El ua dulsaod er a uchei, a Jesus a uluusbech er a klengar er ngii el “olisechakl a ungil klumech el kirel a Rengedel a Dios.” (Lukas 8:1) Ngmirrael er a kemanget el omerael er a chelsel a beluu er a Israel me bo el sebechel el osisecheklterir a rechad el kirel a Rengedel a Dios. Ngar er a chelsel aike el eua el Ebangkelio el mesaod el kirel a omesiungel a Jesus, e a tekoi el Renged a medung el kuk betok er a 100 el taem. E a oumesingd el taem e tia el tekoi a mildung el ngar er a cheldechedechal a Jesus, engdi ngulterekokl el milsaod a lmuut el betok el tekoi el kirel a Rengedel a Dios!​—Johanes 21:25.

Sera lengar tia el chutem a Jesus, e ngera uchul me a Renged a kmal mle klou a ultutelel er ngii? A ta er a uchul a ngii el mle medengei el kmo a Dios a mla tutkii el mo mengedereder er ngii el Renged. (Isaia 9:6; Lukas 22:28-30) Engdi a Jesus a dimlak el moktek er ngii a melai er a klisiich me a klebkall. (Mateus 11:29; Markus 10:17, 18) Ngdimlak louchais er a rechad el kirel a Renged el di millatk a klungiolel. Ngbai kmal semeriar er tia el Rengedel a Dios * e le ngmo kutmokl a tekoi el kirel a betik er a rengul el Demal el ngar er a eanged me tirke el blak a rengrir el oltirakl er ngii.

A Jesus a kmal betik a rengul er a Demal. (Osisechakl 8:30; Johanes 14:31) Ngkmal soal a blekerdelel a Demal el betik a rengul, e chubechubechad, e melemalt a omerellel. (Duteronomi 32:4; Isaia 49:15; 1 Johanes 4:8) Me ngulterekokl el kmal chetil el orrenges a blulak el tekoi el kirel a Demal el kmo, ngomes er kid el chuarm e diak a ngera el lerellii el kirel, me a lechub e ngsoal a rechad a lecharm. Tiaikid a ta er a uchul me a Jesus a kmal mle soal el omerk er a “Ungil Chais el kirel a Rengedel a Dios,” e le ngmle medengei el kmo ngmo er ngii a taem e a Renged a mo meketeklii a klemerang el kirel a Demal. (Mateus 4:23; 6:9, 10) Ngmekerang e sebechel el kutmeklii tia el tekoi?

Ngokiu tia el Renged e a Jehovah a mo melodech a betok el tekoi el di mo uchul a klungiolel a klechad. “Ng mo smuld a rokui el chiuosech er a mederir” a reblak a rengrir el chad. Ngdirrek el mo choroid aike el rokui el tekoi el uchul a langel, me ng “dikea lluut el mor ngii a kodall, e mo diak a klengiterreng, ma langel, ma ringel.” (Ocholt 21:3, 4) Me a Dios a mo ousbech er tia el Renged el okngemed a rokui el ringel el lecharm er ngii a rechad. *

Ngdiak el mechas a rengud er sel klemeriarreng er a Jesus el kmal mle soal el ouchais er a rechad el kirel a Rengedel a Dios! Ngmle ungil medengei el kmo a  Renged a mo meketakl a blekerdelel a Demal el kmal mesisiich e chubechubechad. (Jakobus 5:11) Ngdirrek el mle medengei el kmo, a Renged a mo uchul a klungiolir a remelemalt el chad el tir a betik er a rengul.

A kemanget el taem er a uchei er a lemei er a chutem a Jesus e ngkiliei er a eanged el obengkel a Demal. Me a Chedam a uluusbech er ngii el Ngelekel el omeob a rokui el tekoi. Aikang a uldimukl er ngii a diak lemochur a ildisel el btuch me a galaxy el ngar er a eanged me tia el klebokel el beluad el beluulechad el mui er a betok el bedengel a charm. (Kolose 1:15, 16) Me nguaisei, engdi a Jesus a kmal mle soal a rechad el kuk mle ileakl er a rokui el bleob.​—Osisechakl 8:31.

A bltkil a rengul a Jesus el mo er a rechad a mlocholt el okiu a omesiungel. Ngar er a uchelel a omesiungel e ngmileketeklii el kmo ngmlei er a beluulechad el kirel el “ouchais er a ungil chais” el mo er tirke el ousbech a ngeso. (Lukas 4:18) Me nguaisei, engdi a Jesus a mirruul a lmuut el betok el tekoi el dimlak di longedecheduch er a rechad e lemerekong. Ngdirrek el mirruul a tekoi el ulechotii el kmo ngmle betik a rengul er a rechad. El ua tiang, sera bo lekldibel er bita er ngii a rebetok el chad el lorrenges er ngii e a Jesus a kmal “mlo chubteterir, me ng ulemekungil er tirkel silecher.” (Mateus 14:14) A ta el taem e a chad el mle chuarm er a meringel el rakt a ulechotii a klaumerang er ngii er a ledu er a Jesus el kmo, “chomko ng soam, e ng sebechem el kikidak.” Me a bltkil a rengul a Jesus a uchul me ngdilu el kmo: “Ng soak, me bo mklikiid,” e ulemekungil er ngii. (Lukas 5:12, 13) Me sera lesa sechelil er a Maria el mengeiung er a kodellel a ochedal el Lasarus e “ng kmal mlo imis el mekngit a rengul,” me ng “lilangel.” (Johanes 11:32-36) Me ngrirellii a kmal mengasireng el tekoi el ulekisii a Lasarus er a kodall, alta e ngmla mo 4 el klebesei er a lemad!​—Johanes 11:38-44.

A Jesus a mle medengei el kmo a tekoi el lulengetmokl er sel taem a di mle tedeb. Ngmle medengei el kmo ngdi telkib e tirke el lulemekungil er tir a lmuut el mo smecher me tirke el lullekiis er tir a lmuut el mo mad. Me nguaisei, engdi ngdirrek el mle medengei el kmo a Rengedel a Dios a mo sumechokl aika el mondai me ngdiak el lluut el mo er ngii. Seikid a uchul me ngdimlak di loruul a mengasireng el tekoi e ngdirrek el kmal mle blak a rengul el omerk er a “Ungil Chais el kirel a Rengedel a Dios.” (Mateus 9:35) A mengasireng el tekoi el lurruul a di olechotel aike el tekoi el Rengedel a Dios a di kmedu el mo kutmokl er a beluulechad el rokir. Ka molatk a telbiil el lolekoi a Biblia el kirel seikid el taem.

•  Ngmo diak a secher.

  “A re meiko a mo sebechir el omes, ma re mechad a mo orrenges. A re chitechut a mo melechesokl e meloik, me tirkel bengong a mo oldiu er a deurreng.” Ngdirrek el “mo diak a tal chad el kiei er a beluad el lmuut el mo mengeremrum el kmo ng smecher.”​—Isaia 33:24; 35:5, 6.

• Ngmo diak a kodall.

  “A re melemalt a mo ungilbesrir el kiei er a chelsel a beluu e mo oubeluu er ngii el di blechoel.”​—Psalm 37:29.

  “Ngiil Rubak el DIOS a mo okngemedii a kodall me ng mo diak el mo cherechar. Ng mo mesuld a iuechel a mederir a re bek el chad.”​—Isaia 25:8.

• Tirke el mla mad a lmuut el me ngar.

  “Tirkel rokui el mla mad a mo rongesii a ngerel me te mo tuobed er a debellir.”​—Johanes 5:28, 29.

  “Ngmorngii chokiis.”​—Rellir 24:15, BT.

• A rokui a mo er ngii a blirir me a urerir.

  “A re chad a mo toketek a blai e mo kiei er ngii; el diak le ngodech el chad a mo ousbech. Te mo dualem a sers er a bilong, e mo dmeu a rengrir er a bilong; ng diak le kuk ngodech el chad a mo melim. . . . Ng mo cherrungel a deuil a rengrir er a ikel uluureor el kirel.”​—Isaia 65:21, 22.

•  Ngmo diak a mekemad.

  “Ng merrob a mekemad er a beluulchad el rokir.”​—Psalm 46:9.

  “A re beluu a mo diak lluut el mor a mekemad, el kmal diak lluut el mengedmokl el kirel a mekemad.”​—Isaia 2:4.

• Ngmo diak a bosech er a kall.

  “A chutem a mla otebedii a smengel; ng Dios, el Dios er kid a mla omekngeltengat er kid.”​—Psalm 67:6.

  “Bo le betok a redechel a wheat er a beluu; ma ikel bukl di bo le medekedek er a dellomel el kall.”​—Psalm 72:16.

• Ngmo diak a chelebuul.

  “Ele re metacherbesrir a diak di le blechoel el obes er tir.”​—Psalm 9:18.

  “Ng olsobel er a re mechebuul el tirkel omekedong er ngii, me tirkel metacherbesrir ma re cheloit el chad. Ng chubteterir a re mechitechut ma re mechebuul; ng olsobel a klengar er tirkel metacherbesrir.”​—Psalm 72:12, 13.

Me sel molatk el kirel aika el telbiil el bo leketmokl a Renged, e ngsebechem el mo medengelii sel uchul me a Rengedel a Dios a kmal mle klou a ultutelel er a Jesus? Sera lengar er a chutem e ngkmal mle semeriar el mesaod el kirel a Rengedel a Dios el mo er a ngii di el chad el mle soal el orrenges, e le ngmle medengei el kmo a Renged a mo sumechokl e okngemed a rokui el meringel el mondai el dechelebangel er chelechang.

Me kau, ke semeriar aike el telbiil el ngar er a Biblia el kirel a Renged? A leuaisei, e ngmekerang e mo sebechem el suub a lmuut el betok el kirel tiaikid el Renged? E ngera sebechem el meruul me bo mngai a klungiolem er ngii? A ongingil el suobel a mo onger aika el ker.