A rungil el sechelei a blechoel el chadecheduch el omak er a klausechelei er tir. Me ngdi osisiu, a Dios a soal a deblechoel el mengedecheduch er ngii el omak er a kmes el deleuill er kid me ngii. Ngdmu el kmo: “Isei e kom mo omekedong er ngak, e me meluluuch er ngak mak mo onger er kemiu.” (Jeremia 29:12) Me sel mongedecheduch er a Dios e ke ‘olekeed er kau er [ngii], me ngmo kmeed er kau.’ (Jakobus 4:8) Me a Biblia a mengelaod er kid el kmo: “Ng kmeed er tirkel rokui el omekedong er ngii.” (Psalm 145:18) Me a bek el taem el doluluuch el mo er ngii, e nglmuut el mo kmes a deleuill er kid me ngii.

A Jesus a dilu el kmo: “Ngar ngii er kemiu a ruungalek a mo omsa bad a ngelekel a lolengit er a blauang? Ma lechub e kom mo omsa bersoech a lolengit er a ngikel? A lsekum kom . . . meduch el omesterir a re ngelekiu a ungil, e a Demmiu el ngar a eanged a bai ngar uchei el mesterir a ungil klalo tirkel olengit er ngii!” (Mateus 7:9-11) Nguaisei, a Dios a soal a cho moluluuch el mo er ngii e le ‘ng kerekikl el omekerreu er kau’ e soal el ngosukau. (1 Petrus 5:7) Ngdirrek el soal sel mouchais er ngii a rokui el mondai er kau. Ngar er a Biblia e ngdmu el kmo: “Lak el sebek a rengmiu er a ngii di le ngerang, e bai molengit er a Rubak er a bek el nglunguchiu, a ikel mousbech, el di blechoel el mereng a sulel.”​—Filipi 4:6.

A rulsemuul er a omesubel a klechad a mla mtebengii el kmo a betok el dart el miliol el chad a medengei el kmo ngkirir el meluluuch. Me a rebebil el diak loumerang er a Dios me te kongei er tia el tekoi. * Me tiang a meketeklii el kmo a rechad a ulebeob el kirir el ousbech er a Dios. Me a Jesus a dilu el kmo: “Te ngeltengat a re medengei el kmo te chebuul a lak lousbech er a Dios.” (Mateus 5:3) Me a ta er a rolel e kede nguu tia el ngeso a sel deblechoel el mengedecheduch er a Dios.

Ngera el klungiaol a sebeched el ngmai a lsekum kede meluluuch el mo er a Dios?