Kemiu el Sechal, Kom Kongei er a Dereder er a Kristus?

“A bderrir ar bek el sechal a Kristus.”​—1 KORINTH 11:3.

1. Ngera ochotii el kmo a Jehovah a Dios er a budech?

 A CHOCHOLT 4:11 a kmo: “Rubak e Dios er kemam, ikau a redemelel a nguu a klebkall, ma chomengull, ma klisiich, ele kau a mileob a rokuil tekoi, ma rokuil tekoi a ngarngii luleltirakl a uldesuel a rengum e ulebeob.” E le Jehovah el Dios a mileob a rokui el tekoi a uchul me ngrredemelel a Mengedereder er a eanged me a chutem me aike el rokui el bleob el ngar er a chelsel. A Jehovah a “Dios ra diak a ulengesekel, e ngDios ra budech,” el urerel a sebeched el omes el okiu a mla meteketek el dereder er a rechanghel er ngii.​—1 Korinth 14:33; Isaia 6:1-3; Hebru 12:22, 23.

2, 3. (a) Ngtechang a mle kot el blebelel a Jehovah? (b) Ngerang a deruchellel a kot el Ngalek er a deleuill er ngii me a Demal?

² A Dios el Jehovah a diak a uchelel e di mla ngar er ngii er a uchei er a lobeob a rokui el tekoi. Ngike el kot el blebelel a mle reng el okedongall el “Tekoi” e le ngmle Melekingel a Jehovah. Ngoeak ngii el Tekoi, e ngulebeob a rokui. E a uriul e ngmlei er a beluulechad el cherrungel el chad el okedongall el Jesus Kristus.​—Monguiu er a Johanes 1:1-3, 14.

³ Ngerang melekoi a Bades el kirel a deleuill er a Dios me a kot el Ngelekel? A apostol el Paulus a mlukreng el meluches el kmo: “Ngsoak cho bo modengei el kmo, a bderrir ar bek el sechal a Kristus, ma bdelul a redil a sechal, ma bdelul a Kristus a Dios.” (1 Korinth 11:3) A Kristus a ngar a cheungel a dereder er a Demal. Ngklou a ultutelel a blechebechel a dereder me tirke el chederedall er ngii me bo sebechel el meteketek a budech er a delongelir a remellomes a rengrir el blebelel a Dios. Me a Ngalek, el “rokuil tekoi . . . a mlara [ngii] e merruul,” me ngkirel el mo kongei er a dereder er a Dios.​—Kolose 1:16.

4, 5. Ngmle ua ngerang a uldesuel a Jesus el kirel a omengederederel a Jehovah?

⁴ Ngmle ua ngerang a uldesuel a Jesus er a lekengei er a dereder er a Jehovah e lemei er tia el chutem? A Bades a kmo: “A Kristus Jesus el . . . mle teletelel a Dios, e dimlak lomdasu el kmo, ‘Kungreos er ngak me di kua Dios,’ e bai di mle ngii el mechachongii e nguu a teletelel a mesiou, me ngmlo ua teletelel a chad, ma blekerdelel a diak le ngodech ra chad. Ngdi mle ngii loltubokl er ngii, me ngmle bekongesenges el mo lmuut ra kodall, el sel kodall ra [teluo el kerrekar].”​—Filipi 2:5-8.

⁵ A Jesus a mle bekongesenges el mo er a Demal er a chelsel a klengar er ngii. Ngdilu el kmo: “Ngdiak el sebechek el di ngak el meruul a ngerang; . . . ma kuukerrekeriil e ngmelemalt, ele ngdiak kusiik a di uldesuek, ak bai osiik ra rengul ngikel ulderchak.” (Johanes 5:30) Ngdirrek el dilu el kmo: “Ele kdiblechoel meruul a ikel soal [a Demak.]” (Johanes 8:29) Ngar er a ulebongel er a klengar er ngii er tia el chutem e ngmilluluuch el mo er a Demal el kmo: “Ak mla kobkellau ra belulechad, el mla remuul el rukui a ikel bilskak lurreor el kirek el meruul.” (Johanes 17:4) Me ngbleketakl el kmo a Jesus a kilengei el mo chederedall er a cheungel a dereder er a Demal.

Ngklungiolel a Ngalek a Lolengesenges er a Demal

6. A Jesus ngullecholt a ngera el ungil el blekeradel?

⁶ A Jesus a ullecholt a betok el ungil el blekeradel er a lengar er tia el chutem. Uldimukl er ngii el rokui a klou el bltkil a rengul el lulechotii el mo er a Demal. Ngdilu el kmo: “Ngbetik a renguk ra  Chedam.” (Johanes 14:31) Ngdirrek el ulechotii a klou el bltikerreng er ngii el mo er a rechad. (Monguiu er a Matteus 22:35-40.) A Jesus a ullecholt er a delemedemek e mle blechoel el melatk a rengrir a rechad, e dimlak lemeringel a tekingel. Ngdilu el kmo: “Mer ngak, kemiu el rokui el merengela ra ureor el mengol er choberaod el chellungel, me kungellemiu. Ngak a medemedemek e ngariou a renguk, mo mchelngii chongelungel er ngak e mosuub er ngak, e cho bo muaisei e a ulengull a mora reng er kemiu. Chongelungel er ngak a mechelechol, ma telechellek a kebekakl.” (Matteus 11:28-30) A remedemedemek a rengrir el chad el kakerous a rekrir, el ileakl tirke el chad el chuarm a mekngit el omerellir a rebebil, a kmal sebechir el metik a ongelaod er a ungil el blekerdelel a Jesus ma ungil el klemechel.

7, 8. Ngerang dmung a Llach er a Moses el kirel a redil el smecher el merael a rasech er ngii, e mle ua ngerang a omerellel a Jesus el bedul a redil el mle smecher er tia el rakt?

⁷ Ka molatk er a omerellel a Jesus el bedul a redil. Ngar er a reksi, e a rebetok el sechal a mekngit a omerellir el bedul a redil. Tiang a kmal klemerang el kirir a remengeteklel a klechelid er a Israel er a irechar. Me nguaisei, engdi a Jesus a ullecholt a omengull el mo er a redil. E tiang a mlocholt er a omerellel el bedul a redil el mle smecher el 12 el rak el lorael a rasech er ngii. “Me ngkmal mlo chuarm rar betok el toktang, me ngulekngemed a ikel bek el mlarngii er ngii, e dimlak a blkul ngbai mlo mekngit.” Me ngoeak a Llach er a Moses e ngika el redil a diak el klikiid me a ngii di el chad el rutechii a mo diak el klikiid.​—Levitikus 15:19, 25.

⁸ Ngika el redil er a lerenges el kmo a Jesus a omekungil er a resmecher,  e ngmlo teloi er a seked e dilu el kmo: “A di kretechii ku bilel, e ak mo ungil.” Me ngriretechii a Jesus e di mle mereched el mo ungil. A Jesus a mle medengei el kmo ngdimlak el kirel el merutech er a bilel, engdi ngdimlak loungeroel er ngii, ngbai mle ungil a tekingel el mo er ngii. Ngmle sebechel el melechesuar a ringelel a rengul ngika el redil er aika el betok el rak el lsecher me ngkmal uluusbech a ngeso. Me a Jesus a uleba delemedemek el melekoi er ngii el kmo: “Rungalek, a kloumera er kau a ulemekungil er kau; morael el ngara budech, me bo mungil era rekdem.”​—Markus 5:25-34.

9. Ngera mle nger er a Jesus er a lolasem a redisaiplo er ngii el merrob er a rengalek me lak lebo er ngii?

⁹ Ngmo lmuut er a rengalek me ngmle beot er tir el mo er a Jesus. A ta el taem e a rechad a ngilititerir a rengalek el mo er a Jesus, e a redisaiplo a chileklterir, e le te locha ulemdasu el kmo a Jesus a chetil a longesang er ngii a rengalek. Ngdi Jesus a dimlak leuaisei a uldesuel. A Bades a kmo: “Ma Jesus ra lesengei e ngmeltirm a rengul, me ngdilu er tir [el redisaiplo] el kmo, ‘Bechiiteterir ar mekekerel ngalek me le mer ngak, e lako molekebai er tir; ele ngkirir a rengedel a Dios.’” Ngdirrek el “milechulleterir e ulemor a chimal er bebrir, el ulemekngeltengat er tir.” Me ngdimlak di lulleker er a rengalek el me kmeed er ngii, e ngbai uluuetkeu er tir.​—Markus 10:13-16.

10. Ngmilekerang a Jesus e ngmai aike el ungil el blekerdelel a Demal?

¹⁰ Ngmilekerang a Jesus e ngmai aike el ungil el blekeradel el lullecholt er a chelsel klengar er ngii er tia el chutem? A uchei er a lemei er tia el chutem e ngulebengkel a Demal el ngar er a eanged el kemanget el taem me ngmilsuub a blekerdelel a Demal. (Monguiu er a Osisechakl 8:22, 23, 30.) Ngar a eanged e ngmilsang a bltkil a rengul a Demal el mocholt er a omengederederel el mo er a rokui el blebelel me ngmilsuub er ngii. Oleko Jesus a mle medecherecher a rengul e ngdimlak el sebechel el olecholt aike el ungil el blekeradel. Ngkmal mle uchul a deuil a rengul el chederedall er a Demal, e dirrek el kmal mle uchul a deuil a rengul a Jehovah el mo Demal ngika el Ngalek. Sera lengar er a chutem a Jesus, e ngullecholt aike el mengasireng el blekerdelel a Demal. Me kid a dirrek el ngar er ngii a kmal klou el techelled el sebeched el mo chederedall er a Kristus, el ngii a meltutk el mo Mengedereder er a Rengedel a Dios el ngar er a eanged!

Doukerebai a Blekerdelel a Kristus

11. (a) Ngkired el meringel el oureor el mo oukerebai er a techang? (b) Ngera uchul me a resechal er a ongdibel a kmal kirir el mo oukerebai er a Jesus?

¹¹ A rokui el Kristiano el ngar a ongdibel, el ileakl a resechal a kmal kirir el meringel el oureor el oukerebai a blekerdelel a Kristus. El ua lolekoi a Biblia el kmo: “A bderrir ar bek el sechal a Kristus.” El ua Kristus el uluukerebai er a Bdelul, el ngii a mera el Dios, me a Rekristiano el sechal a dirrek el kirir el mo oukerebai er a bderrir, el Kristus. Me a apostol el Paulus er a bo el Kristiano e ngmirruul el uaisei, me ngdilu er a rekldemel el Kristiano el kmo: “Kemiu bo moukerebai er ngak, el ua ingak loukerebai ra Kristus.” (1 Korinth 11:1) Me a apostol el Petrus a dirrek el dilu el kmo: “Kemiu a kmal mlokedong el mo uaisei, ma Kristus el mlukringel el kiriu a milechere kerebai el momakes loltirakl a ultil chochil.” (1 Petrus 2:21) Tia el omeruul el mo oukerebai er a Kristus el ileakl el kirir a resechal a ngar er ngii a kuk ta er a uchul, e le tirkang a ngar er ngii a techellir el mo mechuodel me tirke el olengeseu er a remechuodel. El ua Jesus el mle dmeu a rengul el oukerebai er a Jehovah, me a Rekristiano el sechal a dirrek el kirir el mo dmeu a rengrir el oukerebai er a Kristus me aike el ungil el blekerdelel.

12, 13. Te mekerang a remechuodel a lomekerreu er a delebechel el mloterekokl er tir?

¹² A remechuodel el Kristiano er a chelsel a ongdibel a ngar er ngii a ngerechelir el mo oukerebai er a Kristus. A Petrus a dilu er a remechuodel el kmo: “Bo mongedmokl er sel moterekokl er kemiu el delebechel el sib ra Dios, el kele morimel, e bai di le kemiu el mo uaisei, el diak mongedmokl el kirel a de merur er ngii el klungiaol, e bai le ngara blakerreng, el diak moba klisiich lomengedereder el mor tirikel mloterekokl er kemiu, e bai bo mkerebai ra delebechel.” (1 Petrus 5:1-3) A remechuodel el Kristiano a diak el kirir el mo meringel el mengedereder. Me a  loukerebai er a Kristus, e ngkirir el mo oubltikerreng e melatk a reng, e ngar er a eou rengrir e ungil a omerellir el mo er a delebechel el mloterekokl er tir.

¹³ Tirke el mloterekokl a ngerachel er tir er a chelsel a ongdibel a diak lemecherrungel el chad, me ngkirir el diak lobes er tia el tekoi. (Rom 3:23) Me ngkmal kirir el kongei el mo oukerebai er a Kristus e oltirakl er sel rolel a bltikerreng el lullecholt er ngii. Te kirir el melatk er sel rolel er a Dios me a Kristus a lomekerreu er a rechad e mo oukerebai er tir. A Petrus a dilu el kmo: “E mdul rokui loubail ra ngariourreng, e ‘a Dios chomtok rar kididai a rengrir, e omsterir a grazia ar ngariou a rengrir.’”​—1 Petrus 5:5.

14. A remechuodel te mekerang a lolecholt a omengull el mo er a rebebil?

¹⁴ A remiltutk el sechal er a ongdibel a kirir el olecholt a kot el ungil el blekeradel sel lomekerreu er a delebechel er a Dios. A Rom 12:10 a kmo: “Bo mungil kaubltikerreng loba bltikerreng ra klodam; e bo mkaidesachel el kakull.” A remechuodel me tirke el olengeseu er tir a kirir el olecholt a omengull el mo er a rebebil. El ua rebek el Kristiano, tirka el sechal a diak el kirir el meruul “a ngera loba cheliuongel klaititekangel ma di kirel a ues, e bai moba ngariourreng el dul ousbech el kmo, a chad a ngarbab er ngak.” (Filipi 2:3) Tirke el mloterekokl er tir a ngerachel a kirir el omes er a rebebil el kuk ngar er a bab er tir. A loruul el uaisei e totireklii a uleklatk er a Paulus el kmo: “E kid el misisiich a kired loltour a chelitechut rar diak le misisiich, el diak le kired el di oldeu a di rengud e le merekong; ar derta er kid a kirir lomdasu ra ungilbesul ra ngar bita er tir loldeu a rengrir, el kirel me le meteketek a klungiolir. Le Kristus me ngdirrek el dimlak di loldeu ra rengul.”​—Rom 15:1-3.

‘Mongull er a Rebechemiu el Redil’

15. A rebechiil el sechal ngkirel mo ua ngera omerellir el bedul a rebecherir?

¹⁵ Ka molatk er a uleklatk el le dillii a Petrus el kirir a rebechiil el sechal el kmo: “Me kemiul sechal, dilerrek el muaisei el bo molechesuar a redil el kmo ngkuk mechitechut er kemiu el klekedall, mo mdak el kiei kemiu mar bechemiu el oltirakl ra klemedengei, e mongull er tir.” (1 Petrus 3:7) Me a omengull el mo er a chad a belkul a kmo ngkired el omes er ngii el ua le ngar er a bab er kid. Me a doruul el uaisei, e ngkired el melatk er a rengul a chad me aike el lousbech me aike el soal, e kongei er a uldesuel a lsekum e ngdiak a ngera el letemellii. Tiaikid a kirel el mo omerellel a bechiil el sechal el mo er a bechil.

16. Ngera el omellach a ngar er a Tekingel a Dios el kirir a resechal el mo oltirakl er ngii?

¹⁶ A Petrus a milellach er a rebechiil el sechal el mo mengull er a rebecherir e dilechelii el kmo: “Me lak le metenget a nglunguchiu.” (1 Petrus 3:7) Tiang a kmal meketeklii a osengel a Jehovah el kirel a rolel a bechiil el sechal a lomekerreu er a bechil. Me a lsekum a sechal a diak longull er a bechil e ngsebechel el metenget a nglunguchel. Me nguaisei, a bechiil el redil el mocholt a ua itiang el omeruul el bedul ngii a ulterekokl el mo ungil a blekerdelel.

17. Ngkirel mo ua ngerang a bltkil a rengul a sechal el bedul a bechil?

¹⁷ A Tekingel a Dios a omeklatk er a resechal el mo betik a rengrir er a rebecherir er a ledu el kmo: “Ar sechal el mo betik a rengrir rar becherir el ua le betik a rengrir ra bedengir. . . . Le ngdiak a chad louketui ra di bedengel, te bai omekeroul e omecheliu, el uaia Kristus el uaisei ra eklesia, mada, kemiul sechal, bo le betik a rengmiu rar bechemiu el ua le betik a rengmiu ra di kemiu, me kemiul redil, bo mongull rar bechemiu.” (Efesus 5:28, 29, 33) Ngkirel el mo ua ngerang a bltkil a rengrir a resechal el bedul a rebecherir? A Paulus a milluches el kmo: “Kemiul sechal, bo le betik a rengmiu rar bechemiu, el ua Kristus el mlo betik a rengul ra eklesia, me ngdi mle ngii lodersii  el kirel.” (Efesus 5:25) Nguaisei, a sechal a kirel el kongei el mo tongetengii a klengar er ngii el bedul a bechil, el ua Kristus el mirruul el uaisei el bedul a rebebil. Me a lsekum a Kristiano el bechiil el sechal a omekerreu er a bechil el oba delemedemek e blechoel el melatk er a rengul e kerekikl er ngii e diak el mekngit a uldesuel el kirel, e ngmo beot er a bechil el kongei el chederedall er ngii.

18. Ngera el ngeso a sebechir a rebechiil el sechal el ousbech el meruul a ngerechelir er a chebechiil?

¹⁸ Tia el ngerachel el mloterekokl er a rebechiil el sechal ngkmal meringel el tekoi? Ngkmal diak, e le a Jehovah a diak longerechir aike el medeel er tir. Me a lmuut el tang, a remengull er a Jehovah a ngar er ngii a klou el techellir el nguu a ngeso er sel kot el klou el klisiich er a eanged me a chutem, el ngii a chedaol reng er a Dios. A Jesus a dilu el kmo: “A lsekum kemiu, el mekngit el chad, a uaisei el medengelii a ngma ungil sengk el mesterir ar ngelekiu, e a Chedam ra eanged ngdiak bai lsal mesterir a Chedaol Reng tirikel olengit er ngii?” (Lukas 11:13) Ngoeak a nglunguchir e a rebechiil el sechal a sebechir el olengit er a chedaol reng er a Jehovah me ngolengeseu er tir sel loruul a tekoi el obengterir a rebebil, el uldimukl er a rebecherir.​—Monguiu er a Rellir 5:32.

19. Ngera kede mo mesaod er a ongingil el suobel?

¹⁹ Me nguaisei, ngkmal kirir a resechal el mo mesuub el kmo ngmekerang e mo sebechir el kongei el mo chederedall er a Kristus e mo oukerebai er ngii. E kuk ua ngerang el kirir a redil, el ileakl a rebechiil el redil? Ngar er a ongingil el suobel e kede mo mesaod el kmo ngkirel mo ua ngerang a osengir el kirel a tekoi el bla leketmokl a Jehovah.

Ke Dirk Melatk?

• Ngkired el mesuub a ngera el blekerdelel a Jesus?

• A remechuodel te mekerang a lomekerreu er a delebechel?

• Ngkirel mo ua ngerang a omerellel a sechal el bedul a bechil?

[Aike el Ker er a Suobel]

[Siasing el ngar er a 16 el llel]

Moukerebai er a Jesus el ullecholt a omengull el bedul a rebebil