1, 2. (a) Kede mekerang e nguu a diak a ulebengelel el klengar? (b) Ngera sebechel el ngosukid me kede lomelemii a omerolled?

 SEL bo de Kristiano, e ngdi ua domuchel el merael er a kemanget el omerael. Me a lsekum kede melemolem el blak a rengud el mesiou er a Dios, e a omerolled a di mo ungilbesul me kid a mo sebeched el kiei el mo cherechar. A Jesus a dilu el kmo: “Ngikel mtekengelii a rengul el mor a ulebongel, a mo suobel.” (Mt. 24:13) Me a lsoad el rokir a omerolled e ngkmal kired el melemolem el blak a rengud el mesiou er a Dios el mo lmuut er a “ulebongel,” el ngii alta e ngulebongel er a klengar er kid me a lechub e ngulebongel er tia el mekngit el beluulechad. Engdi ngkmal kired el kerekikl me lak bo demekesuseu er a uldasu er tia el beluulechad. (1 Jn. 2:15-17) Me kede mekerang e mo sebeched el lomelemii tia el omerolled?

² A Jesus a milecherei a kot el ungil el kerebai el kired. Me a omerollel a llechukl er a Biblia. Me sel dosuub er ngii e ngsebeched el mo medengei el kmo a Jesus ngua ngera el chad. Ngdirrek el rullid el mo betik a rengud e oumerang er ngii. (Monguiu er a 1 Petrus 1:8, 9.) A apostol el Petrus a dilu el kmo a Jesus a milecherei a kerebai el kired el oltirakl er ngii. (1 Pe. 2:21) Me a lsekum ngmo blak a rengud el oukerebai  er a Jesus e ngmo sebeched el outekangel el mo lmuut er a ulebongel. * Ngar sel mlo merek el suobel e kede milsuub el kirel a klengariourreng me a klechubechub er a Jesus. E ngar tia el suobel e kede kuk mo mesuub el kmo ngmekerang a doukerebai er a blekeurreng me a sekutaberreng er ngii.

3. Ngerang a blekeu, e kede mekerang e mo obang?

³ A blekeu a blekeradel el smisichid e dirrek el ngosukid me ngsebeched el outekangel a ringel. Ngsebechel el ngosukid me kede bekeu el meruul a llemalt. Ngdirrek el sebechel el ngosukid me ngklou a rengud e melemolem el blak a rengud el mesiou er a Dios er aike el taem el dechelebangel a omelsemai. A omeluu el mo er a Dios me a omelatk me a bltikerreng a ngosukid me ngmo sebeched el oba blekeu. Ngmekerang e mo uaisei? Sel bo doluu er a Dios e le ngchetid el tomellii a rengul, e ngrullid me ngdiak debechei a dekted er a rechad me letemellii a blakerreng er kid el mo er Ngii. (1 Sa. 11:7; Osi. 29:25) Me a omelatk el lebeskid a Jehovah a ngosukid el mo kerekikl el melatk er a ngar medad el klebesei e diak di dolatk a mondai er kid er a bek el sils. (Psa. 27:14) Me a mera el bltikerreng a rullid el mo oba blekeu el mo lmuut er a taem el bo demodechelakl. (Jn. 15:13) Ngmo sebeched el oba blekeu sel dultuil a klaumerang er kid er a Dios e doukerebai er a Ngelekel.​—Psa. 28:7.

4. Ngmilekerang a Jesus e ochotii a blekeurreng er ngii er a lengar er a templo? (Momes er a siasing er a uchelel a suobel.)

⁴ Sel taem er a dirk el 12 a rekil a Jesus, e ngulechotii a blekeurreng er ngii er a lebo er a “Templo, el dengchokl er a delongelir a re sensei.” (Monguiu er a Lukas 2:41-47.) Tirka el sensei a mle ungil el medengei a Llach er a Moses, e dirrek el mle ungil medengei a siukang er a rechad er a Judea. E aika el siukang a rirellii el mo meringel er a rechad el oltirakl a Llach er a Moses. Engdi a Jesus a uleba blekeurreng me ngdimlak lebechei aika el klemedengei er tir me leterebengii me lak longedecheduch. Ngbai millemolem el “oker a ker er tir.” Kede medengei el kmo a keril a dimlak el ua kerrir a rengalek. Ngsebeched el kora melatk el kmo nguleker a dmolech a belkul el ker el rirelleterir tirka el sensei el mo omtab aika el keril. Me a lsekum e tirka el sensei a mle sorir el oker a ker er a Jesus el omuchel a klaititekangel e ngdimlak a ta el bo el sebechel el oureor. Me tirke el rokui el ulerrenges er ngii el uldimukl er tirka el sensei, a kmal “mlo mechas a rengrir er a llemesel a rengul a longer er tir.” Nguaisei, a Jesus a mle bekeu el mesebechakl er a klemerang el ngar er a Tekingel a Dios!

5. Ngoeak a ngera el rolel e a Jesus a ulechotii a blekeurreng er ngii er a omesiungel?

⁵ Ngar er a taem er a omesiungel e a Jesus a ulechotii a blekeurreng el okiu a kakerous el rolel. El ua tiang, ngmileketeklii el mo er a rechad el kmo a remengeteklel a klechelid a mengeuid er tir el ousbech a klsuul el osisechakl. (Mt. 23:13-36) Ngii el Jesus a dimlak lebecherei a beluulechad me letemellii a blakerreng er ngii. (Jn. 16:33) Ngmillemolem el olisechakl alta e ngmle chelebangel a ultok. (Jn. 5:15-18; 7:14) E mle eru el taem el uleba blekeu e oldik er a rechad el mla er a templo el meruul a tekoi el melemall er a mera el omengull.​—Mt. 21:12, 13; Jn. 2:14-17.

6. Ngmilekerang a Jesus e ochotii a blekeurreng er a ulebongel er a klengar er ngii er tia el chutem?

⁶ Me bo dosaod er a blekeurreng er a Jesus er sel ulebongel el sils er a klengar er ngii er tia el chutem. A Jesus a mle medengei a tekoi el mo duubech er sel taem el Judas a mo oterekeklii. Me nguaisei, engdi sel kesus er a loruul er a Baskua e a Jesus a dilu er a Judas el kmo: “Morchedau el remuul a ikel kirem el meruul!” (Jn. 13:21-27) E sera lengar er a sers er a Gethsemane, e ngmle bekeu el di ngii el ochotii el mo er a resoldau el mle omdechem er ngii. Me alta e ngmlo ocherur a kodall, engdi ngdirk ulemekerreu er a redisaiplo er ngii,  me ngdilu er a resoldau el kmo: “Bechititerir tirkal bebil er a re chad me lorael.” (Jn. 18:1-8) E sera lengar er a ngarbab el kort er a rechad er a Judea e loker er ngii, e a Jesus a mle bekeu el subedeterir el kmo ngii a Kristus el Ngelekel a Dios. Me ngdimlak el medakt alta e ngike el ngarbab el prist a millasem el osiik a uchul e ngmo mekodir. (Mk. 14:60-65) Me nglilemelemii a blakerreng er ngii el mo er a Dios e mlad er a teluo el kerrekar. Me ngar er a ulebengelel a klengar er ngii e nguleldiu el kmo: “Ng mla mecherrungel a rokui el tekoi!”​—Jn. 19:28-30.

7. Kemiu el ngeasek, ngua ngera uldesuiu e le kemiu el Sioning er a Jehovah? E kom mekerang e ochotii el kmo kom oba blekeurreng?

⁷ Kede mekerang e oukerebai er a blekeurreng er a Jesus? Ngar er a skuul. Kemiu el ngeasek, ngsebechiu el olecholt er a blekeurreng sel mouchais er a rengalek er a skuul me a relmuut el bebil el kmo kom Sioning er a Jehovah. Ngoeak tiaikid el rolel e kom ochotii el kmo ngdmeu a rengmiu el omtechei er a ngklel a Jehovah, alta e a rebebil a mo melenguul er kemiu. (Monguiu er a Psalm 86:12.) A rebebil a locha mo sorir el mengesuseu er kemiu el mo oumerang el kmo kede mla er a mongkii el mei. Engdi ngsebechel el mo ulterekokl a rengum el kmo aike el lolekoi a Biblia el kirel a blebelel a Dios a klemerang. Ngsebechiu el ousbech a babilenged el mesaod el kirel a blebelel a Dios el mo onger er tirke el oker el kirel a klaumerang er kau. (1 Pe. 3:15) Seikid e ngmo ungil a rengmiu e le kom medengei el kmo kom uleba blekeurreng el mesebechakl er a klemerang er a Biblia!

8. Ngera uchul me ngkired el omerk er a klumech el oba blekeu?

⁸ Ngar er a omesiunged. Kid el mera el Kristiano a kmal kired el melemolem el “bekeu el ouchais a chisel” a Jehovah. (Rel. 14:3) Ngera uchul me ngsebeched el olisechakl el oba blekeu? A kot, e kede medengei el kmo a tekoi el dolisechakl a mengai er a Biblia. E aikang a klemerang el tekoi. (Jn. 17:17) Ongerung, e kid a “kldemel a Dios er a ureor,” me ngmla meskid a chedaol reng er ngii el olengeseu er kid. (1 Ko. 3:9; Rel. 4:31) E a ongedei, e ngbetik a rengud er a Jehovah me a rechad a uchul me ngsoad el mo er a tkurrebab el sebeched el ouchais er a rechad el kirel a ungil chais. (Mt. 22:37-39) Tiaikid el blekeurreng el dobang a rullid me ngdiak demeterob el olisechakl er a rechad. Kede mla oterekokl a rengud el mo melemolem el olisechakl er a klemerang el mo er tirke el chad el remengeteklel a klsuul klechelid “a mla chodeng a rengrir.” (2 Ko. 4:4) Me kede melemolem el omerk er a ungil chais el mo er a rechad alta e a rebebil a mo otngeklii me a lechub e te mo oldechelakl er kid.​—1 Th. 2:1, 2.

9. Kede mekerang e ochotii a blekeurreng er a taem el dechelebangel a ringel?

⁹ Sel dechelebangel a ringel. Sel bo demui el ultuil er a Dios, e ngmo meskid a klaumerang me a blekeurreng me ngmo sebeched el outekangel a ringel. Me alta e ngmad a betik er a rengud me ngmo mekngit a rengud, engdi ngdirk ngar er ngii a omelatk el dobang. Me ngulterekokl a rengud el kmo a “Dios el olengeseu a rokui el tekoi,” a mo melisiich er kid. (2 Ko. 1:3, 4; 1 Th. 4:13) Me alta ngmeringel a bedenged e le kede smecher me a lechub e kede telemall, engdi ngdiak dekengei el melai a rolel a ukeruul el ngii a mo melemall er a rengul a Dios. (Rel. 15:28, 29) Me a lsekum ngmeringel a uldesued e le “rengud a oltutakl er kid,” e ngdiak el kirel el mo mechitechut a rengud, e le kede oumerang er a Jehovah el ngii a “kmeed er tirkel chelam a rengrir.”​—1 Jn. 3:19, 20; Psa. 34:18.

10. Ngerang a sekutaberreng, e ua ngerang a omerellel me a cheldechedechal a Kristiano el oba sekutaberreng?

¹⁰ A sekutaberreng a dechal a chad el rullii me ngsebechel el kutukl a ungil me a mekngit, e ngiltii el mo meruul a ungil. (Heb. 5:​14) Me a Kristiano el oba sekutaberreng a melilt a tekoi el loruul el ngii a mo melisiich er a deleuill er ngii me a Dios. Ngkerekikl a cheldechedechal me ngdiak bo luchul e lolemall a rengrir a rebebil. Ngbai oldeu  er a rengul a Jehovah e le ngkerekikl a tekingel sel longedecheduch er a rechad. (Osi. 11:12, 13) Ngdirrek el meoud el ngmasech a rengul. (Osi. 14:29) Ngmelemolem el “meruul a ungil” e ungil el melilt a tekoi el loruul er a chelsel a klengar er ngii. (Osi. 15:21) Me kede mekerang e mo oba sekutaberreng? Ngkmal kired el mesuub er a Tekingel a Dios e oltaut aike el tekoi el desuub. (Osi. 2:1-5, 10, 11) Ngdirrek el sebeched el mesuub e oukerebai er a cherrungel el kerebil a Jesus el uleba sekutaberreng.

11. Ngmilekerang a Jesus e ochotii a sekutaberreng el okiu a cheldechedechal?

¹¹ A Jesus a ulechotii a sekutaberreng el okiu a cheldechedechal me a omerellel. A cheldechedechal. Sera lolisechakl el kirel a ungil chais e nguluusbech a ungil el tekoi el chilas a rengrir a rechad el ulerrenges er ngii. (Mt. 7:28; Lk. 4:22) Ngmle blechoel el menguiu me a lechub e ngousbech a Tekingel a Dios el omeketakl a tekoi. Ngmle ungil el medengei el kmo ngera el bades a sebechel el ousbech er ngii el mo er a ua ngera el blekeradel. (Mt. 4:4, 7, 10; 12:1-5; Lk. 4:16-21) Me a cheldechedechal a Jesus el mle blechoel el ousbech a Bades a kmal rirutech a rengrir a rechad el ulerrenges er ngii. Me a uriul er a lebekiis er a kodall e ngmilengedecheduch er a reteru el disaiplo er ngii er a lengar er a omerollir el mo er a Emmaus. Ngulemeketakl a belkul aike el bades el mesaod el kirel ngii el Jesus. Me a uriul e a redisaiplo er ngii a dilu el kmo: “Ng kor a kilard a rengud er ser a longedecheduch er kid er a rael e losaod er kid a Chedaol Llechukl?”​—Lk. 24:27, 32.

12, 13. Ngera el kerebai er a Jesus a ochotii el kmo ngmle tabesul a osengel er a tekoi e dirrek el mle meoud el ngmasech a rengul?

¹² A uldesuel me a rengul. A sekutaberreng er a Jesus a rirellii me ngmle meoud el ngmasech a rengul. (Osi. 16:32) Ngmle sebechel el omtebechel er a uldesuel, e dirrek el mle ‘medemedemek e ngariou a rengul.’ (Mt. 11:29) Ngii el Jesus a dirrek el mle blechoel el klou a rengul sel lobengterir a redisaiplo er ngii alta e ngmla er ngii a chelitecheterir. (Mk. 14:34-38; Lk. 22:24-27) Ngmillemolem el chelellakl a rengul el mo lmuut er a taem el blo lemekngit a omerellir a rechad el mo er ngii.​—1 Pe. 2:23.

¹³ A sekutaberreng er a Jesus a ngilsuir el mo tabesul a osengel er a tekoi. Ngmle medengelii a uchul me ngar er ngii a Llach er a Moses, me tiang a mla er ngii a lerellii er a omerellel el mo er a rechad. El ua tiang, ka molatk er a redil el mle smecher “el merael a rasech er ngii.” (Monguiu er a Markus 5:25-34.) Ngika el redil a mirrael er a delongelir a rebetok el chad el mo rutechii a ikrel a bilel a Jesus me ngmlo ungil er a rektel. E a doltirakl er a Llach e ngika el redil a dimlak el klikiid me ngdimlak el kirel el merutech er a ngii di el chad. (Lev. 15:25-27) Engdi a Jesus a dimlak bo el mekngit a tekingel el bedul ngii. Ngbai ulechotii a “klechubechub ma blakerreng” el mo er ngii e le ngmle medengei el kmo a chouaika el blekeradel a bai lmuut el meklou a ultutelel er a di blekongesenges el mo er a Llach. (Mt. 23:23) Me ngmle ungil a tekingel el mo er ngika el redil el dilu er ngii el kmo: “Rungalek, kuluumerang a uchul me ke mla mo ungil, me morael el ngar a budech.” Me tiang a olechotel a kot el ungil el kerebai er a sekutaberreng er a Jesus!

14. A Jesus ngmillilt el mo meruul er a ngerang? E milekerang e sebechel el melemolem el blak a rengul er a omesiungel?

¹⁴ A rolel a klengar er ngii. A Jesus a ullecholt er a sekutaberreng el okiu a rolel a klengar er ngii. Me ngileltii a ureor er a berkel a klumech el mo urerel. (Lk. 4:43) Ngdirrek el millilt a tekoi el ngii a sebechel el ngosuir me ngmelemolem el blak a rengul el meruul er a omesiungel e mo rokir a urerel. El ua tiang, ngulemekbeot er a rolel a klengar er ngii me bo el sebechel el mengoit er a klou el temel me a klisichel el meruul er a omesiungel. (Lk. 9:58) Ngmle medengei el kmo ngklou a ultutelel el kirel el osisecheklterir a rechad me bo el sebechir el melemolem el omerk er a klumech er a uriul er a kodellel. (Lk. 10:1-12; Jn. 14:12) Ngdirrek el tilbir el mo er a redisaiplo er ngii el kmo ngmo olengeseu er tir er a omesiungir “el mo lmuut er a ulebongel er a beluulchad.”​—Mt. 28:19, 20.

15. Kede mekerang e ochotii a sekutaberreng sel dongedecheduch er a rechad?

¹⁵ Kede mekerang e mo oukerebai er a sekutaberreng er a Jesus? A cheldechedechad. Sel dongedecheduch er a rudam me a rudos er kid, e ngungil a dousbech a ungil el tekoi el melisiich er tir er a bai dongitechut er tir. (Efe. 4:29) Me sel dongedecheduch er a rechad el kirel a Rengedel a Dios, e a cheldechedechad a kirel “el ulsar” el belkul a kmo ngkirel el ungil a delecherul a tekinged. (Kol. 4:6, BT) Kede melasem el mo medengei aike el ousbech a rechad me aike el tekoi a lesemeriar er ngii, e mo ungil el melilt a tekoi el dolekoi. Me sel lungil a cheldechedechad e a rechad a mo sorir el lorrenges er kid me a klumech el domerk er ngii a sebechel el medalem er a rengrir. Me a dirrek el sel dosaod er a klaumerang er kid, e ngungil a dousbech a bek el techall el menguiu er a Biblia el mo er tir, e le tiang a Tekingel a Dios el ngii a uchetemel a osisechekled. Kede ungil medengei el kmo a klumech er a Biblia a lmuut el klou a klisichel er a di tekinged.​—Heb. 4:12.

16, 17. (a) Kede mekerang e ochotii el kmo ngtabesul a osenged er a tekoi e diak di lemereched el ngmasech a rengud? (b) Kede mekerang e melemolem el blak a rengud er a omesiunged?

¹⁶ A uldesued me a rengud. A sekutaberreng er kid a ngosukid el mo meduch el omtebechel a uldesued me sel bo dechelebangel a omelsemai e ngdiak di lemereched el ‘ngmasech a rengud.’ (Jak. 1:19) Me a lsekum a rechad a melibas er kid, e ngungil a dolasem el mo medengelii a uchul me te melekoi me a lechub e te meruul er tia el tekoi. Tiang a sebechel el ngosukid me ngmo diak lekesib a rengud e mo beot er kid el ousubes er tir. (Osi. 19:11) A sekutaberreng a dirrek el ngosukid el mo tabesul a osenged er a tekoi. Ngkired el medengei el kmo a rudam me a rudos er kid a diak lemecherrungel. Ngdirrek el diak dobes el kmo te locha chelebangel a mondai er tir el kid a diak dodengei. Me ngkired el kongei el kuk remenges a uldesuir. Me ngsoad el bek el techall e kede kongei a uldesuir, e diak di dorrimel er tir el mo oltirakl a uldesued.​—Fil. 4:5.

¹⁷ A rolel a klengar er kid. Kid a medengei el kmo a berkel a ungil chais a kot el ileakl el techall er a omesiou el dobang. Me ngkmal soad a rokui el tekoi el dolilt el mo meruul, bo luchul e dolemolem el blak a rengud er a omesiunged. Kede ngiltii el nguu a Jehovah el mo kot er a klengar er kid, e dirrek el omekbeot a rolel a klengar er kid me bo el sebeched el mengoit er a klou el temed me a klisiched el omerk er a klumech er a uchei er a lemei a ulebongel.​—Mt. 6:33; 24:14.

18. Kede mekerang e lomelemii a omerolled el mo er a diak a ulebengelel el klengar? Me ke mla tibir er a rengum el mo mekerang?

¹⁸ Ngkmal dmeu a rengud el kuk siluub a bebil el ungil el blekerdelel a Jesus! Ka di molatk a klungiaol el bo dengai a lsekum kede mesuub a lmuut el bebil er a blekerdelel, e mo melasem el oukerebai er ngii. Mada me bo leblak a rengud el oukerebai er a Jesus. A bo deuaisei, e kede melemolem er a omerolled el mo er a diak a ulebengelel el klengar, e dirrek el lmuut el olekeed er kid er a Jehovah.