A JESUS ngmla er ngii a mera el belkul a klengar er ngii? Ngmlukeroul er a chelsel a chebuul el delengchokl e dimlak a betok el kloklel. Ngdirrek el dimlak a “bo lotilii a bdelul er ngii e olengull.” (Lukas 9:57, 58) Me a lmuut el tang, a recherrouel a uluuketui e uleltuub er ngii e sola e milekodir.

Ke locha mo melatk el kmo, ‘A chouaisei el klengar a diak a mera el belkul.’ Engdi a klengar er a Jesus a dimlak di leuaisei e lemerekong. Ka me bo domes a eua el tekoi el kirel a klengar er ngii.

“A kall el kunga er ngii a sel kutireklii a soal ngikel ulderchak e krekir sel ureor el le bilskak.”​—Johanes 4:34.

A Jesus a uleltaut a soal a Demal el Jehovah * el oeak a tekingel me a omerellel. Ngkmal mle dmeu a rengul el meruul a soal a Dios. Ngulemekesiu er ngii el mo er a kall, el di ua lolekoi er ngii tia el bades el llechukl er bab. Ka molatk a blekeradel er sel taem er a lolekoi aika el tekoi.

A Jesus a millekoi aika el tekoi er a bocha el sueleb. (Johanes 4:6) Ngmirrael er a chelsel a beluu er a Samaria er sel tutau me ngulterekokl el kmal mle songerenger. Me a redisaiplo er ngii a dilu er ngii el kmo: “Sensei, momengur.” (Johanes 4:31) A Jesus a ulechotii el oeak a nger er ngii el kmo ngilai a klisichel er a loruul er a urerel a Dios. Tiang a omesodel a chad el mla er ngii a mera el belkul a klengar er ngii.

“Ng betik a renguk er a Chedam.”​—Johanes 14:31.

A Jesus a kmal mle kmes a deleuill er ngii me a Demal el ngar er a eanged. A dmolech el bltkil a rengul el mo er a Demal a rirellii el mo ouchais el kirel a Ngklel me a moktek er ngii me a blekerdelel. Ngkmal mle cherrungel el olecholt er a Demal el oeak a tekingel, omerellel, me a blekerdelel, me sel domes er ngii e ngdi ua domes er a Demal. Sei a uchul me a Filip er a loker er ngii el kmo: “Mochotii er kemam a Chedam,” e a Jesus a dilu el kmo: “Ngikel mla mesekak a mla mesa Chedam.”​—Johanes 14:8, 9.

A Jesus a kmal mle betik a rengul er a Demal me ngkilengei el olengesenges er ngii el mo lmuut er a kodellel. (Filipi 2:7, 8; 1 Johanes 5:3) A chouaisei el mesisiich el bltikerreng el mo er a Dios a rirellii a klengar er a Jesus el mo er ngii a mera el belkul.

“A kot el ngarbab el bltikerreng a sel le mad a chad el kirir a re sechelil.”​—Johanes 15:13.

A rediak el mecherrungel el chad a ua lak a omeltkir el kirel a ngar mederir el taem. A Biblia a mesaod el kmo: “A klengit a siliseb er a beluulchad el okiu a tal chad [Adam], ma kodall a ulekiu a klengit el mei, ma kodall a ulemerk el mor a re chad el rokui, ele rokui a mlor a klengit.” (Rom 5:12) Ngdiak el sebeched el di kid el mo cheroid er a blsel a klengit, el ngii a kodall.​—Rom 6:23.

Engdi ngdmeu a rengud e le Jehovah a mla kutmeklii a semecheklel tia el blekeradel. Ngkilengei er a Ngelekel el Jesus, el ngii a mle cherrungel e diak a kngtil, el mo chuarm e mad me bo el sebechel el melubet er a klechad er a klsibai el mo er a klengit me a kodall. A Jesus a kmal mle betik a rengul er a Demal me a rechad, me ngkilengei el odersii a cherrungel el klengar er ngii el kired. (Rom 5:6-8) A chouaisei el bltikerreng a rirellii a klengar er ngii el mo er ngii a mera el belkul. *

“Ngikaikid a betik er a renguk el Ngelekek, el ngii odeuir a renguk.”​—Mateus 3:17.

A Jehovah a mla er a eanged e millekoi aika el tekoi er a lemetecholb a Jesus. Me ngulechotii el kmo ngkmal mle betik a rengul e dirrek el kilengei er a Ngelekel el Jesus. Sei a uchul me a Jesus a mle sebechel el melekoi el kmo: “A Chedam a betik a rengul er ngak.” (Johanes 10:17) Ngmle medengei el kmo nguleba bltkil a rengul me a kengei er a Demal a uchul me ngmle bekeu el outekangel a ultok me a mekngit el tekoi el mlo er ngii. Ngdirrek el mle sebechel el mo chelebangel er a kodall. (Johanes 10:18) Me ngii el mle medengei el kmo nguleba bltkil a rengul me a kengei er a Demal a uchul me a klengar er ngii a mlo er ngii a mera el belkul.

A Jesus a mla er ngii a mera el belkul a klengar er ngii. Me ngsebeched el suub a betok er ngii el kirel a rolel a lebo er ngii a mera el belkul a klengar er kid. A ongingil el suobel a mo mesaod a bebil el ulekrael el lebilsterir a rultirakl er ngii el kirel a rolel a klengar er tir.