Bo Leblak a Rengum el Mo er a Rengedel a Dios

“Ak millilt er kemiu el otebedemiu er tial beluulchad, me ng dikea mchedal.”​—JN. 15:19.

CHELITAKL: 18, 54

NGSEBECHEM EL ONGER?

Ngera me a Jesus a dimlak leteloi a klaititekangel er a beluulechad?

A Rekristiano, ngkirel el mo ulterekokl a uldesuir el kirel a ngerang?

Ke mekerang e mo blak a rengum el mo er a Jehovah me a Rengedel?

1, 2. (a) Ngera me a blakerreng er a Rekristiano el mo er a Dios a klou a ultutelel, e tiang ngrullid el mo mekerang? (Momes er a siasing er a uchelel a suobel.) (b) Ngua ngerang a blekerdelir a rebetok el chad, e tiang ngmo uchul a ngerang?

 A REMERA el Kristiano a diak lolab el mo er a bitang me a bitang er a taem er a mekemad me a ngii di el taem. E ngera uchul? E le tirke el rokui el mla tuib a rengrir el mo er a Jehovah a betik a rengrir e olengesenges e blak a rengrir el mo er ngii. (1 Jn. 5:3) Me ngsoad el oltirakl er a melemalt el llechul a Dios er a ngii di el beluu el dekiei er ngii, alta e ngodech a blekeradel me a omelekoi me a siukang er ngii el beluu. Me a blakerreng er kid el mo er a Jehovah me a Rengedel a lmuut el klou a ultutelel er a ngii di el tekoi. (Mt. 6:33) A chouaitia el blakerreng a uchul me a Rekristiano a diak el kirir el teloi a mekemad me a ngii di el klaititekangel er tia el beluulechad.​—Isa. 2:4; monguiu er a Johanes 17:11, 15, 16.

² A rechad el diak loumerang el uai kid a locha blak a rengrir er a belurir me a dirrek el kleblillir me a siukang me a lechub a sports team er a belurir. Me a blakerreng el kirel aika el tekoi a mla mo uchul a  klaisichai el mla muchel a uldikel me a koadelchad. Me a chouaika el omeruul a sebechel el ngar er ngii a bo letemellii er kid me a telungalek er kid e le kede kiei el iliuekl er aika el mondai. Me kid el ulebeob el okesiul a Dios a uchul me ngar er ngii a uldesued el soad a llemalt. Me a lebebil er a taem e kede mo omdasu el kmo a tekoi el loruul a kabelment er a klechad a chebirukel. (Gen. 1:27; Dut. 32:4) Me kede mo mekerang sel bo leuaisei a tekoi? Ngsebechel el mo beot er kid el mo olab el mo er a bitang er a klaititekangel el mo er ngii.

3, 4. (a) Ngera uchul me a Rekristiano a diak lolab el mo er a bitang er a ngii di el klaititekangel er a beluulechad? (b) Ngera ngmo mesaod tia el suobel?

³ A kabelment er a klechad a sebechel el mo orrimel er a rechad el mo teloi a klaititekangel el mo duubech, engdi kid a remera el Kristiano a diak doruul el uaisei. Ngkmal diak bo deteloi a ngii di el klaititekangel er a balatiks me a lechub e debo er a mekemad. (Mt. 26:52) Me ngdiak demorimel el mo olab el mo er a ngii di el beluu er a chelsel tia el beluulechad er a Satan. (2 Ko. 2:11) Me kid el diak dechedal tia el beluulechad a uchul me kede mimokl el diak dechelsechusem er a ngii di el klaititekangel er a chelsel.​—Monguiu er a Johanes 15:18, 19.

⁴ Me kid el diak demecherrungel a uchul me a rebebil er kid a dirk melasem el mengoit a dimla blekerdeled el mle teloi a klaititekangel er a beluu. (Jer. 17:9; Efe. 4:22-24) Me tia el suobel a mo mesaod a bebil el omellach el sebechel el ngosukid el mo chemoit aika el blekeradel. Kede dirrek el mo mesaod er a rolel e ngsebeched el meklemalt a uldesued me ngmo blak a rengud el mo er a Rengedel a Dios.

A UCHUL ME NGDIAK DETELOI A NGII DI EL KLAITITEKANGEL

5, 6. Ngmle ua ngerang a uldesuel a Jesus el kirir a rekakerous el chad el lekiliei el teloi er tir, e ngera uchul?

⁵ A lsekum ngdirk rrau a rengum me ngdiak modengei el kmo ke mo mekerang e ngungil a di lekau el oker el kmo, ‘Ngmilekerang a Jesus?’ A Jesus a kiliei er a beluu el teloi er a betok el kakerous el chad er a Judea me a Galilea me a Samaria me a lmuut el bebil. Me a Biblia a ouchais el kmo ngmla er ngii a klekakebosech er a uldesuir tirka el chad. (Jn. 4:9) Ngdirrek el mla er ngii a klautok er a delongelir a Refarisi me a Resadusi (Rel. 23:6-9), me a delongelir a rechad me a remelai a tax (Mt. 9:11), me a delongelir tirke el tilobed er a skuul er a Llach me tirke el dimlak. (Jn. 7:49) Me a lmuut el tang, a rebetok el chad er a Israel a mle kesib a rengrir e le te mle chederedall er a beluu er a Rom. Me alta e a Jesus a mle sebechel el meketeklii a klemerang e ungil el smodii a osobel el mlo er ngii el okiu a rechad er a Judea, engdi ngdimlak a ta el lolisiich er a rulebengkel el mo teloi a ngii di el rolel a klaititekangel. (Jn. 4:22) Ngbai millisiich er tir el mo betik a rengrir er a rokui el chad.​—Lk. 10:27.

⁶ Ngera uchul me a Jesus a dimlak lekengei a uldesuir a Rechijudea el tir a ulemdasu el kmo te kuk ungil er a rebebil? E le ngii me a Demal a kmal diak lolab el mo er a bitang er a ngii di el klaititekangel er tia el beluulechad. Ngmle moktek er a Jehovah el soal a rechad a bo lebetok a rengelekir el mekekii a beluulechad. (Gen. 1:27, 28) Ngdirrek el ulemeob er tir el mo sebechir el omechell er a rengalek el kakerous a bedengir me a blekerdelir. Me Ngii me a Ngelekel a kmal diak lolisiich a klekakeakl er a delongelir a rechad me a beluu me a omelekoi. (Rel. 10:34, 35; Och. 7:9, 13, 14) Me ngkmal kired el oukerebai er tir.​—Mt. 5:43-48.

7, 8. (a) Ngera el tekoi a kirir a Rekristiano el mo ulterekokl a uldesuir er ngii? (b) Ngkirel el mo ua ngerang a uldesuir a Rekristiano el kirel a semecheklel a mondai er a beluu?

⁷ Me nguaisei, engdi ngar er ngii a ta el tekoi el kirel el mo ulterekokl a uldesued el kirel. Ngkired el melisiich er a llemeltel a Jehovah el  mengedereder. A Satan a ulemuchel el omtok er a omengederederel a Jehovah er a chelsel a sers er a Eden. Me chelechang e a rokui el chad a kirir el melilt el kmo te mo oumerang er a Dios me a lechub e ng Satan. Me kau, ke melilt el mo olengesenges a llechul a Jehovah me a lechub e ke di meruul aike el soam? Ke kongei el kmo ngdi ta el Rengedel a Dios a sebechel el sumechokl a mondai er a klechad? Me a lechub e ke oumerang el kmo a rechad a sebechir el di tir el mengedereder?​—Gen. 3:4, 5.

⁸ A nger er kau er aika el ker a mo oterekeklii el kmo ke dechor er a ngerang er a chelsel a ngii di el klaititekangel er a beluu. A rechad er a balatiks me a relmuut el bebil er a rechad a blak a rengrir el melasem el mesmechokl a mondai er a beluu, e a lebebil er a taem e ngungil a moktek er tir. Engdi a Rekristiano a medengei el kmo ngdi ta el Rengedel a Dios a sebechel el sumechokl a mondai er a klechad e dirrek el mo toketekii a llemalt. Me ngkmal kired el di mechei aika el mondai er a chimal a Jehovah. E le lsekum a derta er kid a mo melisiich a uldesuel el kirel aika el mondai er a beluu e ngkmal di mereched el mo er ngii a klekakeakl er a chelsel a ongdibel.

9. Ngera el mondai a mlo er ngii er a ongdibel er a Korinth, e milekerang a Paulus er a losmechokl er ngii?

⁹ Te mla er ngii a rebebil el Kristiano er a Korinth el ulemuchel a klaititekangel er a chelsel a ongdibel. A rebebil er tir a dilu el kmo: “‘Ngak a oltirakl er a Paulus’; ma tang a kmo, ‘Ngak a oltirakl er a Apolos’; ma tang a kmo, ‘Ngak a oltirakl er a Petrus’; ma tang a kmo, ‘Ngak a oltirakl er a Kristus.’” Me a Paulus a kmal kilebetiekl e le tiang a klunga el tekoi me ngmla mo soal el mo diak a budech er a chelsel a ongdibel. Me nguleker el kmo: “Ng mla obii a Kristus el mo telal chelechad!” Me ngera sebechel el sumecheklii tia el mondai? A Paulus a dilu er tir el kmo: “Chelechang, e ak uba ngklel a Jesus Kristus el Rubak er kid e mengelechel er kemiu el rokui el odam, me bo le ta tekingiu e lak le ngar ngii a klautok er a delongeliu. Bai bo le ta rengmiu ma uldesuiu.” Me nguaisei, ngkmal diak el kirel el mo er ngii a omeleakl er a chelsel a ongdibel er a Rekristiano er chelechang.​—1 Ko. 1:10-13; monguiu er a Rom 16:17, 18.

10. Ngmilekerang a Paulus er a lolisiich er a Rekristiano me lak bo leteloi a ngii di el klaititekangel er tia el beluulechad?

¹⁰ A Paulus a millisiich er a rengellitel el Kristiano el mo oltaut a osengir er a klengar er tir er a eanged er a bai lomdasu a tekoi er tia el chutem. (Fil. 3:17-20) * Te uluureor el melekingel a Kristus. A chad el oureor el melekingel me a lechub e ng ambassador el omtechei er a belual, a diak lolasem el mesmechokl a chetituokel me a mondai er sel beluu el lengar er ngii. Ngbai di melisiich a tekoi er a kabelment er sel beluu el ngii a omtechei er ngii. (2 Ko. 5:20) Me a Rekristiano el oba omelatk el mo kiei er a chutem a chederedall er a Rengedel a Dios, me ngdirrek el diak el kirir el mo olab el mo er a bitang er a klaititekangel er tia el beluulechad.

BO LEBLAK A RENGUM EL MO ER A JEHOVAH

11, 12. (a) Ngar er a chelsel a ngera el blekeradel e ngmo meringel er a Kristiano el olecholt er a blakerreng el mo er a Rengedel a Dios? (b) Ngera el tekoi a dilubech el mo er a ta el odos, me ngmilekerang?

¹¹ Ngar er a betok el beluu e a rechad er ngii a ta rengrir el siukang me a omelekoi me a reksi er a belurir a uchul me ngrulleterir el mo omdasu el kmo a belurir a kot el ungil. Me ngar er a chouaika el basio e a Rekristiano a kirir el omeklemalt a uldesuir me a ukltkir me bo lemelemalt a uldesuir el kirel aika el tekoi. Me te mekerang a loruul er tiang?

 ¹² Ka molatk er a Mirjeta * el redil er sel dimla beluu er a Yugoslavia. Ngmlukeroul er a telungalek el ouketui er a rechad er a Serbia. Engdi sera lesubii el kmo a Jehovah a diak longetukel er a rechad e a Satan a ngike el uchul a omengetukel, e ngmillasem el omeklemalt er a uldesuel. Ngmlo er ngii a taem el letilaut a mekemad er a belual el mlo uchul me ngliluut el mo ouketui er a rechad er a Serbia, me ngmlo meringel er ngii el omerk er a klumech el mo er tir. Me ngmlo melechesuar el kmo ngkirel el lmuut el mo blak a rengul el omeklemalt er a uldesuel. Me ngmilluluuch el olengit a ngeso er a Jehovah el kirel tia el omerellel e dirrek el bo lsebechel el lmuut el kilungii a omesiungel e bo le pioneer. Me ngdmu el kmo: “Ak mla mo medengei el kmo a bo leblak a renguk er a omesiungek e ngkmal ngosukak el kirel tia el tekoi. E le ngmo sebechek el oukerebai er sel bltkil a rengul a Jehovah me ngmerael tia el mekngit el blekerdelek el mo diak.”

13. (a) Ngera el tekoi el dilubech a rirellii a Zoila el mo mekngit a rengul, me ngmilekerang? (b) Ngera sebeched el suubii er a tekoi el dilubech el mo er ngii?

¹³ Ngdirrek el ungil a dolatk er a Zoila el redil er a Mexico, engdi chelechang e ngar er a ongdibel er a beluu er a Europe. Ngmlo remenges a mekngit el tekingir a rebebil el rudam el mla er a bebil el beluu er a Latin America el kirel a belual me a siukang me a dirrek el chelitakl er ngii. Oleko ngmle kau, e ke mo mekerang? Kede medengei el kmo aika el mekngit el tekoi a rirellii el mo chetil. Engdi kede chemat er ngii e le ngullengit a ngeso er a Jehovah el ngosuir me bo lak lemekngit a uldesuel el kirel tia el tekoi. Ngungil a lak dobes el kmo te ngar ngii er a delongeled a rebebil el dirk melasem el mesmechokl a uldesuir el kirel aika el tekoi. Me ngkmal diak el soad el melekoi me a lechub e doruul a ngii di el tekoi el mo uchul a klekakeakl me a lechub e bo luchul a klauketui er a delongeled.​—Rom 14:19; 2 Ko. 6:3.

14. Te mekerang a Rekristiano e meklemalt a uldesuir me a ukltkir?

¹⁴ Me kau ke mlukeroul er a chelsel a basio el melisiich er a uldasu el kmo a beluam a kot el ungil? Me aika el tekoi ngdirk mesisiich a uldesuem el kirel? A Rekristiano a kmal diak el kirir el mechei a chouaika el uldasu me lerelleterir el mo mekngit a uldesuir el bedul a rechad. Me ke mo mekerang a lsekum ke melechesukau el ngar er ngii a mekngit el uldesuem el bedul a rechad er a ngodech el beluu, me a siukang me a omelekoi? A leuaisei, e ngkmal ungil el bo mkerekikl el melatk er a osengel a Jehovah el kirel a omengetukel me a uldasu el kmo a beluam a kot el ungil. Tia el rolel a omerriter a kmal ungil el tekoi el moruul er ngii er a temem el mesuub el di kau el tang me a lechub e ngtemel a omengull el telungalek er kau. E sola e molengit er a Jehovah me lengesukau el mo meklemeltii a uldesuem el kirel aika el tekoi.​—Monguiu er a Rom 12:2.

15, 16. (a) Te mo mekerang a rebebil e le kid el blak a rengud el mesiou er a Dios? (b) Te mekerang a ruungalek e ngosuterir a rengelekir?

¹⁵ Ngkmal soad el mesiou er a Jehovah el klikiid a ukltked. Me a lebebil er a taem e ngmo kired el melilt el mo ngodech er a rechad er a urered me a skuled me a retonari er kid me a dirrek el rechedad. (1 Pe. 2:19) A Jesus a milengelechel er kid el kmo a rebebil a mo ouketui er kid e le kid el ngodech a uldesued er tir. Lak dobes el kmo tirke el omtok er kid a diak lodengelii a Rengedel a Dios. Seikid a uchul me ngdiak lodengelii a uldesued el kirel a klungel a ultutelel a blakerreng er kid el mo Renged er a bai kabelment er a klechad.

¹⁶ A blakerreng el mo er a Jehovah a belkul a kmo ngkired el mo mesisiich el dechor el outekangel a omelsemai el bo dechelebangel. (Dan. 3:16-18) A dakt el mo er a rechad a  chelitecheterir a rokui el chad, engdi a remekekerei el chad a ileakl el meringel er tir el mo ngodech er a rebetok. Me ngungil a omereched el ngosuterir a rengelekem a lsekum te mocha kirir el mo osus er a banderang me a ngii di el tekoi el melisiich a beluu. Mousbech er a temel a omengull el telungalek el ngosuterir el mo medengei a chouaika el tekoi me bo el sebechir el bekeu el dechor e mesaod er a klaumerang er tir el oba omengull. (Rom 1:16) Ngdirrek el ungil el bo mongedecheduch er a resensei er tir a lsekum ngmo kirel.

MORENG A SAUL EL KIREL A BLEBELEL A JEHOVAH!

17. Ngkired el mengeroid er kid er a ngera el uldasu, e ngera uchul?

¹⁷ Ngdiak a kngtil a lsekum ngsoad a beluu me a siukang me a omelekoi me a kall er a beluu el demlukeroul er ngii. Engdi ngdiak el kired el mo oba uldasu el kmo, “a beluak a kot el ungil.” A Jehovah a mileob a betok el kakerous el tekoi el uchul a deurreng er kid. (Psa. 104:24; Och. 4:11) Me ngera uchul me kede mo omdasu el kmo a rolel er ngak a kot el ungil?

18. Ngmekerang e mo sebechel a tabesul el osenged er a tekoi el mo uchul a klengeltengat?

¹⁸ A Dios a soal a rokui el chad a bo lodengelii a klemerang e bo lenguu a diak a ulebengelel el klengar. (Jn. 3:16; 1 Ti. 2:3, 4) Me sel lebo el tabesul e lemelemalt a osenged er a tekoi, e nglmuut el smisichid e dirrek el mo uchul e ngmukerreu a kltarreng er a delongeled el Kristiano. Me ngkired el mengeroid er kid er a ngii di el klaititekangel er a beluulechad a lsekum e ngsoad el melemolem el blak a rengud el mo er a Jehovah. Me kede mera el oba omereng el saul e le Jehovah el mla ngubetid er tia el beluulechad er a Satan el di melisiich a klekakeakl me a kldidairreng me a klaiuechit! Mada doterekokl a rengud el mo melisiich er a budech el ua tekingel a milluches er a psalm el kmo: “Ng meral ungil, e deurreng sel le dak el kiei a rudam el ta rengrir!”​—Psa. 133:1.

[Aike el Footnote]

[Aike el Ker er a Suobel]