1-3. Ngera el klungiaol a dengai el okiu a omengiued er a Biblia, me sel doltaut a osisechakl el ngar er a chelsel?

 A TA el chuodel el odos er kid el mla menguiu er a Biblia el kuk betok er a 40 el taem e dirk melemolem el menguiu a kmo: “Ak mereng a sulel a Jehovah er a bek el sils e le ngolengeseu er ngak el mo ungil medengelii a Biblia.” A ta er a odos a dilu el kmo a omengiuel a Biblia a kmal mla smisichii a klaumerang er ngii er a Jehovah, el uchul me ngmla okesengii a deleuill er ngii el obengkel. Me ngdmu el kmo: “Ngmera el imis el dmeu a renguk!”

² A apostol el Petrus a millisiich er a rokui el mo semeriar el mesuub er a Tekingel a Dios. (1 Pe. 2:2) Me tirke el meruul el uaisei e dirrek el oltaut a osisecheklel a Biblia a klikiid a ukltkir e ngar er ngii a moktek er a klengar er tir. Te dirrek el mekurulii a ungil el deleuill er tir me a rechad, el tir a betik a rengrir er a mera el Dios e dirrek el mesiou er ngii. Aikakid a ungil el uchul me ‘ngdmeu a rengud er a llechul a Dios.’ (Rom 7:22) Engdi ngdiak di le ikaikid e lemerekong. Me ngera lmuut el bebil er ngii?

³ A cherengel a taem el mosuub el kirel a Jehovah me a Ngelekel e ngmukeroul a bltkil a rengum el mo er tir me a dirrek el rechad. Me a Biblia a dirrek el ngosukau el mo medengei el kmo a Dios a mo olsobel er a rebekongesenges el chad er sel taem el lokngemedeterir a remekngit. Ke dirrek el medengelii a ungil el klumech me ngsebechem el ouchais er ngii el mo er a rechad. A Jehovah a mo omekngeltengat er kau sel molisechakl er a rechad er aike el tekoi el bla msuub.

4. Ngera belkul a donguiu er a Biblia el ‘kekerei a ngered’?

⁴ A Jehovah a diak el soal a rechedal a di lorreched el menguiu a Tekingel. Ngdilu er a Josua er a irechar el kmo: “A cheldechedecham a kirel blechoel el mesaod er a babier er  a llach, e dirrek el kirem el kekerei a ngerem el menguiu er ngii er a llomes me a klebesei.” (Jos. 1:8, NW; Psa. 1:2) Me tiang belkul a kmo ngkired el menguiu er a Genesis el mo er a Ocholt el di kekerei a ngered? Ngdiak. Ngbelkul a kmo ngkirem el mekekokau el menguiu me ngar er ngii a techellem el melebedebek er ngii. Tiang a ngosukau el mo melatk aike el bades el sebechem el ousbech er ngii e dirrek el mo melisiich er kau er sel taem. Me sel obetik a chouaika el bades me a cheldecheduch, e mokekokau el menguiu el kekerei a ngerem, me bo el sebechel el medalem er a rengum. Ngera uchul me tiang a klou a ultutelel? E le sel bo mungil el medengelii a belkul a omellach er a Dios, e ngrullau el mo soam el oltaut er ngii er a klengar er kau.

5-7. Mosaod er a rolel e ngsebechel a omengiuem er a Tekingel a Dios el kekerei a ngerem el ngosukau (a) me ke melemolem el klikiid; (b) el mo ungil a omerellem el bedul a rechad; (c) el mo oumerang er a Jehovah el mo lmuut er a chelsel a meringel el taem.

⁵ Sel donguiu el kekerei a ngered e ngsebechel el ngosukid el mo ungil el melebedebek aike el babier er a Biblia el diak desal medengei. Me bo dosaod a edei el okesiu. A kot, ka molatk er a ngeasek el odam el menguiu er a babier er a Hosea. Me ngmocha er a 4 el bliongel e olengull el telkib er a uriul er a lekekerei a ngerel el choiuii a 11 el mo er a 13 el bades. (Monguiu er a Hosea 4:11-13.) E ngera uchul? Aika el bades a ullechau er a uldesuel e le ngmelasem el oltngakl a deleboes el omeruul sel lengar er a skuul. Me ngmelebedebek er ngii el bades e kmo: ‘A Jehovah a sebechel el omes a berrotel el mekngit el omerellir a rechad. Me ngkmal diak el soak el mo tomellii a rengul.’ Me ngtibir el mo melemolem el klikiid er medal a Dios.

⁶ Ongerung, a odos a kerekikl el menguiu er a babier er a Joel e mocha er a 2 el bliongel er a 13 el bades. (Monguiu er a Joel 2:13.) Me tia el bades a rullii el mo omdasu er a rolel e ngsebechel el oukerebai er a Jehovah el “bekokuii e mui er a klechubechub; ng klou a rengul e oltaut er a telbilel.” Me ngtibir el mo diak di lemereched el ngmasech a rengul e di lolterturk a tekingel a bechil me a rechad.

⁷ Ongedei, molatk er a Kristiano el chedam el mla mo diak loureor me ngsuebek a rengul el kirel aike el lousbech a telungalek er ngii. Ngkerekikl el menguiu er a babier er a Nahum, e mocha er a Nahum 1:7 e choiuii el kmo, a Jehovah a “mengeluolu er tirkel obult el mor ngii,” e dirrek el “cheuotelir a re chedal er a taem er a chelebuul.” Me tiang a ngosuir el mo melechesuar a ulekerreuil a Jehovah me ngmo diak el sebek a rengul. E sola e mocha menguiu er a 15 el bades el kekerei a ngerel. (Monguiu er a Nahum 1:15.) Me ngmo soal el ochotii a klaumerang er a Jehovah el oeak a lomerk er a ungil chais er a chelsel a meringel el taem. Me sel taem el dirk losiik er a urerel e ngtibir el mo ousbech er tia el techellel el mo oldingel a obliil.

8. Mtelkib el mesaod a mekreos el ulekrael el bla betik el okiu a omengiuem er a Biblia.

⁸ Aika el ungil el tekoi el dulsaod a mlengai er a babier er a Biblia el rebebil a omdasu el kmo ngmeringel el bo dodengei a belkul. Me sel morriter er aika el babier, e ngulterekokl el mo soam el menguiu a lmuut el bebil er a bades er a chelsel. Ka di molatk er a llomeserreng me a ongelaod el ngar er aika tekoi el lulluches a reprofet! E kuk mekerang el kirel a Biblia el rokir? A Tekingel a Dios a di ua chutem el delakl a betok el diamond er ngii. Bo mungil el mengiis er tia el chutem! Nguaisei, monguiu er a Biblia el rokir e molemolem el osiik a betok el mekreos el ulekrael me a ongelaod er a chelsel.

9. Kede mekerang e mekurulii a klemedengei er kid er a Biblia?

⁹ Alta e ngklou a ultutelel el kirem el menguiu er a Biblia er a bek el sils, engdi ngdirrek el ungil el mokurulii a klemedengei er kau er ngii. Me bo mungil el ousbech aike el babier el oltobed a cheldebechelel a Jehovah, e morriter  e monguiu a chisir a rechad, basio me a tekoi el dilubech. Me a lsekum ngtelkib el rrau a rengum er a rolel a omoltaut er a bades el monguiu er ngii, e molengit er a ta er a remechuodel er a ongdibel me a lechub e ngklou el chad el Kristiano me lengesukau. Me bo dosaod er a kerebil a Apolos el ta er a Kristiano er a taem er a Biblia, el meketeklii a klungel a ultutelel a domekeroul er a klemedengei er kid.

10, 11. (a) Ngmilekerang a Apolos e mlongeseu el mo ungil el omerk er a klumech? (b) Ngera kede suubii er a cheldecheduch el kirel a Apolos? (Momes er a baks el “Kau Ke Medengei a Beches el Osisechakl?”)

¹⁰ A Apolos el chad er a Judea el mlo Kristiano, a mle “ungil medengei a tekoi er a Chedaol Llechukl” e dirrek el mle “blak a rengul el mengedecheduch.” Me a babier er a Rellir a mesaod er ngii el kmo: Ngmle “melemalt el olisechakl a tekoi el kirel a Jesus.” Engdi ngdimlak lodengei el kmo ngdirk ullisechakl el kirel a mechut el omesodel a techolb. Me a rubekel el Prisila me a Akuila er a lerengesii el olisechakl er a Efesus, e te mlo “ungil mesaod er a Rolel a Dios el mor ngii.” (Rel. 18:24-26) Me tia ngmlo uchul a ngera el klungiolel a Apolos?

¹¹ A uriul er a lolisechakl er a Efesus, e a Apolos a mlo er a Akaia. Me sera lebong “e ng kmal ngilsuterir tirkel mlo oumerang el oeak a krasia er a Dios, ele ng uleba Chedaol Llechukl el olecholt el kmo a Jesus a Mesias, me ngulturk a ngerir a re chad er a Judea er mederir a re chad.” (Rel. 18:27, 28) Seikid el taem e ngmla mo sebechel a Apolos el melemalt el smodii a belkul a techolb er a Rekristiano. Me a okurulel a klemedengei er ngii a uchul e “ng kmal ngilsuterir” a rebeches el mle soiseb er a mera el omengull. Me ngera kede suubii er tia el cheldecheduch? Ngkired el mo ua Apolos el soad el mo medengei a tekoi el donguiu er a Biblia. E dirrek el kired el oba klengariourreng me a omereng el saul el kongei a ngii di el ulekrael el sebechel ngosukid el mo ungil el sensei.

12, 13. Mosaod er a rolel e ngsebechel a ungil el omesodel a Bades el ngosuterir a remesuub er a Biblia el mo olengeriakl.

¹² Kid a dirrek el sebeched el olengeseu er a rechad el di ua Prisila, Akuila me a Apolos. Ngmo uangerang a uldesuem a lsekum ke ngosuir a chad el mesuub el mo melodech er a klengar er ngii e olengeriakl er a omesubel? Me a lechub e ke ta er a remechuodel, ngmo uangerang a uldesuem a lsekum a kldemem er a klaumerang a mereng a sulem el kirel a omellach er a Bades el bilsang me ngilsuir el mo outekangel er a mondai er ngii? Ngulterekokl el kmal mo uchul a deurreng sel dousbech er a Tekingel a Dios el ngosuterir a rechad el mo sumechokl a klengar er tir. * Ngmekerang a omoruul er tiang?

¹³ A rebetok el chad er a Israel er sel taem er a Elias a mle sersuul a rengrir el kirel a mera el omengull me a klsuul. Me a omellach el ledilung a sebeched el ousbech er ngii el ngosuir a chad el mesuub er a Biblia el dirk sersuul a rengul el mo olengeriakl. (Monguiu er a 1 King 18:21.) Ka molatk er tiang: A lsekum a semeriar el chad a medakt a uldesuir a rechad er a blil me a resechelil, e ngsebechem el melisiich er ngii el mo tibir a rengul el mo mesiou er a Jehovah el okiu a omesodem er a bades er a Isaia 51:12, 13.​—Monguiu.

14. Ngera sebechel el ngosukau el mo melatk a bades er a Biblia er sel taem el molengeseu er a rechad?

¹⁴ Ngbetok a tekoi el ngar er a Biblia el sebechel el melisiich, e omeklemalt er a rechad. Engdi ke locha mo oker el kmo, ‘Ak mekerang e lotkii a bades er sel taem el kuusbech er ngii?’ Sel monguiu er a Biblia e molebedebek a uldesuel a Dios er a bek el sils, e ke mekurulii a klemedengei er kau er a Biblia, e a chedaol klisichel a Jehovah a sebechel el ngosukau el mo melatk a bades er sel taem el mousbech er ngii.​—Mk. 13:11; monguiu er a Johanes 14:26. *

15. Ngera sebechel el ngosukau el mo ungil medengelii a Tekingel a Dios?

¹⁵ Moluluuch el mo er a Jehovah me lebeskau a llomeserreng me bo el sebechem el remuul a ngerechelem er a ongdibel me a dirrek el omesiungem el ua lurruul er ngii a King el Salomon. (2 Kr. 1:7-10) Bo mua reprofet er a irechar el “mle meringel el okerker e osiik” er a Tekingel a Dios me bo lenguu a melemalt el klemedengei el kirel a Jehovah me a soal. (1 Pe. 1:10-12) A apostol el Paulus a dilu er a Timothy me lesisichii a rengul el oeak “a ikel tekingel a klemerang ma meral osisechakl.” (1 Ti. 4:6) Me a lsekum ke mo meruul el uaisei e ngmo sebechem el ngosuterir a rechad, e a osisiu el taem e ke smisichii a klaumerang er kau.

16. (a) Ngmilekerang e mo klungiolir a rechad er a Berea e le tir el mle “bek el sils el losuub er a Chedaol Llechukl”? (b) Ngera uchul me a omengiuel a Biblia a klou a ultutelel el kired er chelechang?

¹⁶ A Rechijudea el kiliei er a beluu er a Berea el ngar er a Masedonia a mle siukang er tir el “bek el sils el losuub er a Chedaol Llechukl.” Me sera lomerk er a ungil chais a Paulus el mo er tir, e te ulemekesiu a tekingel er a klemedengei er tir er a Bades. Me ngera mlo rsel? Te betok er tir a kilengei el kmo ngullisechakl a klemerang me te “mlo oumerang.” (Rel. 17:10-12) Tiang a ochotii el kmo a omengiuel a Biblia er a bek el sils a melisiich er a klaumerang er kid er a Jehovah. Me a chad a kirel el kmal oumerang e “medengei a ikel tekoi el lolatk e mengiil” me  bo el sebechel el mo soiseb er a beches el beluulechad er a Dios.​—Heb. 11:1.

17, 18. (a) Ngmekerang a mesisiich el klaumerang me a bltikerreng e omekerreu er a rengul a Kristiano? (b) Ngmekerang a omelatk e omekerreu er kid er a kdekudel el tekoi?

¹⁷ Ngmla er ngii a ungil el uchul me a Paulus a milluches el kmo: “Ngdi kid a chad er a cheldecheos, me ng kired el ultebechel a uldesued el oumerang e betik a rengud er a Dios, el ua le tekerngel a ulud me ng kired el bliull er ngii, e melatk e mengiil er a osebechekled el ua helmet, el ngar a bdelud.” (1 Th. 5:8) A ulul a soldau a kirel el ngar er ngii a tekerengel el omekerreu er ngii er a cheraro. Me ngdi osisiu, a rengul a Kristiano a kirel el mukerreu me lak lemechetikaik el mo er a klengit. Me a lsekum ngmesisiich el oumerang er a Jehovah e betik a rengul er Ngii me a dirrek el rechad, e ngdi ua lenguu a kot el mesisiich el tekerengel a ulul el loiang. Me ngulterekokl el diak bo loruul a tekoi el uchul e ngoridii a kengei er a Dios.

¹⁸ A Paulus a dirrek el milsaod el kirel a omelatk “er a osebechekled el ua helmet, el ngar a bdelud.” Me a soldau er a irechar el diak a ngera el omekerreu er a bdelul a klou a techellel el mo mad er a mekemad. Engdi a lsekum e ngar ngii a ungil el helmet er ngii, e ngsebechel el mechelebed a bdelul e diak lemad. Me ngmo ultebechel a uldesued sel doba omelatk e doumerang el kmo a Jehovah a sebechel el olsobel er kid. Tiang a ngosukid me bo el sebeched el oltngakl a “chelsengsang el omengaititekangel” er tirke el omtok a mera el osisechakl. (2 Ti. 2:16-19) Me a omeltked a dirrek el smisichid el mo oltngakl a ongetikaik el mo meruul a tekoi el louketui a Jehovah.

19, 20. Ngera uchul me kede omes er a Tekingel a Dios el kmal mekreos? Kede mekerang e ochotii a omereng el saul er kid el kirel? (Momes er a baks el “A Jehovah a Meskak Aike el Kuusbech.”)

¹⁹ Nglmuut el kmal mla mo klou a ultutelel el dultuil er a Tekingel a Jehovah er chelecha el lolekedang a ulebongel. A omellach el dengai er ngii a ngosukid el mo sumechokl a mekngit el omerelled me a chelitechetud. A ongelaod me a omelisiich er a chelsel a smisichid me ngsebeched el outekangel a ngii di el omelsemai er a Satan me tia el mekngit el beluulechad. Me a ulekrael el dengai er a Tekingel a Jehovah a ngosukid el mo merael er a rael el mo er a klengar.

²⁰ Lak mobes el kmo a Jehovah a “soal a rokui el chad a bo le sobel,” el uldimukl er a remesiungel me tirke el domerk er a klumech el mo er tir e dolisechakl er tir. Engdi a rokui el sorir el mo suobel a kirir el mo ‘medengelii a klemerang.’ (1 Ti. 2:4) Me ngkmal kired el menguiu er a Biblia e oltaut a ulekrael er ngii a lsoad el mo suobel. A omengiued er a Biblia er a bek el sils a ochotii el kmo kede omes er a klemerang el Tekingel a Jehovah el kmal mekreos.​—Jn. 17:17.