A irechar el mei e a rechad a uluureng el kiei el di ngeasek el mesisiich a bedengir el diak a ulebengelel. Engdi ngmekngit a rengud e le chelecha el taem e kid el rokui a di mo chuodel e mad. Me a tekingel a Job er a bekord el edei el telael el rak er a mla me mong a dirk klemerang el me lmuut er chelechang.

A urunguled el kiei el diak a ulebengelel a mesisiich e dirrek el oureng er ngii a rokui el chad. A Biblia a ouchais el kirel a Dios el kmo: “Ngmo lmuut er a urungulir el kiei el diak a ulebengelel me nglilia er a chelsel a rengrir.” (Olisechakl 3:11, NW) Me omomdasu e ngmelemalt el tekoi a lsekum a betik a rengul el Dios a loia er a uldesued tia el urunguled el ngii a diak el sebechel el mo mera el tekoi? A lsekum a nger er kau a diak, e ngmelemalt a uldesuem. A Tekingel a Dios a mesaod er a kodall el kmo ngcheraro el ngii a mo nguemed.​—1 Korinth 15:26.

Me ngbleketakl el kmo a kodall a cheraro. Me ngdiak a chad el mesisiich a bedengel me a uldesuel el soal el mad. Me a lsekum e ngar er ngii a kdekudel el tekoi el mo duubech e kede mertid me a lechub e kede chemiis er ngii. E sel bo desecher e kede osiik a rolel e kede mo ungil. Me kede meruul a ngii di el tekoi el sebeched el kutmokl me lak bo luchul e de mad.

Ngar er ngii a uchul me ngsebeched el oumerang el kmo a cheraro el kodall a mo nguemed? Ngkmal ngar er ngii. A Jehovah el Dios a dimlak lebebii a chad me di lekiei el kesai el rak e lemad. A kodellir a rechad a dimlak el tedebechel a telbilel er a uchelel. Ngbai mle moktek er ngii el soal a rechad a lekiei el diak a ulebengelel, me tia el moktek er ngii a bo lotutii.​—Isaia 55:11.

Ngmekerang e mo nguemed a kodall? A rechad el kiliei er a irechar a millasem el torebengii a kodall, engdi ngdimlak el sebechir. Me ngme lmuut er chelechang e a rechad a dirk melasem el torebengii. A re scientist a mla meruul a kar el sebechel el omekungil me a lechub e ngmerrob a bebil er a rakt. Te dirrek el milsuub a betok el tekoi el kirel a DNA er a rechad me a charm. Me ngar er a betok el basio e a klemengetel a klengar er a rechad er chelechang a kuk kemanget er a klengar er a rechad el kiliei er a dart el rak er a mla me mong. Me nguaisei, engdi a kodall a dirk melemolem. Me ngua lolekoi a Biblia el kirir a rechad el kmo: Te “lmuut el mor a chutem.”​—Olisechakl 3:20.

A ungil chais a kmo a kodall a sebechel el mo nguemed el diak lultuil er a llemesir a rechad. A Jehovah el Dios a mla kutmeklii a rolel e ngmo osebelid er a kodall. E ngike el mo otutii tia el uldesuel a Jesus Kristus.