1, 2. Ngera uchul me kede semeriar er a tekoi el ngar er a Psalm 45?

 A KEBKALL el king a merael el mo er a mekemad el mo mesebechakl er a klemerang me a llemalt. Ngmo mesisiich er a recherrouel, e a uriul e ngmo bechil a klebokel el redil. Ngika el king a longebkall er ngii a rechad e dirrek el melatk er ngii el diak a ulebengelel. Aikang a di bebil er aike el kmal ungil el tekoi el losaod a Psalm 45.

² Me nguaisei, engdi a Psalm 45 a diak di lecheldecheduch el kmal ungil er a uchelel el mo er a ulebengelel e lemerekong. A tekoi el losaod a kmal meklou a ultutelel el kired, e le ngar er ngii a lerellii er a klengar er kid er chelechang me a dirrek el ngar medad el klebesei. Me bo dekerekikl el mesuub er tia el psalm.

3, 4. (a) Ngera el “ungil tekoi” a lulsaod er ngii ngike el milluches er a psalm, e ngerang rullii er a uldesued? (b) Ngera el “chelitakl el mor a king” a domerk er ngii? Kede mekerang e mo ua olechesel a meluches sel lekltmokl el meluches a babier?

³ Monguiu er a Psalm 45:1. A “ungil tekoi” el ‘milekekii’ a uldesuel a milluches er a psalm, a chisel a king. A tekoi er a Hebru el moiuid el “mekekii” a belkul a kmo “ombebrechorech.” Me a milluches er a psalm a kmal mlo dmeu a rengul er a lerengesii tia el chais  me a rengul a mlo ua lomrechorech er a deurreng. Ngdirrek el rirellii el mo ua “olechesel a meluches sel le kldmokl el meluches a babier.”

⁴ Tiang ngera belkul el kired? A ungil chais el kirel a Rengedel a Mesias a ungil tekoi el mekekii a uldesued. Tia el klumech er a Renged a kmal mlo “ungil” er sera rak er a 1914. E ngera uchul? E le ngulemuchel er seikid el rak, e ngmlo diak di lolutk el kirel a Renged er a ngar medad, e ngbai melutk el kirel a mera el kabelment el mengedereder er chelechang el ngar er a eanged. Tiaikid a “Ebangkelio el kirel ngii el Renged” el domerk er ngii er a “beluulchad el rokir el kirel el mo ocholt el mor a rokui el chad.” (Mt. 24:14) Me tia el klumech er a Renged ngmla ‘mekekii a uldesued’? Kid ngmera el dmeu a rengud el omerk er tia el ungil chais? Kid a di ua ngike el milluches er a psalm el ‘chelitekled a mor a king,’ e le kede ouchais el kmo a Jesus a mla mo Mengedereder er a Rengedel a Mesias el ngar er a eanged. Kede dirrek el outkeu er a rokui el chad el uldimukl er a remengeteklel tia el beluulechad el mo kongei er a Jesus el mo merredelir. (Psa. 2:1, 2, 4-12) E sel dungil el ousbech er a Biblia el omerk er a klumech e kede mo ua “olechesel a meluches sel le kldmokl el meluches a babier.”

5. (a) Ngera rullii a Jesus el kmal mo “ungil sechal”? (b) Ngmilekerang a Jesus e mo “ungil mengedecheduch,” e mekerang a doukerebai er ngii?

⁵ Monguiu er a Psalm 45:2. A Biblia a diak el betok a omesodel el kirel a klebekelel a Jesus. Alta ngmle cherrungel el chad me ngkmal mle “ungil sechal,” engdi a blakerreng me a klaumerang er ngii el mo er a Jehovah a rirellii me ngliluut el kmal mo ungil sechal. Ngdirrek el mle “ungil mengedecheduch” el mesaod er a Renged me a tekingel a rirutech a rengrir a rebetok el chad. (Lk. 4:22; Jn. 7:46) Me kid kede mo er aike el sebeched el oukerebai er a Jesus sel domerk er a klumech?​—Kol. 4:6.

6. A Dios ngmilekerang er a lomekngeltengat er a Jesus?

⁶ A blakerreng me a dmolech el bltkil a rengul a Jesus el mo er a Demal a uchul me ngulemekngeltengat er a omesiungel e milsa omeksullel er a uriul er a letengetengii a klengar er ngii el mo olubet. A apostol el Paulus a milluches el kirel a Jesus el kmo: “Ng mle ngariou a rengul e mlo olengesenges el mo lmuut er a kodall, el kodellel er a kerus. Tiaikid ia uchul ma Dios a ulengesecheklii el mor sel kot el ngarbab el deruchall e milsa ngakl el kuk ngarbab er a rokui el ngakl. Me tirkel rokui el ngar a eanged ma beluulchad ma datk, a mo outubuach el mengull er a ngklel a Jesus, e di mo chemolt el melekoi el kmo a Jesus Kristus a Rubak, el mo uchul ma rokui el chad a mo kobkellii a Dios el Chedam.” (Fil. 2:8-11) A Jehovah a ulemekngeltengat er a Jesus el ulekisii e msang a diak el ngemed el klengar.​—Rom 6:9.

7. Ngokiu a ngera el rolel e a Dios a ngileltii a Jesus el “kuk ngar uchei er a re bek el king”?

⁷ Monguiu er a Psalm 45:6, 7. A Jesus a kmal betik a rengul er a llemalt e ouketui a ngii di el tekoi el sebechel el oltuub er a Demal a uchul me a Jehovah a ngileltii el mo King er a Rengedel a Mesias. A Jesus a mlechilt er a “cheluch ma deurreng” el kuk ngar uchei er a “re bek el king,” el mesaod el kirir a reking er a Juda el dirrek el uldidellel a rsechel a David. Ngoeak a ngera el rolel? A kot, e a Jehovah a ngileltii a Jesus. Ongerung, a Jehovah a ngileltii a Jesus el mo mengedereder el King e dirrek el mo mesiou el Ngarbab el Prist. (Psa. 2:2; Heb. 5:5, 6)  Ongedei, ngdimlak lemengilt el okiu a cheluch el ua reking er a Israel, e ngbai milengilt el okiu a chedaol klisichel a Dios. E a ulebongel er ngii, e ngmengedereder el ngar er a eanged, el diak lengar tia el chutem.

8. Ngera me ngulterekokl a rengud el kmo a omengederederel a Jesus a melemalt? Ngera uchul me ngar er ngii a llemeltel a Jesus el mengedereder?

⁸ Sera rak er a 1914, e a Jehovah a tiltkii a Ngelekel el mo Mesias el King el ngar er a eanged. Ngmo ‘mengedereder er a rechedal el oba llemalt,’ me ngulterekokl a rengud el kmo a omengederederel a di blechoel el melemalt. Ngar er ngii a llemeltel el mengedereder e le ‘omerrederel a le bilsang a Dios,’ e ngii a mo mengedereder el “diak a ulebengelel.” Ngkmal dmeu a rengud el mesiou er a Jehovah el ngar cheungel omengederederel ngika el mla metutk el King!

9, 10. (a) Ngoingerang e a Kristus a lilechetii a saider er ngii, e milekerang er a lousbech er ngii? (b) Ngmekerang a bo lousbech er a saider er ngii er a ngar medad el klebesei?

⁹ Monguiu er a Psalm 45:3. A Jehovah a melekoi er a King me llechetii a saider er ngii er a chelechedal. Me sel loruul er tiang, e ngmsang a Jesus a kengei el mo oumekemad er tirke el omtok er a omengederederel a Dios e mo olekngemed er tir. (Psa. 110:⁠2) A Kristus a King el diak el sebechel el mo mechitechut er a mekemad a uchul me a bades a kmo ng “olab a klisiich.” Me nglilechetii a saider er ngii er a chelechedal er sera rak er a 1914, er a bo lemesisiich er a Satan me a remekngit el anghel er ngii e lomidokl er tir er a eanged el mei er a chutem.​—Och. 12:7-9.

¹⁰ Tiang a di mle uchelel a urerel a King el mo mesisiich er a mekemad. Ngdirk kirel el mo churrengelii a mekemedil. (Och. 6:2) A Jehovah a mla tibir el kmo a rokui el tekoi er a beluulechad er a Satan a kirel el mo nguemed, me a omengesuseu er ngii me a remekngit el anghel er ngii a dirrek el kirel el mo diak. Me a kot, e a Kloul Babilon, el ngii aike el rokui el klsuul klechelid, a mo mokngemed. E a Jehovah a mo ousbech er a remengeteklel a balatiks el mo okngemedii ngika el “prostitute.” (Och. 17:16, 17) E sola e a Kristus a mo okngemed a rokui el kabelment er tia el beluulechad er a Satan. Me a Jesus el ngii a “anghel el oungerachel er a diak a btil deliobech” a mo churrengelii a mekemedil el oeak sel lomidokl er a Satan me a remekngit el anghel er ngii er a chelsel ngii el deliobech. (Och. 9:1, 11; 20:1-3) Me bo domes a ulaoch el medung er a Psalm 45 el kirel aika el tekoi.

11. Ngmekerang a Kristus a loumekemad el ‘mesebechakl a klemerang’?

¹¹ Monguiu er a Psalm 45:⁠4. A King a diak loumekemad el melai a beluu me a lechub e ngmelai er a remo sibil. Ngngar er ngii a ungil el uchul e ngmo oumekemad. Ngmo oumekemad el mesebechakl er a “klemerang ma klengariourreng ma llemalt.” (Psa. 45:4, NW) Ngdi ta el Jehovah a ngar er ngii a llemeltel el mengedereder er a eanged me a chutem. E tiakid sel kot el klou a ultutelel el “klemerang” el kirel el obeketakl. A Satan er sera bo lomtok, e ngua ledilu el kmo a Jehovah a diak a llemeltel el mengedereder. Me seikid el taem el mei, e a remekngit el anghel me a rechad a mla mo obengkel el omtok er a omengederederel a Jehovah. Me chelechang e ngmla mo taem el kirel ngika el ngellitel el King er a Jehovah el mo oumekemad el mo ochotii el kmo ngdi ta el Jehovah a ngar er ngii a llemeltel el mo mengedereder.

12. Ngmekerang a King a loumekemad el mesebechakl er a “klengariourreng”?

¹² A King a dirrek el mo oumekemad el mesebechakl er a “klengariourreng.” A Jesus a milecherei a kot el ungil el kerebai er a klengariourreng me a blekongesenges el mo er a Demal. (Isa. 50:4, 5; Jn. 5:19) Me tirke el rokui el blak a rengrir el mesiungel ngika el King a kirir el oltirakl  er a kerebil, e mo ngariou a rengrir el olengesenges er a Merredelir el Jehovah er a bek el taem. Me ngdi tirkaikid el chad a sebechir el mo kiei er a beches el beluulechad er a Dios.​—Sek. 14:16, 17.

13. Ngmekerang a Kristus a loumekemad el mesebechakl er a “llemalt”?

¹³ A Kristus a dirrek el mo oumekemad el mesebechakl er a “llemalt.” Tiang a mesaod er a “llemeltel a Dios” me a lechub e nguldesuel el kirel a ungil me a mekngit. (Rom 3:21; Dut. 32:4) A Isaia a ulemlaoch el kirel a Jesus Kristus el kmo: “Ng mor ngii a king el oba bliochel blakerreng.” (Isa. 32:1) Sel bo longedereder a Jesus e ngmo er ngii a “beches el eanged ma beches el beluulchad el rokui el tekoi er ngii a di llemalt.” (2 Pe. 3:13) Tiang a belkul a kmo a rokui el chad el mo kiei er tia el beches el beluulechad a mo oltirakl a llechul a Jehovah el kirel a ungil me a mekngit.​—Isa. 11:1-5.

14. Ngmekerang a klisichel a chimal a Kristus e “mo mesisiich” er a mekemad? (Momes er a siasing er a uchelel a suobel.)

¹⁴ Ngike el milluches er a psalm a mesaod er a King el mermang el ultechull er a saider er ngii. (Psa. 45:3) Me ngmo ousbech er a klisichel el otebedii a saider er ngii e omuchel el ousbech er ngii. Ngike el milluches er a psalm a ulemlaoch el kirel a Jesus el kmo: “A klisichem a mo mesisiich a ngarbab el klisiich er a mekemad!” (Psa. 45:4) Me a Jesus Kristus sel bo loumekemad el olekngemed er a beluulechad er a Satan er a taem er a Armakedon, e ng “mo mesisiich” er a recherrouel. Ngdiak dodengei el kmo ngua ngerang a King a bo lolekngemed er a beluulechad er a Satan. Engdi kede medengei el kmo aike el tekoi el bo loruul a Jesus a mo omekdakt er tirke el diak lolengesenges a uleklatk er a Dios e dirrek el diak el kengei er a omengederederel a King. (Psa. 2:11, 12) Ngar er a ulochel el kirel a ulebongel, e a Jesus a millekoi el kmo a rechad a mo “diak lodenge rengrir er a dakt sel longiil a ikel mochu er ngii er a beluulchad el rokir, ele ikel ngar ngii a klisichel el ngar a melidiul a mo tuobed er a ikel kirel ngar ngii.” Ngdirrek el dilu el kmo: “Isei e a Ngelekel a Chad a me duum, el le mei e ng ngar a eabed el oba kloul klisiich ma klebkall.”​—Lk. 21:26, 27.

15, 16. Te rua techang a mo obengkel a Jesus el oumekemad?

¹⁵ A babier er a Ocholt a mesaod er sel taem el lemei a King el “oba kloul klisiich ma klebkall” el mo mesisiich er a recherrouel a Dios el kmo: “E sola e ak milsa eanged el menga chesmerel, e ng me chemolt er ngii a becheleleu el uos. Ngikel mlar bebul a lomekedo er ngii el Blak a Rengul e Merang; ng melemalt a loukerrekeriil ma loumekemad a mekemedil. A re soldau er a eanged a uleak ullel, el ngar a becheleleu el uos e oubail a kmal becheleleu el ungil linen. Ng tilobed a kedorm el saider er a ngerel, el loba el mo oumekemad e mo mesisiich a beluu. Ng mo mengedereder el oba skors el deel, e mo merderd el di ua loltobed osechel a bilong er a omeseokl er a ngesechel a rengul a Dios el Olab a Bek el Klisiich.”​—Och. 19:11, 14, 15.

¹⁶ Te rua techang tirke el “soldau er a eanged” el mo obengkel a Jesus el oumekemad? A rechanghel a uluumekemad el obengkel a Jesus er sera lomuchel el otebedii a saider er ngii el oldik er a Satan me a remekngit el anghel er ngii er a eanged. (Och. 12:7-9) Me kede oumerang el kmo a rechanghel a dirrek el mo teloi er a Kristus el oumekemad er a taem er a Armakedon. Me ngdi tirkaikid a mo obengkel a Jesus el oumekemad e merekong? A Jesus a tilbir el mo er a rengellitel el odam er ngii el kmo: “Tirkel mo mesisiich, el tirkel melemolem el meruul el mor a ulebongel a ikel soak, a bo kbesterir a osisiu el klisiich er omerreder el ua sel kngiluu er a Demak. Ak mo mesterir a klisiich er omerreder er a bek el beluu, me te mo mengedereder el oba skors el deel e mo mrideterir el ua bekai a lobeu.” (Och. 2:26-28) Me seikid e a rokui el ngellitel el odam er a Kristus a mla mo er a eanged  e dirrek el mo obengkel el oumekemad. Me te mo obengkel a Jesus er sel taem el ‘bo lemesisiich’ er a bek el beluu.

17. (a) Ngomtechei er a ngerang a becheleleu el uos er a Kristus? (b) A saider me a balech ngomtechei er a ngerang?

¹⁷ Monguiu er a Psalm 45:5. A Ocholt 6:2 a kmo: “Ak chilsngekl, e milsa becheleleu el uos. E a chad el mlar bebul a uleba balech ma kelel a balech, e a krone a le bilsang. Ng mlar a uos el tuobed el ua teletelel a chad el mo oumekemad el mo melabeluu.” A becheleleu el uos er a King a omtechei er a melemalt el rolel a mekemad el lekengei er ngii a Dios. (Och. 19:11) Me a King a oba saider me a dirrek el balech. E aikang a omtechei aike el klekedall el bo lousbech a Kristus el olekngemed er a recherrouel.

18. Ngera mo duubech er sel taem el Kristus a mo ousbech a ‘belchel’?

¹⁸ Ngike el milluches er a psalm a uluusbech a okesiu el omlaoch el kirel a King el kmo: “A kelel a belchem a kedorm el tmuu er a chaidireng er a re cherrouel a king; a ngodech el beluu a me obiou er bitar ochim.” Ngmo er ngii a klou el tellemall er a beluulechad el rokir. A Jeremia a ulemlaoch el kmo: “Isel sils e tirkel lokodeterir a RUBAK a di mo berriid a cheklechir er a bital beluulchad el mor a bitang.” (Jer. 25:33) A lmuut el ta er a ulaoch a mesaod aika el osisiu el tekoi el mo duubech el kmo: “Ak milsa anghel el dechor er bebul a sils. Ng uleldiu el klou a ngerel el mor a rokui el charm el silebek er a melidiul el kmo, ‘Be mkldibel er a klou el mur er a Dios! Mei me monga techel a bedengir a re king, ma re mengeteklir a re soldau ma re soldau, ma techel a uos ma re chad el ngar a uos, ma techel a bedengir a rokuil chad, el sibai ma re mimokl, ma re ngarbab ma re ngariou el chad!’”​—Och. 19:17, 18.

19. Ngmekerang a Kristus e mo churrengelii a mekemedil?

¹⁹ Me a uriul er a lokngemedii a mekngit el beluulechad er a Satan, e a kebkall el King el Jesus Kristus a mo churrengelii a mekemedil. (Psa. 45:4) Ngmo meruul el uaisei el oeak sel lebideklii a Satan me a remekngit el anghel er ngii er a chelsel a diak a btil deliobech. Te melemolem el ngar er a chelsel el kirel sel 1,000 el rak el omengederederel a Jesus. (Och. 20:2, 3) Me a Diabelong me a remekngit el anghel er ngii sel lengar er a chelsel a diak a btil deliobech, e ngdi ua lulekoad e le ngdiak el sebechir el omekcharm er a rechad. A rokui el chad a mo sebechir el oldeu a rengrir er a omengederederel a King, el diak a Satan me a rechanghel er ngii el mengesuseu er tir el mo meruul a mekngit. Engdi uchei er a bo el paradis a beluulechad el rokir, e ngmo duubech a lmuut el ta er a tekoi el mo uchul a deuil a rengul a King me tirke el 144,000, e dirrek el mo uchul a deuil a rengud. Tia el tekoi a bo losaod er ngii a ongingil el suobel.