Molilt a Tekoi el Ngii a Kobkellii a Dios

“A mellomes a rengul a omes er a le bor ngii.”​—OSISECHAKL 14:15.

1, 2. (a) Ngera sel kot el klou a ultutelel el tekoi el kired el melatk er ngii er a uchei er a dolilt a tekoi el bo doruul? (b) E ngera el ker a bo dosaod?

KID a dirrek el bek el sils el doruul er tia el tekoi. A bebil er ngii a mekekerei el tekoi. E a kuk bebil er ngii a kmal klou a bo el lerellii er a klengar er kid. Aikang ngera el tekoi? Aikang a tekoi el dolilt el mo meruul. A omelilt el doruul el kirel a meklou me a mekekerei el tekoi, a uchul me ngklou a ultutelel el ike el omelilt el doruul a kirel el mo uchul a omengebkall el mo er a Dios.​—Monguiu er a 1 Korinth 10:31.

² Ngbeot me a lechub e ngmeringel er kau el melilt a tekoi el moruul? A lsekum e ngsoad el olengeriakl el mo klou el chad el kirel a omesiunged el Kristiano, e ngkmal kired el mesuub el mo meduch el kutukel a melemalt me a cheleuid me bo el sebeched el ungil el melilt a tekoi el oltirakl a uldesued el diak el uldesuel a ta er a chad. (Rom 12:1, 2; Hebru 5:14) Ngera bebil er a meklou el uchul me ngkired el mo meduch el melilt a tekoi el doruul? Ngera uchul me a lebebil er a taem e ngkmal meringel er kid el meruul er tia el tekoi? E ngera el tekoi a kired el mo kerekikl el melatk er ngii me bo lulterekokl a rengud el kmo a tekoi el dolilt a mo kobkellii a Dios?

Ngera Uchul Me Ngkired el Melilt a Tekoi el Bo Doruul?

3. Ngera uchul me ngdiak el kired el tomellii sel ungil el rolel a omelilt el tekoi el domekeroul er ngii?

³ A lsekum e ngdiak el ulterekokl a omelilt er kid el oltirakl a llechul a Biblia, e tirke el chad el dedak el ngar er a skuul me a ureor a mo omdasu el kmo ngmechitechut a klaumerang er kid me ngbeot er tir el mengesuseu er kid. Te ulterekokl el mo omulak e mengeblad me a lechub e te merechorech me bo el sebechir el mengesuseu er kid el “moltirakl er a re betok el chad” el mo teloi er tir me a lechub e kede mo mesebechakl er tir. (Exodus 23:2) Me nguaisei, engdi a chad el meduch el melilt a tekoi el mo mengebkall er a Dios a kmal diak el medakt me a lechub e lekengei a ngii di el tekoi el sebechel el mo uchul e ngtomellii a mla muksau el oltirakl er a ulekrael er a Biblia el ukltkel.​—Rom 13:5.

4. Ngera uchul me a rebebil a mo sorir el melilt a tekoi el kired?

 ⁴ Ngdiak el rokui el chad el sorir el melilt a tekoi el kired a sorir el melemall er kid. A rungil el sechelid a dirrek el locha mo orrimel er kid el mo meruul a tekoi el oltirakl a sorir. A lsekum kede kiei el ileakl er a rechad er a blid, e a rechedad a ulterekokl el dirrek el blechoel el melatk a tekoi el mo uchul a klungioled, e dirrek el sorir el melasem el melilt a meklou a ultutelel el tekoi el bo dechelebangel er a chelsel a klengar er kid. El ua tekoi er a ukeruul. A Biblia a kmal bleketakl el mengelechel el kmo ngmekngit a dolai a rasech. (Rellir 15:28, 29) A bebil er a rolel a ukeruul a diak el bleketakl a omesodel e dirrek el kirel a derta er kid el ungil el melilt a tekoi el doruul er a uchei er a dekengei me a lechub e dotngeklii a rolel a ukeruul el dolai er ngii.  * A rebetik er a rengud el chedad a ulterekokl el ngar er ngii a mesisiich el uldesuir el kirel aika el tekoi. Me nguaisei, engdi a omelilt el doruul er ngii a kmal di mo ultuil er kid el mla metecholb el Kristiano, e le derta er kid a “di chemur a choberaod, el di telechellir.” (Galatia 6:4, 5) Me sel kot el klou a ultutelel el tekoi el kired el melatk er ngii a sel ungil el ukltked er medal a Dios el diak el mederir a rechad.​—1 Timoteus 1:5.

5. Kede mekerang e kerekikl me ngdiak lebo lemechitechut a klaumerang er kid?

⁵ A mekngit el omelilt er kid a sebechel el mo uchul a klou el tellemall. A disaiplo el Jakobus a milluches el kirel a chad el mekngit a omelilt er ngii el kmo ngii el chad “a teleuadel a rengul, el diak lulterekokl chomerollel.” (Jakobus 1:8) Ngdi ua chad el ngar er a bilas el diak a ongengel el ngar er a meringel el daob, el di omteuitech el mong e mei, el ua longesuseu er ngii a chad el diak el ultebechel a uldesuel me a rengul. Ngulterekokl el kmal mo beot er ngii el mo mechitechut a klaumerang er ngii, e dirrek el mo oltelechakl er a rebebil el kirel a chelebulel! (1 Timoteus 1:19) Me kede mekerang e mo sebeched el oibngid er tia el tekoi? Ngkmal kirel el mo “ulterekokl a kloumera” er kid. (Monguiu er a Kolose 2:6, 7.) E tia el klaumerang er kid a sebechel el meteketek, el oeak sel dosuub el mo meduch el melilt a tekoi el doruul el oltirakl er a klaumerang er kid er a Tekingel a Dios. (2 Timoteus 3:14-​17) Engdi ngngera el tekoi a sebechel el mo uchul e kede mo mekngit el melilt a tekoi el doruul?

A Uchul Me Ngsebechel el Mo Meringel a Omelilt er Kid

6. A dekted, ngera ngrullii el kired?

⁶ A dakt a sebechel el mengitechut a uldesued, ngdekted e le kede medakt el remuul a cheleuid el omelilt, ngdekted e le ngdiak el soad el mo mechitechut er a tekoi el doruul er ngii, me a lechub e ngdekted e le ngdiak el soad el mo ua kebelung el chad er a osengir a rebebil. Kede ungil el medengei aika el rolel a dakt. Ngdiak a chad el soal el meruul a cheleuid el omelilt, el ngii el omelilt a sebechel el mo uchul a telemall me a lechub e ngrullid el mo merur. Me nguaisei, engdi a bltkil a rengud el mo er a Dios me a Tekingel a kmal sebechel el ngosukid el mo bekeu el diak demedakt. El okiu a ngera el rolel? A bltkil a rengud el mora Dios a rullid el mo blechoel el mesuub er a Tekingel me aike el babier el mengai a uchetemel er a Biblia er uchei er a bo dolilt a meklou a ultutelel el tekoi el doruul. Me sel doruul el uaisei, e ngsebechel el mo kesai a cheleuid el tekoi el doruul. E ngera uchul? E le a Biblia a “sebechel rullii a diak a klemedengei er ngii er a tekoi el mor ngii a duch er ngii, e osisecheklterir a re mekekerel chad el mo chedechuul.”​—Osisechakl 1:4.

7. Ngera ngosisecheklid er ngii a kerebil a King el David?

⁷ Kid, ngblechoel el ungil a omelilt el doruul? Ngdiak. Kid el rokui a remuul a cheleuid el tekoi. (Rom 3:23) El uai tiang, a King el David a mle mellomes a rengul e blak a rengul el chad. Engdi ngmlo er ngii a taem e ngmlo mekngit el melilt a tekoi el mlo uchul a chelebuul el mo er ngii me a rebebil er a rechad. (2 Samuel 12:9-​12) Me nguaisei, engdi a David a dimlak el bechei aike el mle cheleuid el omerellel me longitechut er a rolel a omelilt er ngii, e dirrek el dimlak el bechei me bo el uchul el temellii a deleuill er ngii me a Dios. (1 King 15:4, 5) Ngkmal sebechel el mo ungil a omelilt er kid a lsekum kede ua David el dimlak lobes el kmo a Jehovah a ousubes a kngtid e dirrek el obes a cheleuid el omelilt el deriruul. Me a Jehovah a mo melemolem el olengeseu el melisiich er tirke el betik a rengrir e olengesenges er ngii.​—Psalm 51:1-4, 7-​10.

8. Ngera kede suubii er a tekingel a apostol el Paulus el kirel a chebechiil?

⁸ Ngsebeched el kosadel a ringelel a uldesued sel dolilt a tekoi el bo doruul. Ngmekerang a doruul er  tiang? Sel dolatk el kmo a lebebil er a taem e ngngar er ngii a ungil el rolel a doruul er tia el tekoi. Ka di molatk er sel rolel el luluusbech er ngii a apostol el Paulus el kirel a chebechiil. Nguleak a ulekrael e ngmilluches el kmo: “Ma lsekum a chad chomdasu ra blekeradel el kirel a ngelekel el ekebil el kmo ngmetacherbesul ma rekil me ngengeleklang, me ngdikea lsebechel uaisei, e nglomelemii a uldesuel, me ngmo bechiil a ngelekel, e ngdiak le klengit. Ngdi ngikel kmal telbiil ra rengul el sebechel choderderii a uldessuel el diak a chaitituokel er ngii me ngtelbiil ra rengul el diak lomekbuch ra ngelekel lekebil, e ngdi ungil.” (1 Korinth 7:36-38) A Paulus a millekoi er a klemesobil el kmo ngkmal ungil el rolel a klengar, engdi ngdiak el belkul a kmo me ngkmal melemalt el rolel a omelilt el mo er a rebek el chad.

9. Me kid, ngkired el mo kerekikl el melatk a uldesuir a rechad el kirel a tekoi el dolilt el mo meruul? Ka mosaod.

⁹ Me kid, ngkired el mo kerekikl el melatk a uldesuir a rechad el kirel a tekoi el dolilt el mo meruul? Ngsebechel engdi ngngar er ngii a telkelel. Ka di molatk er a tekingel a Paulus el kirel a blengur el kmo ngsebechel a chad el rullii a blengur el mo ua lechedul el longull er ngii. Ngdirrek el mileketeklii el kmo a omelilt el kirel tia el tekoi a diak el mekngit, engdi a lsekum a chad a diak el kerekikl er ngii e ngsebechel el choitechetur a rengul a chad. Me ngngera el tekoi a letilbir a Paulus el mo meruul er ngii? Ngmilluches el kmo: “Misei e a lsekum a kall a melibas er chodam er ngak, engdikea kluut el menga techel a charm el mo cherechar, el kirel me lak le mesibas chodam er ngak.” (1 Korinth 8:4-​13) Ngkmal kired el mo kerekikl a tekoi el dolilt el mo meruul me lak dolibas er a rebebil. Nguaisei, engdi a kot el ngaruchei e ngkmal ungil a dolilt a tekoi el ngii a diak bo letemellii a mekreos el deleuill er kid el obengkel a Jehovah. (Monguiu er a Rom 14:1-4.) Me ngngera el omellach er a Biblia a sebechel el ngosukid el mo melilt a tekoi el mengebkall er a Dios?

Elolem el Bakes el Mo Uchul a Ungil el Omelilt

10, 11. (a) Kede mekerang e sebeched el oibngid me ngdiak el bo lekedidai a rengud el kirel a ngerachel el dobang er a chelsel a telungalek er kid? (b)  Ngera kirir a remechuodel el blechoel el melatk er ngii er a uchei er a lolilt a tekoi el kirel a ongdibel?

¹⁰ Lak bo lekedidai a rengud. A uchei er a omolilt er a tekoi el bo moruul er ngii, e di lekau el oker er kau el kmo, ‘Tia el omelilt el kuruul er ngii, ngngerechelek el meruul er ngii?’ A King el Salomon a milluches el kmo: “A re chad el mekedidai a rengrir a di mereched el mo motuub. Ng bai ungil a le ngariou a rengud.”​—Osisechakl 11:2.

¹¹ A ruungalek el chad a sebechir el mesterir a llemeltir a rengelekir me te melilt a bebil er a tekoi el bo loruul, engdi a rengalek a kirir el medengei el kmo ngdirk ngngar ngii a telkelel a llemeltir el melilt a rokui el tekoi el kirel a klengar er tir. (Kolose 3:20) A rebechiil el redil me a rechedil a ngar er ngii a telkelel a ngerachel el lobang er a chelsel a telungalek er tir, e dirrek el kirir el olengesenges er a deruchellel a chedam er a blai el ngii a bdelul a telungalek. (Osisechakl 1:8; 31:10-​18; Efesus 5:23) Ngdirrek el di osisiu, a rebechiil el sechal me ngkirir el diak lobes el kmo a llemeltir el mengedereder a ngar er ngii a telkelel e tir a dirrek el chederedall er a Kristus. (1 Korinth 11:3) A remechuodel er a chelsel a ongdibel a dirrek el melilt a tekoi el ngar er ngii a lerellii el kirel a ongdibel. Engdi tir a kmal kirir el kerekikl el meruul a tekoi ‘el diak lengelakl ra ikel ngara chedaol Llechukl’ el ngii a Tekingel a Dios. (1 Korinth 4:6) Te dirrek el kerekikl el oltirakl a ulekrael el mei el mla er a blak a rengul el mesiou. (Matteus 24:45-​47) Ngkmal sebeched el oibngid er a ringelel a uldasu me a chelebuul a lsekum e kede melilt a tekoi el okiu a kengei er a dereder el mla mloterekokl el kired el olengesenges er ngii.

12. (a) Ngera me ngkired el merriter a tekoi? (b) Mosaod el kmo ngmekerang a chad a bo lorriter el kirel tia el tekoi?

 ¹² Morriter a tekoi. A Salomon a milluches el kmo: “Ngikel blak a rengul el omdasu a mo betok a ngera er ngii, e ngikel di orreched a di olengesonges a lousbech.” (Osisechakl 21:5) El uai tiang, kau ke melatk el meruul er a siobai er kau? Lak lorreched a rengum. Mongudel aike el rokui el mousbech, e mosiik a ngeso er tirke el medengei a tekoi el kirel tia el siobai, e morriter el kmo ngera el omellach el ngar er a Biblia a mesaod el kirel tia el tekoi. (Osisechakl 20:18) Mketmokl a teblo el babier el kirel aike el soam el mo merriter, el ta er ngii a omoluches aike el klungiolel tia el siobai, e sel tang a omoluches a bebil er a telemall el sebechel el duubech. A uchei er a mngiltii a bo moruul er ngii, e ‘momekbuk a cheral.’ (Lukas 14:28) Molatk el kmo tia el tekoi el moruul er ngii ngera ngmo rullii er kau me a dirrek el deleuill er kau me a Jehovah. Ke ousbech er a klou el taem me a klisiich el mo meruul er tiang. Engdi a omoruul er tiang, e ngmo sebechem el mo ungil el melilt a tekoi me ngdiak el bo el uchul a ringelel a uldasu me a mondai er a uriul.

13. (a) Ngera el omelisiich a debetik er ngii er a Jakobus 1:5? (b) Kede mekerang e mongeseu sel doluluuch el olengit er a llomeserreng?

¹³ Moluluuch el olengit a llomeserreng. Aike el tekoi el dolilt a sebechel el kobkellii a Dios a lsekum kede olengit er ngii me lengesukid el mo ungil a omelilt er kid. A disaiplo el Jakobus a milluches el kmo: “Ma lsekum ngngarngii ra delongeliu a ngesonges a llemesel a rengul, e bo lolengit ra Dios el ngikel ka le mekreos ma ka loungeroel e mesterir a rokuil chad, me le nguu.” (Jakobus 1:5) Ngkmal diak el kired el merur el olengit er a llomeserreng er a Dios me lengesukid el mo melilt a tekoi. (Olisechakl 3:5, 6) E le di lekid el oltirakl er a uldesued e ngsebechel el mengeuid er kid. Me sel doluluuch el olengit a llomeserreng e dorriter a omellach el ngar er a Tekingel a Dios, e kede kongei er a oureor el klisichel me ngolengeseu er kid el merriter aike el mera el uchul e kede meruul er tia el tekoi.​—Hebru 4:12; Monguiu er a Jakobus 1:22-​25.

14. Ngera uchul me ngdiak el kired el mengudel a blachel?

¹⁴ Molilt a tekoi el bo moruul. Ngungil a domuchel el merriter e doluluuch el olengit a llomeserreng er a uchei er a dolilt a tekoi el bo doruul. A mellomes a rengul chad a mengoit a taem el “omes er a le bor ngii.” (Osisechakl 14:15) Me a leuaisei, e ngungil a lak mongudel a blachel. A chad el mengudel a blachel a sebechel el mo betok a omesodel el kirel a uchul me ngdiak loruul a tekoi. (Osisechakl 22:13) A omerellel el mengudel a blachel a mo uchul me ngkongei er a rebebil me te melilt a tekoi el bo loruul.

15, 16. Ngerang a uldimukl er sel doltaut er a tekoi el dolilt er ngii?

¹⁵ Motaut a tekoi el mullilt el mo meruul. A temed me a klisiched el dousbech el mo ngiltii a ungil el tekoi el bo doruul er ngii a sebechel el mo diak a ultutelel a lsekum e ngdiak dotutii e bo el blak a rengud el meruul er ngii. A Salomon a milluches el kmo: “A ngii di le ngerang el bo moruul er ngii, msisichau el rullii.” (Olisechakl 9:10) Ngsebeched el olengeriakl er a tekoi el doruul er ngii a lsekum kede kongei el mo merriter aike el dousbech me bo el sebeched el mera el otaut a telbiled. El uai tiang, a ta er a chad el mla mo oldingel a obliil a melatk el mo teloi er a mui el taem el omesiou. Ngsebechel el mo  otutii tia el telbilel? Ngkmal sebechel a lsekum e ngdiak el bechei a ureor me a omilil me bo el uchul e lak a klisichel me a temel el lousbech el kirel a omesiungel.

¹⁶ Aike el kot el ungil el tekoi el dolilt el mo meruul a diak el blechoel el beot er kid a oltaut. E ngera uchul? E le “belulechad el rokir a chederdall er ngikel mekngit.” (1 Johanes 5:19) Ngkmal kired el oumekemad er tirke el “merreder ra ilkolk er tial belulechad, ma ikel ngara ikel beluu ra eanged el mekngit el [anghel].” (Efesus 6:12) A apostol el Paulus me disaiplo el Judas a ulechotii el kmo tirke el melilt el mo mengebkall er a Dios a mo oumekemad el kirel a klaumerang er tir.​—1 Timoteus 6:12; Judas 3.

17. Ngoeak a rolel a omelilt el doruul, e ngera el tekoi a longerechir er ngii er kid a Jehovah?

¹⁷ Mluut el melatk a tekoi el mullilt el mo meruul e mosmechokl aike el cheleuid. Aike el tekoi el dolilt el mo meruul a diak el blechoel el mo ungil el oltirakl a uldesued. E le “taem ma techall a mor a re bek el chad.” (Olisechakl 9:11) Engdi a Jehovah a mengerechir er kid el mo melemolem el oltaut a bebil er aike el tekoi el dullilt el mo meruul alta kede mo chelebangel a ringel. A chad el melilt el tibir a klengar er ngii el mo er a Jehovah me a lechub e ngrullii a telbilel er a chebechiil a kirel el medengei el kmo aikang a meklou a ultutelel el tekoi. E a Jehovah a kmal mengerechir er kid el mo oltaut aike el tekoi el detilbir el mo meruul. (Monguiu er a Psalm 15:1, 2, 4.) Me nguaisei, engdi a oumesingd er a tekoi el dolilt el mo meruul a diak el sal loberaod. Me a mellomes a rengul el chad a blechoel el ngar er ngii a temel el kuk mo merriter a tekoi el lullib el mo meruul. Ngkmal diak el becherei a kldidiul a rengul me bo luchul e lak losmechokl me a lechub e lolodech a tekoi el lullib el mo meruul. (Osisechakl 16:18) Me a kot el klou a ultutelel el tekoi el lolatk er ngii er a bek el taem a mo melemolem el kiei el mengebkall er a Dios.

Mosisecheklterir a Rebebil el Mo Melilt a Tekoi el Mengebkall er a Dios

18. Te mekerang a ruungalek el chad e osisecheklterir a rengelekir el mo ungil el melilt a tekoi el bo loruul?

¹⁸ A ruungalek el chad a kmal betok a sebechir el remuul el ngosuterir a rengelekir el mo meduch el melilt a tekoi el loruul el mengebkall er a Dios. A ungil el kerebai er kid a sebechel el mo ungil el osisecheklii a ngalek. (Lukas 6:40) Ngkmal ungil el tekoi a lsekum a ruungalek a osisecheklterir a rengelekir er aike el bakes el ngii a sebechel el ngosuterir el mo ungil el melilt a tekoi el bo loruul. Te dirrek el sebechir el mesterir a techellir a rengelekir el mo melilt a tekoi el di kirir, e dirrek el chemat er tir el kirel sel lebo el ungil a tekoi el lurruul er ngii. Engdi kuk mekerang a lsekum e ngdimlak bo lungil a tekoi el lurruul er ngii a ngalek? Ngulterekokl el soal a oungalek el chad el mo mesebechakl er a ngelekel, engdi tiang a diak el bo el uchul a klungiolel a ngalek. El di uai tiang, a oungalek el chad a sebechel el kongei er a ngelekel el mo nguu a license er ngii me bo el sebechel el omekall a mlai. E oleko ngii el ngalek a tomellii a llach er a rael e obals, e ngike el oungalek er ngii a sebechel el kokedir a blsel. Engdi a lsekum a ngalek a kirel el oureor el mengkad er sel blsel, e ngrullii el mo melechesuar a ngerachel el kirel el meruul er ngii.​—Rom 13:4.

19. Ngera el tekoi a kired el osisecheklterir tirke el dosuub a Biblia el obengterir, e mekerang a doruul er tiang?

¹⁹ A Jesus a milengelechel er a redisaiplo er ngii el mo olisechakl er a rebebil. (Matteus 28:20) A ta er a klou a ultutelel el suobel el sebeched el losisecheklterir a rechad el dosuub a Biblia el obengterir a osisecheklterir el mo meduch el melilt a tekoi el bo loruul. Me a bo doruul er tiang, e ngkmal kired el kerekikl me lak dongedereder er tir el kirel a tekoi el lolilt el mo meruul. Nglmuut el kmal klebokel el tekoi sel dosisecheklterir el mo ungil el merriter a omellach er a Biblia me bo el sebechir el oltirakl sel lolasem el melilt a tekoi el bo loruul er a chelsel a klengar er tir. E le ngdiak dobes, “ar derta er kid a kirir el mo mesaod er tir ra Dios.” (Rom 14:12) Me kid el rokui a kmal ngar er ngii a ungil el uchul e ngkired el mo ungil el melilt a tekoi me bo el sebeched el mengebkall er a Dios.

[Footnote]

Ngmekerang a Omonger?

• Ngera uchul me ngkired el mesuub el mo meduch el melilt a tekoi el doruul?

• Ngera sebechel a dekted el rullii er a uldesued, e mekerang e sebeched el mo mesisiich er ngii?

• Ngerang a elolem el tekoi el sebeched el meruul el mo uchul e a omelilt er kid a mo kobkellii a Dios?

[Aike el Ker er a Suobel]

[Baks el ngar er a 18 el llel]

Aike el Tekoi el Doruul el Mo Uchul a Ungil el Omelilt

1 Lak Bo le Kedidai a Rengud

2 Morriter a Tekoi

3 Moluluuch el Olengit a Llomeserreng

4 Molilt a Tekoi el Bo Moruul

5 Motaut a Tekoi el Mullilt el Mo Meruul

6 Mluut el Melatk a Tekoi el Mullilt el Mo Meruul e Mosmechokl Aike el Cheleuid

[Siasing el ngar er a 17 el llel]

A chad el diak el ultebechel a rengul a di ua bilas el diak a ongengel el ngar er a meringel el daob