ● Du ebbes es du enjoysht.

   Vass di Bivvel sawkt: “En fraylich hatz macht ebbah ksund.”—Shpricha 17:22.

   Vass’s maynd: Vann miah sacha doon es uns haebbi macht, kann’s uns helfa bessah shpiahra mentally.

   Boviah dess: Du ebbes es noch immah geglicha hosht du. Fa’n example, shteah songs singa adda heich ab zu shay music es dich goot shpiahra macht, lays ebbes es encouraging is, adda shteah en neiyah hobby. Du zaylsht aw haebbiyah sei vann du anri helfsht, even vann’s yusht bissel is.​—Apostelgeschichte 20:35.

• ● Gebb acht uf dei health.

   Vass di Bivvel sawkt: ‘Es dutt em samm goot fa exercise greeya.’​—1 Timotheus 4:8.

   Vass’s maynd: Es helft uns vann miah exercise greeya, genunk shlohf greeya, un healthy essa.

   Boviah dess: Gay uf en walk, even vann’s yusht 15 minutes is.

• ● Fagess nett es sacha in layva tshaynsha un es du nett immah so shpiahra zaylsht.

   Vass di Bivvel sawkt: “Du vaysht goah nix veyyich meiya.”​—Jakobus 4:14.

   Vass’s maynd: Sacha es zu grohs seema fa deela mitt, mechta aekshli yusht temporary sei.

   Es macht nix aus vi shlimm es sacha sinn heit, es kend diffand sei meiya. So gukk fa vayya es dich helft mitt vass du am deich gay bisht. (2 Korinther 4:8) Di problems es du am deela bisht mitt nau zayla andem tshaynsha mitt zeit, avvah vann du dich selvaht umbringsht, du kansht sell nett tshaynsha.

   Boviah dess: Lays veyyich leit in di Bivvel es so discouraged voahra es si shtauva henn vella, un gukk vi iahra layva bessah vadda is mitt zeit. Oft is’s bessah vadda in vayya es si nett gedenkt henn. Do sinn samm examples.

 Yau. Di Bivvel dutt uns sawwa funn leit es shtauva henn vella. Gott voah nett upset mitt si, avvah hott si helfa vella. Eah kann aw’s saym ding du fa dich.

Da Elijah

•  ● Vass vissa miah veyyich een? Da Elijah voah en prophet es brayf voah. Avvah eah hott aw daylmohls discouraged kshpiaht, un hott feelings katt grawt vi miah henn.—Jakobus 5:17.

•  ● Favass hott eah shtauva vella? An ay zeit, hott da Elijah laynich kshpiaht, sich kfeicht, un hott gedenkt es eah nix veaht voah. Eah hott ksawt zu Jehova: ‘Nemm nau mei layva funn mich.’—1 Kaynicha 19:4.

•  ● Vass hott een kolfa? Da Elijah hott Gott ksawt grawt vi eah kshpiaht hott. Vi hott Gott een encouraged? Gott hott gvissa es eah ebbes drumm gebt veyyich een un es eah powerful genunk is fa een helfa. Eah hott aw da Elijah ksawt es eah een noch brauch un hott ebbah gevva fa een helfa.

•  ▸ Lays veyyich da Elijah: 1 Kaynicha 19:2-18.

Da Hiob

•  ● Vass vissa miah veyyich een? Da Hiob voah en reichah mann mitt en grohsi family, un voah faythfel zu Gott.

•  ● Favass hott eah shtauva vella? En latt shlechti sacha henn kshteaht haebna zu da Hiob. Eah hott alles faloahra es eah katt hott. Awl sei kinnah sinn umkumma inna vind shtoahm. Eah hott en shlimmi disease grikt. Un no, henn dayl leit ksawt es voah sei aykni shuld es dee sacha kaebbend henn. Da Hiob hott ksawt: “Ich hass mei layva, ich vill nett on layva.”​—Hiob 7:16.

•  ● Vass hott een kolfa? Da Hiob hott gebayt zu Gott un hott kshvetzt mitt anri. (Hiob 10:1-3) Sei goodah friend, da Elihu, hott een encouraged un een kolfa sei situation da recht vayk ohgukka. Un’s mensht importand, da Hiob voah frohwa es Gott een viddah kolfa hott recht denka.

•  ▸ Lays veyyich da Hiob: Hiob 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.

Da Mosi

•  ● Vass vissa miah veyyich een? Da Mosi voah en faythfelah prophet un hott da lead gnumma fa di Kinnah-Israel.

•  ● Favass hott eah shtauva vella? Da Mosi hott feel responsibilities katt un leit henn oft complained veyyich een, un’s hott een ausgvoahra. Eah hott naus gegrisha zu Gott un hott ksawt: “Bring mich grawt um.”​—4 Mosi 11:11, 15.

•  ● Vass hott een kolfa? Da Mosi hott Gott ksawt vi eah kshpiaht hott. Gott hott da Mosi kolfa mitt sei stress bei anri greeya fa een helfa mitt sei eahvet.

•  ▸ Lays veyyich da Mosi: 4 Mosi 11:4-6, 10-17.