Ngike el Berrotel el Merreder er a Beluulechad a Chemotang

NGMLA er ngii a ta el taem el Jesus a millekoi er a rechad el kmo, ngmo “modik a merreder er tial belulechad.” E a uriul e ngliluut el melekoi el kmo a merreder er tia el beluulechad a “diak a klisichel er ngak” e dirrek el “mla mukerrekeriil.” (Johanes 12:31; 14:30; 16:11) Me a Jesus ngmillekoi el kirel techang?

Sel domtab a tekingel a Jesus el kirel a “merreder er tial belulechad,” e ngkmal bleketakl el kmo ngdimlak lolekoi el kirel a Demal, el Jehovah el Dios. Me a leuaisei e ngtecha ngika el “merreder er tial belulechad”? E mekerang a bo le “modik,” e oeak a ngera el rolel e ngmla “mukerrekeriil”?

A “Merreder er Tial Belulechad” a Di Ngii el Ochotii

A omerellel a Diabelong er sera longarm er a Jesus el Ngelekel a Dios, e ngulechotii a kldidiul a rengul el di ua omerellir a remekngit el chad el kmal sorir el olecholt el kmo te olab a klisiich. A uriul er a lolecholt a “rokuil renged” er tia el beluulechad ngii el Satan, e ngdilu er a Jesus el kmo: “Ak mo meskau a klisichel chomerreder era ika el rokui ma klebkellel; le ngmla moterekokl er ngak, ma kmsa ngikel soak. Misei e a lsekum ke mo outubuach er medak, e a ikal rokui a mo kloklem.”​—Lukas 4:5-7.

A lsekum a Diabelong a di okesiu el klengit el ua lomdasu a rebebil, e ngmekerang e sebechel el mo mesaod a belkul sel omengesuseu? A Jesus ngua di lemilekesuseu er a mekngit el uldasu me a lechub e ngdilubech a mekngit el uldesuel er a uriul er a lemetecholb? Me a lsekum e ngmlo uaisei, e ngmekerang e sebechel a bades el melekoi el kmo ng “diak a klengit er ngii”? (1 Johanes 3:5) A Jesus a dimlak longemikr er a klisichel a diabelong el sebechel mengesuseu er a klechad, e ngbai ulemeketakl er tia el tekoi er a losaod el kirel a Diabelong el kmo ngii a “merreder er tial belulechad,” e dirrek el milsaod er ngii el kmo ‘ngomekoad rar chad’ e dirrek el ‘bulak.’​—Johanes 14:30; 8:44.

Ngar er a bekord el 60 el rak er a uriul er a longarm er a Jesus a Diabelong, e a apostol el Johanes a ulemeklatk er a Rekristiano el kirel a mesisiich el omengesuseu er a Diabelong er a ledu el kmo “a belulechad el rokir a chederdall er ngikel mekngit.” Ngdirrek el dilu el kmo ngkaikid ngike el “mengeuid ra belulechad el rokir.” (1 Johanes 5:19; Chocholt 12:9) Me ngkmal bleketakl el kmo a Biblia a mesaod el kirel a diak lemoues el mekngit el anghel el ngii a “merreder er tial belulechad.” Engdi ngua ngera klungel a klisichel a omengesuseu er ngii el kirel a klechad?

A Merreder er Tia el Beluulechad a Omesterir a Klisiich er a Rechedal

Sera loluches el kirir a Rekristiano el oumekemad el kirel a klaumerang, e a apostol el Paulus a mle bleketakl a omesodel el kirir tirke el kot el mekngit el cherrouir. Ngdilu el kmo, “Kid a diak doumekemad ra tech ma rasech, kede bai oumekemad er chomengedereder, ma klisiich, ma merreder ra ilkolk er tial belulechad, ma ikel ngara ikel beluu ra eanged el mekngit el [anghel].” (Efesus 6:12) Me tia el mekemad a kmal klou el diak di el mekemad el kirel a klechad me a lechub el kirel a “tech ma rasech,” e ngdirrek el mekemad el kirir a ‘remekngit el [anghel].’

Ngoeak a betok el oidel a Biblia, e ngmesaod er tirka el “mekngit el [anghel]” el kmo ngdiak di lokesiu el klengit, e te bai mera el mesisiich e mekngit el anghel. Me ngkmal bleketakl el kmo a Diabelong a melisiich er a klisichel el okiu a rebebil er a rumtok el anghel, el tir a “chiloit a delengcheklir” er a eanged.​—Judas 6.

A ulaoch el ngar er a babier er a Daniel a mesaod er sel rolel a lomtebechel er tia el beluulechad er a irechar el mei er chelechang tirka el ‘merreder ra belulechad.’ Ngii el Daniel a kmal mle suebek a rengul er a rekldemel el chad er a Judea er sera letobed er a klsibai er a Ekipten er a 537 er a uchei er a taem er kid e lluut el mo remei er a belurir er a Jerusalem, me ngmilluluuch el kirir el edei el sandei. Me a ta er a anghel, el Dios a uldureklii el mo mengelaod er a Daniel, a uluuchais er ngii er sel uchul me ngmlo  meoud. Ngdilu el kmo: “A klekar el anghel er a renged er a Persia a ulemtok er ngak el lluich ma tal sils.”​—Daniel 10:2, 13.

Me ngtecha ngika el ‘klekar er a Persia’? Ngbleketakl el kmo ngdimlak losaod er a King er a beluu er a Persia el Cyrus el ngii a ulemekerreu er a Daniel me a rechedal er sel taem. Me a lmuut el tang, ngmekerang e sebechel a king el ngii a di chad el omtok er a anghel el edei el sandei, a lsekum ngmle sebechel a di ta el anghel el mekodeterir a 185,000 el mesisiich el soldau er a chelsel a di ta el kesus? (Isaia 37:36) Ngika el mekngit el ‘klekar ra Persia’ a ulterekokl el ta er a remekngit el anghel er a Diabelong, el ngii a ngar er ngii a klisichel el mengedereder er a Rengedel a Persia. Me a uriul, e ngika el anghel er a Dios a milsaod el kmo nglmuut el mo oumekemad er ngike el ‘klekar ra Persia’ me a lmuut el ta er a mekngit el anghel, el ngii a “mengkerengel a Gris.”​—Daniel 10:20.

Me ngngera el klubeled a sebeched el nguu er tia el tekoi? Ngkmal bleketakl el kmo te ngar er ngii a rediak lemoues el ‘merreder ra belulechad,’ el tir a mekngit el anghel el mengedereder er a beluulechad el ngar er a cheungel a omengederederel a merredelir, el Satan el Diabelong. Engdi ngngerang a moktek er tir er a uchelel el me lmuut er chelechang?

A Merreder er Tia el Beluulechad a Ochotii a Mera el Blekerdelel

Ngar sel ulebongel el babier er a Biblia el Chocholt, e a apostol el Johanes a milsaod er sel rolel e a Jesus el ngii a Mikael el bderrir a rechanghel, a mo mesisiich er a Diabelong me a rechedal, e dirrek el ouchais el kirel aike el mekngit el tekoi el mo duubech e le te mlodik er a eanged. Ngmelekoi el kmo: “Ngdi kom chebuul, kaul chutem ma daob, ele diabelong a mocha medengei el kmo ngkekedeb a taem er ngii, me ngoba meringel cheldechuderreng lechika er kemiu!”​—Chocholt 12:9, 12.

Ngoeak a ngera el rolel e a Diabelong a ochotii a klou el ngesechel a rengul? Ngdi uai tirke el betok el kesib a rengrir el mekngit el chad el sorir el melisiich er a tekoi el ‘mengedereder me a lechub e ngmelemall,’ a Diabelong me a remekngit el anghel er ngii a kltmokl el sorir el melemall er tia el beluulechad me tirke el rokui el chad el ngar er a chelsel. Ngungil el medengei el kmo ngkmal di kedeb a temel, me ngousbech a tekoi el ua meklou el siobai, el mo mengesuseu er a rechad el mo sorir a el omechar a betok el klalo, el ngii a mo uchul a telemellel a chetemel me a debel me a dirrek el eltel tia el beluulechad el ngii a sebechel el mo uchul a telemellel a klengar er a rechad.​—Chocholt 11:18; 18:11-​17.

Ngar er a uchelel a reksi er a klechad, e sel ngelbesel a rengul a Diabelong el soal el mo mengedereder a kmal bleketakl el lolisiich er ngii a tekoi er a balatiks me a dirrek el klechelid. A babier er a Chocholt a omekesiu er a klisichel a tekoi er a balatiks el ua tebelik el charm el Diabelong a mla msang a “kloul klisichel chomerreder.” Ngdirrek el mesaod el kirel aike el mekikiongel el omeruul el lolisiich a deleuill er a tekoi er a balatiks me a klechelid el kmo te dmak el meruul a tekoi er a deleboes. (Chocholt 13:2; 17:1, 2) Ka di molatk aike el betok el mekngit el omeruul el ngibeserreng, rechorecherreng, mekemad me a klekakiakl er a rechad el ngii a mla meketmokl er a chelsel aika mereko el betok el rak el uchul me a rebetok el miliol el chad a mlad. Ngsebechel a ta el melemalt a rengul el chad el kongei el kmo aika el mekngit e kdekudel el omeruul el mla meketmokl er a chelsel a reksi a di telengtengil a klengar er a klechad? Me a lechub e ngtelemellel a omengesuseu er tirke el diak lemoues el mekngit el anghel?

A Biblia a kmal bleketakl el dongchii e ochotii ngike el mengeuid er a rechad el mengedereder e dirrek el uchul a klisiich er tia el beluulechad. A blekerdelel a klechad a lodengei me a lak, me ngii a di mo mocholt el okiu a merrederel me sel rolel el kmo ‘ngmengedereder me a lechub e ngmelemall.’ Me a ker a kmo, ngmo uangerang a klteketel el lechuarm a klechad er cheungel a omengederederel a Diabelong?

Temel a Ulebongel el Okngemedel a Diabelong

Ngar er a omesiungel a Kristus er tia el chutem er a kot el dart el rak e ngmileketeklii el kmo a Diabelong me a remekngit el anghel er ngii a di kmedu el mo nguemed. Tirke el disaiplo er a Jesus er a louchais er ngii er sel rolel er a loldik er a remekngit el anghel, e a Jesus a dilu er tir el kmo: “Ak milsa Satan ra lrebet ra eanged el ua bisebusech.” (Lukas 10:18) Me ngoeak aika el tekingel a Jesus, e ngulechotii el  kmo nguleldeu er a rengul e le ngmle medengei el kmo a ngar er a medad el klebesei e ngmo kats er ngika el merreder er a chutem, e mo nguu a ngarbab el kingellel sel luuturiul er ngii el mo er a eanged el Mihael el bderrir a rechanghel. (Chocholt 12:7-9) A omerriter er aika el ulaoch er a Biblia a meketeklii el kmo tia el klisiich a mileketmokl er a eanged er a rak er a 1914 me a lechub e ngtelkib el taem er a uriul. *

Sel taem el me lmuut er chelechang e a Diabelong a ungil el medengei el kmo ngkmal di kedeb a temel. Me alta e a “belulechad el rokir a chederdall er ngikel mekngit,” engdi a rebetok el miliol el chad er chelechang a dirkak lemekesuseu er a chelebeldil el soal el melasem el mo mengedereder er tir. A Biblia a mla omok a mederir el mo sebechir el ungil el dmangch aike el mera el mekngit el omerellel me a blulekngel. (2 Korinth 2:11) Te bai oba omelatk el ngar er a tekingel a Paulus el mo er a rekldemel el Kristiano el kmo: “A Dios ra budech a dimereched el roderdii a Satan er cheungel chochemiu el mridii.” *​—Rom 16:20.

Ngdi kmedung a temel a ulebongel el okngemedel a Diabelong! Ngar er cheungel a omengederederel a betik a rengul el Kristus, e a remelemalt a mo oureor el kutmeklii tia el okesiu el blil a ochil a Dios el ngii a chutem, el mo paradis. A uldikel, kltui, me a rechorecherreng a mo nguemed el diak a ulebengelel. A Biblia a kmo, “A ikel dilubech el tekoi er a ngar a mong a kmal di mo diak a melatk.” (Isaia 65:17) Ngmera el mo uchul a ulengull el mo er a rokui el chad el tir a mo mengubet el mo diak el chederedall er ngike el berrotel el merreder er tia el beluulechad me a rokui el omengederederel!

[Aike el Footnote]

[Blurb el ngar er a 9 el llel]

Ngar er cheungel a omengederederel a betik a rengul el Kristus, e a remelemalt el chad a mo kutmeklii tia el chutem el mo paradis