Mukrael el Oeak a Chedaol el Klisichel a Dios er a Kot el Dart el Rak Me Chelechang

“Ma ikal rokuil tekoi a urerel ngiil di tal osisiul [chedaol el klisichel a Dios].”​—1 KORINTH 12:11.

1. Ngera kede mo mesaod er ngii el ngar tia el suobel?

SEL taem er a Pentekost er a rak er a 33 e ngdilubech a meklou el tekoi. (Rellir 2:1-4) A oitelel a chedaol el klisichel a Dios er tiakid el taem er a kot el dart el rak a mle klou a lengedechii er a omerellel a Dios el mo er a rechedal. Ngar sel mlo merek el suobel, e kede milsaod a bebil er a rolel e a chedaol el klisichel a Dios a millisiich er a reblak a rengrir el mesiungel er a ngar er a mong el mo sebechir el oltaut a meringel el ngerechelir. Engdi ngera mle klekakerous er a rolel a loureor a klisichel a Dios er a uchei er a taem er a Klekristiano me sera kot el dart el rak? E a Rekristiano te mekerang e ngmai a klungiolir er a omerellel a chedaol el klisichel a Dios er chelechang? Kede mo mesuub el kirel tia el tekoi el ngar tia el suobel.

 “Mesang, Ngak a Mesiungel a [Jehovah]”

2. Ngmilekerang a Maria e mle sebechel el mes a olechotel a urerel a chedaol el klisichel a Dios?

² A Maria a mla er sel delemerab er bab er a Jerusalem er a lemoitel a chedaol el klisichel a Dios. (Rellir 1:13, 14) Nguaisei, engdi a bekord el okedei el rak er a uchei er a leduubech tia el tekoi, e a Maria a miles a olechotel a urerel tia el klisichel a Dios. A Jehovah a uliuelii a klengar er a Ngelekel er a eanged el mei er tia el chutem, el loia er a omecherellel a ekebil el Maria me ngmlo dioll. A tekoi el dilubech el mo er a Maria a uleak a “[chedaol el klisichel a Dios].”​—Matteus 1:20.

3, 4. Ngera el blekeradel a lulechotii a Maria, e mekerang a doukerebai er ngii?

³ Ngera me a Jehovah a ngileltii a Maria e milsang a chouaitia el ileakl el techall? A anghel er a uriul er a lolekoi er a Maria el kmo ngmo mechellii a Ngelekel a Dios, e a Maria a dilu el kmo: “Mesang, ngak a mesiungel a [Jehovah]; bo ltaut er ngak el ua ikel molekoi.” (Lukas 1:38) Me sera lolekoi el uaisei, e a Maria a ulechotii sel blekerdelel a rengul, el Jehovah a dimla medengelii. A nger er ngii a mileketeklii el kmo ngmle kltmokl el mo oltaut er a soal a Dios. Ngdimlak loker el kmo ngmo ua ngerang a uldesuir a rechad er a beluu el kirel a kldiull er ngii me a lechub e loker el kirel aike el sebechel el mo duubech er a deleuill er ngii me ngike el chad el mo bechil. Me sera losaod el kirel el kmo ngmesiungel a Dios, e ngulechotii a mui el klaumerang el ngar er a Jehovah el Mastang er ngii.

⁴ A lebebil er a taem, e ke kora mo omdasu el kmo a ngerechelem er a omesiungem el mo er a Dios, ngkmal oberedang er kau? Ngungil a di lekid el oker er kid el kmo: ‘Ngak ak mui el ultuil er a Jehovah el mo sumechokl a rokui el tekoi el oltirakl er sel soal a rengul? Ngak ak ulecholt el kmo ak bekongesenges el chad?’ Bo lulterekokl a rengum el kmo a Dios a mesterir a chedaol el klisichel tirke el oumerang er ngii er a rengrir el rokir e olengesenges er ngii el Merredelir.​—Rellir 5:32.

A Petrus a Mlongeseu er a Chedaol el Klisichel a Dios

5. Ngoeak a ngera el rolel e a Petrus a milsa olechotel a urerel a chedaol el klisichel a Dios er a uchei er a Pentekost er a rak er a 33?

⁵ Ngdi ua Maria, e a apostol el Petrus a dirrek el mlo medengelii a mesisiich el urerel a chedaol el klisichel a Dios er a uchei er a Pentekost er a rak er a 33. A Jesus a milsang a Petrus me tirke el bebil el apostol a klisichel a omerreder el oldik er a remekngit el anghel. (Markus 3:14-​16) Me a Bades alta e ngdiak losaod a betok el tekoi el kirel tiang, engdi a Petrus a locha uluusbech er tia el klisichel a omerreder. A klisichel a Dios a dirrek el mlocholt er sel taem el Jesus a dilu er a Petrus me lorael el bedulngii er bebul a Daob er a Galilea, me a Petrus a mirruul el uaisei. (Monguiu er a Matteus 14:25-29.) Me ngbleketakl el kmo a Petrus a uleltuil er a chedaol el klisichel a Dios el ngosuir el mo meruul a meklou el ureor. E a telkib el taem er a uriul, e tia el klisiich a mlo omekrael er a Petrus me a rekldemel el disaiplo er a kuk ngodech el rolel.

6. Ngoeak a klisichel a Dios, e ngera ngmle sebechel a Petrus el meruul er a Pentekost er a rak er a 33 me a uriul er isei?

⁶ Ngar sel Chedaol el Sils er a Pentekost er a rak er a 33, e a Petrus me a rebebil a uleak a ongasireng el rolel, e ngmlo sebechir el melekoi a tekingir tirke el mle kldibel er a Jerusalem. E a uriul, e a Petrus a mlo dechor e milengedecheduch er a seked. (Rellir 2:14-​36) Nguaisei, ngika el chad el lebebil er a taem e ngdi mereched el dmu tekingel me a lechub e ngmle medakt er a rechad, a ngiluu a blekeu el mo sebechel el omerk er a klumech, alta e ngchilebangel a ultok me a odechelakl. (Rellir 4:18-​20, 31) A Dios a uluusbech er tia el klisichel el msang a Petrus a ileakl el klemedengei. (Rellir 5:8, 9) A Petrus a dirrek el ngiluu a klisiich el mo sebechel el okisii a chad el mla mad.​—Rellir 9:40.

7. Ngera el osisecheklel a Jesus a mlo bleketakl er a osengel a Petrus er a uriul er a lemetecholb el okiu a chedaol el klisichel a Dios?

⁷ A uchei er a Pentekost, e a Petrus a mlo medengei a belkul a betok el klemerang el tekoi el lullisechakl a Jesus. (Matteus 16:16, 17; Johanes 6:68) Engdi ngmla er ngii a bebil er a osisecheklel a Jesus el dimlak bo lebleketakl er a rengul er a uchei er a Pentekost. El uai tiang, a Petrus a dimlak lomtab el kmo a Jesus a mo mekiis er a kodall, el ua mesisiich el anghel er a ongedei el klebesei, me a Renged a mo ngar er a eanged. (Johanes 20:6-10; Rellir 1:6) Sel uldasu el kmo a rechad a sebechir el mo anghel e mengedereder er a Renged el ngar er a eanged a mle ngodech el tekoi er a rengul a Petrus. Engdi sera lemetecholb el okiu a chedaol el  klisichel a Dios e lenguu a omelatk el mo er a eanged, e ngmlo sebechel el omtab a belkul a osisecheklel a Jesus el kirel aika el tekoi.

8. Ngera el klemedengei a lobang a rengellitel me tirke el ‘ngodech el sib’?

⁸ A uriul er a lenguu a chedaol el klisichel a Dios a redisaiplo er a Jesus, e te mlo medengei a belkul a osisecheklel a Jesus el dimlak lodengei er a uchei. Ngoeak a ulekrael er a Dios, e a remilluches er a Beches el Renged a milsaod a betok el tekoi el kirel a moktek er a Jehovah el mlo uchul a klungioled. (Efesus 3:8-​11, 18) Chelecha el sils, e a rengellitel me tirke el ‘ngodech el sib’ a dmak el melai a osisiu el klemerang el tekoi er a Tekingel a Dios. (Johanes 10:16) Kau ke oba omereng el saul el kirel a klemedengei me a utebengel a Tekingel a Dios el sebeched el ngmai el okiu a chedaol el klisichel?

A Paulus a Mlo “Mui ra Chedaol [el Klisiich]”

9. A Paulus ngmlo sebechel el kutmokl a ngerang el okiu a chedaol el klisichel a Dios?

⁹ A bekord el ta el rak er a uriul er a rak er a Pentekost 33, e a Saulus el uriul e ngmlo Paulus a dirrek el mlucheluch er a chedaol el klisichel a Dios. E tia el klisiich a ulemekrael er ngii er a rolel el uchul a klungioled er chelechang. A Paulus a mlukrael el mo meluches a 14 el babier er a Biblia. A chedaol el klisichel a Dios a ngilsuir a Paulus el mo bleketakl a osengel, el kirel a omelatk er a diak el ngemed me a diak el mad el blekeradel el ngar er a eanged, me ngmlo sebechel el meluches e mesaod el kirel. E tia el klisiich a dirrek el ngilsuir a Paulus el mo omekungil er a resmecher e oldik er a remekngit el anghel e olekiis er a rulekoad! Nguaisei, sel klisiich el lengiluu el oeak a chedaol el klisichel a Dios a ngilsuir el mo kutmeklii a klou a ultutelel el omesiou, el tekoi el loruul er ngii a remesiungel a Dios er chelecha el taem, engdi ngdiak lokiu a mengasireng el rolel.

10. Ngmilekerang a chedaol el klisiich e ngosuir a Paulus el mo bekeu el mengedecheduch?

¹⁰ A Paulus el mlo “mui ra chedaol [el klisiich]” a mle bekeu el omtok er a chad er a olai. Tia el blekengel a Paulus a mle klou a lerellii er ngike el oba uldekial a omerreder er a beluu er a Siprus, el ulerrenges a cheldechedechal! Me ngii el chad a kilengei er a klemerang, “e kmal mlo mechas a rengul er chosisecheklel a [Jehovah].” (Rellir 13:8-12) Me ngbleketakl el kmo, a Paulus a mle medengei el kmo ngdi ta el chedaol el klisichel a Dios a mle sebechel el ngosuir el mo melekoi a klemerang el tekoi el oba blekeu. (Matteus 10:20) E a uriul, e ngullengit er a ongdibel er a Efesus me loluluuch el kirel me a Dios bo ‘le bsang a ikel kirel el melekoi.’​—Efesus 6:18-20.

11. Ngmilekerang a klisichel a Dios a lomekrael er a Paulus?

¹¹ A chedaol el klisichel a Dios a ngilsuir a Paulus el mo mengedecheduch e dirrek el ulekebai er ngii me lak lebo er a bebil er a basio. Me sera lomuchel er a urerel er a klemissionari, e a Paulus a mlukrael er a klisichel a Dios. (Rellir 13:2; monguiu er a Rellir 16:6-10.) Me a Jehovah a melemolem el omekrael er a ureor er a berkel a klumech er chelechang el oeak a chedaol el klisichel. Me nguai a Paulus, e a rokui el bekongesenges el mesiungel a Jehovah a melasem el omerk er a klemerang el oba blekeu me a blakerreng. Me alta e a rolel a Dios a lousbech er a klisichel el omekrael er kid a kuk ngodech er sel rolel er a lomekrael er a Paulus, engdi ngsebechel el mo ulterekokl a rengud el kmo a Jehovah a ousbech er a chedaol el klisichel el osiik er a remelemalt a rengrir el chad el mo medengelii a klemerang.​—Johanes 6:44.

“Ma Ureor a Ngarngii a Bek el Blekeradel”

12-14. A klisichel a Dios ngomekrael er a remesiungel el oeak a osisiu el rolel? Mosaod.

¹² A chisel a klengeltengat er a Jehovah el mo er a ongdibel er a rengellitel er a kot el dart el rak,  ngsebechel el melisiich er a remesiungel a Dios er chelechang? Ngulterekokl el uaisei! Ka momtab a mlukrael el tekingel a Paulus el mo er a ongdibel er a Korinth el kirel aike el mengasireng el sengk er a klisichel a Dios er a taem er ngii el kmo: “A ngat ra grazia ngarngii a bek el blekeradel, e a [klisiich] a di osisiu; chomesiou a ngarngii a bek el blekeradel, e a Rubak a di osisiu; ma ureor a ngarngii a bek el blekeradel, e a Dios el oureor el meruul a rokuil tekoi ra chelsir ar bek el chad a di osisiu.” (1 Korinth 12:4-6, 11) Nguaisei, a chedaol el klisiich a sebechel el omekrael el ngar er a kakerous el rolel, el mo er a rekakerous el mesiungel a Dios el mo oltaut er a moktek er Ngii. Me a “kekerel delebechel” me a ‘ngodech el sib’ a di dul ngmai a ulekrael er a chedaol el klisichel a Dios. (Lukas 12:32; Johanes 10:16) Nguaisei, engdi ngdiak el blechoel el osisiu a ulekrael er a chedaol el klisiich el mo er a derta el chedal a ongdibel.

¹³ El uai tiang, a remechuodel a meltutk el okiu a chedaol el klisichel a Dios. (Rellir 20:28) Engdi ngdiak el rokui el ngellitel a mesiou el mechuodel er a chelsel a ongdibel. Me ngngera sebeched el melekoi el kirel tiang? A chedaol el klisichel a Dios a omekrael er a rechedal a ongdibel el oeak a kakerous el rolel.

¹⁴ Sel klisiich el rulleterir a rengellitel el mo ulterekokl a rengrir el kmo a Dios a mla rodelterir el mo ngelekel, a osisiu el uai sel klisiich el luluusbech er ngii a Jehovah el olekiis er a Jesus el mo er a klengar el ngar er a eanged. (Monguiu er a Rom 8:11, 15.) Tiang a sel osisiu el klisiich el Jehovah a uluusbech er ngii el omeob er a eanged me a chutem. (Genesis 1:1-3) Me ngoeak tia el osisiu el klisiich, e a Jehovah a ulemekngerachel er a Besalel el kirel a ileakl el ureor er a tento el templo, e silsichii a Samson el mo meruul a meklou el ureor, e rirellii a Petrus el mo sebechel el merael er bebul a ralm. Me a demukrael er a klisichel a Dios a diak el losisiu a belkul er sel tekoi el mucheluch el oba chedaol el klisichel a Dios. A demucheluch el oba chedaol el klisichel a Dios a ta er a ileakl el rolel a loureor tia el klisiich. E a Dios a ngike el melilt er tirke el bo lomecheluch er tir el oba chedaol el klisichel.

15. Tia el techolb el okiu a chedaol el klisichel a Dios ngmo melemolem el diak a ulebengelel? Mosaod.

¹⁵ Sel oureor el klisichel a Dios a mle blechoel el omekrael er a reblak a rengrir el mesiungel el oeak a kakerous el rolel. Ngulemekrael er tir er a betok el telael el rak er a uchei er a lomuchel a Dios el omecheluch er a rechad. E sera Pentekost er a rak er a 33, e ngulemuchel tia el tekoi el Dios a omecheluch er a rechad el oba chedaol el klisichel, e tiang a ngar er ngii a ulebengelel. Me alta e tia el omecheluch er a rechad me a lechub a techolb el okiu a chedaol el klisichel a Dios a mo diak, engdi tia el klisichel a Dios a mo melemolem el omekrael er a rechedal el olengeseu er tir el mo oltaut er a soal el mo cherechar.

16. Ngera te meruul er ngii a remesiungel a Dios er chelechang el oeak a chedaol el klisichel?

¹⁶ Ngera el tekoi a meketmeklang el ngar tia el chutem el oeak a chedaol el klisichel a Jehovah? A Chocholt 22:17 a onger el kmo: “Ma [chedaol el klisiich] ma Hanayome a dul dmu el kmo, ‘Mei.’ Me tirikel orrenges ldu el kmo, ‘Mei.’ Me tirikel meched a rengrir le mei, me tirkel sorir a ralm ra klengar le me lolai el diak locheraol.” Me ngoeak a ngelsuil tia el klisichel a Dios, e a Rekristiano er chelechang a mengemedaol er “tirkel sorir” el mei me lolai a ralm er a klengar. A rengellitel el Kristiano a ngar medal tia el ureor, e a ngodech el sib a obengterir el mengemedaol er a rechad. Aika el eru el chelechad a oureor el obengkel tiakid el osisiu el klisichel a Dios el meruul er tia el ureor. Aika el eru el chelechad a tilib a rengrir el mo er a Jehovah e mlo metecholb “loba ngklel a Chedam, ma Ngalek, ma [chedaol el klisiich].” (Matteus 28:19) E tir el rokui a kongei er a chedaol el klisichel a Dios me lomekrael er a klengar er tir, el ngosuterir el omekdubech er a rdechel tia el klisiich e lolecholt er ngii. (Galatia 5:22, 23) Ngdi ua rengellitel, e a ngodech el sib a mecherei tia el klisichel a Dios me lengesuterir el meruul aike el sebechir, el mo rodemii sel longerechir er ngii a Jehovah el kirel a cheledaol el blekeradel.​—2 Korinth 7:1; Chocholt 7:9, 14.

Molemolem el Olengit er a Chedaol el Klisichel a Dios

17. Ngmekerang a dochotii el kmo kede oba chedaol el klisichel a Dios?

¹⁷ Me a omoba omelatk er a diak a ulebengelel el klengar el ngar er a eanged me a lechub el ngar er tia el chutem, e a Jehovah a sebechel el meskau  “sel diak le metuk el klisiich,” me bo el sebechem el melemolem er a blakerreng er kau e bo mnguu a omeksullem. (2 Korinth 4:7) Me a omolemolem el omerk er a ungil el chais el kirel a Renged e ngsebechel el mo uchul a omelenguul el kirem. Engdi lak mobes er tia el tekoi el kmo “kom ngeltengat cho motuub el kirel a ngklel a Kristus, le isei e a [chedaol el klisichel me a klebkellel a] Dios a mo kiei er kemiu.”​—1 Petrus 4:14.

18, 19. Ngmekerang a Jehovah a lengesukid el okiu a chedaol el klisichel, e ngera ke mla oterekeklii el mo rullii el kirel tia el tekoi?

¹⁸ A chedaol el klisiich a sel diak locheraol el sengk er a Dios el mo er tirke el mera el osiik er ngii. Ngsebechel el melisiich aike el duch er kid me sel urunguled el soad el meruul aike el sebeched el ngar er a omesiunged el mo er a Dios. “Le Dios choureor ra chelsiu lolekiis a urrunguliu e oltaut, le tiakid a ungilbesul ra Dios.” Tia el mekreos el sengk er a chedaol el klisichel a Dios, el obengkel a blakerreng er kid el “misisiich loreked a Tekoi ra klengar,” a ngosukid el “moba dakt ma britel el mo blak a reng[ud] el churrengelii chosobel[ed].”​—Filipi 2:12, 13, 16.

¹⁹ Me a bo demui el oumerang er a chedaol el klisichel a Dios, e ngkirel el mo blak a rengud el oltaut a ngerecheled, e mo ungil el kutmokl aike el kired el meruul, e dirrek el omes el bedul a Jehovah el kirel a ngeso. (Jakobus 1:5) Ngmo meskau sel mousbech er ngii el mo medengelii a Tekingel, e outekangel a mondai er a klechad, e omerk er a klumech er a ungil el chais. “Molengit, me le beskemiu; e mosiik, mo betik, e molngod ra chesimer, me lobkais el kiriu,” e tiang a uldimukl er a ongit el kirel a chedaol el klisichel a Dios. (Lukas 11:9, 13) Nguaisei, me dolemolem el olengit er a Jehovah me bo el sebeched el mo uai tirke el blak a rengrir el chad er a irechar me a dirrek el chelecha el taem, el tir a mlukrael er a chedaol el klisichel a Dios.

Ngsebechem el Mesaod?

• Ngoeak a ngera el rolel e ngsebeched el oukerebai er a Maria el mo uchul a klengeltengat?

• Ngoeak a ngera el rolel e a klisichel a Dios a ulemekrael er a Paulus?

• Te mekerang a remesiungel a Dios a lemukrael er a klisichel a Dios er chelechang?

[Aike el Ker er a Suobel]

[Siasing el ngar er a 26 el llel]

A klisichel a Dios a ngilsuir a Paulus el mo bekeu el mengedecheduch er a chad er a olai

[Siasing el ngar er a 28 el llel]

Chelecha el taem, e a chedaol el klisiich a olengeseu er a Rekristiano el olab a kakerous el omelatk