Ngoingerang e Ngmei a Mekemad er a Armageddon?

“Ak umes, e mesang, a diak le mochur el kloul seked ra bek el renged, ma klebliil rar chad, ma bliongel rar chad, ma chomelekoi . . . Tirika tirikel uleak sel kloul ringel.”​—CHOCHOLT 7:9, 14.

A ROKUI el tekoi a mla meketmokl el kirel a Armageddon. Ngoeak a ngera el rolel?

Ngmla mo er ngii a cheldellir a rechad el meliuekl er a beluulechad el rokir el mesiou er a Jehovah e kiei el oltirakl a ngarbab el omellach er a Biblia el kirel a tekoi er a kldung. Ngoeak a ngelsuil a Dios, e a rebetok el miliol el chad er a bek el renged, me a kebliil, me a omelekoi a mo dmak e rullii a klodam el ta rengrir e kaubltikerreng. A chouaitia el klodam a ngar er ngii er a delongelir a Resioning er a Jehovah.​—Johanes 13:35.

Ngdi kmedung e a Satan a mo mengudel er a resoldau er ngii e mo oldechelakl er tirke el chad el oba budech e diak el sebechir el di tir el mesebechakl er tir. (Esekiel 38:8-​12; Chocholt 16:13, 14, 16) Ngmekerang e sebechel el mo ulterekokl a rengum er tia el tekoi? A Biblia a mesaod el kirel a ulterekokl el tekoi el sebechel el ngosukid el mo medengei el kmo ngoingerang e ngmo er ngii a mekemad er a Armageddon. E a betok er aike el tekoi el losaod a toutang er chelechang.

Tekoi el Momes el Toutang

A redisaiplo er a Jesus a uleker er ngii el kmo ngmekerang a rechad a bo lodengei el kmo ngoingerang e ngomuchel a “ullebongel ra taem ra belulechad.” (Matteus 24:3) Me a Jesus a ulenger er tir er a lolekoi el kirel a taem el “mo kautok ar beluu mar beluu, ma renged ma renged, e morngii a bosech ma desiu er ker me ker.” E sola e dilu el kmo: “Ngdi ikal rokui a uchelel a ringel ra cheroll.” (Matteus 24:7, 8) A apostol el Paulus a milsaod er tia el osisiu el taem el kmo ng “uriul sils,” e millekoi el kmo aika el sils a “morngii er ngii a blsechel a ringel.” (2 Timoteus 3:1) Omomdasu e aika el ulaoch ngmesaod a tekoi el dubechang er chelecha el sils?

Ngera uchul me tiang a kmal mo meringel el taem? A apostol el Johanes a meskid a uchul. Ngulemlaoch el kmo ngmo er ngii a “kekedeb  [el] taem” el Satan me a remekngit el anghel er ngii a mo meruul a tekoi el di ngar tia el chutem. A Satan a losaod er ngii el kmo ngngar tia el taem e ngoba “meringel cheldechuderreng.” (Chocholt 12:7-​12) Kau ngsebechem el mesang a klsiberreng me a uldikel el ngar er ngii er a delongelir a rechad er chelecha el sils, el diak el di el ngar er a ta el basio, e ngbai meliuekl er a beluulechad el rokir?

A Jesus a dirrek el dilu el kmo ngngar tia el taem er a klou el ringel, e a mengasireng el ureor a mo meketmokl. Ngmillekoi el kmo: “Me tial evangkelio ra rengedel a Dios a mo oberk ra belulechad el rokir, el kirel locholt el bedul a bek el renged; e sola e ngmochu ullebongel.” (Matteus 24:14) Chelecha el sils, el ngar er a kuk betok er a 235 el beluu, e a Resioning er a Jehovah a omerk er a ungil el chais er a Rengedel a Dios el ousbech a babier el bla lotobed el ngar er a kuk betok er a 500 el omelekoi. Aike el teblo el babier el mlengai er a Biblia el loltobed, el A Ongkerongel me a Awake!, a kot el klou a omerusel el meliuekl er a beluulechad el rokir. A Resioning a dirrek el mla oidii a Biblia el ngar er a 100 el omelekoi. A urerir a loruul er ngii a rechad el melenget a temir me a klisichir e dirrek el meketmokl el okiu a tenget. Tia el ureor er a berkel a klumech ngotutel a ulochel a Jesus?

A Biblia a dirrek el mesaod el kirel aike el tekoi el mo duubech el mo uchul a klaumekemad er a delongelel a Jehovah el Dios me tirke el omtok er ngii. Momtab aika el kldei el ulaoch el bo momes a otutel.

Tekoi el Di Kmedung e Ke Mo Omes a Otutel

Kot el Ulaoch. A Biblia a kmo a remengedereder er tia el beluulechad a mo melekoi el kmo “ngbudech, ngdiak de mekesakl.” Te locha mo omdasu el kmo ngmocha sebechir el sumechokl a meklou el mondai er tir. Engdi, aike el blekeradel el mo duubech er a uriul er tia el tekoi a kmal diak bo el uchul a budech.​—1 Thesalonika 5:1-3.

Ongeru el Ulaoch. A ongingil, e a kakerous el kabelment a mo melilt el mo omtok aike el cheldebechel er a klechelid el meliuekl er a beluulechad. Ngar er a Biblia, e a tebelik el charm a omtechei aika el kabelment, e ngike el redil el dengchokl er a ulkel ngika el charm a omtechei a klsuul el klechelid er a beluulechad el rokir. (Chocholt 17:3, 15-​18) Ngika el okesiu el charm a mo meruul er sel soal a Dios a bo loruul er ngii el oeak sel bo lolemall aike el klechelid el omulak el kmo te omtechei er a Dios.

Ngoeak a okesiu, e a apostol el Johanes a mesaod er tia el tekoi el kmo: “Ma ikel mules el truich lorus, ma charm iaikai a mo ouketui er ngikal tingaol dil; me te mo rullii el mo cheloit e meau, e mo kma techel a bedengel e durur lokngemedii ra ngau, ma Dios a riruul a rengrir el mo meruul a uldesuel.”​—Chocholt 17:16, 17.

Ongedei el Ulaoch. Uriul er a loldechelakl er a klsuul el klechelid, e a Satan a mo mengudel aika el renged el mo oldechelakl er tirke el mesiou er a Jehovah el Dios.​—Chocholt 7:14; Matteus 24:21.

Tia el Tekoi Ngera Ngrullii er Kau?

A lsekum e ngdirkak a techellem el mo dmolech el mesuub er a Biblia, e nglocha mo meringel er kau el oumerang el kmo aika el tekoi el dulsaod a mo duubech. Engdi ngngar er ngii a ungil el uchul e ngsebechem el oumerang el kmo aika el rokui el tekoi a di kmedu el mo tmaut er a ngar medad el taem. A betok el ulaoch er a Biblia el mla tmaut a sebechel el oterekeklii a rengud el kirel tiang. *

Nglocha ungil a omchoit a telkib el taem el merriter er a uchul me a Resioning er a Jehovah a ulterekokl a rengrir el kmo a “klaumekemad er sel kloul sils ra Dios” a kmedang me a uchul e ngdiak el kirem el mo medakt er ngii. Molengit er tir me louchais er kau el kirel aike el lolekoi a Biblia el kmo ngkirem el meruul me bo el sebechem el mo ta er tirke el bo lolsobel er tir a Jehovah el Dios. (Chocholt 16:14) Aike el bo msuub a locha mo ngodechii a osengem el kirel a ngar medam el klebesei.

[Footnote]

[Blurb el ngar er a 8 el llel]

A ureor el loruul er ngii a Resioning er a Jehovah, ngotutel a ulaoch er a Biblia?