1, 2. (a) Ngera bebil er a ngerechelel a klekar a sib? (b) Te mekerang a ruungalek e mo ua klekerengel a sib?

 NGAR er a Israel er a irechar e ngmle meringel a klengar er tirke el klekerengel a sib. Ngmle kirir el oureor er rikl sel lemekeald me a lechub e ngtemel a kelekolt, e dirrek el mle kirir el omekerreu a chermir me lak lemetemall er a tebelik el charm me a lechub e a remerechorech lerechorech. Te dirrek el mle kirir el kerekikl el omes a derta el chermir e omkar aike el smecher me a lechub e ngar er ngii a tellemall er ngii. Te kmal ileakl el kerekikl el omekerreu a ngelekel a sib e le ngdirk mekekerei e mechitechut.​—Gen. 33:13.

² A ruungalek el Kristiano a kmal kirir el olecholt a osisiu el blekeradel el ua blekerdelir a reklekerengel a sib. Ngar er ngii a ngerechelir a ruungalek el kirir el omekeroul er a rengelekir el “oba omellach ma osisechakl er a Rubak.” (Efe. 6:4) E tiang ngbeot el tekoi? Ngkmal diak! A rengalek a di blechoel el mo chelebangel a omelsemai el kirel a mekngit el uldasu el lolisiich er ngii a Satan. Me a lmuut el tang tirkang a dirrek el diak el mecherrungel. (2 Ti. 2:22; 1 Jn. 2:16) Me ke mekerang e ngosuterir a rengelekem? Me bo dosaod a edei el tekoi el sebechem el meruul me bo mungil el omekerreu er a rengelekem: (1) bo mungil el medengelterir, (2) momekang er tir, e (3) momekrael er tir.

3. Te mekerang a ruungalek e mo ungil el medengelterir a rengelekir?

³ A ungil el klekar a kerekikl el omes a chermel e le ngsoal a lolemolem el mesisiich a bedengel. A Biblia a kmo: “Bo mungil el mengedmokl a chermem.” (Osi. 27:23) Me kau el oungalek a soam el mo ungil el medengei “a chermem,” el tir a rengelekem. Tiang a sebechem el meruul er ngii sel bo mungil el medengei a omerellir me a uldesuir. Engdi ngmekerang a omoruul er tiang? Ngkmal kirem el mo blechoel el mengedecheduch er tir.

4, 5. (a) Ke mekerang e mo sebechem el ngosuterir a rengelekem el mo beot er tir el ouchais a uldesuir? (Momes er a siasing er a uchelel a suobel.) (b) Ngera ke rirellii el uchul me ngmlo sebechir a rengelekem el beot er tir el mengedecheduch er kau?

⁴ A rebebil el oungalek a mla mtebengii el kmo ngmo meringel er tir el mengedecheduch er a rengelekir er sel taem el bocha lengeasek. Ngar tiaikid el taem e ngmo diak el sorir el mesaod a uldesuir. Me ngera sebechem el meruul a lsekum a rengelekem a mo uaisei? Lak momdasu el kmo ngkmal kirem el mo kemanget el taem el mongedecheduch er tir el mesaod a betok el tekoi. Bai molasem el mengedecheduch er tir er sel taem el momes er tir el ungil a rengrir. (Dut. 6:6, 7) Mongoit a temem el obengterir. Mdak el merael, e mousekool el obengterir me a lechub e mdak el meruul a ureor er a blai. Me sel momes er a rengelekem el ungil a rengrir e mongedecheduch er tir, e ngmo beot er tir el mengedecheduch el ouchais a uldesuir.

⁵ E kuk mekerang a lsekum a ngelekem a dirrek el dirkak bo el soal el mengedecheduch? Molasem er a kuk ta er a tekoi. El ua tiang, ngungil a lak moker er ngii el kmo ngmle ua ngerang a sils er ngii, bai mouchais er ngii el kmo ngmle ua ngerang a sils er kau. Seikid e nglocha mo sebechel el mesaod er a sils er ngii. Me a lechub e ngsoam el mo medengelii a uldesuel el kirel a tekoi, e moker er ngii el kirel ngii el tekoi e lak moker el kirel a uldesuel. Nglocha sebechem el oker er ngii el kmo ngua ngerang a uldesuir a resechelil el kirel tia el tekoi. E seikid e ngmo sebechem el korir el kmo ngmekerang e sebechel el ngosuterir a resechelil.

6. Te mekerang a rengelekem e mo sebechir el ouchais a uldesuir?

⁶ A rengelekem a mo sebechir el ouchais a uldesuir a lsekum e ngbeot er tir el mengedecheduch er kau. A lsekum ke di blechoel el mechesang me ngdiak a temem el obengterir e ngmo meringel er tir el ouchais a mondai er tir er kau. Ke mekerang e rullii el mo beot er tir el mengedecheduch er kau? Lak di molekoi el kmo, “Ngsebechiu el mengedecheduch er ngak er a ngii di el taem.” Tirka el ngeasek el ngelekem a kirel el mo ulterekokl a rengrir el kmo ngdiak di el telkib el tekoi e lengasech a rengum. Ngdirrek el kirir el mo medengei el kmo ke omes a mondai er tir el meklou a ultutelel. A Kayla el 19 a rekil a kmo: “Ngkmal beot er ngak el mesaod a ngii di el tekoi el mo er a demak. Ngblak a rengul el orrenges, e diak di lemereched el oukerrekeriil me a lechub e di lemereched el meleb er ngak sel kungedecheduch. E blechoel el ungil a ulekrael el lomeskak.”

7. (a) Ngmekerang a oungalek el chad e mo tabesul a uldesuel sel losaod a tekoi el ua klasisiik er a delongelel a sechal me a redil? (b) Te mekerang a ruungalek e sebechir el rulleterir a rengalek el mo seselk a rengrir?

⁷ A lebebil er a taem e ngmo meringel er kau el mesaod a tekoi el obengterir a rengelekem el ua klasisiik er a delongelel a sechal me a redil. Bo mkerekikl me lsebechem el osisecheklterir er a melemalt el tekoi el kirir el meruul. El ua tiang, oleko ke mo er a blil a blengur e mo medengei el kmo tia el babier el mesaod a kall a di mengelechel el kirel a dok el ngar er a kall. Ke locha mo tuobed e merael el mo omengur er a ngodech el blil a blengur. Me a osisiu el tekoi a sebechel el duubech el mo er a rengelekem. A lsekum ke di mengelechel er tir el kirel a bek el tekoi, e te locha mo seselk a rengrir e mo diak loker a uldesuem el kirel a tekoi. (Monguiu er a Kolose 3:21.) Ngungil sel molasem el mo tabesul a tekoi el moruul. A ngeasek el odos er kid el Emily a dmu el kmo: “A rechad er a blik sel losaod er a tekoi el kirel a klasisiik e te melasem el rullii tia el tekoi el mo ua lak lemekngit. Te mesaod er a klungiolel a bo dungil el medengelii a chad me a rolel e kede osiik er ngike el chad el soad el mo bechil. Me a omerellir a mla rullak el mo beot er ngak el mesaod er tia el tekoi el obengterir. Me sel  bo kulatk el meruul er tia el tekoi e ngkmal diak kumart er ngak er tir e le ngbai soak a bo lengesukak el kirel.”

8, 9. (a) Ngera klungiolel sel doba kllourreng e dungil el orrenges e lak di demereched el merrob er a cheldechedechal a chad? (b) Ngera el klungiaol a obla mngai e le kau el kerekikl el orrenges er a rengelekem?

⁸ Bo leklou a rengum e mungil el orrenges er a ngelekem me bo lodengei el kmo ngbeot er ngii el mengedecheduch er kau. (Monguiu er a Jakobus 1:19.) A mesobil el chedil el Katia a dmu el kmo: “A ngar er a mong e ngkmal dimlak kubang a kllourreng sel kungedecheduch er a ngelekek. Ngdimlak el sebechek el msang a techellel me bo lemerek el mengedecheduch. Ak di mle blechoel el mesaul a bedengek me ngdiak kungil el rongesii me a lechub e ngdimlak el soak a longesang er ngak. Engdi chelechang el bla kngedechii a blekerdelek e a ngelekek me ngdirrek el mla ngodechii a blekerdelel. Me chelechang e aki kmal kaiuerenges el terung.”

⁹ A chedam el Ronald a mlo chelebangel er a osisiu el tekoi ngii me a ngeasek el ngelekel el redil, me ngdmu el kmo: “Ngkmal mlo kesib a renguk er ngii er a louchais el kmo ngbetik a rengul er a ta el buik er a skulel. Engdi sel bo kulatk er a kllourreng er a Jehovah el mo er a remesiungel e ak mlo omdasu el kmo nglocha bai ungil a lsekum ak msang a techellel me ngouchais er a uldesuel er a uchei er a bo kumeklemalt er ngii. Me ngkmal ungil a renguk e le ngmlo sebechek el meruul el uaisei! Tiaikid sel mle ketengek el mo medengelii a uldesuel a ngelekek. Me sera bo lemerek el mengedecheduch e ngmlo beot er ngak el oba bltikerreng e mengedecheduch er ngii. Me ngkmal mlo mechas a renguk er ngii er a lekengei a uleklatk el kulsaod me ngsilbedak el kmo ngsoal el melodech er a blekerdelel.” Me sel bo blechoel el mengedecheduch er a rengelekiu e ng ngosukemiu el mo ungil el medengei el kmo ngua ngera uldesuir. E tiang a mo uchul e ngsebechiu el mo medengei a bek el tekoi el lolatk el mo meruul. *

10, 11. Ke mekerang e ngosuterir a rengelekem me te melemolem el ngar er a klemerang?

¹⁰ A ungil el klekar a medengei el kmo a sib a sebechel el mo remiid. Ngsebechel el omuchel el menga chudel el telkib el cheroid er a delebechel. E a cherengel a taem e ngmerael el mo cheroid er aike el bebil er a sib. Me tia el omeruul a dirrek el sebechel el duubech el mo er a rengalek. Ngsebechir el mekekoketerir el oberius el mo cheroid er a klemerang. E tiang a sebechel el duubech el okiu a mekngit el klausechelei me a lechub e ngmekngit el tekoi er a ongelaod. (Osi. 13:20) Me ngmekerang e mo sebechem el omekerreu er tir er chouaika el tekoi?

¹¹ Sel molisechakl er a rengelekem e momes a  bek el techall e mngesuterir er aike el tekoi el kirir el mesmechokl. Ngdirrek el ungil a bo molisiich er tir er aike el kuk ungil el blekerdelir. (2 Pe. 1:5-8) A temel a omengull el telungalek a kot el ungil el techall el moruul er tia el tekoi. Ngar sel October 2008 el Omesiunged el Kirel a Renged e ngmesaod el kmo: “A rebdelul a telungalek a ngar er ngii a ngerechelir er a medal a Jehovah el mo oterekeklii a otireklel a ungil el proguram er a omesubel a Biblia er a telungalek er tir.” Me kau ke ungil el ousbech er tia el taem el mo omekerreu er a rengelekem? Bo lulterekokl a rengum el kmo a rengelekem a kmal oba omereng el saul el kirel a blakerreng er kau el melasem el olengeseu er tir.​—Mt. 5:3; Fil. 1:10.

12. (a) Te mekerang a rengeasek e ngmla ngmai a klungiolir e le tir el teloi er a temel a omengull el telungalek? (Dirrek el momes er a baks el “Te Kmal Mereng a Saul.”) (b) E ngera el klungiaol a kuk bla mngai er a temel a omengull el telungalek?

¹² A ngeasek el Carissa me a telungalek er ngii a melai a klungiolir er a temel a Omengull el Telungalek. Ngdmu el kmo: “Ngkmal soak e le ngsebecham el dmak el rokui el dengchokl e chadecheduch. Ngar tiaikid el taem e aki olekes a deleuill er kemam e kutmokl a betok el ungil el tekoi el sebecham el mo melatk er a uriul. A demak a blechoel el meruul er a Omengull el Telungalek er sel ulterekokl el temel. Me a blakerreng er ngii a kmal melisiich er ngak el mo blak a renguk el meruul er tia el tekoi. Ngdirrek el rullak el mo oba klou el omengull el bedul a demak el ngii a dirrek el ngerechelel el melisiich er kemam er a tekingel a Dios.” A ta er a ngeasek el odos el Brittney a kmo: “A Temel a Omengull el Telungalek a kmal mla okesengii a deleuill er ngak me a rechad er a blik. Ngmla meketeklii el kmo te kmal omekerreu e semeriar el mo medengei a mondai er ngak. E tia el techall a mla ngosukemam el mo mesisiich e ta rengmam el telungalek.” Sel moktek er a ruungalek a sorir el osisecheklterir a rengelekir el mo betik a rengrir er a Jehovah. E a temel a Omengull el Telungalek a ta er a kot el ungil el rolel e ngsebechir el meruul er tia el tekoi. *

13. Ngmekerang a ngalek e mo soal el mesiou er a Jehovah?

¹³ A ungil el klekar a ousbech er a skersel el omekrael e omekerreu a chermel. A moktek er ngii a soal el omekrael a chermel el mo er a ungil el basio el “le dubech a chudel er ngii.” (Ese. 34:13, 14) Me kau el oungalek a dirrek el oba osisiu el moktek, el soam el mo ungil el omekrael er a rengelekem el mo mesiou er a Jehovah. Ngsoam a rengelekem a bo le ua ta er a milluches er a psalm el dilu el kmo: “Dios er ngak, ng kmal soak el meruul a tekingem! Ak sichedekl osisecheklem er a renguk.” (Psa. 40:⁠8) Me sel bo loba osisiu el uldasu a rengelekem e ngmo sorir el tuib a rengrir el mo er a Jehovah e mo metecholb. Ngkmal kirir el mekurulii a klemedengei er tir me bo el sebechir el rullii tia el klou a ultutelel el omelilt, e dirrek el kmal kirir el mo semeriar el mesiou er a Jehovah.

14, 15. (a) Ngera kirel el mo turrekong er a oungalek el chad? (b) Ngera uchul me a ngeasek a mo rrau a rengul el kirel a klemerang?

¹⁴ Alta e ke omes er a rengelekem el mechitechut a deleuill er tir el obengkel a Jehovah. Te locha dirrek el mo rrau a rengrir e mo omdasu el kmo a klaumerang er a Resioning er a Jehovah a diak el klemerang. A leuaisei e ke mo mekerang? Bo leblak a rengum el mesaod a tekoi el mo er a rengelekem e molisechakl er tir el mo betik a rengrir er a Jehovah. Mosisecheklterir el mo meduch el mereng a sulel a Jehovah el kirel a tekoi el bla leruul el kirir. (Och. 4:11) E sel bo lekltmokl e ngsebechir el di tir el melilt el kmo te mo mesiou er a Jehovah me a lechub e ngdiak.

¹⁵ A lsekum a rengelekem a rrau a rengrir el kirel a klemerang, e bo leklou a rengum e molasem el omeklemalt a uldesuir. Mngesuterir el mo medengei el kmo a kot el ungil el rolel a klengar a sel dosiou er a Jehovah e tiang a dirrek el mo uchul a betok el klengeltengat el diak a ulebengelel. Ngdirrek el ungil el molasem el mo medengei el kmo ngera sel uchul me ngrrau a rengrir. El ua tiang, a ngelekem el sechal ngmera el diak lekengei a tekoi el losaod a Biblia, me a lechub e ngkuk di medakt el mesaod er a klaumerang er ngii el mo er a rebebil  er a rengalek? A ngelekem el redil, ngomdasu el kmo a llechul a Dios a diak bo el uchul a llomeserreng, me a lechub e ngbai omdasu el kmo ngdiak a sechelil me a rechad a chetirir ngii?

16, 17. Ngokiu a ngera el rolel e ngsebechir a ruungalek el ngosuterir a rengelekir el mo er ngii a deleuill er tir me a Jehovah?

¹⁶ Ke mekerang e ngosuterir a rengelekem el mo ulterekokl a rengrir el kirel a klemerang? A rebetok el oungalek a mla ngosuterir a rengelekir sel loker er tir er aika el ker el kmo: “Kau ngbeot er kau me a lechub e ngmeringel er kau el mo Kristiano? Omomdasu e ngerang a klungiolel a bo de Kristiano? Ngera uchul me ngmeringel er kau el mo Kristiano? Ngua ngera uldesuem el kirel a klungiaol el omngai er chelechang me aike el bo mngai er a ngar medam el klebesei? Me aikang ngkuk klou a belkul er aike el tekoi el kirem el mengoit er ngii?” Moba delemedemek sel moker aika el ker el ousbech a di tekingem e molecholt el kmo ke semeriar er tir. Lak mrelleterir a rengelekem el mo omdasu el kmo ke di oungeroel er tir. Sel taem el mchadecheduch e nglocha mo soam el mesaod er a Markus 10:29, 30. A rebebil el ngeasek a mo sorir el nguu a babier e lmuches a klungiaol a lsekum kede Kristiano el ngar er a bitang me aike el uchul me ngmeringel er tir el mo Kristiano el ngar er a bitang. Tiang a locha sebechel el ngosukau kau me a rengelekem el mo dmangch a mondai el lechelebangel e dirrek el mo sumechokl. Me a lsekum ngkired el mesuub er a Biblia Olisechakl me a “God’s Love” el babier el obengterir a resemeriar el chad e ngkmal kired el mesuub aikang el obengterir a rengeleked! Me kau ke meruul er tiang?

¹⁷ Me a rengelekem sel bo lemeklou e ngmo kirir el di tir el melilt el kmo te mo mesiou er a Jehovah me a lechub e ngdiak. Ngdiak el sebechir el di mereched el melilt el mo mesiou er a Dios e le kau el mla ngiltii el mo mesiou er ngii. A rengelekem a kirir el mo er ngii a deleuill er tir me a Jehovah. (Osi. 3:1, 2) E kuk mekerang a lsekum ngmeringel er a ngelekem el mo kmeed er a Dios? Molisiich er ngii el mo meduch el di ngii el merriter er a klaumerang er ngii el oeak sel di lengii el oker el kmo: ‘Ak mekerang e mo medengei el kmo ngmera el ngar er ngii a Dios? Ak mekerang e mo medengei el kmo a Jehovah a mera el omekerreu er ngak? Ak mera el oumerang el kmo a kulengesenges a llechul a Dios e ngmo uchul a klungiolek?’ Me kemiu a ruungalek bo mungil el klekar e moba kllourreng el omekrael er a rengelekiu. Mngesuterir el mo oumerang el kmo a kot el ungil el rolel a klengar a sel bo losiou er a Jehovah. *​—Rom 12:2.

18. Te mekerang a ruungalek e oukerebai er a Jehovah el ngii a Kot el Ngarbab el Klekar?

¹⁸ A remera el Kristiano a kmal sorir el oukerebai er ngika el Kot el Ngarbab el Klekar el Jehovah. (Efe. 5:1; 1 Pe. 2:25) Me a ruungalek a kmal kirir el mo ungil el medengei a chermir el tir a rengelekir. Ngkmal kirir el mo ungil el omekrael er a rengelekir me bo el sebechir el mo oldeu a rengrir er a diak a ulebengelel el klengeltengat el bla letib a Dios. Mada bo leblak a rengum el meruul aike el sebechem el omekrael e momekeroul er a rengelekem el mo betik a rengrir er a Jehovah!