A omesuub me a omerriter a ochotii el kmo a lsekum tia el omeruul a melemolem e sel desiseb er a rak er a 2030 e a ildisir a rechad el mad er a bek el rak el omelamech el dekool a uchul a lmuut el ngmasech el kuk mo betok er a 8,000,000. Te dirrek el omdasu el kmo sel desiseb er a rak er a 2100 e a omelamech el dekool a mla ngmai a klengar er a bekord el 1,000,000,000 el chad.

A rechad el mo chuarm el omelamech el dekool a uchul a diak di el tirke el melamech a dekool. E le sel lemad a chad el melamech a dekool e a rechad er a blil a dirrek el mo chuarm a uldesuir e sebechir el mo chebuul er a rolel a keizai. Te dirrek el ngar er ngii a 600,000 el chad el mad er a bek el rak e le tir el melungel a chetul a chemelir a rechad el dekool. Me tia el meringel el blekeradel a mla oberk el mo er a rokui el chad e le ngdi merael el mo meringel a cheral a ukeruul.

Tiang a diak el uaike el secher el retoktang a meringel el osiik a kar el mo omkar er ngii, e ngbai kmal beot a kerul, e a ruumesingd el chad a medengelii. A Dr. Margaret Chan, el director-general er a World Health Organization a dmu el kmo: “Tia el telemellel a omelamech el dekool a lulemekdubech er ngii a rechad, e tiang a sebechel el mo mesmechokl a lsekum a kabelment er a beluu me a dirrek el rechad a mo dmak e melasem el merrob er ngii.”

Ngdirkak a ta el taem el lebo ledak a rechad er a bek el beluu e lolasem el merrob er tia el klou el uchul a secher me a kodall. Engdi sera August 2012 e a bekord el 175 el beluu a mlo dmak e kilengei el mo mengesadel a usbechel a dekool. * Me nguaisei, engdi ngar er ngii a bebil el uchul me tia el omeruul a di meleketek. A bek el rak e a kombalii el meruul a dekool a mengoit a betok el biliol el udoud el meruul a advertisement el olechau a osengir a rechad, el ileakl a remekekerei el redil me a resechal el kiei er aike el beluu el dirk meleketek a keizai er ngii. A omelamech el dekool a dirrek el meringel er a rechad el mengoit er ngii a uchul me te mo mad a rebetok er tirke el ta el biliol el chad el mla mo smau el melamech. Me a lsekum tirka el chad a diak lemeterob el ousbech er ngii, e a ildisir a rechad el mad el dekool a uchul a lmuut el di meleketek er a chelsel aika el merael el mei el okeua el rak.

A chad el mla mo smau el melamech a dekool me a dirrek el oterullel a dekool a uchul me a rebetok a ua bla lobedikl er tia el tekoi e dikea el sebechir el mengubet er ngii. Tia el tekoi a dilubech el mo er a Naoko. Ngulemuchel el melamech a dekool er a dirk lengeasek. Ngmlo mesuub er tirke el lulemes er tir er a TV me a mubi me a advertisement el melamech a dekool e mlo omdasu el kmo ngmera el redil. Ngmle medengei el kmo a omelamech el dekool a mlo uchul a kasinoma er a chedengal a demal me a delal e di millemolem el melamech a dekool el mo lmuut er a taem el lulemekeroul er a reteru el ngelekel el redil. Me ngdmu el kmo: “Ak kmal mle bekikl el mo kasinoma a chedengak, e dirrek el mle suebek a renguk el kirel a klisichel a bedengir a rengelekek, engdi ngkmal mle meringel er ngak el mengoit er a omelamech el dekool. Me a kulemdasu el kmo ngkmal diak el sebechek el choitii.”

Engdi a Naoko a miltik er a rolel e ngmlo diak lolamech a dekool. E tiakid el rolel a dirrek el mla ngosuterir a rebetok el miliol el chad me te mlengubet er a omelamech el dekool. Me tia ngera el tekoi? Molemolem el menguiu.