1, 2. Ngera el tekoi a mo sebeched el meruul er ngii el diak a ulebengelel?

 A ODOS el Monika a ngklel el mla bechiil el bekord el 35 el rak a kmo: “Ngak me a bechik a kmal ungil el kaodengei, engdi ngar er aika el mereko el rak e aki dirk mesuub a beches el tekoi er a delongelam.” A rebetok a dirrek el melekoi a osisiu el tekoi el kirir a rebecherir me a resechelirir.

² Ngdmeu a rengud el mesuub a betok el tekoi el kirir tirke el betik er a rengud. Engdi nglmuut el mo klou a deuil a rengud sel dosuub el kirel a Jehovah, el ngii a kot el ungil el Sechelid. Ngkmal diak el sebeched el mo medengei a rokui el tekoi el kirel. (Rom 11:33) Ngmo sebeched el melemolem el mesuub el kirel a Jehovah el diak a ulebengelel e lmuut el mo omes ngii el blekerdelel el mekreos.​—Oli. 3:11.

3. Ngera kede mo mesuub er tia el suobel?

³ Sel mlo merek el suobel a ngilsukid el mo ungil el medengei a eru er a blekerdelel a Jehovah. Kede silubii el kmo ngbeot a debo er ngii e dirrek el diak longetukel er a rechad. Me ngar er tia el suobel e kede mo suubii el kmo a Jehovah el Dios a bekururau e tabesul a omerellel. Tiang a ngosukid el lmuut el mo bleketakl er a rengud el kmo a Jehovah “a ungil el mor a re bek el chad e ngar ngii a klechubechub er ngii el mor a ikel rokui el le riruul.”​—Psa. 145:9.

4. Ngera belkul a bo debekururau?

⁴ Ngera belkul a bo debekururau? A tekingel a Jesus el ngar er a Rellir 20:35 a ngosukid el mo medengelii a belkul e le ngdmu el kmo: “Ng bai klou el deurreng a dorous er a dolai.” Me a bekururau el chad a dmeu a rengul el mengoit a temel, me a klisichel, me a kloklel el olengeseu er a rechad. A chad a bekururau el diak el belkul a kmo ngmerous a meringel a cheral el klalo, e ngbai merous el mera el ngar er  a rengul. (Monguiu er a 2 Korinth 9:7.) Ngdiak a chad el bekururau el mo uai a Jehovah el ngii a “dmeu a rengul el Dios” er kid.​—1 Ti. 1:11, NW.

5. Ngmekerang a Jehovah e ochotii el kmo ngbekururau?

⁵ Ngmekerang a Jehovah e ochotii el kmo ngbekururau? A Biblia a kmo: A Jehovah “a ungil el mor a re bek el chad.” Ngmesterir a rokui el chad aike el lousbech, el uldimukl er tirke el dirkak bo longull er ngii. “Ng meruul er a sils er ngii me ng dmiich el mor a re chad el di osisiu a re mekngit ma re ungil, e oltengel er a chull el mor a re meruul a ungil ma re meruul a mekngit.” (Mt. 5:45) Tiaikid a uchul me a Paulus a dilu er a rebebil el tir a diak el Kristiano el kmo a Jehovah a “blechoel el olecholt er ngii el oeak a ikel ungil tekoi el loruul. Ng oltengel er a chull er a eanged el ekor kemiu e meskemiu a dellomel er sel ungil belsechel, e meskemiu a keliu e omekeek a rengmiu er a deurreng.” (Rel. 14:17) Me ngbleketakl el kmo a Jehovah a bekururau el mo er a rokui el chad.​—Lk. 6:35.

6, 7. (a) A Jehovah ngileakl el dmeu a rengul el olengeseu er a rua techang? (b) Ngera el tekoi el dilubech a ochotii el kmo a Dios a omesterir a remesiungel aike el lousbech?

⁶ Ngileakl el rullii a Jehovah el mo dmeu a rengul sel lomesterir a remesiungel aike el lousbech. A King el David a dilu el kmo: “Ngak a dikea kbuik ele kchudelal chad, ngdi kmal dirkak kisa tal ungil chad el mechoit er a RUBAK, ma lechub e a re ngelekel di lolengetngit a kall.” (Psa. 37:25) A rebetok el blak a rengrir el Kristiano a mla mesang a rolel e a Jehovah a omekerreu er tir.

⁷ El ua tiang, sesei el rak er a uchei e a Nancy el pioneer a mlo chelebangel er a meringel el mondai. Ngdilu el kmo: “Ak uluusbech a $66 me bo el sebechek el harau er a blik er sel ongingil el sils. Engdi ngdimlak kudengei el kmo ak mo ngmai a udoud er ker. Me ak milluluuch el kirel a mondai er ngak e mirrael el mo oureor er a urerek el waitress. Ngdimlak kumdasu el kmo ngmo betok a tip er ngak er sel kebesengei e le ngsel taem el diak el sal betok a okiak. Ngmlo mechas a renguk e le te mle betok a rechokiak el mlei er seikid el kesus. Me sera bo kmerek e kumechur a tip er ngak e ngmle $66.” Me a Nancy a kmal mle ulterekokl a rengul el kmo a Jehovah a ullengeseu er ngii el msang aike el lousbech.​—Mt. 6:33.

8. Ngerang a kot el klou el sengk er a Jehovah?

⁸ Sel kot el klou el sengk er a Jehovah a kltmokl el kirir a rokui el chad. E tiang ngerang? Ngsel olubet el tengetengel a Ngelekel. A Jesus a dilu el kmo: “Ele Dios a kmal mle betik a rengul er a beluulchad me ng milsa di tal Ngelekel, me tirkel rokui el mo oumera er a Ngelekel a Dios a diak le mad e bai mo ngar el diak a ulebengelel.” (Jn. 3:16) A “beluulchad” el ngar tia el bades a mesaod el kirir a rokui el chad. Me a Jehovah a merous er tia el klou el sengk er ngii el mo er tirke el rokui el kongei el nguu. A ngii di el chad el olecholt er a klaumerang er ngii er a Jesus a mo kiei el diak a ulebengelel! (Jn. 10:10) Tiakid a klou el olechotel a kmo a Jehovah a bekururau.

9. Kede mekerang e mo ua Jehovah el bekururau?

 ⁹ Kede mekerang e mo ua Jehovah el bekururau? Sel omerellel a Jehovah el meskid a betok el tekoi el rullid el mo dmeu a rengud a uchul me ngsoad el merous el mo er a rechad el rulleterir el mo dmeu a rengrir. (1 Ti. 6:17, 18) Ngdmeu a rengud el lomesterir a sengk a resechelid me a rechad er a blid e dirrek el ngosuterir tirke el ousbech a ngeso. (Monguiu er a Duteronomi 15:7.) Ngera sebechel el ngosukid el mo blechoel el bekururau? A rebebil a tibir el kmo sel lenguu a sengk, e te osiik er a techall el mo mesterir a sengk a rebebil. A rebetok el chedal a Jehovah er chelechang a kmal ungil kerebai el kirel a blekururau.

10. Ngera ta er a kot el ungil el rolel e kede mo bekururau?

¹⁰ A ta er a kot el ungil el rolel e kede mo bekururau a sel dousbech a temed me a klisiched el olengeseu e dirrek el melisiich er a rechad. (Gal. 6:10) Kau ke bekururau el okiu tiakid el rolel? Di lekau el oker el kmo: ‘Ngak a kuchotii el mo er a rechad el kmo ak kongei el orrenges er tir? A lsekum a chad a olengit er ngak el mo olengeseu er ngii me a lechub e ngoldurech er ngak, e ak kongei el ngosuir? Ngoingerang el taem e ak chilat er a ta er a chad er a blik me a lechub e ngchad er a ongdibel?’ Sel deblechoel el ‘bekururau’ el mo er a rechad, e kede mo melechesukid el kmeed er a Jehovah me a resechelid.​—Lk. 6:38; Osi. 19:17.

11. Ngera bebil er a rolel e ngsebeched el mo bekururau el bedul a Jehovah?

 ¹¹ Ngdirrek el sebeched el mo bekururau el bedul a Jehovah. A Biblia a melisiich er kid el mo mengull er a Jehovah el ousbech a “ikel kot el ungil” er kid. (Osi. 3:9) A “ikel kot el ungil” er kid a uldimukl er a temed, klisiched, me a ududed el sebeched el ousbech el mesiou er ngii. Ngmo lmuut er a remekekerei el ngalek me ngsebechir el mesuub el mo bekururau el bedul a Jehovah.  A chedam el ngklel a Jason a kmo: “Sel ki bo molecha er a tengetengam er a Blil a Ongdibel, e aki mesterir a rengelekam me te mo mesuk er ngii er a blil a tenget. Ngdmeu a rengrir el meruul er tiang e le te melekoi el kmo, ‘ngar er ngii a ki molab el lomsang a Jehovah.’” Sel lemekekerei a rengalek e bo lodengei el kmo te mo dmeu a rengrir a loruul a tekoi el mo er a Jehovah, e te mo melemolem el bekururau el mo er ngii sel lorael el mo meklou.​—Osi. 22:6.

12. Ngera belkul a bo letabesul a omerelled?

¹² A ta er a ungil el blekerdelel a Jehovah a tabesul a omerellel. Ngera belkul a bo letabesul a omerelled? (Osi. 21:3) A chad el tabesul a omerellel a kongei a uldesuir a rebebil. Ngdiak el belkul a kmo, a chad a kmal kirel el cherrungel el oltirakl a llach er a bek el taem. Ngdirrek el diak el kirel el kmal meringel a tekingel me a omerellel. Ngbai ungil a omerellel el mo er a rechad e melasem el mo medengelii a blekeradel el lechelebangel er ngii. Ngdirrek el kongei el orrenges er a rechad e ngar er sel ungil el blsechel e ngmechititerir me te remuul me a lechub e te ngmai aike el sorir.

13, 14. (a) Ngmekerang a Jehovah e ochotii el kmo ngtabesul a omerellel? (b) Ngera ke suubii el kirel a tabesul el omeruul er sel omerellel a Dios el mo er a Lot?

¹³ Ngmekerang a Jehovah e ochotii el kmo ngtabesul a omerellel? Ngmelatk a uldesuir a remesiungel e dirrek el sebechel el mechititerir me te meruul a tekoi el oltirakl er sel rolel el sorir. E tiang a mocholt er a omerellel el mo er a Lot el mle melemalt el chad. Sera letibir a Jehovah el mo melemall er a beluu er a Sodom me a Gomora, e ngmle bleketakl el subedii a Lot me lechiis el mo er a bukl. Engdi a Lot a kuk mle ngodech a uldesuel me ngullengit er a Jehovah me lekengei er ngii el mo er a ta er a basio. Ka di molatk, a Lot a ullengit er a Jehovah me lengedechii a uldesuel!​—Monguiu er a Genesis 19:17-20.

¹⁴ Sel monguiu er tia el cheldecheduch, e ke locha mo omdasu el kmo a Lot a mle mechitechut a klaumerang er ngii me a lechub e ngdimlak lolengesenges. Kede medengei el kmo a Jehovah a mle sebechel el osebelii, me ngdimlak el kirel a Lot el medakt. Me nguaisei, engdi a Lot a mle medakt. Me a Jehovah a mle medengelii a uldesuel a Lot a uchul me ngkilengei me ngchiliis el mo er a ta er a beluu, alta e a Jehovah a dirrek el millatk el melemall er tiakid el beluu. (Monguiu er a Genesis 19:21, 22.) Me ngbleketakl el kmo a Jehovah a diak el meringel a tekingel me a omerellel, e ngbai blechoel el tabesul a omerellel.

15, 16. Ngmekerang a Llach el Jehovah a milsterir a rengalek er a Israel e ochotii el kmo ngtabesul a omerellel? (Momes er a siasing er a uchelel tia el suobel.)

¹⁵ A Llach el Jehovah a milsterir a rechad er a Israel a ochotii el kmo ngtabesul a omerellel. El ua tiang, a lsekum a chad er a Israel a chebuul me ngdiak el sebechel el melenget a ngelekel a sib me a lechub e ngkaming, e ngsebechel el mo melenget a teblo el belochel. E kuk mekerang a lsekum a chad a kmal chebuul me ngdiak el sebechel el melenget a teblo el belochel? A Jehovah a kongei er ngii me ngmelenget a sesei el merikengko, engdi ngdiak el ngii di el merikengko. A Llach a kmo, ngkirel el ike el “kot el ungil merikengko” el luluusbech a rechad er a Israel sel lengar er ngii a ngarbab el chad el me er a blirir. (Gen. 18:6, Lev. 5:7, 11, NW) Me tia el llach, ngmekerang e ochotii el kmo a Jehovah a tabesul a omerellel?

¹⁶ Ka di molatk, oleko ke chad er a Israel el kmal chebuul. Ke oba tengetengem el merikengko el mo er a chedaol tento e mesterir a rebebil el ngar er ngii a ududir el olab a charm el mo melenget. Ke locha mo merur er tia el kekerei el tengetengem. Engdi ke mocha melatk el kmo, ngar er a osengel a Jehovah e a tengetengem a kmal mekreos. E ngera uchul? E le Llechul a Jehovah a kmo ngkirem el nguu aike el “kot el ungil merikengko” er kau. Me ngdi ua ledu er kau a Jehovah el kmo: ‘Ak medengei el  kmo kau a diak el sebechem el melenget el ua rebebil, engdi ke omeskak sel kot el ungil er kau.’ Me tiakid a ochotii el kmo a Jehovah a tabesul a omerellel, e diak longerechir a betok er aike el sebechir a remesiungel el msang.​—Psa. 103:14.

17. Ngera el rolel a omengull a lekengei er ngii a Jehovah?

 ¹⁷ Ngmengelaod er kid sel dodengei el kmo a Jehovah a tabesul a omerellel e kongei er kid sel dongull er ngii el oba rengud el rokir. (Kol. 3:23) A Constance el ta er a chuodel el odos er kid er a beluu er a Italy a kmo: “Ngkmal imis el soak el tekoi sel kuuchais er a rechad el kirel Ngike el Ulemeob er ngak. Tiaikid a uchul me ak melemolem el omerk er a klumech e mesuub er a Biblia el obengterir a rechad. A lebebil er a taem e ngmo mekngit a renguk el chelitechetul a bedengek a uchul e ngmo diak kruul a lmuut el betok. Engdi ak medengei el kmo, a Jehovah a medengei aike el sebechek e betik a rengul er ngak e dmeu a rengul er a omesiungek.”

18. Ngera ta er a rolel e ngsebechir a ruungalek el mesuub er a blekerdelel a Jehovah?

¹⁸ Ngmekerang e mo tabesul a omerelled el ua Jehovah? Ka mluut el melatk er sel omerellel a Jehovah el mo er a Lot. Ngmla er ngii a llemeltel a Jehovah el subedii a Lot er a basio el kirel el mo er ngii. Engdi ngkilengei el orrenges er a Lot el ouchais er a uldesuel e dirrek el kilengei er ngii el mo er sel basio el mle soal el mo er ngii. Me kemiu el oungalek, ngsebechiu el mesuub er tia el blekerdelel a Jehovah? Nglocha sebechem el orrenges a uldesuir a rengelekem e ngar er sel ungil el blsechel e mkengei el mo oltirakl a uldesuir. Ngmekerang a omoruul er tiang? A Ongkerongel er a December 1, 2007 a kmo a rebebil el oungalek a mo medengei a uldesuir a rengelekir er a uchei er a loruul a llach el kirir. El ua tiang, nglocha mo sorir el oterekeklii a temir a rengelekir el me remei sel lekebesengei. E ngar er ngii a llemeltir el meruul er tia el tekoi, engdi ngungil a lomuchel el mengedecheduch er a rengelekir er a uchei er a lolterekokl er a temel tia el tekoi. Me a lebebil er a taem, e a ruungalek a mo kongei el ngodechii sel mla moterekokl el taem a lsekum ngdiak lolemall er a omellach er a Biblia. Me sel longedecheduch er a rengelekir er a uchei er a loruul a llach, e ngsebechir a rengelekir el mo ungil el medengei aika el llach e mo kongei el olengesenges.

19. Te mekerang a remechuodel e melasem el mo tabesul a omerellir el ua Jehovah?

¹⁹ A remechuodel er a ongdibel a kirir el melasem el mo ua Jehovah el mo tabesul a uldesuir el kirir a rudam me a rudos er tir. Lak dobes el kmo a Jehovah a ulemes a tengetengir tirke el mechebuul el chad er a Israel el kmal mekreos. Me ngdi osisiu, a rebebil er a rudam me a rudos a di kesai a temir el omerk er a klumech e le ngsecher me a lechub e ngcheluodel a uchul. E mekerang a lsekum ngmechitechetong a rengrir e le ngdiak el sebechir el meruul a betok el kirel a omesiungir? A remechuodel a sebechir el ngosuterir el mo medengei el kmo a Jehovah a betik a rengul er tir e le tir el omsang aike el kot el ungil er tir.​—Mk. 12:41-44.

20. Ngera belkul a bo letabesul a omesiunged el mo er a Dios?

²⁰ Nguaisei, engdi a tabesul el omeruul a diak el belkul a kmo kede di melemolem a rengud el mo uchul e kede mengesadel a temed el mesiou er a Dios. (Mt. 16:22) Ngdiak el soad el mo beot a rengud er a omesiunged e dolekoi el kmo ngtabesul a omerelled. Ngbai kired el melatk er a tekingel a Jesus el kmo: “Bo le blak a rengmiu.” (Lk. 13:24) Me ngkirel el mo tabesul a tekoi el doruul. Kede mo er a tkurrebab el sebeched el mesiou er a Dios, e a osisiu el taem e ngdiak dobes el kmo Ngii a diak longerechir er kid aike el diak el sebeched. Me a bo deuaisei, e ngulterekokl a rengud el kmo kede mo odeuir a rengul. Ngmera el ungil el tekoi sel dosiou er a tabesul a omerellel el Dios! Ngar er a ongingil el suobel, e kede mo mesaod el kirel a lmuut el eru el kmal ungil el blekerdelel a Jehovah.​—Psa. 73:28.