Te Rua Techang a Omerk er a Ungil el Chais?

“ . . . a mo oberk ra belulechad el rokir.”​—MATTEUS 24:14.

TIA el ungil el chais er a Rengedel a Dios a oberkang er a beluulechad el rokir el loruul er ngii a Resioning er a Jehovah. Te meruul er tia el ureor el okiu a betok el kakerous el rolel. E a ta er ngii el rolel a meketmokl el okiu a . . .

Longedecheduch er a Rechad. A Resioning er a Jehovah a merael el omerk er a ungil el chais el mo er a rechad el di ua lurruul er ngii a Jesus me a redisaiplo er ngii. (Lukas 8:1; 10:1) Ngdiak di lekiei e longiil er a rechad el me osiik er tir. Me tia el ureor el omerk er a klumech el kirel a Rengedel a Dios a loruul er ngii a rokui el Sioning er a Jehovah, el ildisir a mla engelakl er a euid el miliol. Te merael el mo er a bek el obliil me a rael e dirrek el ousbech a dengua me a lmuut el bebil er a rolel, me bo el sebechir el merkii tia el ungil el chais el mo er a rokui el chad. Tia el mlo merek el rak, e a Resioning er a Jehovah a chiloit a kuk betok er a tedobech el biliol el sikang el meruul er tia el ureor er a berkel a ungil el chais.

Tirkang a diak di lolisechakl er a rebebil el kirel a Rengedel a Dios e lemerekong, e te dirrek el ouchais er a rechad el kirel “a ikel rokui el” ledilung a Jesus. (Matteus 28:20) Te dirrek el olisechakl e mesuub a Biblia el diak locheraol el obengterir a rebetok er a eai el miliol el chad.

Me tirka el Sioning a olisechakl er a rechad el meliuekl er a beluulechad er a chelsel a 236 el beluu. Te olisechakl er a rechad el kakerous a blekerdelel a klengar er tir. Te dirrek el olisechakl er a chelsel a mekekerei el beluu me a mats, me a dirrek el mesechesechel a chereomel er a Amazon me a beluu er a Siberia, me a dirrek el cheliliik el beluu er a Africa, me a uchul a Rois er a Himalaya. Tirka el Sioning a ousbech aike el rokui el ngar er ngii er tir me a bek el temir el meruul er tia el ureor el diak el uduudel, e ngbai okiu sel bltkil a rengrir el mo er a Dios me a dirrek el rechad a uchul me te meruul er ngii. Te dirrek el omerk er tia el ungil el chais el okiu a . . .

Llechukl el Babier. Tia el makesin el dai er ngii A Ongkerongel Ouchais er a Rengedel a Jehovah, a motobed el okiu a 185 el kakerous el bedengel a omelekoi, e dirrek el oltobed er ngii el kuk betok er a 42 el miliol el babier er a bek el blsechel. Ngar er ngii a babier el obengkel, el ngii a Awake!, el dirrek el ouchais el kirel a Renged, el motobed el ngar er a 83 el kakerous el bedengel a omelekoi el bekord el 40 el miliol a ildisel er a bek el blsechel.

Ngdirrek el ngar er ngii a babier me a brochure me a tract, me a CD/MP3 el mesaod a osisecheklel a Biblia el ngar er a betok er a 540 el kakerous el omelekoi. Me a Resioning er a Jehovah a mla otobed, e dirrek el mla remous a kuk betok er a 20 el biliol er aika el klalo er a di chelsel aika el mereko el teruich el rak, el ildisel a sebechel a derta el chad el ngar tia el chutem el ousbech a kldei er ngii el klalo.

A Resioning er a Jehovah a dirrek el mla lmuches me a lechub e te mla omuus a betok el kakerous el oidel a Biblia. Te dirrek el mla oidii a Biblia el The New World Translation of the Holy Scriptures me chelechang e ngngar er ngii a cherrungel me a kuk di tedobech el oidel el ngar er a 96 el kakerous el omelekoi. Me ngkuk betok er a 166  el miliol el Biblia a mla merous el mo er a rechad. Me a Resioning er a Jehovah a dirrek el teloi er tia el ureor er a berkel a ungil el chais er a Renged el ngar er . . .

 Aike el Miting er a Rekristiano. Aike el bek el miting el meketmokl er a Kingdom Hall er a bek el sandei, a diak di el kirel a okurulel a tekingel a Dios er a klengar er kid, e ngdirrek el kmal klou el osisechakl el mo er a rokui el chad. Aike el cheldecheduch el motobed a mesaod el kirel a osisechakl el ngar er a Biblia, me a dirrek el omesubel a Biblia el obengkel a omesodel A Ongkerongel me a lmuut el bebil er a babier. Ngdirrek el ngar er aike el miting, e a Resioning er a Jehovah a mesuub el mo ungil, e dirrek el mo meduch el chad el omerk er a ungil el chais.

Me tir el rokui el Sioning er a Jehovah a mesuub a di osisiu el tekoi me a osisechakl el ngar er a chelsel a kuk betok er a 107,000 el blil a ongdibel er tir el meliuekl er a beluulechad, el melisiich er tia el kltarreng er a delongelir. Aika el miting er tir a di nglai a chesmerel el mo er a rechad el semeriar el me orrenges. Ngkmal diak lorrimel er a rechad el mo melenget a udoud. Nguaisei, engdi aika el rokui el tekoi a sebechel el mo diak a ultutelel a lsekum a Resioning er a Jehovah a diak loltirakl a tekoi el lolisechakl el mo er a rechad. Misei a uchul me te blak a rengrir el omerk er a ungil el chais el . . .

Okiu a Ungil el Kerebai er Tir. Te kmal blak a rengrir el olecholt a ungil el kerebai er tir el Kristiano, el okiu sel leblak a rengrir el meruul a ungil el mo er a rebebil, el ua ungil el omeruul el sorir a rechad a bo loruul el mo er tir. (Matteus 7:12) Me tir el diak el mecherrungel a uchul me te mo remuul a cheleuid a lebebil er a taem, engdi te melasem el olecholt er a bliochel el bltikerreng el mo er a rokui el chad el oeak a berkel a ungil el chais, e dirrek el olengeseu er a rebebil er aike el sebechir.

A Resioning er a Jehovah a kmal diak el lolasem el omult er a beluulechad el ousbech a osisecheklir. Te bai meruul er a ureor el mo lmuut er sel bo lungilbesul er a rengul a Jehovah, e sola e ngmochu ulebongel el di ua lulemlaoch a Jesus. Me tiang ngera belkul el kirel tia el beluulechad me a dirrek el rechad el kiei er a chelsel?

[Siasing el ngar er a 7 el llel]

A berkel a ungil el chais er a Renged a lolisechakl er ngii a Resioning er a Jehovah el meliuekl er a beluulechad