1, 2. (a) Ngera uchul me ngkmal soad el ousechelei er a rechad el blak a rengrir e kltmokl el ousubes? (b) Kede mo onger a ngera el ker er tia el suobel?

 NGMEKERANG a omosaod er a mera el sechelim? A odos el ngklel a Ashley a kmo a mera el sechelid a chad el blechoel el kltmokl el olengeseu er kid e dirrek el ousubes er kid sel derellii a cheleuid. Ngkmal soad el sechelil a chad el uaisei a blekerdelel, e le kede mo melechesuar el kmo ngomekerreu e betik a rengul er kid.​—Osi. 17:17.

² A Jehovah a sebechel el mo kot el ungil el Sechelid e le ngkmal blak a rengul e kltmokl el ousubes. A ta er a milluches er a psalm a mesaod er ngii el kmo: “Kau a ungil, e ousubes a tellemall, e cherrungel a bltkil a rengum el mor tirkei el omekedong er kau.” (Psa. 86:5) Ngera belkul a blakerreng me a klausubes? Ngmekerang a Jehovah a lolecholt aika el kmal ungil el blekeradel? E kede mekerang a doukerebai er ngii? Sel bo dodengei a nger er aika el ker, e a bltkil a rengud el mo er ngika el kot el ungil el Sechelid el Jehovah a lmuut el mo mesisiich. Ngdirrek el mo okesengii a deleuill er kid el obengterir a rudam me a rudos er kid.​—1 Jn. 4:7, 8.

3. Mosaod er a blekerdelel a chad el blak a rengul.

³ A blak a rengul el chad a melemalt a omerellel el mo er a betik er a rengul. Ngoubltikerreng el mo er ngii sel lolemolem el olengeseu e lolisiich er ngii. Ngkltmokl el meruul el uaisei er a chelsel a ungil el taem me a mekngit. A Biblia a melekoi el kmo a Jehovah a “blak a rengul.” Ngdiak a ngii di el chad el sebechel el mo mekesiur a blakerreng er ngii.​—Dut. 32:4.

4, 5. (a) Ngmekerang a Jehovah e ochotii el kmo ngblak a rengul? (b) Ngera uchul me ngmelisiich er kid sel dolatk er a blekerdelel a Jehovah el kmal blak a rengul?

⁴ Ngmekerang a Jehovah e ochotii el kmo ngblak a rengul?  Ngblechoel el olengeseu er a reblak a rengrir el mesiungel. E a ta er tir el King el David a uleldanges er a Jehovah el kirel a blakerreng er ngii. (Monguiu er a 2 Samuel 22:26.) Sera lechelebangel a meringel el blekeradel a David e a Jehovah a mle blechoel el omekrael, e omekerreu e mesebechakl er ngii. (2 Sa. 22:1) Me a David a mlo medengelii sel blakerreng er a Jehovah el okiu a tekingel me a omerellel el olengeseu er ngii. Ngera uchul me a Jehovah a mle blak a rengul el mo er a David? E le David el mle blak a rengul el mo er ngii. A Jehovah a kmal mo dmeu a rengul el omes er a blakerreng er a remesiungel, e mo ochotii a blakerreng el mo er tir.​—Osi. 2:6-8.

⁵ Ngmelisiich er kid sel dolatk er a rolel a Jehovah a lochotii a blakerreng el mo er a remesiungel. A ta er a odam el Reed a ngklel a soal el menguiu el kirel a omerellel a Jehovah el ullengeseu er a David el mo outekangel a meringel el blekeradel. Ngdilu el kmo: “Ngkmal melisiich er ngak sel kulatk er a blekerdelel a Jehovah el mle blechoel el olengeseu er a David el mo lmuut er sel taem er a lechiis el mo er a ked e lekiei er a ii. Ngomeklatk er ngak el kmo, a Jehovah a mo kongei el olengeseu er ngak er a chelsel a ngii di el blekeradel a lsekum ak melemolem el blak a renguk el mo er ngii.” Me kau a ulterekokl el dirrek el uaisei a uldesuem.​—Rom 8:38, 39.

6. Ngera bebil el rolel e a Jehovah a ochotii el kmo ngblak a rengul? E mekerang e mo uchul a klungiolir a remesiungel?

⁶ Ngera bebil el rolel e a Jehovah a ochotii el kmo ngblak a rengul? A ta er ngii a kmo ngar er ngii a ulterekokl el rolel a loruul a tekoi. (Isa. 46:4) Me a rokui el tekoi el loruul a oltirakl a uldesuel el kirel a ungil me a mekngit, me aike el uldesuel a diak lemengodech. (Mal. 3:6) A lmuut el ta er a rolel er a Jehovah e ngochotii el kmo ngblak a rengul a ngii el blechoel el otaut a telbilel. (Isa. 55:11) Me ngii el blak a rengul a uchul me a reblak a rengrir el mesiungel a mo ngmai a klungiolir. El mekerang? Sel debo er a tkurrebab el sebeched el olengesenges a llechul a Jehovah e ngulterekokl a rengud el kmo ngmo otutii a telbilel el mo omekngeltengat er kid.​—Isa. 48:17, 18.

7. Ngerang a ta er a rolel e ngsebechem el mo blak a rengum el ua Jehovah?

 ⁷ Kede mekerang e mo blak a rengud el ua Jehovah? A ta er a rolel a sel doruul a ungil el mo er tirke el chelebangel a meringel el blekeradel. (Osi. 3:27) El ua tiang, ke medengelii a odam me a lechub e ngodos el mla mo mechitechut a rengul el locha secherel, ultok er a telungalek er ngii, me a lechub e ngkuk di chelitechetul a uchul? Ngsebechem el melisiich er ngii el ousbech a “tekoi er ongelaod.” (Sek. 1:13) * Sel moruul el uaisei, e ke ochotii el kmo ngblak a rengum el bedul ngii e dirrek el mo mera el sechelil ‘el kuk mo kmeed er ngii er a ta er ngii.’​—Osi. 18:24.

8. Kede mekerang e mo blak a rengud er a chelsel a chebechiieled?

⁸ Ngar er ngii a lmuut el bebil er a rolel e ngsebeched el mo blak a rengud el bedul tirke el betik er a rengud. El ua tiang, a lsekum kede bechiil e kede medengei el kmo ngkmal kired el mo blak a rengud el bedul a bechid. (Osi. 5:15-18) Me ngdiak di el laokreng a tekoi el diak el kired el meruul er ngii e lemerekong, e ngdirrek el ngar er ngii a lmuut el bebil el kired el kerekikl me lak bo el uchul e derebet er a laokreng. (Mt. 5:28) Kede dirrek el ochotii a blakerreng er kid el mo er a rudam me a rudos er kid e le ngdiak dolekoi a mekngit el tekoi me a lechub e ngblulak el kirir, e dirrek el diak dekengei el orrenges a chouaika el mekngit el rolel a cheldecheduch.​—Osi. 12:18.

9, 10. (a) Ngileakl el soad el mo blak a rengud el bedul techang? (b) Ngmo beot er kid el olengesenges er a Jehovah er a bek el taem? Ka mosaod.

 ⁹ Ngkmal soad el melemolem el blak a rengud el mo er a Jehovah. Ngmekerang a doruul er tia el tekoi? Ngkirel el mo betik a rengud er aike el tekoi el soal e dirrek el mo ouketui aike el chetil, e mo kiei el rolel a klengar er kid a oldeu er a rengul. (Monguiu er a Psalm 97:10.) Cherengel a taem el dosuub el mo omdasu el ua Jehovah e ngmo beot er kid el olengesenges er ngii.​—Psa. 119:104.

¹⁰ Me nguaisei, engdi ngdiak lebeot el tekoi el bo dolengesenges er a Jehovah er a bek el taem. Me ngkirel el mo meduch a rengud el outekangel e melemolem el blak a rengud el mo er ngii. Ka molatk er a odos el soal el mo bechiil, engdi ngdirkak lebetik er a odam el soal el mo bechil. (1 Ko. 7:39) A rechad er a urerel a locha mo melasem el osiik er a sechelil el sechal. E a osisiu el taem e ngdirrek el mo sabisi. Engdi ngmla tibir er a rengul el diak bo lobengkel me a lechub e ngmo bechil a chad el diak losiou er a Jehovah e le ngsoal el melemolem el blak a rengul el bedul a Dios. A Rekristiano el ua omerellel ngika el odos a kmal ungil el kerebai el kirel a blakerreng. Me a Jehovah a mo omekngeltengat er tirke el blak a rengrir el mesiou er ngii er a chelsel a meringel el blekeradel.​—Heb. 11:6.

11. Ngera belkul a dousubes er a rechad?

¹¹ Ngera belkul a dousubes er a rechad? A chad el ousubes a diak lolemolem er a ngesechel a rengul el mo er a rechad el kirel a omerellir el mlo uchul e ngilasech a rengul. Engdi ngdiak el belkul a kmo ngkongei er a mekngit el omerellir me a lechub e ngua lemlak el duubech tia el tekoi. Ngbai di ousubes er tia el tekoi. A ta er a kot el ungil el blekerdelel a Jehovah a ngii el kltmokl el ousubes. A Biblia a kmo a Jehovah a kongei el ‘ousubes a telemellir’ a rechad el tir a mera el ouuchel a rengrir e obult er a kngterir.​—Psa. 86:5.

12. (a) Ngua ngerang a klausubes er a Jehovah? (b) Ngera mle belkul a tekingel a apostol el Petrus el kmo, ngsebechel el mo ‘musubes’ a kngtil a chad?

¹² Ngua ngerang a klausubes er a Jehovah?  A Biblia a mesaod el kmo ngcherrungel el ousubes e dikea lluut el melatk a kngtid. (Isa. 55:7) Kede mekerang e medengei el kmo a Jehovah a cherrungel el ousubes? Ka molatk er a telbiil el medung er a Rellir 3:19. (Monguiu.) Ngmekerang a chad e nguu a klausubes er a Jehovah? A apostol el Petrus a dilu el kmo ngkirel el ‘obult e mo chemau a Dios.’ Me a chad el mera el obult er a kngtil a ouuchel er a rengul e tibir el diak lluut el mo meruul er sel klengit. (Mt. 3:8) E tia el uldesuel a rullii el mo ‘chemau a Dios,’ me ngmo diak loruul er sel klengit e mo er aike el sebechel el meruul a soal a Dios. Misei, e ngmo ‘musubes’ a kngtil. Me sel lousubes a klengit a Jehovah e ngdi ua losuld a kngtid el mo diak, el ochotii el kmo ngcherrungel a klausubes er ngii.​—Heb. 10:22; 1 Jn. 1:7.

13. Ngera kede suubii er a tekingel a Jehovah el kmo, ng “dikea bo kulatk a chelebirukel el le riruul”?

¹³ Kede mekerang e medengei el kmo a Jehovah a dikea lluut el melatk a kngtid? A ta er a ulochel a Jeremia el kirir a rengellitel el Kristiano a ngosukid el mo medengelii a klausubes er a Jehovah. (Monguiu er a Jeremia 31:34.) A Jehovah a dilu el kmo: “Ak mo ousubes a kngterir e dikea bo kulatk a chelebirukel el le riruul.” Me sel lousubes er kid, e ngmo diak lolatk a kngtid e lolemolem el oltelechakl e lomals er kid el kirel.​—Rom 4:7, 8.

14. Ngera uchul me ngmo mechelaod a rengud sel dolebedebek er a klausubes er a Jehovah? Ka mosaod.

¹⁴ Ngmo mechelaod a rengud sel dolebedebek er a klausubes er a Jehovah. Me bo dosaod er a odos el bo domekedong er ngii el Elaine. Betok el rak er a uchei e ngmilsuld a ngklel. E a uriul e ngliluut el me soiseb er a ongdibel, engdi ngdirk ulemdasu el kmo a Jehovah a dirkak lousubes er ngii. Ngdirrek el ulemdasu el kmo a bltkil a rengul a Jehovah el mo er a rebebil a kuk ngaruchei er a bltkil a rengul el mo er ngii. Me ngkmal mlo mechelaod a rengul sel lolebedebek er a omesodel a Biblia el kirel a klausubes er a Jehovah. Ngsilubii el kmo sel lousubes a kngtid a Jehovah e ngdi ua lolatech er kid me bo deklikiid er a osengel. Me ngdiak el kired el di melemolem el melatk er a klengit el derirellii. * Ngdmu el kmo: “Ak mlo omelechesiu er ngak el dimlak kuumerang el kmo a Jehovah a sebechel el cherrungel el ousubes er ngak, me ngmle kirek el melemolem el chellungel er tia el berraod er a renguk. Ak medengei el kmo tia el uldesuek a diak lemereched el mesmechokl, engdi ak mla mo medengei el kmo ngsebechek el olekeed er ngak er a Jehovah, e dirrek el omelechesiu er a berraod el kchellungel er ngii el merael el mo kebekakl.” Me a Jehovah a Dios el betik a rengul e kltmokl el ousubes!​—Psa. 103:9.

15. Kede mekerang e mo ua Jehovah el ousubes?

¹⁵ Sel dekengei el ousubes er a rechad e kede oukerebai er a Jehovah. (Monguiu er a Lukas 17:3, 4.) Lak dobes, a Jehovah sel lousubes e ngdikea lluut el melatk er a klengit el derirellii. Me sel dousubes a mekngit el omerellir a rechad e ngdirrek el kired el mo diak dolatk me a lechub e deluut el mo mesaod er a uriul.

16. (a) Ngera belkul a dousubes a kngterir a rechad? (b) Ngkired el mekerang a lsekum ngsoad a Jehovah a lousubes er kid?

 ¹⁶ Sel dousubes a kngterir a rechad e ngdiak el belkul a kmo kede kongei er a tekoi el lerirellii me a lechub e kede mechititerir me te ousbech a bderrir er kid. Ngbai belkul a kmo ngdiak dolemolem el kesib a rengud er tir. Ngdirrek el ungil a lak dobes el kmo a Jehovah a mo ousubes er kid a lsekum kede ousubes er a rechad. (Mt. 6:14, 15) A Jehovah a medengei el kmo kede “di chebechab” e diak demecherrungel. (Psa. 103:14) Me a lsekum a rechad a dmu tekoi me a lechub e te ongesechii a rengud, e ngkired el melatk el kmo te di uai kid el  diak lemecherrungel me ngkired el ousubes er tir.​—Efe. 4:32; Kol. 3:13.

17. Ngera sebechel el ngosukau el mo ousubes er a chad el tilemellii a rengum?

 ¹⁷ A lebebil er a taem e ngmo meringel er kid el ousubes er a rechad. Ngmo lmuut er a rebebil el ngellitel el Kristiano er a taem er a Paulus me ngdirrek el mle meringel er tir el mesmechokl a mondai er a delongelir. (Fil. 4:2) Me a lsekum a odam me a lechub e ngodos a mla ongesechii a rengum, e ke mekerang e mo sebechem el ousubes er ngii? Ka di molatk er a tekoi el dilubech el mo er a Job. Ngkmal miltemall a rengul e le tirke el leko te sechelil el Elifas, Bildad, me a Sofar a millekoi a mekngit el kirel e ultelechakl er ngii. (Job 10:1; 19:2) Me a uriul e a Jehovah a dilu er tir el kmo ngmle mekngit a omerellir me ngkirir el mo er a Job e tonget a charm el kirel a kngterir. (Job 42:7-9) Engdi a Jehovah a dirrek el milengerechir er a Job er a ta er a tekoi. Me tiang ngera el tekoi? Ngdilu er ngii me ngmo meluluuch el kirir tirka el chad. Me a Job a milluluuch el kirir me a Jehovah a ulemekngeltengat er ngii e le ngii el uluusubes er tir. (Monguiu er a Job 42:10, 12, 16, 17.) Ngera kede suubii er tia el tekoi? Sel lemera el ngar er a rengud el meluluuch el kirel a chad e ngsebechel el ngosukid el mo diak el kesib a rengud er ngii.

18, 19. Ngsoad el mo melemolem el mekerang?

¹⁸ Ngkmal dmeu a rengud el milsuub a lmuut el betok el kirel a blekerdelel a Jehovah. Kede silubii el kmo ngbeot a debo er ngii, e diak longetukel er a rechad, e bekururau, e tabesul a omerellel, e dirrek el blak a rengul e kltmokl el ousubes. Engdi ngdirk betok a sebeched el suub el kirel a Jehovah. Me ngmo dmeu a rengud el mesuub el kirel el diak a ulebengelel. (Oli. 3:11) Kede kmal kongei a tekingel a Paulus el kmo: “Kele ng kol meral klou a klungiolel a Dios! E kmal dmolech a llemesel a rengul ma lodengei!” Ngsebeched el melekoi a osisiu el tekoi el kirel a bltkil a rengul a Dios me aika el elolem el blekerdelel el dirk dulsaod.​—Rom 11:33.

¹⁹ Me dolemolem el mesuub a betok el kirel a blekerdelel a Jehovah, e dolebedebek, e doltaut er a chelsel a klengar er kid. (Efe. 5:⁠1) E tiang a mo uchul e a bltkil a rengud el mo er a Jehovah a lmuut el mo mesisiich, me kid a lmuut el mo kmeed er ngii. Misei e kede mo ua ngike el milluches er a psalm el milengitakl el kmo: “Ngdi kuk le ngak e ng bai ungil a dekeed er a Dios!”​—Psa. 73:28.