Ngtechang a Jesus Kristus?

“Ma Jesus er sera bocha lsiseb ra Jerusalem e a mats el rokir a ngilkokl el mo ngemuu el kmo, ‘Ngtecha ngikang?’ Ma seked a dilu el kmo, ‘Ngikang a Jesus el profet el dilum ra Nazareth ra Galilea.’ ”​—MATTEUS 21:10, 11.

NGERA uchul me a Jesus Kristus * er sera bocha el siseb er a Jerusalem er a rak er a 33 er a taem er kid e ngkmal mlo klou a nglemuu er a beluu? Te betok el chad er a chelsel a mats a mla remenges a chisel a Jesus me aike el meklou el tekoi el bla el rruul. Me te melemolem el ouchais er a rebebil el kirel. (Johanes 12:17-​19) Tia el seked a dimlak lolechesuar el kmo ngika el chad el ngar er a delongelir a mo klou a bo el rellii el kirir a rechad er seikid el taem el me lmuut er chelecha el taem er kid!

Momtab a bebil el olechotel a klisichel a omerellel a Jesus el mla er ngii a lerellii er a reksi er a klechad.

▪ A kalender el lousbech er ngii a betok el beluu er a beluulechad a mengai a uchetemel er sel rak el oumesingd el chad a omdasu el kmo ngsel rak el lemlechell er ngii a Jesus.

▪ A eru el biliol el chad, el tir a bekord el edei tiud er a ildisir a rechad er a beluulechad, a melekoi el kmo te Kristiano.

▪ A rechedal sel klechelid er a Islam, el kuk betok er a ta el biliol a ildisir el meliuekl er a beluulechad, a olisechakl el kmo a Jesus a “kuk ngarbab el profet er a Abraham me a Noah me a dirrek el Moses.”

▪ A betok el omelekoi el lullekoi a Jesus a lousbech a rechad sel longedecheduch er a bek el sils. Aikaikid a bebil er ngii:

“Mnguu sel bita er chotengem el bedul ngii.”​—MATTEUS 5:39.

‘Mobengkel el remolii cherul mael.’​—MATTEUS 5:41.

‘Ngdiak a chad el sebechel el siungeterir ar terul rubak.’​—MATTEUS 6:24.

‘Kele mnguu a ngisel a chesiuch el mideklii ra babii.’​—MATTEUS 7:6.

“Misei e a ikel ngiidi le ngerang el somiu a lruul ar chad lekor kemiu, dilerrek el moruul el uaisei el morar chad.”​—MATTEUS 7:12.

‘Momekbuk a cheral.’​—LUKAS 14:28.

A omerellel a Jesus a mla er ngii a klou el lerellii el kirel a reksi er a klechad. Me nguaisei, engdi a rechad a olab a betok el uldasu el kirel a Jesus e dirrek el oumerang a kakerous el tekoi el kirel. Me ke locha mo oker el kmo, ‘Ngtechang a Jesus Kristus?’ Ngdi ta el Biblia a sebechel el ouchais er kid el kmo a Jesus ngmla er ker el mei, e mle ua ngerang a blekerdelel a klengar er ngii, e ngera uchul me ngmlad. Me a bo dodengei aika el klemerang el tekoi el kirel, e ngsebechel el ngar er ngii a klou el lerellii er a klengar er kid er a chelechang me a dirrek el ngar medad el klebesei.

[Footnote]