A klechelid er a Klekristiano “el ngar er aike el kldei el meklou el klechelid el Katolik, Eastern Orthodoxy, me a Protestant a kongei el kmo ngdi tang a Dios el ngar er a tedei el Chad, el Dios el Chedam, Dios el Ngalek, me a Dios el Chedaol Reng. A doltirakl er a osisechakl er a Klekristiano, e tia el tekoi a diak el lolekoi el kirir a retedei el dios e ngbai melekoi el kmo tirka el tedei el chad a mera er ngii a di ta el chad.”​—The New Encyclopædia Britannica.

A Jesus, el Ngelekel a Dios, a dimlak a ta el lolekoi el kmo ngdi osisiu me a lechub e ngii a di tang ngii me a Demal. Ngbai dilu el kmo: “Ak merael . . . el mor a Chedam; ele ngii a kuk ngarbab er ngak.” (Johanes 14:28) Ngdirrek el dilu er a ta er a rubengkel el kmo: “Ak mo ngmasech el mora Demak el ngikel Demmiu, el Dios er ngak e dirrek el Dios er kemiu.”​—Johanes 20:17, BT.

A chedaol reng a diak el chad. Tirke el Kristiano er a irechar a “mlo mui ra Chedaol Reng” me a Jehovah a dilu el kmo: “Ak mo oitelii a Reng er ngak el mora rokuil chad.” (Rellir 2:1-4, 17, BT) A chedaol reng a diak el ta er a telengtengil a Trinidad. Ngbai sel oureor el klisichel a Dios.​—Genesis 1:2, momes er a footnote.

A Karl Rahner me a Herbert Vorgrimler el mellomes a rengrir el chad er a Katolik a mesaod el kirel a Trinidad el kmo “ngdiak el sebeched el mo medengelii a lak lokiu a ocholt me a uriul er a ocholt e ngdirrek el diak el sebeched el mo cherrungel el medengelii.” Ngmera el sebeched el mo betik a rengud er a chad el ngii a diak el sebeched el mo medengelii? A osisechakl el kirel a Trinidad a melenget er a mera el klemedengei me a bltikerreng el mo er a Dios.

A Marco, el dulsaod er ngii er a uchei, a ulemes er a Trinidad el ua letekoi el melenget er ngii me lak bo lodengelii a Dios. Ngdilu el kmo: “Ak ulemdasu el kmo a Dios a omart a blekerdelel er ngak, e tia rirellii el lmuut el kmal mo cheroid e diak el sebechek el mo medengelii.” Engdi a “Dios a diak le cheroid er a derta er kid.” (Rellir 17:27) Ngdirkak lomart er sel mera el blekerdelel er kid. Ngsoal a bo dodengelii. A Jesus a dilu el kmo aki “medengelii a kim mongull el meluluuch er ngii.”​—Johanes 4:22.

A Marco a kmo: “Sera ksuubii el kmo a Dios a diak el ta er a telengtengil a Trinidad, e seikid e ngmlo sebechek el muchelii a ungil el deleuill el obengkel.” Me a lsekum e kede omes er a Jehovah el ua lemera el Chad er a bai lengodech el diak dodengelii el chad, e ngmo beot er kid el oubltikerreng el mo er ngii. A Biblia a kmo: “Ngikel diak loubltikerreng a diak lodengelii a Dios, ele Dios a bltikerreng.”​—1 Johanes 4:8.