Ngkirir a Rengalek el Mesuub el Kirel a Dios?

“A klechelid a di sebechel el osisecheklid el mo meduch el ouketui, e diak el sebechel el osisecheklid el mo kaubltikerreng.”​—JONATHAN SWIFT, ENGLISH AUTHOR.

NGIKA el chad el Swift a dillii tia el tekoi er a 18 el dart el rak er a uchei, engdi chelecha el taem e a rebetok a kongei er tia el uldesuel. Me a rebetok el chad a oumerang el kmo a ruungalek a diak el kirir el olisechakl er a rengelekir el kirel a Dios. Te omdasu el kmo a rengalek el mukeroul er a delengchokl el ngar er ngii a klechelid er tir a mekngit a ulekurulir.

Ngera uldesuem? Ngngera er aika el tekoi a klemerang?

● A ruungalek a diak el kirir el olisechakl er a rengelekir el kirel a Dios.

● A ruungalek a kirir el mengiil er a rengelekir el mo meklou e mo mesaod a tekoi er a klechelid el mo er tir.

● Sel dirk el mekekerei, e ngkirir a ruungalek el mekeroul a klaumerang er tir el kirel a Dios el mo er a rengelekir. Engdi sel bo lemeklou el chad e ngmocha kirir a ruungalek el melisiich er tir el mo di tir el melilt a tekoi el sorir el meruul.

● A rengalek a lechetirir me a lsorir me tir a di kirir el oltirakl aike el klaumerang er a rechad er a blirir.

A Klechelid Ngmelemall er a Rengalek?

Ngdiak a ta el chad el kerekikl el oungalek el soal el melemall er a ngalek. Engdi aike el tekoi el mla medung ngmelisiich er tirke el chad el mengemikr er a techellir a rengalek me lak losuub el kirel a Dios? Ngmla mo betok el rak el rechad a mesuub el kirel a blekeradel el sebechel el mo duubech el mo er a rengalek el klaumerang er a redemerir me a rederrir a uchul. Me tia el omesuub, ngera ngmla tirterii el kirel tia el tekoi?

Tirke el mesuub e merriter a uldasu a mla metik el kmo a omelisiich el mo er a rengalek el kirel a tekoi er a klechelid a sebechel el mo uchul a klungiolel me a dirrek el ungil el okurulel a ngalek. Ngar er a report er a rak er a 2008, el lurruul er ngii a Social Science Research * e ngmelekoi el kmo: “A omesubel a klechelid a kmal sebechel el mekurulii e okesengii a deleuill er a ngalek el obengkel a delal me a demal.” Tia el chais a dirrek el kmo: “A tekoi er a klechelid me a okurulel a tekingel a Dios a mla obeketakl el kmal klou a lerellii er a klengar er a rebetok el ngalek, e dirrek el klou a ultutelel el kirel a deleuill er a ruungalek me a rengelekir.” Ngsebeched el mesang a osisiu el tekoi er a tekingel a Jesus el kmo: “Te ngeltengat a re medengei el kmo te chebuul a lak lousbech er a Dios.”​—Matteus 5:3.

E kuk ua ngerang sel uldasu el kmo a rengalek a kirir el mukeroul el mo meklou e mochu mesuub el kirel a Dios me a tekoi er a klechelid? Tia el uldasu a mengemikr er a klemerang el tekoi el kmo: A uldesuel a ngalek a di ua bechachau el baket el di mengiil a ralm el mo omekeek er ngii. Me a ruungalek a ngar ngii a llemeltir el melilt el kmo te mo omekeek er tia el “baket” er a chelsel a blai el ousbech a tekoi er a kldung me a klaumerang el kirel a ungil me a melemalt me a lechub e te mecherei a mesisiich el uldasu er a ikrel a delengchokl me ngmo omekeek er a uldesuir me a rengrir a rengelekir.

Ngera tia el Berrotel el Tekoi?

Ngoeak a reksi e ngmla meketeklii el kmo a rechad a ngar ngii a blekerdelir el sebechir el ousbech a tekoi er a klechelid el melisiich a uldasu el mo meduch el mengetukel e dirrek el ouketui er a rechad. Me ngmekerang e mo sebechir a ruungalek el mengeroid er tir er aike el tekoi el losaod a Jonathan Swift? Te mekerang e mo sebechir el osisecheklterir a rengelekir el mo oumerang er a Dios, e dirrek el ngosuterir el mo meduch el oubltikerreng el mo er a rebebil?

Tia el berrotel el tekoi a sebeched el metik er ngii el okiu a nger er aika el edei el ker el kmo: (1) Ngera el tekoi a kirir a rengalek el mesuub el kirel? (2) Ngtechang a kirel el olisechakl er tir? (3) E ngera el rolel a osisechakl a kmal ungil?

[Footnote]